Kapitulo 17
“Nawalaan na Ampetang ya Aro ed Balang Sinansakey”
1, 2. (a) Anto so mabetbet a manasagyat ed saray balobalo diad saray pantitipon na saray Tasi nen Jehova? (b) Antoray arum a pamatnagan na sayan kalidad so naimano ra diad saray kumbension tayo?
SANEN saray totoo so inmunan dinmago ed saray pantitipon ed kongregasyon na saray Tasi nen Jehova sikara so mabetbet ya asagyat diad aro a nipanengneng ed sikara. Naimatonan da ed ampetang a panuulop tan diad panangabrasan nipanengneng ed sikara a personal.
2 Diad saray kumbension tayo naimano met na saray bisita a karaklan ed saramay onaatendi so mauk-uksoy a tuloy. Insulat na sakey a peryodista so nipaakar ed ontan a kumbension: ‘Anggaporay managdruga o managbuanges. Anggapo so kulyaotan tan eyagan. Anggapo so tulakan. Anggapo so desdesan. Anggapo so manpopootan tan manaayewan. Anggaporay marutak a lurey odino mauges a salita. Anggapo so dagem a napno na asewek. Anggapo so takewan. Anggapo so tupakan na saray lata. Peteg a nikadkaduma.’ Amin na saya so pamatnagan na aro, say nengneng ya ‘agmanugalin mabanday tan agto anapen iray dilin interes to.’—1 Corinto 13:4-8.
3. (a) Nasabi panaon, anto so nepeg a mapatnag no nipaakar ed panangipanengneng na aro? (b) Diad pangalig ed si Kristo, anton nengneng na aro so nakaukolan tayon bayuboan?
3 Say aro so sakey a kalidad a mananda ed kada puron Kristiano. (Juan 13:35) Legan a sikatayo so ombulaslas ed espiritual, satan so nepeg tayon ibalikas a lalon nagnap. Impikasi nen apostol Pablo a say aro na agagi to so “ondaak a lalon lalo.” (Filipos 1:9; 1 Tesalonica 3:12) Pinaseseg met nen Pedro iray kaparan Kristianos a mangabuloy ed aro ra a mangabrasa “ed interon panlilimog na agagi.” (1 Pedro 2:17) Say aro tayo so nepeg a manenyeg ed sikatayon manggawa na nagkalalo nen say basta iyatendi ed saray miting diad totoon pangibabanikelan tayo na samet a sagpot a mangamtan personal. Peteg ya isakup to so mas nen say pangibaga na “Hello” a panapanaon. Impanengneng nen apostol Juan a satan so nepeg a dilin-manangisakripisyo. Insulat to: “Diad saya et naamtaan tayo so aro, lapud [say Anak na Dios] so angisuko ed kamarerwa to a nisesengeg ed sikatayo; tan sikatayo so nepeg a mangisuko ed saray kamarerwa tayo nisesengeg ed saray agagi tayo.” (1 Juan 3:16; Juan 15:12, 13) Satan so agtayo ni agawaan. Balet kasin peteg ya italaga tayo so bilay tayo nisesengeg ed saray agagi tayo? Bueno, diad anton kalaknab so iyakar tayon ontulong ed sikara natan, anggan sano satan so nayarin aliwan kumbeniente?
4. (a) Diad anton arum a dalan so nayarin naromog tayon pakapangibalikasan na aro tayo a lalon nagnap? (b) Akin a makana so pakawalaan na ampetang ya aro ed balang sinansakey?
4 Dingan na saray gawa a mangisindag ed espiritu na dilin-panagsakripisyo, importante met so nawalaan na puron ampetang a liknaan ed agagi tayo. Sikatayo so papasesegen na Salita na Dios: “Diad arowan na sanaagi et nawalaan na matamoy a panangaro ed balang sinansakey.” (Roma 12:10) Ontan so liknaan tayon amin ed arum a totoo. Kasin sarag tayon isakup so arum ni ed grupo a pakaliknaan tayo na ontan a panliket? Legan a manasingger so anggaan na daan a sistema, makana ed sikatayo so lawas iyapit ed saray Kristianon agagi tayo. Sikatayo so liliingen na Biblia ed saya, a kuanto: “Say anggaan na amin a bengatla so inmasingger la. . . . Diad labas na amin a bengatla, nawalaan na ampetang ya aro ed balang sinansakey, lapud say aro et sakbongan to so dakel a kasalanan.”—1 Pedro 4:7, 8.
5. Akin a lingo so panilalo ya anggaporay probleman onlesa diad baetan na saray membro ed kongregasyon?
5 Siempre, legan a sikatayo so ag-ayadyari, walaray panaon sano makagawa itayo na bengatlan makapasakit. Sikara, met, ed nanduruman dalan so mankasalanan a sumpad sikatayo. (1 Juan 1:8) No naromog mo so inkasika ed ontan a kipapasen, anto so nepeg mon gawaen?
No Anto So Gawaen Sano Onlesa Iray Problema
6. (a) Akin a nayarin say simbawa na Biblia so aliwan naynay a mipakna ed saray inklinasyon tayo? (b) Balet anto so pansumpalan no satan so iyaplika tayo?
6 Say Kasulatan so mangitarya na nakakaukolan a panangiwanwan. Balet say isimbawa ra so nayarin ag-ontukoy ed saman so labay tayon gawaen bilang ag-ayadyarin totoo. (Roma 7:21-23) Anggaman kuan, say magunaet a pankimey ed satan so mangiter na ebidensya ed masimoon a pilalek tayo a mamaliket ed si Jehova, tan pabulaslasen to met so kalidad na aro tayo ed arum.
7. (a) No sikatayo so apasakitan na sakey, akin a sikatayo so ag-ombabales? (b) Akin ya agtayo labat basta paliisan so agin amasakit ed sikatayo?
7 No maminsan sano saray totoo so nasakitan et anapen da so dalan diad pakabales da ed amasakit. Balet ta satan so lalon mamauges labat ed kipapasen. No nakaukolan so panangibales, nepeg a satan so ipasakbat la ed Dios. (Uliran 24:29; Roma 12:17-21) Nayarin salien na arum ya agda lan balot labay a nanengneng so akapasakit ed sikara. Balet satan so agtayo nayarian a gawaen ed saray kaparan managdayew. Say pakaawat na panagdayew tayo so mandepende, diad kabiangan, ed panangaro tayo ed agagi tayo. (1 Juan 4:20) Kasin nibaga tayon simamatua ya inaro tayo so sakey diad agtayo pitongtong ed satan odino say mismon kiwawala to so mangonigon ed sikatayo? Nakaukolan tayon arapen so problema tan solbaren. Panon?
8, 9. (a) No walaan itayo na sengegan ed panreklamo a sumpad sakey ya agi, anto so suston bengatlan gawaen? (b) Balet anto no ulit-uliten to so mankasalanan ed sikatayo? (c) Akin a nepeg tayon imatonan so pamaakaran diad onian dalan, tan anto so ontulong ed sikatayon manggawa na ontan?
8 Diad sayan pamaakaran et insulat nen apostol Pablo: “Itultuloy yo so mantetepelan ed balang sinansakey tan manpeperdonaan so sinansakey a bulobulos no siopaman et walaan na sengegan na panreklamo a sumpad sananey. Unong a singa sibubulos ya impamerdona nen Jehova ed sikayo, ontan met so gawaen yo.” (Colosas 3:13) Kasin satan so nagawaan yo? Anto no say too so naulit-ulit a mankasalanan ed sikayo diad nanduruman dalan?
9 Si apostol Pedro so walaan na parehon tepet, tan insuhiri to ya angangko ta salien ton perdonaen so sakey ya agi ya anggad pitoran danay. Inmebat si Jesus: “Ikuan ko ed sika, aliwan, Anggad pitoran danay, noagta, Anggad pitumplo-tan-piton danay.” Balet akin? Impaliwawa nen Jesus ed sakey ya ilustrasyon ya angipabitar ed kabaleg na utang tayo ed Dios no ipareng ed anggan anton nayarin utang na too ed sikatayo. (Mateo 18:21-35) Diad nanduruman dalan et sikatayo so mankakasalanan a sumpad Dios a kada agew—no maminsan et diad sinisiblet a kiwas, mabetbet a diad ibaga odino iisipen tayo, ontan met ed isaew a manggawa ed nepeg tayon gawaen. Diad agtayo pikakabat nayarin agtayo anggan namoria ya arum ed saray bengatlan ginawa tayo so mauges, odino diad apuraan ed bilay et nayarin agtayo isipen a seryoso so pamaakaran. Sarag na Dios a kerewen so bilay tayo diad bayar ed kasalanan tayo. (Roma 6:23) Balet ta intultuloy ton impanengneng so panangasi ed sikatayo. (Salmo 103:10-14) Sirin, aliwan agmakatunongan, a nakakaukolan to ed sikatayo so pideneng met na ontan ed balang sinansakey. (Mateo 6:14, 15; Efeso 4:1-3) Sano satan so gawaen tayo, imbes a manirap na linawa, satan so pamatnagan ya adampot tayo la so nengneng na aro ya “agmamoot ed inkasakitan.”—1 Corinto 13:4, 5; 1 Pedro 3:8, 9.
10. Anto so nepeg tayon gawaen no say sakey ya agi so walaan na isusumpa ed sikatayo?
10 Nayarin walaray panaon sano namoria tayo ya, anggamano andian itayo na irap na linawa ed saray agagi tayo, et sikato so walaan na bengatlan sumpa ed sikatayo. Anto so nepeg tayon gawaen? Andi-abalan nepeg tayo so mitongtong ed sikato tan panggunaetan ya ipawil so mareen a relasyon. Sikatayo so papasesegen na Biblian onkiwas ya ununa. (Mateo 5:23, 24) Nayarin aliwan mainomay so panggawa ed satan. Nakakaukolan to so aro a tekep na kaumildian. Kasin saratan a kalidad so mabiskeg a tuloy ed sika ta pian nagawaan mo so isisimbawa na Biblia? Saya so importantin kalat a kimeyan.
11. No say sakey ya agi so manggawa na bengatlan mangonigon ed sikatayo, anto so nepeg a gawaen ed satan?
11 Diad biek a dapag, nayarin say sakey so manggagawa na bengatlan mangonigon ed sika—tan nayarin diad arum. Agta maabig ed sakey so pitongtong ed sikato? Angangko. No sika so personal a mangipaliwawa na problema ed sikato diad mapangasin paraan, saya so nayarin mangitarok na maabig iran resulta. Balet nepeg mon tepetan so inkasika ya ununa: ‘Kasin saray bengatlan ginawa to so peteg ya aliwan makasulatan? Odino say problema et malaknab a lapud say binalegan ko tan inkipasal ko so duma ed sikato?’ No ontan, manalwar ya agmangileletneg ed saray dilin estandartim tan insan mangukom unong ed saraya. (Santiago 4:11, 12) Si Jehova so andian na panangiduman mangaawat ed totoo a manlapud amin a nengneng na panagbilay tan maanos ed sikara legan a sikara so ombulaslas ed espiritual.
12. (a) No wala so sakey a kaso na graben gawan-mauges ed kongregasyon, siopa so mangasikaso ed satan? (b) Balet diad leksab na antoran sirkumstansya a satan so responsabilidad na nankasalananan ya onkiwas ya ununa? Tekep na anton getma?
12 Anggaman kuan, no wala ed kongregasyon so nalalanor ed gawan-mauges, nakaukolan na saya so tampol ya imano. Balet diad panamegley na siopa? Mabetbet a saray mamatatken. Anggaman kuan, no lalanoren to so pamaakaran na negosyo ed baetan na sanaagi, odino nayarin diad mauges ya impangusar ed dila ed nengneng a seryoson pinasakitan to so sakey, sirin say nankasalananan so nepeg ya ununan manggunaet ya ontulong ed nankasalanan diad personal a basiyan. Satan so nayarin singa mairap ed arum. Balet ta ontan so insimbawa nen Jesus ed Mateo 18:15-17. Say aro ed agi tan say magunaet a pilalek a sikato so pansiansiaen a bilang agi so ontulong ed sakey a manggawa na ontan diad nengneng a, no nayari, dampoten to so puso na nankasalanan.—Uliran 16:23.
13. No onlesa so sakey a problema ed baetan tayo tan diad sananey ya agi, anto so ontulong ed sikatayon manmorian manepeg ed pamaakaran?
13 No onlesa so sakey a problema, balanglan baleg o melag, natulongan itayo no pansesegan tayon talosan no panon so panmoria nen Jehova ed satan. Agto abobonan so anggan anton nengneng na kasalanan, ingen ta satan so nanengneng to ed sikatayon amin. Diad inggeter ton panaon saray agmanagbabawin managkasalanan so napagit ed malinis ya organisasyon to. Balet anto so nipaakar ed sikatayon amin? Amin tayo so puntirya na panangitepel tan panangasi to. Inletneg to so padron ya aligen tayo. Sano ontan so gawaen tayo, isisindag tayo so aro to.—Efeso 5:1, 2.
Anapen Iray Dalan na “Pamaawang”
14. (a) Akin a pinaseseg nen Pablo iray taga Corinto a “mamaawang”? (b) Panoy pangipanengneng na kasulatan a nisita dia a maong no amin tayo so mannonot nipaakar ed saya?
14 Inusar nen apostol Pablo so dakel a bulan diad impamabiskeg ed kongregasyon na Corinto, Gresya. Sikato so nankimey na impasya diad impanulong ed saray agagi tan inaro to ra. Balet arum ed sikara so kinmulang na panangaro ed sikato. Sikara so kritikon tuloy. Pinaseseg toran “mamaawang” diad pangibalikas na panangaro. (2 Corinto 6:11-13; 12:15) Maong no sikatayon amin so mangimano ed kalaknab na pangibalikas tayo na aro ed arum tan anapen iray dalan na “pamaawang.”—1 Juan 3:14; 1 Corinto 13:3.
15. Anto so nayarin ontulong ed sikatayon mamabulaslas ed aro a para ed anggan siopa a nayarin liknaen tayon aliwan personal a makapasagyat?
15 Kasin walaray arum ed kongregasyon a naromog tayon mairap a singgeran? No onla itayon manakbong ed anggan anton angkelag iran kakabusan ed biang da, unong ta sikara so labay tayon manggawa na ontan ed sikatayo, saya so ontulong a mamapetang na relasyon tayo. (Uliran 17:9; 19:11) Saray liknaan tayo ed sikara so napaaligwas met no anapen tayoray maabig a kalidad da tan iyapasakey ed saraya. Kasin peteg a naimano tayoray dalan a panguusaran nen Jehova ed sarayan agagi? Saya so peteg a managdag na aro tayo ed sikara ya ombaleg.—Lucas 6:32, 33, 36.
16. Diad petepeteg, panon so “pakapaawang” tayo diad pangipanengneng na aro ed saraman so wala ed kongregasyon tayo?
16 Akuen, walaray limitasyon a nagawaan tayo ed arum. Nayarin agtayo nayarian ya ibano so balang sakey diad kada miting. Nayarin agtayo nayarian ya isakup so amin sano imbitaan tayoray kakaaro ed sakey a panangan. Amin tayo so walaan na maapit a kalimog a pangusaran tayo na malaem a panaon nen say arum. Ingen sarag tayo kasin “paawangen”? Sarag tayo kasin usaren so anggan pigaran minutos a kada simba diad magmaong a pikabat ed sakey diad kongregasyon tayo ya aliwan maapit a kaaro tayo? Kasin pamipaminsan ya imbitaan tayo so sakey ed saraya a mikimey ed sikatayo diad lawak na ministeryo? No tuan walaan itayo na ampetang ya aro ed balang sinansakey, seguradon naromog tayoray dalan na pangipanengneng ed satan.
17. Sano wala ed limog na agagi ya agtayo niran balot nabet nensaman, anto so mangipanengneng no kasin walaan itayo na ampetang ya aro ed sikara met?
17 Saray Kristianon kumbension so mangiter na maabig iran pankanawnawa ed “pamaawang” na aro tayo. Nilibulibo so nayarin presente. Agtayo nayarian a pitongtongan iran amin. Balet nayarian tayon ikiwas so inkasikatayo ed dalan a mangipapanengneng ya iyuuna tayo so pankaabigan da nen say kumbeniente tayo, anggamano sikara so agtayo ni nabet nensaman. Tan nayarian tayon ipanengneng so personal ya interes ed baetan na saray sesyon diad ikiwas ya ununan mitongtong ed arum diad saraman so kakaabay tayo. Nasabi agew ya amin na saraman so manayam ed dalin so sanaagin lalaki tan bibii, mankakasakey diad panagdayew ed Dios tan Ama na amin. Agaylan gayaga so pakapikabat ed sikaran amin, a tekep na saray dakel tan nanduruman kalidad! Say ampetang ya aro ed sikara so managdag ed sikatayon malabay a manggawa na ontan. Akin ya agla igapo natan?
Repason Diskusyon
● Sano saray problema so onlesa ed baetan na agagin lalaki tan bibii, panon so nepeg a panresolbe ed saraya? Akin?
● Legan a sikatayo so ombulaslas ed espiritual, diad antoran dalan so nepeg met a bulaslasan na aro tayo?
● Panon a posibli so pangipanengneng na ampetang ya aro ed mas dakel nen say diad ulop na maapit a kakaaro?