Kapitulo 18
Nakaukolan Tayon Agamilen so Maridios a Debosyon ed Abung
1. (a) Kayari na impakaaral ed saray estandarte nen Jehova ed panangasawa, antoran pananguman so ginawa na dakel a totoo? (b) Balet anto ni so nalalanor diad Kristianon bilay na pamilya?
SAKEY ed saray makapaligsay-puson katuaan a naaralan tayo legan na akadkaunan impanaral tayo na Biblia et saraman so misiglaotan ed panangasawa tan bilay na pamilya. Binidbir tayo si Jehova a bilang manangigapo ed panangasawa tan anengneng tayo ed Biblia ya inter to so mismon sankaabigan a panangiwanwan ed saray pamilya. Bilang nansumpalan na satan a panangiwanwan, dakel a totoo so anaynan ed bilay na imoralidad ed sekso tan saray panamaley da so inrehistron manepeg. Balet wala so nagkalalo ni ed Kristianon bilay na pamilya nen say satan. Lalanoren to so awawey tayo no nipaakar ed inkapermanente na impankasakey na panangasawa, diad panumpal ed saray responsabilidad tayo ed pamilya, tan no panon so pideneng tayo ed arum a membro na pamilya.—Efeso 5:33–6:4.
2. (a) Kasin amin so mangiyaaplika ed abung diad saman so kabat to ed Biblia? (b) Panon so impangidanet nen Jesus tan si Pablo na kaimportantian na panggawa ed satan?
2 Minilmilyon a totoo so mikabat ed ibabaga na Biblia nipaakar ed sarayan pamaakaran. Balet no nipaarap ed saray problema ed dilin abung da, satan so agda iyaaplika. Kumusta itayo? Peteg ya anggapo ed sikatayo so malabay a magmaliw a singa saraman so kinondena nen Jesus lapud impaliis da so ganggan na Dios a mankakaukolan ed saray anak a mangigalang ed atateng da diad pangikatunongan a say kunwarin relihyoson debosyon so magenap la. (Mateo 15:4-9) Agtayo labay so magmaliw a totoon walaan na sakey a nengneng na maridios a debosyon balet ta onsaew a mangagamil ed satan “diad dilin sankaabungan da.” Imbes, labay tayon ipatnag so maridios a debosyon, a satan so “paraan na baleg a gungguna.”—1 Timoteo 5:4; 6:6; 2 Timoteo 3:5.
Panon Kabayag So Pantultuloy na Impanasawa?
3. (a) Anto so nagagawa ed dakel iran panamaley, balet anto so nepeg a determinasyon tayo? (b) Usaren so Biblia diad pangebat ed saray tepet a nilista ed tagey nipaakar ed inkapermanente na panangasawa.
3 Diad ompapalalon kabetbet, say bedber na panangasawa so mansusumpal a sankadelikadoan. Arum a sanaasawan manaamong ed loob na 20, 30 odino 40 taon so mandedesidi natan a mangigapo na “balon bilay” ed sananey. Ontan met ya aliwa lan nikadkaduma so pakadngel a saray walad kalangweran a sanaasawa so nansian kayari lambengat na pigaran bulan na impanasawa. Anggan anto so gagawaen na arum, bilang managdayew ed si Jehova nepeg a sikatayo so walaan na pilalek a mamaliket ed Dios. Anto so ibaga na Salita to nipaakaar ed saya?
Sano manasawa so sakey a laki tan sakey a bii, panon kabayag so nepeg ya ilaloan dan panamong? (Roma 7:2, 3; Marcos 10:6-9)
Anto lambengat so basiyan ed diborsyo a nabidbir ed arap na Dios? (Mateo 19:3-9; 5:31, 32)
Panon kabiskeg so liknaan nen Jehova nipaakar ed saray diborsyo ya ag-ingganggan na Salita to? (Malaquias 2:13-16)
Kasin itatandoro na Biblia so pansian a bilang paraan a panresolbe ed saray problema na panamaley? (1 Corinto 7:10-13)
4. Anggaman ed modernon nagagawa, akin ya arum a panangasawa so mansusungdo?
4 Akin a nansungdo so arum ya impanaasawa, bang saray arum—anggan diad limog na saray mangibabagan Kristianos—so nabubuyak? Say pangiguntang na pangasawa ya angga ed sikaran dua so matatken la so mabetbet a sakey a tombok a sengegan. Say pakaromog ed sakey a kaparehan walaan na parehon interes ed sakey tan nayarian na sakey a panongtongan ed saray pamaakaran a lukalukas so importante met. Balet say mas babaleg ya importante et say pagmaliw na sakey a toon mangaagamil na puron maridios a debosyon. No sakey a too so tuan mangaaro ed si Jehova tan nakumbinse a saray dalan to so duga, insan wala so maabig a basiyan diad pangimaton ed saray probleman onlesa. (Salmo 119:97, 104; Uliran 22:19) Say panangasawa na ontan a too so agleglemewen diad awawey a, no aliwan epektibo, et nayarian ton naynay so misian odino mandiborsyo. Agto anamoten iray kakabusan na asawa to a bilang baraan diad ipaliis to ed saray dilin responsabilidad to. Noag ingen, aralen ton arapen iray problema ed bilay tan anapen toray epektibon solusyon.
5. (a) Panon a say katooran ed si Jehova so nalalanor? (b) Anggan sano nasagmak so mabiskeg a kairapan, antoran gungguna so nayarin onsabi diad pamemben a malet ed saray estandarte nen Jehova?
5 Sikakabat itayon maong a getmaen nen Satanas a sano sagmaken tayo so personal a panirap et ipulisay tayo laray dalan nen Jehova tan ibaga a mas magmaong lan desidien tayo ed inkasikatayo no anto so maong tan no anto so mauges. Balet saray totoon matoor ed si Jehova so aliwan ontan. (Job 2:4, 5; Uliran 27:11) Maslak ed saray Tasi nen Jehova ya akasagmak na panamasegsegang a manlapud saray agmananisian kaasawan so ag-amultot ed saray sipanan na panamaley da. (Mateo 5:37) Arum, kayari na pigaran taon, so walaan ni na gayagan saray kaasawaan da so akiulop ed sikara diad panaglingkor ed si Jehova. (1 Corinto 7:16; 1 Pedro 3:1, 2) No nipaakar ed saray arum, a saray kaasawan da so agmangipapanengneng na pananguman odino saray kaasawan da so angikaindan ed sikara lapud mabiskeg a talindeg da ed pananisia—saraya met so mikabat a sikara so siyayaman ya abendisyonan diad impangitandoro ra ed saray estandarte nen Jehova. Diad anton dalan? Saray sirkumstansya ra so angibangat ed sikara ya onapit ed si Jehova. Naaralan dan isindag so maridios a kalidad ya anggan diad leksab na kairapan. Sikara so totoon saray bilay da so angiter na ebidensya ed pakayari na maridios a debosyon.—Salmo 55:22; Santiago 1:2-4; 2 Pedro 1:5, 6.
Gawaen na Balang Sakey So Biang To
6. Ta pian nawalaan na maaligwas a panamaley, anton oksuyan so nepeg a respetoen?
6 Siempre, mas nen panamong so nakaukolan ta pian nawalaan na tuan maaligwas a panangasawa. Say manunan nakaukolan et respeto ed biang na kada membro na pamilya ed areglo nen Jehova diad inkaulo. Saya so ontulong ed maabig ya oksuy tan liknaan na kaligenan ed abung.—1 Corinto 11:3; Tito 2:4, 5; Uliran 1:8, 9; 31:10, 28.
7. Panon so nepeg a kaagamil na inkaulo ed pamilya?
7 Panon so nepeg a kaagamil na satan ya inkaulo? Diad nengneng a mangisindag ed saray kalidad nen Jesu-Kristo. Si Jesus so mapekder diad impangitandoro ed saray dalan nen Jehova; inaro to so inkatunong tan ginula to so kaugsan. (Hebreos 1:8, 9) Inaro to met a maong so kongregasyon to, itataryaan to na nakaukolan a pananginwanwan tan panangasikaso. Sikato so aliwan makinon tan aliwan makonsidera, noag ingen, “mauyamo tan mapaabeba ed puso,” tan saramay onsilong ed inkaulo to so ‘makaromog na saray pakainawaan na kamarerwa ra.’ (Mateo 11:28, 29; Efeso 5:25-33) Sano say sakey ya asawan laki tan ama so mideneng ed sankaabungan to ed satan a nengneng, malinew ya isisilong to so inkasikato ed si Kristo, ya angiletneg na ayadyarin ehemplo na maridios a debosyon. Saray Kristianon kainaan so, siempre, nepeg a mangidalangirang na saratan a parehon kalidad diad pidedeneng da ed saray anak da.
8. (a) Diad arum iran pamilya, akin a nayarin ompatnag a saray Kristianon metodo so agmakagagamor na kinaliktan iran resulta? (b) Anto so nepeg tayon gawaen no nidunget itayo ed ontan a kipapasen?
8 Anggaman kuan, lapud atooan ya ag-inkayadyari, nayarin saray problema so onlesa. Say sakey a sukat na isanok diad panangidirihe na arum so nayarin mamapaligutgut la ed arum sakbay a wala ed pamilya so ginmapon mangiyaplika ed saray prinsipyo na Biblia. Say mauyamon kerew tan maaron nengneng so nayarin singa agmangiter na maabig a resulta. Kabat tayo a say Biblia et ibabaga to so pangekal ed “sanok tan pasnok tan ingalan tan mauges a panagsalita.” (Efeso 4:31) Balet no arum a totoo so singa agmakatalos ed antokaman, anto so nepeg a gawaen? Bueno, panon so inkiwas nen Jesus sanen manasagmak na kairapan? Agto inalig iraman so angigagaem tan nanayew. Noag ingen, impudir to la so inkasikato ed si Ama to, a nanmatalek ed sikato. (1 Pedro 2:22, 23) Ontan met, no saray makasubsubok a kipapasen so onlesa ed abung, iter tayo so ebidensya na maridios a debosyon no sikatayo so onarap ed si Jehova, a kerewen so tulong to diad pikakasi, imbes ya aligen tayoray dalan na mundo.—Uliran 3:5-7.
9. Imbes a mananap na lingo, antoran metodo so naaralan ya usaren na dakel iran Kristianon kaasawaan a lalaki?
9 Saray pananguman so agnaynay ya onsabin tampol, balet say simbawa na Biblia so peteg ya epektibo. Dakel iran kaasawaan a lalakin datin mareklamo ed kakulangan na kaasawaan da so akaromog a say aligwas so ginmapo sanen sikaran mismo so angapresyan lalon nagnap ed saray impideneng nen Kristo ed kongregasyon to. Saman a kongregasyon so agtinibukel na saray ayadyarin totoo. Ingen ta inaro nen Jesus so kongregasyon to, inletneg to so suston ehemplo ed satan, inter to ni ingen so bilay to nisesengeg ed sikato, tan inusar to so Kasulatan a bilang paraan na panulong ed sikato ya onaligwas ta pian amin so makapaliket ed sikato. (Efeso 5:25-27; 1 Pedro 2:21) Say ehemplo to so amaseseg ed dakel iran Kristianoan kaasawaan a lalaki a mankimey diad pangiter na maabig ya ehemplo tan pangiyopresi na maaron personal a tulong a mamaarap ed iyaligwas. Saray ontan a metodo so angiter na maabig a resulta nen say ampait a panag-anap-na-lingo odino say basta agla pitongtong.
10. (a) Diad antoran dalan a nayarin say asawan laki tan ama—anggan say sakey a mangibabagan Kristiano—so manggawa ed bilay a mairap ed arum diad abung to? (b) Anto so nayarin nagawaan diad pamaaligwas ed kipapasen?
10 Siempre, nayarin saray kakulangan na asawan-laki tan ama so amalesa na problema ed abung. Anto no sikato so aliwan sensitibo ed saray emosyonal a nakakaukolan na pamilya to odino sikato so agmangipapangulon peteg diad pangiyareglo na diskusyon na pamilya ed Biblia tan diad arum ya aktibidades? Arum iran sankaabungan so akanengneng na maabig iran resulta kayari na pranka, magalang ya impaningbat ed problema. (Uliran 15:22; 16:23; 31:26) Balet anggano saray resulta so ag-inilaloan ya amin, balang sakey so makayarin manggawa na makanakanan tulong diad maaligwas a kurang na pamilya diad personal a pamayubo ed saray bunga na espiritu tan diad pangipanengneng na maaron panangimano tan konsiderasyon ed membro na pamilya. Onsabi so aligwas, aliwan diad panalagar ed sananey a toon manggawa na bengatla, noagta diad panggawa tayon maong ed dilin biang, sirin ipapanengneng a sikatayo so personal a mangaagamil ed maridios a debosyon ed abung.—Colosas 3:18-20, 23, 24.
No Iner So Pakalaan na Ebat
11, 12. (a) Antoran probisyon so ginawa nen Jehova ya ontulong ed sikatayo diad saray problema ed bilay na pamilya? (b) Pian nagunggunaan a nagnap, anto so nirekomenda a gawaen tayo?
11 Walaray dakel a sengegan a pangaaagwatan na totoo na simbawa diad kurang na pamilya ra. Balet kabat tayo a say Salita na Dios so nankarga na sankaabigan a simbawa, tan sikatayo so misalsalamat a diad panamegley na nanengneng a muyongan to et tutulongan to itayon mangiyaplika ed satan. Kasin sika so nagnap a nagugunggunaan ed ontan a tulong?—Salmo 119:129, 130; Miqueas 4:2.
12 Niarum ed iyaatendi ed saray pantitipon ed kongregasyon, kasin wala so inggana yon maparanay a panagaral na Biblia ed pamilya? Saray pamilyan manggagawa a maparanay ed saya a kada simba so apankakasakey diad panagdayew da. Say bilay na pamilya ra so maalaligwas legan a sisingbaten da so panangiyaplika ed Salita na Dios diad saray dilin sirkumstansya ra.—Ipareng so Deuteronomio 11:18-21.
13. (a) No walaan itayo na tepetepet diad espesipikon pamaakaran ed panamaley odino pamilya, iner so mabetbet a pakaromogan tayo na nakaukolan a tulong? (b) Anto so nepeg a nisindag ed amin a gawaen tayon desisyon?
13 Angangko ta walaray tepet nipaakar ed saray espesipikon pamaakaraan na panamaley odino pamilya ya imanoen yo. Alimbawa, anto so nipaakar ed panagkontrol ed panag-anak? Kasin manepeg so panagpakapon ed saray Kristianos? Kasin napatunong so panagpaekal no ompatnag a say ugaw so nianak a walay depekto? Kasin wala so anggan anton limitasyon diad nengneng na relasyon ed sekso a manepeg ed baetan na asawan laki tan asawan bii? No say sakey a tobonbalo so mangipanengneng na samet ya interes ed espiritual a pamaakaran, diad anton kalaknab a nakaukolan ed sikato so pibiang a kaiba so pamilya diad panagdayew? Andi-duaruwan walaan ka na opinyon diad kada sakey ed saraya? Balet nayarian mo kasin ebatan diad letnegan na saray prinsipyo na Biblia? Kada sakey ed sarayan tepet so asalaysay la ed The Watchtower. Aralen ya usaren so indese diad pananap ed ontan a materyal. No andian ka na daan iran palapagan a tutukoyen na indese, sukimaten ed librarya na Kingdom Hall. Ag-iilaloan so On odino Andi ed kada tepet. No maminsan et sikayo so nepeg a mandesidi—sinansakey odino bilang sanasawa. Balet aralen so manggawa na desisyon a mangisindag na panangarom ed si Jehova tan diad membro na pamilyam. Manggawa ed saray desisyon a mangiter na ebidensya ed magunaet a pilalek mon mamaliket ed Dios. No gawaen mo so ontan, sikato so pamatnagan namparan diad si Jehova tan diad arum a mikabat ed sikan maong a sika so tuan mangaagamil na maridios a debosyon aliwa lambengat ed publiko noagta ontan met ed dilin abung mo.—Efeso 5:10; Roma 14:19.
Repason Diskusyon
● Panon a say katooran ed si Jehova so alanor diad inkamatoor ed sipanan na panangasawa na sakey?
● Sano nadedesdes ed saray problema ed pamilya, anto so ontulong ed sikatayon manggawa ed saman so makapaliket ed Dios?
● Anggano saray arum ed pamilya so onkulang, anto so nayarin mamaaligwas ed kipapasen?