Ligliwa a Manlapud Dios na Kareenan
“Mantultuloy a manliligliwaan so balang sinansakey ed sarayan salita.”—1 TESALONICA 4:18.
1. Antoran kerew so angipanengnengan nen Pablo na interes to ed kareenan?
SI Pablo, ya apostol, so manpirawat a tuloy a say Kristianon kongregasyon so manggayaga na kareenan. Sirin, 13 ed saray sulat to, a singa nipreserba ed sikatayo ed apuyanan a Kasulatan, so angilukas diad impangulit a saramay nansulatan so manggayaga komon na kareenan a manlapud Dios. Alimbawa, diad ugaw nin kongregasyon ed Tesalonica, insulat nen Pablo: “Komon ta wala ed sikayo so agkanepegan a panangasi tan kareenan.” Diad sampot na saman lamlamang a sulat, kinerew to: “Komon ta mismon Dios na kareenan so mamasantos ed sikayo a nagnap. Tan mabunigas ed amin a pamaakaran a say espiritu tan kamarerwa tan laman yo komon ya agagi so mansiansian andi-tilol diad kiwawala na Katawan tayon Jesu-Kristo.”—1 Tesalonica 1:1; 5:23.
2. (a) Anton nengneng na panangimano so impatnag nen Pablo ed kongregasyon? (b) Panon so nayarin panumbok na saray Kristianon mamatatken natan ed ehemplo nen Pablo?
2 Si Pablo tan saray kakaiba to so agnipuera ed ‘impanirap tan impansagpot’ ed limog na saraman so balon mananisia. Inkuan nen Pablo: “Sikami so nagmaliw a mauyamo ed pegley yo, a singa sano say sakey ya ina et taganoen toray dilin anak to. Sirin, unong a walaan na matamoy a panangaro ed sikayo, sikami so apaliket a tuloy a mangipanabang ed sikayo, aliwa lambengat a say maong a balita na Dios, noagta ontan met ed saray dilin kakamarerwa mi, lapud nagmaliw kayon inararo mi.” Agta natebek tayo ed saraman a salita so maapit a kapagaan, say puro, inyute-utel a panangaron alikna nen Pablo ed saman a kongregasyon? Peteg, sikato so sakey a padron na nengneng na aro ya ipatnag na saray Kristianon mamatatken ed ngalngalin 50,000 kongregasyon na saray Tasi nen Jehova ed sankadalinan natan.—1 Tesalonica 2:7-9; Juan 13:34, 35; 15:12-14.
3. (a) Panon a nayarian nen Timoteo a gunggunaan so kongregasyon ed Tesalonica? (b) Saya so misimbangan ed anto natan?
3 Say Managtukso, si Satanas, so angitarok na kairapan ed saraman a Kristianos ed Tesalonica. Kanian si Timoteo so imbaki nen Pablo ed sikara, ta pian ‘pabiskegen to ra tan ligliwaen to ra nisesengeg ed pananisia ra.’ Si Timoteo so pinmawil ed si Pablo ed Atenas a walaan na ampetang a report nipaakar ed katooran tan aro na agagi ra. Amin so aligliwa na baleg ed impakaamta diad pananisa tan katooran na sinansakey, tan sikara so nantultuloy a kinmerew ed Dios a panoan to so antokaman a kakulangan. (1 Tesalonica 3:1, 2, 5-7, 10) Saya, met, so mangisindag na teokratikon oksuyan natan, a saray managbiahen manangasikaso so mamapabiskeg ed saray kongregasyon, anggan diad pasen a panlilingkoran na saray Tasi nen Jehova a wala so panangisebel odino ampait a panamasegsegang.—Isaias 32:1, 2.
‘Diad Kiwawala To’
4, 5. (a) Anton kerew so ginawa dia nen Pablo, tan akin a satan so walaan na nikaduman interes ed sikatayo natan? (b) Akin a say agew tayo so nagkalautlan makabaliksan?
4 Impanampot nen apostol Pablo iyan parte na sulat to diad kerew: “Komon ta sikayo so padaaken na Katawan, on, parakelen to kayo, ed aro diad balang sinansakey tan ed amin, unong a singa sikami met ed sikayo; diad getman gawaen to komon iray kapusoan yo a mabiskeg, ya andi-pakatetelan ed kasantosan diad arap na Dios tan Ama diad kiwawala na Katawan tayon Jesus ed amin a sasantos to.”—1 Tesalonica 3:12, 13.
5 Si Pablo so onnenengneng dia ed arawin arapen, diad panaon na “kiwawala [nen Jesus] tan ed konklusyon na sistema na bengabengatla” sano “say Anak na too so onsabi ed gloria to, tan amin na saray angheles to so kaiba to.” Say mangatatawen ya Ari tayo so sinmabi nen 1914. Manlapud maglorian agnanengneng a trono to, si Jesus so manguukom la natan ed saray nasyones tan totoo na dalin, ya ibibiig toray mapaabeba, malakarneron totoo a para ed kililiktar diad “baleg a kairapan” tan para ed bilay ya andi-anggaan ed paraison dalin.—Mateo 24:3-21; 25:31-34, 41, 46.
Saray Bilin a para ed Pankaabiganan Tayo
6. Anton bilin nen Pablo so nepeg tayon imanoen natan?
6 Kasin sakey ka a manadampot ed satan a kalat ed andi-anggaan a bilay? No ontan, nepeg mon talinengen so insulat dia nen Pablo ed saray taga Tesalonica: “Kaunoran, agagi, kerewen mi ed sikayo tan bilinen mi kayo ed panamegley na Katawan a Jesus, unong a singa impangawat yo na bilin a nanlapud sikami ed no panon so nepeg yon panakar tan pamaliket ed Dios, unong a diad tua ed sikato so pankukurangan yo, pian itultuloy yon gawaen a lalon nagnap. Ta kabat yo iray ganggan ya inter mi ed sikayo ed panamegley na Katawan a Jesus.” (1 Tesalonica 4:1, 2) Anto so arum ed “saray bilin” ya indanet dia nen Pablo?
7. (a) Anton importantin ‘bilin’ so niiter dia? (b) Diad impakaawat ed espiritu na Dios, akin ya agtayon balot nepeg a lukakan so panagbantay tayo?
7 Say ununan ‘bilin’ so misiglaotan ed maabig iran moral. Mabitar ya imbaga nen Pablo: “Saya so linawa na Dios, say panamasantos ed sikayo, pian sikayo so onarawi ed pilalawan; pian balang sakey ed sikayo so nepeg a mangamta ed no panon so pangayarian to ed dili ton baseha na kapasantos tan galang, aliwan diad maagum a kagletan ed sekso a singa wala ed saratan a nasyones ya agmikabat ed Dios.” Makapaliket, “akabatan” tayo so Dios tan say Anak to, si Jesu-Kristo, tan manadampot ed bilay ya andi-anggaan. Agaylan makapabaing no abuloyan tayo ni so inkasikatayon nikutep lamet ed minumundon lunek na imoralidad! Makapaermen ya ibaga, arum ed saray akaliktar ed saray taon na kampo na panangipangawan tan prisowan, odino angusar na andukey a panaon ed maseseg a misioneron kimey, et inabuloyan da lambengat so Managtukso ed saginonor a manigpo ed sikaran ag-akabantay no nipaakar ed moral. Diad impakaawat ed masanton espiritu na Dios, komon ta agtayon balot “napaermen” ed panamegley na seksual a karutakan!—1 Tesalonica 4:3-8; Juan 17:3; 1 Corinto 10:12, 13; Efeso 4:30.
8, 9. (a) Anto so “arowan na sanaagi”? (b) Panon so nayarin pamayubo tayo ed ontan ya aro, tan tekep na anton pankaabigan?
8 Say ontumbok a ‘bilin’ nen Pablo so nipaakar ed phil·a·del·phiʹa, “arowan na sanaagi.” (1 Tesalonica 4:9, 10) Saya so nikaduman panangipatnag ed aprinsipyoan ya aro, a·gaʹpe ya ampetang ya irerekomenda nen Pablo dia ed bersikulo 9, tan ontan met ed kapitulo 3, bersikulo 6 tan 12. Say phil·a·del·phiʹa so sankamaapitan a panangaro, a singa mapatnag a linmesa ed baetan nen Jesus tan si Pedro, tan diad baetan nen David tan si Jonatan. (Juan 21:15-17; 1 Samuel 20:17; 2 Samuel 1:26) Nayarin niarum ed a·gaʹpe, diad panangipaalagey na maapit a panuulop, a singa anengneng, alimbawa, ed maapit a gayaga na panlilimog ya aromog na dakel ed saray Tasi nen Jehova ed ministeryo na panagpayunir tan diad arum niran teokratikon kimey.
9 Inkuan nen Pablo: “Itultuloy yon gawaen ed nanagnap a sukat.” Naynay a nayarian tayon palaknaben so arowan na sanaagi. Nagkalautlan sayan maabig a kalidad so manlippua sano saray mamatatken tan ministeryal ya ariripen so mangipangulo ed maseseg a kimey ed Panarian. Sano amin ed kongregasyon so mamapasya ed ‘panaanap ya ununa ed Panarian,’ a saray pambabalingaan nisesengeg ed atooan ya ag-inkayadyari, agpantatalosan na personalidad, tan saray miulibay a problema so nagmaliw a segundaryo. Iteen tayon naynay komon iray kamataan tayo ed kalat!—Mateo 6:20, 21, 33; 2 Corinto 4:18.
10. Panon so nayarin ‘pankurang tayon masimpit,’ bilang Kristianos?
10 Dia et insiglaot nen Pablo so sananey a ‘bilin’—a sikato so gawaen tayon gagala diad pambilay a mareen, ya asikasoen tayo so dilin kimey tayo, tan mankimey ed saray lima tayo. Legan a sikatayo sirin so ‘manakar a masimpit’ ed inagew-agew a panagbilay tayo, say panangipatnag ed aprinsipyoan ya aro tan say arowan na sanaagi, amin a nakaukolan tayo so niiter.—1 Tesalonica 4:11, 12; Juan 13:35; Roma 12:10-12.
Naligliwa ed Panamegley na Ilalo ed Kioli
11. (a) Akin ya impangiparungtal nen Pablo natan so kikioli? (b) Panon so nepeg a pangapekta na sayan simbawa nen Pablo ed sikatayo?
11 Ontumbok a tinukoy na apostol so engranden ilalo na kioli. Balet akin a sayan tema so imparungtal nen Pablo? Kinaliktan ton pabiskegen so agagi to a mansungdo ed saray panamasegsegang ya onsasabi ed dalan da. Sikara so wala ed kaatapan a makabalang na bilay da. Ompatnag a diad saman a panaon et arum ed sikara so naugip ed patey. Saray kapananisiaan so mankaukolan na ligliwa. (1 Tesalonica 2:14-20) Inisip a say “kiwawala” nen Kristo so asingger la, minorekdek da no anto so nagawa ed saraman so inatey la. Say insulat nen Pablo natan so mangiter na aliwa lambengat a ligliwa ed saraman so akabalang na Kristianon inararo ra noagta ontan met a kapasesegan a mansungdo ya anggad iterak na “agew” nen Jehova. Say simbawa nen Pablo so nepeg ya ontulong ed sikatayon amin a mangipanengneng na espiritual a kaligenan legan ya itultuloy tayon iyabawag so maong a balita, diad panalagar ed sigpot ya anggaan na sayan sistema na bengabengatla.—2 Tesalonica 1:6-10.
12. Anton peteg a ligliwa so nayarin onwala ed sikatayo sano ompatey so sakey ya inad-aro, tan manlapud anton sengegan?
12 Inkuan nen Pablo: “Agagi, agmi kayo labay ya agmikakabat nipaakar ed saraman so nanaugip ed patey; pian sikayo komon so agmanermen a singa saray arum met ya andian na ilalo.” (1 Tesalonica 4:13) Agaylan ligliwa tan kareenan na nonot so naromog diad ilalo ed kioli! Limaran taon ed saginonor, imparungtal nen Pablo so komaduan sulat to ed saray Kristianos ed Corinto diad impangikuan: “Komon ta nawalaan kayo na agkanepegan a panangasi tan kareenan a manlapud Dios ya Ama tayo tan say Katawan a Jesu-Kristo. Bendito so Dios tan Ama na Katawan tayon Jesu-Kristo, say Ama na matamoy iran panangasi tan Dios na amin a ligliwa, a manligliwa ed sikatayo diad amin a kairapan tayo, pian nayarian tayo komon a ligliwaen iraman so diad anggan anton nengneng na kairapan ed panamegley na ligliwan nanligliwaan na Dios ed sikatayo.”—2 Corinto 1:2-4.
13, 14. (a) Akin a kaliktan nen Pablo a saray Kristianos so napakabatan no nipaakar ed kabaliksan na patey? (b) Anto so ipapanengneng na Kasulatan a kipapasen na saray inaatey?
13 Sikatayo so aglabay na apostol ya agsikakabat no nipaakar ed kipapasen na saray inaatey. Sinmabi panaon, say baleg ya apostasya so tinmalindeg ed limog na saray mangibabagan Kristianos, sikara so pinmawil ed saray Binababilonia tan Griegon pilosopyas. Saray ontan ya apostasya so angawat ed saray Platonicon doktrina na ag-ipapatey na kamarerwa—a natan et manunan bangat ed interon sankamundoan ya imperyo na palson relihyon. Say misteryon kasnagan a nanliktub ed “kayari-bilay,” balanglan nibaga a diad tawen, purgatoryo, odino pasen na andi-anggaan a kapairap, so ag-angiter na tuan ligliwa. Nagkalalo ni, say ag-ipapatey so manumlang ed doktrina na kikioli, ta panon so kioli na sakey lamet ed bilay no say kamarerwa to so ag-ompatey?
14 Dia et insulat nen Pablo so “nipaakar ed saraman so nanaugip ed patey.” On, “nanaugip.” Say sakey a toon nanaugip so agmakaamta na antokaman tan agmakayarin manggawa na anggan anton kimey. (Ipareng so Eclesiastes 9:5, 10.) Wala so inkagawa legan na ministeryo nen Jesus sanen inkuanto a si Lazaro “linman nampainawa” tan sikato, si Jesus, so “mamangon ed sikato a manlapud saray inaatey.” Sanen saraman a salita so ag-atalosan na saray babangatan nen Kristo, “inkuan nen Jesus ed sikara a mabitar: ‘Si Lazaro so inatey.’” Saray agagi nen Lazaro a bibii, si Marta tan Maria, so aligliwa diad ilalo ed kioli, tan sikara so nagkalalon niligliwa nen Jesus. Balet agaylan say pananisia ra so apabiskeg sanen pinaoli nen Jesus so kaaro to, ya inatey la ed loob na apatiran agew, a manlapud ugip na patey!—Juan 11:11-14, 21-25, 43-45.
15. (a) Panon a say ilalo tayo ed kioli so apabiskeg? (b) Panon so nayarin pakatulongan tayon mangiligen na liknaan diad ipatey na sakey ya inad-aro?
15 Saman a milagro, a pati arum iran kimey nen Jesus diad panamaoli ed inaatey, tan matalona et say impamaoli nen Jehova ed si Jesus a mismo—amin na sarayan apamintuaan-a-maong ya inkagawa so mamabiskeg na talek tayo ed makapakelaw ya ilalo ed kioli. (Lucas 7:11-17; 8:49-56; 1 Corinto 15:3-8) Tua, say patey so mangitarok na ermen tan lua, tan mairap so kiligen na liknaan diad inkaandi na inad-aro. Balet agaylan ligliwa tan biskeg so nagamoran tayo diad panamaseguro a say Soberanon Katawan a Jehova “so peteg a mangakmon ed patey diad ando lan ando, tan . . . peteg a punasen toray lua ed amin a kalupaan da”! (Isaias 25:8; Apocalipsis 21:4) Sakey ed saray sankaabigan a tambal na kaermenan et say pansiansian okupado ed kimey na Dios na kareenan, ya inabang tayo ed arum so makapaligsay-puson ilalo ed Panarian a pisalsalamatan tayon naawat.—Ipareng so Gawa 20:35.
Oksuyan na Kikioli
16, 17. (a) Panon a “say unor a kabusol” so nitarok ed kaandi? (b) Anton oksuyan na kikioli so impaliwawa natan nen Pablo?
16 Say pananisia so mabiskeg a si Kristo, “say ununan-bunga” na kioli tan natan et nitrono ed nikawanan na Dios ed katawenan, so mangisumpal ed saray maglorian gagala nen Jehova ed Panarian. (Hebreos 6:17, 18; 10:12, 13) A singa imbaga nen Pablo ed sananey a sulat: “Sikato [si Jesu-Kristo] so nepeg a manuley bilang ari ya anggad amin a kakabusol so ipasen na Dios ed silong na sali to. Unong a say unor a kabusol, say patey so naandi.” Panon? Diad kabiangan ed panamegley na kioli tan diad kaekal na saray epekto na Adamicon patey. Say apostol so angipaliwawa ed satan ed onia: “Lapud say patey so diad panamegley na sakey a too, say kioli na inaatey so dia met ed panamegley na sakey a too. Ta unong a singa dia ed Adan et amin so ompapatey, ontan met ed si Kristo ya amin so nagawan manbilay. Balet balang sakey ed dilin oksuyan to: Si Kristo ya ununan-bunga, kayari to et saraman so kayarian nen Kristo legan na kiwawala to.” (1 Corinto 15:20-26) Sayan oksuyan na kioli so ontumbok a tinukoy nen Pablo diad ununan sulat to ed saray taga Tesalonica, a kuanto:
17 “No say pananisia tayo et si Kristo so inatey tan binmangon lamet, sirin, saraman so naugip ed patey diad panamegley nen Jesus so itarok na Dios a kaiba to. Ta saya so ibaga mi ed sikayo diad panamegley nen Jehova, a sikatayon manbibilay a makaliktar ed kiwawala na Katawan so agtayo unaan iraman so naugip ed patey; lapud say Katawan a mismo so onakseb a manlapud tawen a tekep na manangiganggan a tawag, a tekep na boses na arkanghel tan trumpeta na Dios, tan saraman so inaatey a mikasakey ed kinen Kristo so ombangon ya ununa.”—1 Tesalonica 4:14-16.
18. Kapigan so kioli na saray alanaan a “nanaugip ed patey”?
18 Kayari na 1914, legan na “kiwawala” nen Jesus ed pakayari na Panarian, sikato, bilang say arkanghel, so mangipaakseb na mangatatawen a ganggan a para ed saraman “so mikasakey ed kinen Kristo” a mantitipon. Diad kipapasen na ontan iran alanaan a “naugip ed patey,” sayan singa-trumpetan tawag so mankakaukolan na espiritual a kikioli ra ed katawenan. Say The Watchtower so abayaglan angipresenta na pantalos ed sayan kioli na alanaan iran Kristianos a manlapud patey a ginmapo nen taon 1918.
19. Kapigan tan panon so “kaala ed lurem” na saraman so nakekeraan, tan nipaakar ed anton gagala?
19 Anggaman kuan, kumusta so nakekeraan ya alanaan a Kristianos ed dalin, a natan et mandaiset ed grupo a kulang lan 10,000? Saraya, met, so nepeg a manumpal ed mangaraldalin a kurang-na-bilay da diad katooran. Anggamano singa sikato so wala ed sikara legan na kiwawala nen Kristo, insulat nen Pablo: “Kayari to et sikatayon mabilay a makaliktar so, a pati sikara, so naala ed lurem a miabet ed Katawan diad dagem; tan sirin sikatayon naynay so wala ed Katawan.” (1 Tesalonica 4:17; ipareng so Apocalipsis 1:10.) Sirin, diad pankurang na panaon, amin a 144,000 so napaoli a manserbin saserdote tan arari diad mangatatawen a Sion a kaiba ra so Kordero, si Jesu-Kristo. “Saya so ununan kioli.” (Apocalipsis 14:1, 4; 20:4, 5) Balet anto so manaalagar ed saray binilyon a katooan a wala natan ed saray lubok da?
20, 21. (a) Anto so manatalaran ed arapen a para ed saray binilyon a katooan ed saray lubok da? (b) Anton grupo so aglan balot mankaukolan ya ompatey ed patey, tan akin? (c) No saray sinansakey ed sayan grupo so ompatey, anton maliket ya ilalo so wala ed sikara?
20 Anggaman aliwan espesipikon sinalambit nen Pablo iraya diad inmunan sulat to ed saray taga Tesalonica, say Apocalipsis 20:12 so mangipaseguro ed sikatayo a “saray inaatey, say baleg tan say melag,” so napaolin ontalindeg ed arap na panangukom ed trono na Dios. (Nengnengen met so Juan 5:28, 29.) Anggaman kuan, natan et “sakey a baleg ya ulop” a manbilang na minilmilyon so natitipon la ed arap na satan a trono. Bilang sakey a grupo, saraya so niliktar a mabilay diad onsasabin “baleg a kairapan.” Sikara so impastol na Kordero tan impaarap to ra ed “saray subol na danum na bilay,” ta pian sikara so aglan balot ompatey ed dalin. Balet nisesengeg ed edad odino say ag-inilaloan iran nagawa, arum ed sikara so nayarin ompatey legan na “kiwawala” na Katawan. (Apocalipsis 7:9, 14, 17; Eclesiastes 9:11) Kumusta iraya?
21 Say magayagan ilalo ed masasakbay a kioli so wala ed arapen na amin na saratan ya “arum a karnero.” (Juan 10:16) Say pananisia ra tan kimkimey da, singa saraman so ginawa nen Abraham nensaman, so angitarok la ed sikara diad kipapasen na pikakaaro ed Dios. Singa saraman a lalaki tan bibii na pananisian adeskribe ed Hebreos kapitulo 11, sarayan modernon-agew ya “arum a karnero” so nansungdo ed saray subok. Makatunongan a sikara, met, so makaeksperiensia na “magmaong a kioli,” ya andi-duaruwan diad kayarin tuloy na Armagedon. (Hebreos 11:35; Santiago 2:23) Peteg, balang sakey a, diad pananisia, ‘angan ed laman nen Jesus tan inminum ed dala to’ so minabang ed kasumpalan na sipan to: “Sikato . . . so walaan na bilay ya andi-anggaan tan paolien ko ed unor ya agew.”—Juan 6:54; Roma 5:18, 21; 6:23.
22. Panon so nayarin panligliwa tayo ed balang sinansakey?
22 Kayari na impanalaysay ed maglorian ilalo na kioli, insimbawa nen Pablo: “Mantultuloy manliligliwaan so balang sinansakey ed sarayan salita.” (1 Tesalonica 4:18) Insan insalaysay ton malaknab iray makanan bengatla nipaakar “ed kiwawala na Katawan tayon Jesus.” (1 Tesalonica 5:23) Anto iraya? Nengnengen so artikulon “Kareenan a Manlapud Dios—Kapigan?”
Diad Panegek—
◻ Antoran kerew so ginawa nen Pablo a nisesengeg ed saray Kristianos?
◻ Antoran “bilin” so inter na apostol a para ed pankaabigan tayo?
◻ Panon so panligliwa na Salita na Dios ed sikatayo no nipaakar ed saray inaatey?
◻ Anton oksuyan na kikioli so dineskribe nen Pablo?