Kapitulo 16
Anto So Personal a Gawaen Mo?
1. Anton desisyon so nepeg a gawaen diad personal a letnegan?
1 Say desisyon a manserbi ed si Jehova so aliwan sakey a nagawaan na sananey a para ed sika. No say asawam so sakey a matoor ya aripen na Dios, satan so nayarin mabmablin bendisyon. Mipadpara, no saray atateng mo so mangaaro ed si Jehova, sika so wala ed mapalabon kipapasen. Saray ontan a sirkumstansya ed abung so mamawala na biskeg diad pilimog ed saraman so mandadayew ed si Jehova “diad espiritu tan katuaan.” (Juan 4:23, 24) Balet nasabi panaon a sika et nepeg mo so manggawa na personal a desisyon. Tua kasin inarom si Jehova tan labay mo so magmaliw a sakey ed saray ariripen to? Peteg kasin labay mo so manbilay ed sakey a mundon ontalona so inkatunong?
2. (a) Akin a say awawey na sakey ya ateng diad panaglingkor ed si Jehova so nagkalautlan importante? (b) Antoray limaran bengatla a nayarin gawaen na atateng a pangiter ed saray anak da na maabig a gapo?
2 No sakey kan ateng, seguradon labay moray anak mon manggayaga ed bendisyon a maandon bilay diad leksab na Panarian na Dios. Agmo nakontrol so gawaen da sano sikara la so ontatken a mangipakurang ed saray dilin bilay da. Balet say personal a gawaen mo nipaakar ed tuan panagdayew so makaagamil na mabiskeg ya impluensya—balanglan diad maabig odino diad mauges. No sika so onsener diad panserbi ed si Jehova, satan so mangisiblet ed saray ilalak mo na sankaabigan a pankanawnawa ran onggapo ed dalan a mamaarap ed maandon bilay. Odino no sika so manggawa na dedikasyon ed Dios tan insan mansumpal ya agka la manbilay a tukoy ed satan, saya so nayarin mangitonton ed espiritual a desyang ed interon pamilya, diad kabalang na amin a bengatla ed baleg a kairapan. Balet no sika so mangipanengneng na sakey ya ehemplo na katooran, no personal a tulongan moray anak mon manaral ed Salita na Dios, no bayuboan ed inkasika tan diad sikara so panangaro ed si Jehova tan respeto ed nanengneng a muyongan to, no sikara so tulongan mon manmoria no panon a sikara so nasalimbengan diad panggawa ed linawa na Dios, no ipanengneng mo ed sikara no panon so pakaromog na gayaga ed sagradon serbisyo, sirin iiter mo ed sikara so ekselentin gapo diad dalan a mamaarap ed bilay. Saya lambengat so posibli diad panamendisyon nen Jehova. (Ipareng so 2 Timoteo 1:5.) Itultuloy a satan so ipikasi. Nakaukolan so malaem a sagpot diad biang mo. Balet agaylan makagungguna so pansumpalan!
3. (a) No naabet mo so isusumpa a manlapud saray membro na pamilya, anto so nayarin gawaen? (b) Anto no mantultuloy so isusumpa?
3 Angangko ta say kipapasen a nipaarap ed sika et arum ed saray membro na pamilyam so andian na panangaro ed si Jehova. Kasin salien dan sika so dismayaen “diad pibiang”? Odino kasin wala so pirmin isusumpa? Anto so nagawaan mo ya ontulong ed sikaran minabang ed liket mo diad pakatalos ed gagala na Dios? Mabetbet a saray babeng so natalonaan diad pangimbita ed saray membro na pamilya a mila ed sika diad Kingdom Hall pian nanengneng da no anto so nagagawad’man. Legan a wadman, nayarin sikara so mitongtong ed sakey ed saray mamatatken pian nalinewan iray tepet da no nipaakar ed sisisiaen tan gagawaen na saray Tasi nen Jehova. Balet anto no say isusumpa so mantultuloy? Sirin, nakaukolan mon tepetan so inkasika: ‘Peteg kasin inarok si Jehova tan say Anak ton Jesu-Kristo tan siak so misalsalamat a tuloy diad amin a ginawa ra ed siak ta pian siak so mabulos a mangitepel ed arum a kairapan pian nipanengneng ko so panangarok tan pisasalamat ko? Kasin inarok so dilin pamilyak diad pangiletneg na maabig ya ehemplo, ta pian no nayari, et sikara met so natulongan a mamemben ed saray probisyon na Dios a para ed maandon bilay?’—Mateo 10:36-38; 1 Corinto 7:12, 13, 16.
Say Tanda a Nenengnengen na Nasyones
4. Panon so pakapangipanengneng tayon peteg ya inaro tayo si Jehova?
4 Say pankanawnawa so ninanatnat natan ed totoo ed amin a pasen diad pangipatnag na aro ra ed si Jehova ed panamegley na pangidadasig da na inkasikara ed Mesianicon Panarian to. Satan a gobierno so paraan diad kaalangon na ngaran nen Jehova. Say awawey tayo ed gobierno so mangiter na pamatnagan ed no panon so liknaan tayo nipaakar ed si Jehova mismo.
5. (a) Diad Isaias 11:10, anto so nipasakbay a para ed agew tayo? (b) Anto so kabaliksan na satan?
5 Pinuyanan nen Jehova si propeta Isaias a mangisulat: “Tan nagawa ed satan ya agew a wala so lamut nen Jesse ya ontalindeg a sakey a tanda ed saray totoo. Diad sikato so panusisaan na nasyones, tan say painawaan ton pasen so magloria.” (Isaias 11:10) Satan a “lamut nen Jesse” et say niglorian Katawan a Jesu-Kristo. Sanen inggapo ton agamilen so maarin autoridad, bilang sakey a manangiter-bilay a “lamut” et inter to so balon biskeg ed linya na Mesianicon arari a nanlapud si Jesse diad panamegley na ilalak ton si Arin David. (Apocalipsis 5:5; 22:16) Nanlapulad 1914 et sikato la so “akatalindeg a bilang sakey a tanda ed totoo,” a dudupagan na saray totoon mankaliktan ed matunong a gobierno. Si Jehova a mismo so amatalindeg ed sikato a bilang Tanda, say tuan Mesianicon Ari.—Isaias 11:12.
6. (a) Anto so akayari ed totoon mantitipon ed liber na mangatatawen ya Ari? (b) Bilang nansumpalan na ‘inengneng a mausisa’ ed “tanda,” anto so naaralan na totoo?
6 Balet panon a saray totoo ed dalin so makapantitipon ed liber na sakey a mangatatawen ya Ari? Nakaukolan da so kaikdan na impormasyon a manlapud Biblia ta pian sikato so nanengneng da diad mata na pakatalos. Diad leksab na panangiwanwan na masanton espiritu, say nakdaan na espiritual ya Israel so mabisbiskeg a manusumpal ed sayan kimey, iyaabawag da ed sankadalinan so maong na niletneglan Mesianicon Panarian na Dios. Saray sinansakey ed amin a nasyones so tinmalineng tekep na panangapresya. Sikara so nanusisa nipaakar ed madibinon nakakaukolan pian magmaliw ya uuleyan na Panarian, a panggayagaan so maandon bilay ed Paraison dalin. Napnek ed saray ebat na Biblia, sikara so kinmiwas a mitukoyan ed saraya tan tinmalindeg ira ed dapag na Mesianicon Panarian nen Jehova. Kasin satan so agawaan mo la?
‘Dengelen Da Balet Agda Gawaen’
7. Anton reaksion ed mensahe na Biblia so nipasakbay ed Ezequiel 33:30-33?
7 Lapud magunaet a kimey na saray Tasi nen Jehova, sikara so mabetbet a pantotongtongan na totoo. Balet panon so liknaan na sarayan totoo nipaakar ed mensahen iyaabawag na saray Tasi nen Jehova? Say reaksion na dakel et singa saman so impanengneng na saray kapara nen propeta Ezequiel a destiero ed Babilonia. Nipaakar ed sikara, inkuan nen Jehova: “No nipaakar ed sika, O anak na too, saray anak na totoom so mansalita ed balang sinansakey . . . a kuan da, ‘Gala, ipangasim, tan dengel mo no anto so salitan ompapaway a manlapud si Jehova.’ Tan sikara so ondago ed sika, a singa isasabi na totook, tan onyurong ed arap mo a bilang baley ko; tan sikara so peteg ya ondengel ed saray salitam balet saraya so agda gawaen, a diad saray sangi ra et ibabalikas da so kagletan a pilalek tan say puso ra so onla ed sinasaol a pananubo. Tan, nia! magmaliw ka ed sikara a singa sakey a kanta na makapaliket a panangaro, singa sakey a walaan na marakep a boses tan mantugtog na saray dinelesan. Tan peteg a dengelen da so salitam, balet anggapo so manggawa ed saratan. Tan sano ontua—nia! nagawan tua—sikara met so mikabat a sakey a propeta so wala ed pegley da.”—Ezequiel 33:30-33.
8. Panon so pangiter na arum a totoo na ebidensya ed satan ya awawey?
8 Walaray dakel a totoon mandidinayew ed saray Tasi nen Jehova tan labay da so literatura na Biblia ra. Nayarin mangawat nira ed opresi na libren panangiyaral na Biblia diad abung. Arum so ondago a kaiba daray kakaaro ra ed saray nikabiig a pantitipon na saray Tastasi. Diad tinaon a Memoryal na impatey nen Jesu-Kristo, alimbawa, say bilang na inmatendi so adobli ed bilang na saray aktibon tastasi nen Jehova. Diad arum a dalin, say inmatendi so atagey ni ya anggad maminliman danay diad bilang na saray Tasi. Balet anto so gawaen da nipaakar ed katuaan na Biblia a narerengel da? Anggad masulok a taloran milyon so personal ya angipapuso ed saraya tan angitarok ed bilay da a mitunosan ed saratan. Balet saray arum so mangipasen ed satan a singa lambengat marakep a musika, bengatlan manligliwa ed sikara. Sikara so mansiansia ed pireg, angangko ta mangibalikas na panamaseseg balet ta agmanggawa na dedikasyon na bilay da ed Dios tan agmibiang ed sagradon serbisyo.
9. Imbes a panduaruwa tan panalagar, anto so gawaen na saray makabat a totoo?
9 Anto so nagungguna diad panduaruwa tan panalagar? Seguradon aliwan say pabor tan pananalimbeng nen Jehova legan ya onsasabin agew na panangibales. Ta pian kaiba na saray niliktar, nepeg ya iter mo so makakumbinsin ebidensya natan a sika la so ‘akiulop ed si Jehova’ tan sika la so kayarian to.—Zacarias 2:11; Mateo 7:21.
Ginawa ra so Suston Desisyon
10, 11. (a) Siopa si Hobab, tan anton imbitasyon so ninatnat ed sikato? (b) Panoy pikabat tayo no anton desisyon so ginawa to?
10 Amin a nagmaliw a managdayew ed si Jehova bilang patumbok nen Jesu-Kristo so nanggawa na personal a desisyon diad panggawa ed satan. Saya so tua ed amin na saray mananawir ed mangatatawen a Panarian. Natan et nilukas ed arum so mablin pankanawnawa diad pampili ra, tekep na ilalo ed pakaliktar diad baleg a kairapan tan manbilay ed inkayadyari diad dalin. Si Hobab so angiletneg na makanan ehemplo ya aligen da.
11 Si Hobab so bayaw nen Moises. Sikato so aliwan Israelita noagta membro na tribu na Keneo a manaayam ed teritorya na Midian. Kayari na impangawat na Israel ed ganggan ed panamegley nen Moises tan angipaalagey na sagradon tabernakulo a para ed panagdayewan ed si Jehova, sinmabi panaon a sikara so ondere ed baybay a mamaarap ed Insipan a Dalin. Say lusek na lurem a mangirerepresenta ed kiwawala nen Jehova so wala ed unaan da, a mangipapanengneng ed dalanen da tan no iner so pankampamentoan da. Balet makatulong so pakawalaan da na sakey a mikabat ed dalan tan no iner so pananapan ed saray bengatlan nakaukolan diad pankampamento. Inimbitaan nen Moises si Hobab a miulop ed sikara, balet ta diad gapo et aglabay nen Hobab, ya inisip ton magmaong la so miayam ed saray kakanayon to ed pasen a nianakan to. Anggaman kuan, sikato so pinaseseg nen Moises a manisip tan mila ed sikara a “manserbin pinagkamata” na Israel tan sirin wala ed dasig na pinabang ed saray bendisyon ya ikalbo nen Jehova ed totoo to. Sikakabat a saman so ginawa nen Hobab, a singa nipanengneng ed Uko-ukom 1:16.—Numeros 10:29-32.
12. (a) Siopa natan so singa si Hobab, tan diad antoran dalan? (b) Anton imbitasyon natan so kapara na saman so imbitasyon nen Moises ed si Hobab?
12 Walaray totoo natan ya inretrato nen Hobab. Anggaman aliwa ran espiritual ya Israelitas, sikara so akiulop ed saraya legan a sikara so manbibiahen mamapaarap ed Balon Sistema na Dios. Diad panggawa ed saya, nepeg dan pultoten so pisisiglaotan da diad saray minumundon kakanayon da tan diad saray gobierno na too. Diad leksab na panangipangulo nen Babaleg a Moises, si Jesu-Kristo, sikara so malikeliket a manseserbin kaiba na nakdaan na saray “agagi” nen Kristo, mabetbet a mansiim ed saray balon teritorya diad panangipulong ed maong a balita. Dakel ed sikara so linma ed saray pasen a walaan na nagkalautlan baleg a pankaukolan ed saray manangiyabawag na Panarian, mabetbet a bilang payunir o misionero, ya usaren da so panaon da a nagnap diad pangiyabawag ed Panarian na Dios a bilang say alenleneg a peteg ya ilalo na katooan. Siansian dakel niray pankanawnawan pibiangan ed ontan a sagradon serbisyo. Saray kualipikadon totoo so naimbitaan a mangipalugar na inkasikara tan sirin minabang ed saray bendisyon a kaulop na ontan ya apalaknab a serbisyo. Nagawaan mo?
13. (a) Siopa si Jael, tan anto so talindeg na asawa to nipaakar ed saray ariripen nen Jehova? (b) Panon so inkidunget nen Jael ed sakey a subok?
13 Ngalngalin 180 taon kayari na impandesidi nen Hobab a miulop ed Israel, sakey ed saray kapolian to, sakey a lakin manngaran na Heber, so manaayam a kaiba to so asawa to, si Jael, aliwan arawi ed Megido. Insian nen Heber so inkasikato a manlapud saray Keneo tan sikato so linmoob ed mareen a relasyon ed si Jabin, sakey a Canaaneon ari a mapasang ya amairap ed Israel. Sanen pinatalindeg nen Jehova si Barak a bilang manangiliktar ed Israel, si Sisera a kapitan na armada nen Jabin, so anginlong ed armada to tan siamalasus iran karwahe na bakal a walaan na saray pinatarem a balatyang ed saray dalig. Balet si Jehova so akibakal a para ed totoo to, a ginutgut to so kampamento na kakabusol, tan saray karwahe ra so inkukutep na delap. Si Sisera a mismo so anaynan ed karwahe to tan binmatik ya amaarap ed tolda nen Jael ya asawa nen Heber. A singa inilaloan nen Sisera, sikato so inimbitaan nen Jael ed tolda.—Uko-ukom 4:4-17; 5:20, 21.
14. Anton desisyon so ginawa nen Jael, tan ed anton ebidensya so iter na saya?
14 Natan et agawa so subok. Anto so gawaen nen Jael ed sayan kabusol na totoo nen Jehova? Sinakbongan to si Sisera na ules, pinainum to na gatas tan inalagar ton akaugip. Diad saman et sikato so “angala na tasok na tolda tan inegnaan to so martilyo. Insan sikato so linmoob a masilsilib tan inmartilyo to so tasok ed alupising to tan intalos to ed dalin, legan a sikato so naugip tan naksawan. Sirin sikato so inatey.” Peteg a kinaukolan to so tepel tan panangaro ed si Jehova tan diad katooan to. Kinaukolan to met so positibon kiwas tan gunaet diad biang to.—Uko-ukom 4:18-22; 5:24-27, 31.
15. Panon a saray totoo natan so napapaneknekan a sikara so singa si Jael?
15 A singa tua ed arum ya aliwan-Israelitan managdayew ed si Jehova, ireretrato nen Jael so “arum a karnero” a manggagawa na maabig ed saray espiritual ya agagi nen Kristo. Anggaman anto so siglaotan da ed saray maapit a kakanayon da ed mundo tan diad saray manuley to, say “arum a karnero” so agmangabobon ed pamapairap na minumudon manuley ed saray totoo nen Jehova. Say katooran da et diad si Babaleg a Barak, say Katawan a Jesu-Kristo, tan diad saray tuan patumbok to. Saraya a wala ed Jael a klase so aliwan personal ya angitagey na lima ra a sumpad saray minumundon manuley, balet uusaren da so antokaman a wala ed sikara diad panumbra ed panamairap ed saray ariripen nen Jehova. Agda ikikibot so pangipaamta a sikara so sigpot a mitutukoyan ed saray gagala nen Jehova diad paneral ed amin a kakabusol to.
16, 17. (a) Anton ehemplo a makanan aligen tayo so nikurit ed Gawa kapitulo 8? (b) Kayari to et anto so nepeg tayon itultuloy a gawaen?
16 Agla manaabala. No sika so tuan walaan na pananisia ed si Jehova tan diad Mesianicon Panarian to tan intarok mo la so bilay mo a mitukoyan ed saray nakakaukolan na Biblia, sirin, andi-abala, mapublikon satan so ipatnag mo. Isindag so espiritu na Etiopen eunoko a nikurit ed Gawa kapitulo 8. Sanen atalosan to so nakakaukolan, intepet to ed si Felipe, ya angipaliwawa ed sikato na maong a balita nipaakar ed si Jesus: “Anto so manebel ed siak diad kabautismoan?” Tan tampol a sikato so nipalgep ed danum.
17 No agawaan la sirin so maabig a gapo, inagew-agew a pabiskegen mo so relasyon mo ed si Jehova, anapen a naynay iray dalan diad pangiyaplika ed Salita to a lalon nagnap, tan mibiang a nagnap diad makanan kimey na panangiyabawag ed Panarian legan na kaunoran iran agew na sayan sistema na bengabengatla.