Panangipreserba na Bilay diad Panaon na Eras
1. Anton makabat a kiwas so inala nen Jose legan na saray taon na daakan, tan diad anton resulta?
TAMPOL kayari na inkaturo to a bilang administrador na tagano, si Jose so nanliber ed dalin na Ehipto. Saray bengatla so inorganisa ton maong diad panaon a saray taon na daakan so ginmapo. Natan say dalin so amawala na bunga to ed agaylan karakel! Intultuloy nen Jose a tinipon iray tagano a manlapud uma diad liber na kada syudad, a sikara so insimpen to ed syudad. Intultuloy to so “nantipon na ilik ed agaylan karakel, a singa saray buer na dayat, ya anggad kaunoran et sikara la so tinmundan nambilang, lapud agla nabilang.”—Genesis 41:46-49.
2. Diad anton personal a sakripisyo so nanggawa ed saray totoon makayari a makagamor na sustento?
2 Saray pitoran taon na inkadaakan so anampot, tan say eras so ginmapo unong a singa impasakbay nen Jehova—sakey ya eras ya aliwa lambengat ed Ehipto, noagta “ed amin a tapew na dalin.” Sanen saray naerasan a totoo ed Ehipto so ginmapon akikasi ed si Paraon ya ikdan tora na tagano, imbaga nen Paraon ed sikara: “Onla kayo ed si Jose. Antokaman ya ibaga to ed sikayo, gawaen yo.” Si Jose so nanlako na ilik ed saray Ehipsios ya anggad saray kuarta ra so naupot. Insan saray ayep da so inawat to a pinagkabayar. Kaunoran, saray totoo so sinmingger ed si Jose, a kuan da: “Saliw mo kami tan say dalin mi a para ed tagano, tan sikami a pati say dalin mi so magmaliw ya ariripen nen Paraon.” Sirin sinaliw nen Jose so amin a dalin na saray Ehipsios a para ed si Paraon.—Genesis 41:53-57; 47:13-20.
Probisyon a para ed Espiritual a Panamakan
3. Anton ahensya so impasakbay nen Jesus diad panangitarya na tagano diad manepeg a panaon?
3 Unong a say ilik ya imbunog nen Jose et kabaliksan to so bilay ed saray Ehipsios, ontan met a say tuan espiritual a tagano so nakaukolan diad panustine ed saray Kristianos a magmaliw ya ariripen nen Jehova diad dedikasyon da ed Sikato diad panamegley na Babaleg ya Jose, si Jesu-Kristo. Legan na mangaraldalin a ministeryo to, impasakbay nen Jesus a saray alanaan a patumbok to so manakbat ed responsabilidad na panangiparungo ed sarayan probisyon. Intepet to: “Siopa a peteg so matoor tan makabat ya aripen a tinuro na katawan ton mangasikaso ed sankaabungan to, a mangiter ed sikara na tagano ra ed manepeg a panaon? Maliket itan ya aripen no sikato so nasabian na katawan to a manggagawa na ontan.”—Mateo 24:45, 46.
4. Panon a say probisyon a ginawa na “aripen” a klase natan so mipetekan ed saman so naorganisa ed agew nen Jose?
4 Say matoor a nakdaan na “makabat ya aripen” a klase natan so onla ed anggan anton natnat a Makasulatan pian imanoen a saray dedikadon tastasi nen Jehova, tan ontan met ed saray interesadon totoo ed mundo so makaawat na makaiter-bilay a taganon espiritual. Sayan nimatalek a kimey so binidbir a bilang sagradon kimey tan gagawaen a bilang sagradon serbisyo ed si Jehova. Nagkalalo ni, say “aripen” so angorganisa ed saray kongregasyon tan saraya so paparungoan da na literatura na Biblia ed ontan lan karakel a sikara so walaan na daakan a “bini” na Panarian a para ed kisibuag ed lapag diad nipabtang ya uma ra. Saya so mipetekan ed agew nen Jose, sanen tinipon to so totoo ed saray syudad tan inikdan tora na ilik ya aliwa lambengat ed sustento noagta ontan met ed itanem tekep na panmoria diad panani ed saginonor.—Genesis 47:21-25; Marcos 4:14, 20; Mateo 28:19, 20.
5. (a) Anton nikaduman imano so ipapanengneng na “aripen” ed kakaukolan na sankaabungan diad panaon na irap? (b) Panon a say “impanlippua” na taryan espiritual nen 1986 so nipara ed saray tagano ed panaon nen Jose?
5 Anggan sano say mapublikon kimey na panagpulong so nasebelan tan saray Tasi nen Jehova so napasegsegang, say ‘matoor ya aripen’ so manmoria ed sayan panangitarya na taganon espiritual a bilang sagradon nimatalek a kimey. (Gawa 5:29, 41, 42; 14:19-22) Sano ombasig so desyang, a singa saray bagyo, delap, tan yegyeg, say “aripen” so mangimano a niiter so nakakaukolan a tulong ed pisikal tan espiritual diad sankaabungan na Dios. Anggan saraman so wala ed kampo na panangipangawan so nasasabin maparanay ed saray niprintan salita. Saray ketegan na nasyon so agnaabuloyan a mamatunda ed agos na taganon espiritual ed saraman so mankaukolan. Say pangitultuloy a pangiter na suplay so mankaukolan na tepel, pananisia ed si Jehova, tan mabetbet ed malaknab a katudioan. Diad sankamundoan legan na 1986 lambengat, say “aripen” so amawala na manlippua a 43,958,303 a Biblia tan masekder-apis iran libro, tan ontan met 550,216,455 iran magasin—tuan “abalbaleg a karakel, a singa saray buer ed dayat.”
Panangibales, Pananusa, odino Panangasi?
6, 7. (a) Panon a say eras so nansumpal diad indakmomo na saray samploran sanaagi ed arap nen Jose? (b) Diad antoran dalan a si Jose natan so nasusubok?
6 Kabekta say eras so dinmampot ed dalin na Canaan. Si Jacob so angibaki ed saray samploran agagi nen Jose ed ama ed Ehipto pian manaliw na ilik. Balet agto impila si Benjamin, say alenleneg ya agi nen Jose a peteg, diad kapagaan, a singa inkuanto, ya “ompan nagawa so kaduksaan ed sikato.” Lapud si Jose so manlalako, saray agagi to so sinmingger ed sikato tan sikara so dinmakmomo ed sikato. Anggaman agda abidbir so agi ra, sikara so kabat nen Jose.—Genesis 42:1-7.
7 Natan et anonotan nen Jose iray akadkaunan kugip to nipaakar ed sikara. Balet anto so gawaen to? Kasin sikato so ombales? Diad panaon na baleg a pankaukolan da, kasin perdonaen to so impantrato ra ed sikato? Anto so nipaakar ed makapautot a kaermenan nen ama to? Kasin saya so nalingwanan? Panon natan so liknaan na saray agagi to nipaakar ed baleg a lingon ginawa ra? Si Jose, met, so nasusubok ed sayan pamaakaran. No kasin saray kiwas to so mitukoyan ed awawey na Babaleg a Jose, si Jesu-Kristo, so nipanengneng ed saginonor, a singa adeskribe ed 1 Pedro 2:22, 23: “Sikato so agnankasalanan, nisay aromog so kapalikdoan ed sangi to. Sanen sikato so inayew, sikato so agbinmales ya angayew. Sanen sikato so maniirap, sikato so ag-angigagaem, balet intultuloy ton inmatalek so inkasikato ed samay sakey a mangukom a situtunong.”
8. Diad panamegley na anto so kiwawanwanan nen Jose, ya iyilustra to so anto nipaakar ed si Jesus tan saray babangatan to?
8 Lapud nanengneng nen Jose so lima nen Jehova diad kurang na saray nagagawa, sikato so maalwar a manumpal ed saray ganggan tan prinsipyo na Dios. Diad parehon dalan, si Jesus so naynay a magunaet a ‘manggawa ed linawa na Ama to’ legan ya ipanabang to so bilay ya andi-anggaan ed ‘siopaman a mangagamil na pananisia ed sikato.’ (Juan 6:37-40) Bilang “embahador a kasandi nen Kristo,” saray alanaan a babangatan to met so manusumpal na sagradon pudir diad “pansalita ed totoo ed amin na saray balikas nipaakar ed sayan bilay.”—2 Corinto 5:20; Gawa 5:20.
9, 10. (a) Anton kurang so alaen natan nen Jose, tan akin? (b) Panon so impangipanengneng nen Jose na panangabagey a mipara ed saman so impanengneng nen Jesus?
9 Ag-imparungtal nen Jose so inkasikato ed saray agagi to a tampol. Noag ingen, sikato so nansalita ed sikaran sipapasang diad panamegley na sakey a managpatalos, a kuanto: “Sikayo so espiya!” Lapud sinalambit da so sakey ya agin kayugtanan, kinerew nen Jose a paneknekan da so inkamatua ra diad pangitarok da ed sayan sakey diad Ehipto. Naamingaw nen Jose so paneesaesan dan pagbabawi a sayan nansumpalan so nayarin bales ya impangilako ra ed sikato, si Jose, diad inkaaripen. Pinmaliis, si Jose so nannangis. Anggaman kuan, impabalor to si Simeon ya impisok ya anggad sikara so pinmawil a kaiba ra si Benjamin.—Genesis 42:9-24.
10 Si Jose so ag-ombabales ed mauges a ginawa ra ed sikato. Kinaliktan ton determinaen no kasin say panagbabawi ra so puro, a manlapud kaaralman na puso ra, ta pian sikara so napanengnengan na panangasi. (Malaquias 3:7; Santiago 4:8) Tekep na maabagey ya awawey, a kapara na samay impanengneng nen Jesus, si Jose so aglabat amano ed saray sako ra na ilik noagta impawil to met ed sikara so kuarta ra, diad sangab na kada sako na sakey. Niarum ni, sikara so inikdan to na balon diad pambiahe ra.—Genesis 42:25-35; ipareng so Mateo 11:28-30.
11. (a) Kabekta, anto so apilit a gawaen nen Jacob, tan akin a sikato so inmabobon ed kaunoran? (b) Panon met so pangipaseguro ed sikatayo na Roma 8:32 tan 1 Juan 4:10 diad panangaro na Dios?
11 Kabekta, naupot da la so taganon sinaliw da ed Ehipto. Kinerew nen Jacob ed saray siamiran ilalak ton lalaki ya ompawil tan manaliw ni. Diad akauna, sikato so akikasin agmamapila ed si Benjamin, a kuanto: “Say anako so agmila ed sikayon lalaki, lapud say agi to so inatey tan sikato lambengat so atilak. No nagawa ed sikato so kaduksaan ed dalan a laen yo, sirin peteg ya ilasor yoray ubanan a buek ko diad kaermenan ed Sheol.” Anggaman kuan, kayari na ontan lan impanangguyor tan opresi nen Juda a sikato so personal a responsabli ed si Benjamin, si Jacob so masuyat ya inmabobon a mamapila ed ugaw.—Genesis 42:36-43:14.
12, 13. (a) Panon ya impaakseb nen Jose so sakey a subok diad pangipatnag na awawey ed puso na saray agagi to? (b) Panon a say nansumpalan so angiter ed si Jose na letnegan diad pangipanengneng na panangasi?
12 Sanen anengneng nen Jose a si Benjamin so akila ed saray sanaagi, sikara so inimbitaan to ed abung to, a diman et sikato so angitarya na panangan. Diad si Benjamin et inter to so betang a limaran danay ed karakel nen say betang na kada sakey ed arum. Insan ginawa nen Jose so unor a subok ed saray agagi to. Lamet, impawil to so amin a kuarta ra ed kada sako na sakey, balet say dilin nikadkaduman kopa to so inkarga ed sangab na sako nen Benjamin. Kayari na impikal da, imbaki nen Jose so inkargado na abung to a mangakusa ed sikara na panagtakew tan usisaen iray sako nisesengeg ed kopa to. Sanen aromog ed sako nen Benjamin, binisangbisang na sanaagi so kawes da. Sikara so pinapawil ya onarap ed si Jose. Si Juda so akikaskasi, ya inyopresi to so inkasikaton magmaliw ya aripen diad pasen nen Benjamin ta pian say ugaw so makapawil komon ed ama to.—Genesis 43:15-44:34.
13 Kumbinsido la natan ed impanguman na puso na agagi to, agla nakontrol nen Jose so emosyon to. Kayari na impangiganggan ton amin so ompaway, inkuan nen Jose: “Siak si Jose ya agi yo, ya inlako yo ed Ehipto. Balet natan agkayo nanaingongotan tan agkayo onsasanok ed inkasikayo lapud siak so inlako yo; lapud diad panangipreserba na bilay et siak so imbaki na Dios ya akauna nen sikayo . . . ta pian mangipasen na nakdaan ed sikayon totoo ed dalin tan pian mansiansia kayon manbilay diad baleg a pakaliktar.” Insan inkuanto ed saray agagi to: “Onla kayo a tampol ed si amak, tan ibaga yo ed sikato, ‘ . . . Mila kayo ed sikami. Agmanabala. Tan sikayo so nepeg a manayam ed dalin na Goshen, tan . . . diman et iter ko so tagano, ta wala ni so limaran taon na eras; ta ompan sikayo tan say sankaabungan yo tan amin a bengatlan wala ed sikayo so mansumpal ed inkaid-irap.’”—Genesis 45:4-15.
14. Anton magayagan balita so nipasabi ed si Jacob?
14 Sanen nadngelan nen Paraon so balita nipaakar ed saray agagi nen Jose, imbaga to ed si Jose a saray karwahe ed dalin na Ehipto so usaren a mangawit ed si ama to tan ed amin a pamilya to ed Ehipto lapud say sankaabigan ed dalin so kayarian da. Diad impakadngel ed amin na saman ya agawa, si Jacob so apabiskeg ed espiritu tan inkelyaw to: “Magenap la! Si Jose ya anako so mabilay ni! A, onlaak tan nengnengen ko sakbay a siak so ompatey!”—Genesis 45:16-28.
Daakan So Taganon Espiritual
15. Diad siopa so singgeran tayo natan a para ed espiritual a sustento, tan panon so nayarin kapaseguroan tayo na inkadaakan?
15 Anto so kabaliksan na sayan amin ed sikatayo natan? Lawas manonot ed espiritual a nakakaukolan tayo, sikatayo so onnengneng ed samay Sakey a mas lalon babaleg nen say mapangasin Paraon ed panaon nen Jose. Sikato so Soberanon Katawan a Jehova, a mangitatarya na sustento tan panangiwanwan ed sarayan ambilunget ya agew na sakey a mundon naerasan ed katuaan na Biblia. Imbanikel tayo so inkasikatayo ed saray intereses na Panarian to, ya itatarok tayoray kakaplo ed kamalir to, a singa panangibaga. Agaylan mapalangkap a nilukasan to ed sikatayo “so dorongawen na katawenan,” ya ikakalbo to so sakey a bendisyon “ya anggad anggapo la so pankulangan”!—Malaquias 3:10.
16. (a) Iner lambengat so pakaromogan na manangipreserbay-bilay a “tagano” natan? (b) Panon a say panagtanem na “ilik” a nisesengeg ed nanaerasan a katooan so nilaknab?
16 Diad nikawanan nen Jehova et say Administrador na Tagano to, natan say nitronon Ari, say niglorian Jesus. (Gawa 2:34-36) Unong a saray totoo so nakaukolan a mangilako ed inkasikara a bilang ariripen pian mantultuloy a manbilay, ontan met ya amin natan a malabay a mantultuloy a manbilay so nepeg ya onasingger ed si Jesus, magmaliw a patumbok ton dedikado ed Dios. (Lucas 9:23, 24) Unong ya indirihe nen Jacob iray ilalak ton onla ed si Jose a para ed tagano, ontan met ya iwawanwan nen Jehova iray managbabawin totoo diad inad-aro ton Anak si Jesu-Kristo. (Juan 6:44, 48-51) Titiponen nen Jesus iray patumbok to ed saray singa-syudad a kongregasyon—masulok a 52,000 a mabiskeg ed interon mundo natan—a ditan et sikara so napapakan na dakel a taganon espiritual tan nanaikdan na manlippuan “ilik,” a bilang “bini” diad pantanem ed uma. (Genesis 47:23, 24; Mateo 13:4-9, 18-23) Sarayan tastasi nen Jehova so mabulbulos a komikimey! Lalon ondarakel ed sikara so manbuboluntaryo ed sigpot-panaon a serbisyo ed panagpayunir, ya anggad karakel na 595,896 ed sikara so mibibiang, a bilang pantok, ed sayan apribilehyoan a kimey diad sakey a bulan nen katantaon. Satan so manpopromedio na masulok a 11 a payunir ed kada kongregasyon!
17. Anton arum a mapropetikon awaran so walaan na piparaan diad impikasakey na saray samploran sanaagi ed si Jose?
17 Makatantanda ya amin na saray samploran agagi nen Jose ed ama, a natan et nagbabawi ed saray datin awawey tan kiwas, a nikasakey ed sikato diad Ehipto, a pati say Sodoma, so mangititipo ed mundo a nipasakan nen Jesus. (Apocalipsis 11:8) Saya so mangipanonot ed sikatayo ed Zacarias 8:20-23, a mamantok ed sakey a salaysay na “samploran lalaki” a mangibabaga, “Mila kami ed sikayon totoo,” salanti, diad saray alanaan a totoo nen Jehova, a diad sikara et wala so nakdaan a siansia nin manseserbi dia ed dalin.
18. Say nikaduman pabor a nipanengneng ed si Benjamin so mipara ed anto diad modernon panaon?
18 Anggaman kuan, anto so nipaakar ed samay sakey ya agin-peteg nen Jose, si Benjamin, a say mairap ya inkianak to et anigway na bilay na inad-aron asawa nen Jacob a si Raquel? Si Benjamin so nikadkaduman pinaboran nen Jose, ya andi-duaruwan akalikna na inkamaapit ed sayan anak na dilin ina to. Saya so nayarin makasengeg na impangawat nen Benjamin na limaran karakel a betang sanen amin na saray 12 sanaagi so inmunan apankakasakey diad panangan ed abung nen Jose. Agta sankaabigan ya iretrato nen Benjamin so nakdaan na alanaan a Tastasi natan, karaklan to et saraman so mabilay ni a natitipon ed dapag na Katawan nanlapulad 1919? Sayan “Benjamin” a klase so peteg ya akaawat na nikaduman betang a nanlapud si Jehova, a bilang say ‘espiritu [to] so mantasi ed espiritu ra.’ (Roma 8:16) Saraya, met, so asubok no nipaakar ed katooran da legan a say “karnero” na Katawan so nanlingkor ed sikara.—Mateo 25:34-40.
19. Anton kapetekan so naimano diad baetan na inyalis na sankaabungan na Israel ed Goshen tan say katitipon na totoo na Dios natan?
19 Makapainteres a, sanen inuksoy nen Paraon so kiyalis nen Jacob tan say sankaabungan to ed Ehipto, amin a lalakin “kakamarerwa” a nanayam diman so manbilang na 70, sakey a karakel na 7 tan 10. (Genesis 46:26, 27) Sarayan duaran bilang so nausar a makabaliksan ed interon Kasulatan, “7” so mabetbet ya ipapatnag to so mangatatawen tan say “10” so mangaraldalin ya inkakumpleto. (Apocalipsis 1:4, 12, 16; 2:10; 17:12) Saya so mipetekan ed kipapasen natan, sano nayarin nailaloan tayo a tiponen nen Jehova ed “dalin” to, so espiritual a paraiso a panggagayagaan tayo la natan, so kada unor a sakey ed pamilya na Tastasi to. (Ipareng so Efeso 1:10.) “Kabat nen Jehova iraman so kayarian to,” tan anggan natan et sikara so ililigen to ed “sankaabigan diad dalin,” a singa say Goshen ya inuleyan nen Paraon.—Genesis 47:5, 6; 2 Timoteo 2:19.
20. Anggaman ed espiritual ya eras natan, akin a sikatayo so nepeg a manliket?
20 Diad agew nen Jose, saray taon na eras so tinmumbok ed saray taon na daakan. Natan, sikara so mankukurang a bansag. Miduma ed espiritual ya eras ed dalin ya anggapo ed pabor nen Jehova, wala so daakan a taganon espiritual diad pasen na panagdayewan ed si Jehova. (Isaias 25:6-9; Apocalipsis 7:16, 17) On, anggaman wala so eras diad pandengel ed saray salita nen Jehova ed Kakristianoan, a singa impasakbay nen Amos, say salita nen Jehova so ompaway a manlapud mangatatawen a Jerusalem. Agaylan satan so manggawa ed sikatayon maliket!—Amos 8:11; Isaias 2:2, 3; 65:17, 18.
21. (a) Anton baleg a pribilehyo so panggagayagaan tayo natan? (b) Diad anto so nepeg tayon pisalsalamatan, tan panon so nayarin pangibalikas tayo na pisasalamat?
21 Natan, diad leksab na panangiwanwan na Babaleg ya Jose, si Jesu-Kristo, sikatayo so walaan na baleg a pribilehyon natipon ed singa-syudad iran kongregasyon. Ditan et nayarian tayo so manpiestaan ed daakan a mayaman iran taganon espiritual tan ontan met a mantanem na bini na katuaan tan ilaknab so maong a balita a say taganon espiritual so akatarya. Saya so gawaen tayo diad pankaabigan na amin a mangawat ed saray termino tan probisyon a simamaaron inyuksoy na Soberanon Manuley, si Jehova. Agaylan sikatayo so misalsalamat ed Dios tayo nipaakar ed langkap ed Anak to, say Babaleg a Jose, a manseserbi a bilang makabat ya Administrador na taganon espiritual! Sikato lambengat so angipabtangan nen Jehova ya onkiwas a bilang Manangipreserba na bilay ed sayan panaon na eras ed espiritual. Komon ta balang sakey ed sikatayo so mangipanengneng na gunaet diad pangisaklang na sagradon serbisyo diad pananumbok ed ehemplo to tan diad leksab na panangipangulo to!
Kasin Nanengneng Yo so Pamparaan?
◻ Panon a si Jose so mipara ed si Jesus a bilang Administrador na Tagano?
◻ Anto ed drama nen Jose so nipara ed pagmaliw ya ariripen na Dios ed panamegley na dedikasyon?
◻ Anton kalidad so impanengneng nen Jose tan si Jesus a bilang ehemplo tayo natan?
◻ A singa ed panaon nen Jose, anton nagnap ya oksuyan ed kibubunog na tagano so wala natan?
◻ Anto so idagdag ed sikatayon gawaen na panalaysay ed sayan drama?
[Litrato ed pahina 21]
Say modernon-agew a Benjamin a klase so nikaduman pinaboran nen Kristo, a mangaawat na daakan a “tagano ed manepeg a panaon”
[Litrato ed pahina 19]
Diad sakey a mundon abalkot na eras ed espiritual, say Babaleg a Jose so mangitatarya na daakan ed amin ya onasingger ed sikato diad pananisia
Unong a saray samploran sanaagi so angipanengneng na katutulok ed si Jose, sakey a baleg ya ulop natan so mamibidbir ed si Kristo
Singa saray 70 kakamarerwa ed sankaabungan nen Jacob, say kumpleton bilang na “karnero” nen Jehova so makarateng ed maong a “dalin”—say espiritual a paraison panggagayagaan tayo la natan