Kapitulo 22

Agla Pampipirawatan So Binenegan!

1. (a) Antoran bendisyon so manatalaran diad asingger ya arapen ed saray matoor ya ariripen na Dios? (b) Ingen, anto so ginawa na arum a totoo?

¹ Say kasumpalan na propesiya na Biblia so andi-lingon mangipanengneng a sikatayo natan so wala ed mismon puerta na maglorian sistema na bengabengatla na Dios. Agla mabayag et say marelmeng a mundo so naandi, tan ontan met ed pinawala ton ot-ot na puso, say gonigon tan ermen. Say dalin so mansumpal ed Paraiso a saray managdayew ed tuan Dios so makayarin manggayaga ed ayadyarin atooan a bilay ed ando lan ando. Nipaakar ed inkaseguro na saray sipan to nipaakar ed sarayan bengatla, imbaga nen Jehova ed si apostol Juan: “Isulat mo, lapud sarayan salita so matoor tan matua.” (Apocalipsis 21:1-5) Ingen, anggaman singa makapakelaw, arum a totoon mikabat ed sarayan katuaan so ompawil ed dalan na bilay na mundo ya ibabaga na Dios a deralen to. Agaylan makapaermen! Akin a gawaen da so ontan?

2. (a) Pian napaliisan so ontan a pansumpalan, anto so nepeg a gawaen na sakey a too kayari na pakaaral to ed katuaan? (b) No onsaew a manggawa ed saya, anto so nayarin mandomina ed kanonotan to, tan diad anton pansumpalan?

² Sanen inmunan nadngelan da so maong a balita nipaakar ed Panarian na Dios tan say gawaen to, sikara so malikeliket ya angabrasa ed satan. Balet importante met so itundas ed Kristianon inkatatken, a paaralemen so pakatalos ed Salita na Dios tan anapen iray dalan na pangiyaplika ed satan a nagnap diad dilin bilay na sakey. (Hebreos 6:1, 11, 12) No say kakulangan na apresasyon so manggawa ed siopaman a mamaulian diad panggawa ed saya, sikato so agmantultuloy a mangipasen a mabli so pribilehyo na panserbi ed Dios. Say ontan a too so nayarin magmaliw ya agmakankaanos ed saray pisikal a bendisyon ya insipan, bangta onsaew a mangapresya ed pankaukolan to ed espiritual ya ibubulaslas tan say kaimportantian na pibibiang a nagnap no nayari diad kimey na panagpulong tan panaggaway-babangatan ya inter na Dios ed sikatayo a gawaen natan. Saray makapnek a pilalek ed materyal a kayarian tan ed samay ompatnag a panliketan so nayarin onggapon mangala na mas malaem a panaon to. Saray espiritual ya intereses so ipasen ton segunda. Aliwan tamtampol, noagta daiset-daiset, sikato so naguyor ed mundo.​—1 Timoteo 6:9, 10.

3. (a) Akin a mapeligro so pamili bilang kakaaro ed saray totoon agmandadayew ed si Jehova? (b) Kapigan a nayarin mainomay a naromog na sakey a too so inkasikato ed malukak a pililimog ed ontan a totoo?

³ Nayarin ibaga na sakey a too a labay to so makaliktar ya onloob ed “balon dalin,” a manbilay ed sakey a mundon panayaman na inkatunong. Balet kasin say pampili to na kalimog so mamabiskeg ed ibabaga to? Siempre, kada agew et wala so agnapaliisan a piaarap ed saray totoon agmanlilingkor ed si Jehova​—diad trabaho, diad eskuelaan, sano mansaliw, anggan diad abung. Balet legan na saray painawa ed trabaho, sakbay tan kayari na paneskuela, sano mantelepono odino ondalaw ed kakaaro, legan na saray panaon na panligliwaan, siopan ulop so pipilien to? Kasin peteg a satan so makabaliksan? Ipapasakbay na Biblia: “Agnapalikdo. Say mauges a pililimog et deralen to so maabig ya ugali.” (1 Corinto 15:33) Balet anto so “mauges a pililimog”? Kasin manggawa na anggan anton piduma ya arum a totoo so agmandadayew ed si Jehova, a basta gagawaen da so ompatnag a maptek ed dilin mata ra? Diad letnegan na naaralan tayo la, kabat tayo a saray totoon ontan so agmakaliktar ya onloob ed “balon dalin.” Siopaman a manleglemew ed saray estandarte nen Jehova sano manpili ed kakaaro so agmanbayag et naromog da so inkasikaran pinmawil la ed mundon aminsan ya inisip dan binenegan da. Balet saray pasakbay ya ehemplon nikurit ed Kasulatan so manalimbeng ed sikatayo a sumpad ontan a kurang no sikara so ipapuso tayo.​—1 Corinto 10:11.

“Nisulat ya Onkanan Pasakbay ed Sikatayo”

4. (a) Anton nengneng na bilay so wala ed Israel diad Ehipto kayari na impatey nen Jose? (b) Akin a say “baleg ya alaoklaok ya ulop” so akiulop ed Israel sanen sikara so niliktar ed Ehipto? (c) Panon so inkasumpal na satan a mapropetikon drama ed agew tayo?

⁴ Sanen inliktar nen Jehova so Israel a nanlapud inkaaripen ed Ehipto, agaylan saman so impakainawa ed sikara! Say maruksan panamairap ya asagmak da kayari na impatey nen Jose so nanggawa ed Ehipton singa ampetang a palbaan a nibantakan da. (Exodo 1:13, 14; Deuteronomio 4:20) Balet kabekta et indapo nen Jehova so samploran bakbak, odino salot, ed Ehipto. Say piduma ed baetan na tuan Dios tan saray dirios na Ehipto so nagmaliw a mapatnag. Sirin, sanen tinaynanan na Israel so dalin, “sakey a baleg ya alaoklaok ya ulop” na aliwan-Israelitas so akiulop ed sikara, a singa met natan et say “baleg ya ulop” so sinmian ed mundo tan akiulop ed nakdaan na espiritual ya Israel. (Exodo 12:38) Balet anto so agawa ed kampo agnambayag kayari na Exodo?

5. (a) Kayarin tuloy na inkiliktar da, panon a sikara so ‘pinmawil ed Ehipto’? (b) Akin a saman so agawa?

⁵ Say Kristianon babangatan ya Esteban so angipaliwawa: “Diad saray kapusoan da et sikara so pinmawil ed Ehipto.” Saya lambengat so pigaran bulan kayari na inkiliktar da. (Gawa 7:39, 40) Anto so angiter na ebidensya ed satan? Sikara so nanggawa na binalitokan a baka​—say nengneng na bengatlan naugalian da ed Ehipto​—tan inyabawag dan sikara so “manpipiesta ed si Jehova.” Balet sikara so mangaalig ed saray Ehipsios. (Exodo 32:1-6) Si Jehova so sinmanok a tuloy ed sikara. Say ugali ra so direktan misumlangan ed Ganggan a niiter ed Palandey Sinai. Nilibu-libo so akabalang na bilay da. Akin a saman so agawa? Anggamano kabat daray ganggan nen Jehova, mapatnag a sikara so ag-amabiskeg na panamabli ed puso ed saraya tan nisesengeg ed katuaan a say tuan Dios so peteg a mangitotonton ed sikara.

6. (a) Antoran probisyon so ginawa nen Jehova ed sikara diad kalawakan? (1 Corinto 10:3, 4) (b) Akin ya arum so ginmapon nampirawat ed saman so wala ed sikara diad Ehipto?

⁶ Sanen tinaynanan da so Ehipto, namparan say Israel tan say “alaoklaok ya ulop” ya akiulop ed sikara so mikabat a saman so maptek a bengatlan gawaen. Balet kayari na sakey taon et sikara so agni akasabi ed Insipan a Dalin; andian ni na saray kaabungan ed “dalin a panag-agusan na gatas tan dilo.” Sikaran amin so walaan na daakan a kanen ed pisikal, tan nagkalautla a wala so inkadaakan ed espiritual. Say lusek na lurem tan apuy so angiter na pirmin ebidensya a si Jehova so mangitotonton ed sikara. Diad Abalangan Dayat tan diad Palandey Sinai et anengneng daray makapakelaw ya ebidensya na pakayari nen Jehova. Say Ganggan a sipanan so angiter ed sikara na espiritual a kapesel tan pakarepreskoan. Intarya to met ed sikara so dakel a gawaen dan personal, ya ipapanengneng to ed sikara a nakaukolan dan iyarunsa so ugali ra, panagnonot da, motibo ra, ta pian saraya so makapaliket ed si Jehova. Balet imbes a pablien da so amin a gagawaen nen Jehova ed sikara, ginapoan dan kaliktanen iray pisikal a bengatlan wala ed sikara diad Ehipto. Sinisiblet a pankaliktan so angipaarap ed dakel diad kadederal.​—Numeros 11:4-6, 31-34.

7. (a) Sanen saray espiya so sinmempet ed balita ra, akin a saray totoo so nansalita na ipawil ed Ehipto? (b) Anto so nansumpalan? (Hebreos 3:17, 19)

⁷ Agnambayag kayari na saya, si Moises so angibaki na lalakin mansiim ed Insipan a Dalin. Sanen sikara so pinmawil amin da so akipaknan saman so peteg a “panag-agusan na gatas tan dilo.” Balet samplora ed saray espiya so tinmakot ed saray totoon manaayam diman tan sikara so tinalagnaw na saray binakoran a syudad. Ag-ira nanmatalek ed si Jehova ed amin a puso ra tan nilanor da so puso na arum ya onggiwgiw ed takot. Aminsan lamet a saray kaisipan da so pinmawil ed Ehipto, tan nantotongtongan da so ipawil diman. Nisengeg ed kakulangan na pananisia, saman ya interon kapolian na 20 taon ya edad tan matatatken so diad kaunoran et inatey ed kalawakan, ya agbalot akaloob ed Insipan a Dalin.​—Numeros 13:27-33; 14:1-14, 29.

8. (a) Pian si Lot tan say pamilya to so makaliktar diad kaderal na Sodoma, anto so nakaukolan dan gawaen? (b) Akin a say asawa nen Lot so nagmaliw a lusek na asin? (c) Anton pasakbay a mensahe so kinarga na satan a para ed sikatayo?

⁸ Diad masulok ya 400 taon ed asasakbay, saman a parehon leksion so nipabitar ed miduman letnegan. Si Lot a kaanakan nen Abraham so nanayam ed Sodoma, marutak ed moral balet ta asenson syudad ed materyal. Mauges a tuloy so imoralidad ed Sodoma tan say luyag to a ginetma nen Jehova a deralen, ya aglan balot nipaalagey lamet. Saray angheles so nibakin mangiliktar ed si Lot tan say sankaabungan to. Sanen pinasakbayan nen Lot iray mamanugangen ton lalaki, diad mata ra et “sikato so singa sakey a toon manlulurey.” Balet ta saman so aliwan lurey. Diad palbangon et saray angheles so nampaganat ed si Lot tan say pamilya ton ompaway ed syudad tan imbaga ra ed sikara ya ontaynan iran ag-onlilingaw. Say bilay da so mandepende ed katutulok. Si Lot tan saray duaran mamarikit to so angunor ed samay imbaga ed sikara tan niliktar ira. Balet ta say asawa nen Lot so mapatnag a masugnar a mangibeneg ed saray materyal a bengatlan ataynanan. Diad inlingaw et abalang to so bilay to, nagmaliw a lusek na asin. Kasin ipapapuso tayon personal so kabaliksan na saman? Ta pian agtayo nasaew so punto, satan so insakup nen Jesus ed sakey a pasakbay no nipaakar ed inkamaganat na itaynan ed daan a sistema diad agew tayo. Saman so sanen mamapasakbay a sumpad pagmaliw ya alablabas a mapaga ed materyal a kaykayarian ya imbaga to: “Nonoten so asawa nen Lot.” (Genesis 19:12-26; Lucas 17:31, 32) Anto so manalimbeng ed sikatayo a sumpad saray patipatit ya angigalpong ed saray Israelitas tan diad asawa nen Lot?

“Idampot ed Magmaong a Pasen”

9. Anto so pananisia, tan panon so pakabayubo tayo ed satan?

⁹ Pian agnaimpluensyaan ya onlingaw ed benegan, nakaukolan tayon bayuboan so pamadaak ed pananisia diad saman so wala ed arapen. Uukeran na Hebreos 11:1 so pananisia a bilang “say nipaseguron panilalo ed saray bengatlan inilaloan, say mapatnag a kiparungtal na kapetegan anggaman agni anengneng.” Sikato so sakey a paseguro odino garantiya, singa sakey a titulo, a nasabin nakayarian tayo so insipan na Dios. Say pananisia so niletneg ed mabiskeg ya ebidensya, tan bilang resulta et walaan tayo na mabiskeg a rason diad panisia ed saman so agnanengneng na pisikal a mata. Sikato so aliwan kredulidad, odino inkamaparaan a manisia lapu lambengat ed bengatlan singa maabig. Pian nawalaan na peteg a pananisia, nepeg a sikatayo so sinononot a tuloy diad pagmaliw a mikabisadon personal ed ebidensya a letnegan na satan. Nakaukolan tayo met ya imanoen a maalwar no panon a say nanaaralan tayo so misiglaotan ed saray dilin bilay tayo tan bayuboan so puron impapuson panangapresya ed satan.

10. (a) Panon nen Abraham ya inter so ebidensya na pananisia to, tan diad panon kabayag? (b) Panoy pikabat tayo a say ginawa to so susto?

¹⁰ Si Abraham so walaan na ontan a pananisia. Bilang nansumpalan, diad panangiwanwan nen Jehova et si Abraham so anaynan ed maasenson syudad na Ur ed Caldea tan inmalis ed arawin Canaan, sakey a dalin ya agto nin balot anengneng nensaman. Diman et sikato so nanayam a bilang sankaili, ya agto insiglaot so inkasikato a para ed kaligenan ed anggan anton syudad-panarian. “Aalagden to so syudad a walaan na saray peteg a letnegan [Mesianicon Panarian nen Jehova], say managpaalgey tan managgawa ed satan a syudad et say Dios.” No intultuloy ton kinaliktan so bilay ed Caldea, andi-duaruan sikato komon so pinmawil. Imbes, sikato so “manadampot ed magmaong a pasen, salanti, sakey a kayarian na tawen.” (Hebreos 11:8-16) Aliwan diad pigaran taon lambengat, odino anggan samplora odino duamplon taon, ya adampot nen Abraham so ontan a “magmaong a pasen.” Intultuloy ton ginawa so ontan ya anggad impatey to, 100 taon odino onsulok ni kayari na intaynan to ed Ur. Agto lambengat imbaga a sikato so walaan na pananisia; satan so impanengneng to diad panamegley na saray gawa to. Bilang nansumpalan et nipaseguro so tumang to. Ontan lan inkaseguro so ilalo na kioli ed sikato a, singa imbaga nen Jesus, ‘diad Dios, si Abraham so mabilay.’​—Lucas 20:37, 38; Santiago 2:18.

11. Panon nen Isaac tan si Jacob ya impanengneng a sikara, met, so walaan na pananisia?

¹¹ Balet kumusta si Isaac ya ilalak nen Abraham, tan si Jacob ya ilalak nen Isaac? Agdan balot atawayan so dalan na bilay na saray Caldeo. Balet ta saya so agda impasen a bilang rason na pananap da no anto so itsura to. Sanen naaralan da ed atateng da so nipaakar ed sipasipan nen Jehova et saraya so impapuso ra. Binayuboan da so pananisia a singa si Abraham. Sikara, met, so “manadampot ed magmaong a pasen.” Sikara so ag-imbaing na Dios.​—Hebreos 11:9, 16, 20, 21; Genesis 26:24, 25; 28:20-22.

12. Anto so angitonton ed si Esau tan si Dina diad seryoson kaguloan?

¹² Diad biek a dapag, si Esau ya agi nen Jacob so ag-angapresya ed saray espiritual a bengatla. Sikato so angasawa na bibiin agmandadayew ed si Jehova. Imbes a pablien toray sagradon bengatla, inlako to so kanepegan to ed inkapanguloan diad sakey a panangan. (Genesis 25:29-34; 26:34, 35; Hebreos 12:14-17) Sikato so sakey a toon nankaliktan na pisikal a kagletan natan. Si Dina, a marikit nen Jacob, so nipanget met ed seryoson gonigon. Akin? Lapud kinaliktan to so milimog ed saray paganon “bibii na dalin.”​—Genesis 34:1, 2.

13. (a) Anto a peteg so bilay ed saray totoon kabiangan na mundo natan? (b) Anto so manalimbeng ed sikatayo a sumpad katangguyor ya ompawil ed satan?

¹³ No, singa si Abraham, Isaac tan Jacob, sika so peteg a “manadampot ed magmaong a pasen,” a para ed bilay diad silong na Mesianicon Panarian nen Jehova, agmo aabuloyan so inkasikan natangguyor ed mundo. Nonoten, say mundo so agmangiyoopresi na magnayon ya arapen. “Balet saman so manggawa ed linawa na Dios so mansiansia lawas.” Tan agaylan mayaman a makapkapnek a bilay itan!​—1 Juan 2:17.