Kapitulo 23
“Nakaukolan Yo So Panagsungdo”
1. (a) Akin a saray Tasi nen Jehova so tuan maliket a totoo? (b) Balet anton simbawa ed Hebreos 10:36 so onaplika ed sikatayon amin?
1 Saramay manmamatalek ed si Jehova so sankapetegan a totoon maliket ed dalin natan. Amta ra no iner so pakaromogan na sankaabigan a simbawa ed no panon so panalona ed saray problema ed bilay—diad dilin Salita na Dios. Sikara so ag-antakot legan na inengneng da ed arapen, lapud kabat da so gagala na Dios nipaakar ed dalin. (Jeremias 17:7, 8; Salmo 46:1, 2) Anggaman kuan, nansulat si apostol Pablo ed saray kapara ton Kristianos: “Nakaukolan yo so panagsungdo, ta pian, kayari na pakagawa yo ed linawa na Dios, et nayarin awaten yo so kasumpalan na sipan.” (Hebreos 10:36) Anto ta so makasengeg ed pankaukolan na panagsungdo?
2. Akin a saray babangatan nen Jesus so mankaukolan na panagsungdo?
2 Sakbay na dilin impatey to, pinasakbayan nen Jesus iray apostoles to ed no anto so nagawa ed arapen, a kuanto: “No sikayo so kabiangan na mundo, say mundo so manliket ed saray kayarian to. Natan lapud sikayo so aliwan kabiangan na mundo, noagta pinili takayo ed mundo, nisengeg ed saya et sikayo so gulaen na mundo. Nonoten so salitan imbagak ed sikayo, Say aripen so aliwan babaleg nen say katawan to. No pinasegsegang da ak, pasegsegangen da kayo met; no sinumpal da so salitak, sumpalen da met so salita yo. Balet amin na sarayan bengatla so gawaen da a sumpad sikayo a nisesengeg ed ngaran ko, lapud agda kabat iman so angibaki ed siak.” (Juan 15:19-21) Agaylan tua itan!
3. (a) Panon a ‘nisesengeg ed ngaran nen Jesus’ et saray babangatan to so napasegsegang? (b) Diad anton pantalos a saray managpasegsegang so “agmikabat” ed samay Sakey ya angibaki ed si Jesus? (c) Siopa so manunan responsabli ed panamasegsegang?
3 Saray patumbok nen Jesus so puntirya na pambusol lapud sikara so manbibilay ed utel na sakey a mundon mangipupulisay ed samay peteg ya irerepresenta na Inkakristiano. Say Kristo et kabaliksan to so “Alanaan a Sakey.” Si Jesu-Kristo so sakey a nilanaan nen Jehova a magmaliw ya Ari, a manuley ed interon dalin. Sirin sanen imbaga nen Jesus a saray babangatan to so napasegsegang ‘nisesengeg ed ngaran to,’ labay ton ibaga a say kapasegsegang so lapud panutumbok da ed sikato a bilang Mesianicon Ari nen Jehova, lapud katutulok da ed si Kristo a manuna nen say anggan dinan a mangaraldalin a manuley, lapud katooran dan ontutulok ed Panarian to tan ag-ira mibabali ed saray kurang na atooan a gobierno. Inyarum nen Jesus a say isusumpa so lapud saray managpasegsegang “so agmikabat ed saman so angibaki ed siak”—salanti, agda labay a bidbiren si Jehova a Dios a bilang Soberano na Talba. (Ipareng so Exodo 5:2.) Siopa so manunan manangisugsog ed sayan panamasegsegang? Si Satanas a Diablo.—Apocalipsis 2:10.
4. (a) Panon a say kasumpalan na Apocalipsis 12:17 so mangapekta ed saray bilay tayo? (b) Anto so puntirya nen Satanas?
4 Nagkalautla nanlapulad inkapagit nen Satanas ed tawen diad samay kayari na inkianak na Mesianicon Panarian nen Jehova nen 1914, a say panamairap ed saray tuan Kristianos so binmiskeg. Saya so agleglemewen. Wala so sigpot a pibabakal ed biang na Diablo tan saray dedemonyos to a sumpad amin ya ondadapag ed Panarian na Dios diad lima nen Jesu-Kristo. Nipaakar ed saya, ibabaga na Apocalipsis 12:17: “Tan say dragon [Satanas a Diablo] so sinmanok ed bii [mangatatawen a pinagkaasawan muyongan na Dios], tan binakal to so nakekeraan ed bini [say alanaan-na-espiritun patumbok nen Kristo ed dalin] to, a manusumpal ed ganggan na Dios tan mantatasi ed si Jesus.” Say “arum a karnero,” met, so nipanget ed utel na labanan. Diad panamegley na masilib iran paraan, pambabanikelan nen Satanas a sagyaten o puersaen iran ontunda a mangunor ed ganggan na Dios. Labay toran onkapuy tan insan sigpot a deralen to so espiritualidad da. Say getma to et say pamatunda to ed panangiyabawag ed si Jesus a bilang Mesianicon Ari nen Jehova. Balet diad sayan espiritual a pibabakal et saray matoor ya ariripen na Dios so manbiktorya.
Panon so Nepeg ya Ikiwas na Saray Kristianos?
5. Antoran kiwas so ginawa na gobierno a sumpad saray Tasi nen Jehova?
5 Dakel ya opisyales na gobierno so mamidbir a saray Tasi nen Jehova so maunor-ed-ganggan a totoo tan aagamilen da so maabig ya impluensya ed komunidad. Anggaman kuan, amin a gobierno na too so kabiangan na minumundon sistema na bengabengatla nen Satanas. (1 Juan 5:19; Apocalipsis 13:2) Sirin agpankelawan ya arum a gobierno so mangisebel ed pantitipon na saraman so mandadayew ed tuan Dios, a sebelan daray literatura na Biblia ra, ya iyagel da so panangipulong da nipaakar ed Panarian na Dios, on, a sikara ni ingen so ipriso tan pasakitan ed pisikal. No sikayo so personal ya onsabi ed ontan ya irap, anto so gawaen yo?
6. (a) Anton awawey so nepeg ya onwala ed sikatayo diad saray opisyales na gobierno? (b) Balet anto so mapekder a desisyon tayon gawaen? (c) Anggaman napasegsegang, panon so pakapantultuloy tayon maliket?
6 Saray apostoles nen Jesu-Kristo so magalang ed saray opisyales na gobierno. Sano napasegsegang, sikara so ag-ombales. Balet sanen niganggan ya ontundan manggawa ed imbilin na Dios, mapekder ya inmebat ira: “Nepeg min tuloken so Dios a bilang manuley nen saray totoo.” (Gawa 5:29; Roma 12:19; 1 Pedro 3:15) Anggan sanen saray bilay da so niiyan ed kaatapan, say takot ed patey so agmanggawa ed sikara a mikumpromiso. Kabat da a sikara so manseserbi “ed Dios a mamaoli ed saray inaatey.” (2 Corinto 1:9; Hebreos 2:14, 15) Anggaman apasegsegang, sikara so maliket—maliket lapud kabat dan napapaliket da so Dios, maliket a nawalaan na pankanawnawan mibiang diad panangalangon ed ngaran to tan paneknekan da so katooran da diad nilanaan ton Ari. (Gawa 5:41, 42; Mateo 5:11, 12) Kasin sikayo so ontan a nengneng na too? Kasin maparungtal ya ipabidbir mo so inkasika a kaiba na saraman so manasagmak na ontan ya eksperiensia? Si Eʹbed-melʹech so sakey ya agtinmakot. Siopa iyan too?
7. (a) Siopa si Eʹbed-melʹech, tan akin a sikato so makapainteres ed sikatayo natan? (b) Sanen nadngelan to a si Jeremias so imbantak ed mapitek a bobon, anton aksion so ginawa nen Eʹbed-melʹech, tan akin?
7 Si Eʹbed-melʹech so sakey a matakot-ed-Dios ya Etiopen nanayam ed Jerusalem legay panaon ya angipaarap ed inkaderal to diad panamegley na saray taga Babilonia. Sikato so impleado ed sankaabungan nen Arin Zedekias. Diad saman a panaon et si Jeremias so manlilingkor a bilang propeta nen Jehova ed Panarian na Juda tan diad kabangibang a nasyon. Lapud sikato so makpel ya angiyabawag ed mensahen pasakbay na Dios, sikato so nagmaliw a puntirya na mabiskeg a panamasegsegang. Diad panangisugsog na saray pigaran piprinsipe ed Jerusalem, sikato ni ingen so imbantak ed bobon pian onlereg ed pitek tan ompatey. Anggaman si Eʹbed-melʹech so aliwan sakey ya Israelita, binidbir to si Jeremias a bilang propeta nen Jehova. Diad impakadngel to ed inkagawa, tampol a si Eʹbed-melʹech so nananap ed ari diad wangalan na syudad pian tulongan to si Jeremias. Kinmiwas ed ganggan na ari, tampol a sikato so anugyop na 30 lalaki, ontan met ed saray lubir tan daan a lupot. Imbaga to ed si Jeremias ya ikarga toray lupot ed kilikili to pian aggasgasen na lubir, tan insan say propeta so inagwat da a nanlapud bobon.—Jeremias 38:4-13.
8. Anton manamaseguron sipan so impawit nen Jehova ed si Eʹbed-melʹech, tan akin?
8 Natalosan a si Eʹbed-melʹech so mapaga ed nayarin gawaen na saray prinsipe ed sikato lapud inamper to so kanonotan da, balet mas lalon matalona so panamagalang to ed propeta nen Jehova tan say dilin talek to ed Dios. Bilang resulta, si Eʹbed-melʹech so pinaseguroan nen Jehova ed panamegley nen Jeremias: “‘Nia saray salitak so ontua ed sayan syudad a para ed desyang tan aliwan para ed maabig, tan sikara so peteg a nagawa ed arap mo diad satan ya agew. Tan sika so iliktar ko ed satan ya agew,’ kuan nen Jehova, ‘tan sika so agniyawat ed lima na lalaki a tinakotan mon mismo. Lapud andi-saew a siak so mangiliktar ed sika, tan agka napelag ed kampilan; tan peteg a kayarianen mo so kamarerwam a bilang samsam, lapud sika so nanmatalek ed siak,’ kuan nen Jehova.”—Jeremias 39:16-18.
9. (a) Panon a say “arum a karnero” so singa si Eʹbed-melʹech? (b) Sirin, anto so kabaliksan na sipan nen Jehova ed si Eʹbed-melʹech ed “arum a karnero” natan?
9 Agaylan mabli itan a sipan ed saray ariripen nen Jehova natan! Singa si Eʹbed-melʹech, say “arum a karnero” so makakaimaton ed saray nagagawan ag-inkahustisya ed modernon-agew a Jeremias a klase, diad alanaan a nakdaan, tan diad saray sagpot a pamatunda ed kimey na panangipulong da ed mensahe nen Jehova. Sikara so agnanabalan nanggawa na antokaman a kiwas pian salimbengan tan suportaan da so alanaan a klase. Manepeg, sirin, say sipan nen Jehova ed si Eʹbed-melʹech so mamabiskeg ed sikara, a sinakurongan to so talek da ya ag-abuloyan na Dios so sumusumpa a maneral ed sikara noagta sikara so ipreserba To a bilang sakey a klase diad onsasabin sankamundoan a kadederal ya onloob ed matunong a “balon dalin” To.
10. Diad antoran pasen na bilay so pakasagmakan na saray Kristianos ed panamasegsegang?
10 Aliwan amin a mankukurang ed saray bakat nen Jesu-Kristo so binegya ed kipangaw, noagta amin so makasagmak na panamasegsegang ed nanduruman nengneng. (2 Timoteo 3:12) Saray nilibulibon Kristianon kaasawaan a bibii, tan kaasawaan a lalaki, so diad dakel iran taon et matoor a nansungdo ed mabiskeg ya isusumpa ed mismon kaabungan da. Saray anak, met, lapud pilalek dan manserbi ed si Jehova, so inkaindan na saray atateng da. (Mateo 10:36-38) Saray Kristianon tobonbalo so nayarin napasegsegang diad eskuelaan; saray matatatken a totoo, diad saray pasen na impleyo ra. Amin na saray Tasi nen Jehova so makataway ed satan legan a sikara so mibiang ed mapublikon panagtasi nipaakar ed Panarian na Dios. Diad amin na satan, onaplika iray salita nen Jesus: “Diad panagsungdo yo et nagamoran yo so kamarerwa yo.”—Lucas 21:19.
11. (a) Antoran arum a kipapasen so mangipresenta na mabiskeg a subok ed dakel? (b) Siopa ni so makasagmak ed sarayan bengatla, tan akin?
11 Para ed aliwan daiset, walaray arum a kipapasen a mangipasen ed sikara diad subok. Nayarin sikara so walaan na seryoson sakit, a mangekal ed sikara na liket ed bilay. Odino, anganko ta sikara so nidunget ed sankairapan iran kipapasen ed ekonomya. Nayarin, no maminsan, saray komento na maapit a kakaiba so aliwan makatunongan tan mapasang. Diad kipapasen nen patriarkan Job, inusar nen Satanas so amin na sarayan paraan diad getman pamuyak ed katooran to. Panon so ikiwas tayo no nasagmak tayo so miulibay a kipapasen?—Santiago 5:11.
12. (a) Akin a si Noe so nagkalautlan nankaukolan na panagsungdo ed ministeryo to? (b) Panon a say kipapasen so mipadpara ed agew tayo?
12 Diad biek a dapag, anto no sikatayon personal so makaromog na samet a paborablen kiwas diad saray sagpot tayo ed panagtasi nipaakar ed gagala na Dios? Satan, met, so mankaukolan na panagsungdo. Nonoten, legan na amin na saray taon a si Noe so nampulong ed sakbay na Delap, say asawa to lambengat tan saray ilalak to tan saray kaasawaan da so akiulop ed sikato diad panaglingkor ed si Jehova. Amin nin katooan so “agnanimano.” (Mateo 24:39) Mipadpara, natan, say karaklan so ‘agmaniimano.’ Diad arum iran pasen, anggaman kuan, ya aminsan et wala so paborablen kiwas ed mensahe na Panarian, natan et wala so daakan a panagani ed saray managdayew ed tuan Dios. Maliket iraman so angisungdo ed saray taon na agpanangimano odino pirmin isusumpa tan natan et sikara la so mibibiang ed sayan sankaliketan a panagtipon!
‘Maliket Iraman so Mantultuloy a Mansungdo’
13. (a) Pian mantultuloy a mansungdo, anto so nepeg tayon pansiansiaen ya isentro? (b) Anto so nakaukolan tayo diad pamidbir ed saray metodo nen Satanas?
13 Pian agnabalang so makapakelaw ya ilalo ed bilay diad “balon dalin,” makana so pansiansian inengneng a malinew ed baleg a salisalan a nipapaarap ed amin a palsa—say salisalan na sankatalbaan ya inkasoberano. Kasin sikatayo so agmikukumpromison wala ed dapag nen Jehova? Kasin sigpot ya apresyaen tayo a wala lambengat so duaran dapag, ya anggapo so wala ed pegley? Pian ag-itayo biktimaen na sayan bakal, nakaukolan tayon bidbiren a say panagbusol tan panagsagyat so metodon uusaren nen Satanas diad pamuyak ed katooran tayo, pian gawaen to itayon ontundan mangunor ed Dios, pian ombeneg ed sankakanaan a kimey na panagtasi ed Mesianicon Panarian.—1 Pedro 5:8, 9; Marcos 4:17-19.
14. (a) Anton siglaotan so nepeg tayon bayuboan, tan diad siopa? (b) Panon so panulong to ed sikatayo?
14 Nepeg a bayuboan tayo met so sigpot a panagmatalek ed si Jehova. Agaylan kakulangkulangan so panali ed dilin biskeg tayo lambengat ya ompaliis ed saray masilib a patit na mabiskeg-nen-too a kabusol! Balet no sikatayo so manmatalek ed si Jehova ed amin a puso tayo, sirin sano sagmaken tayo so kairapan tan arapen so tukso et sikatayo so niyasingger ed sikato. (Efeso 6:10, 11; Uliran 3:5, 6) Sikatayo so agpiliten nen Jehova ya onla ed sakey a dalan. Sikatayo so agto ipaarap ya onsumpa ed linawa tayo. Balet no sikatayo so onarap ed Salita to a para ed kiwanwan, manpikasi ed sikato nipaakar ed biskeg tan mansiansian maapit ed muyongan to, et saray kurang tayo so iwanwan to. Tan sikatayo so pabiskegen to ed apasimbalon ebidensya na ag-onsaew ya aro to.—Roma 8:38, 39.
15. (a) Siopa so nepeg ya ununa ed saray bilay tayo? (b) Panon so nepeg tayon panmoria ed saray kipapasen a manubok na pananisia tayo?
15 Saray kairapan tan tukso a sagmaken yo so manubok ed sikayo. Siopa so unaen yo ed bilay yo? Say labay nen Satanas so amin tayo komon so manunan mapaga ed inkasikatayo. Maslak a totoo so ontan. Si Jesu-Kristo so duma. Kasin sikayo so ontan? Kasin naaralan mo lan iyuna so panangitandoro ed ngaran nen Jehova? No ontan, sirin, imbes a paliisan iray kipapasen a manubok na pananisia yo, sikara so nayarian yon abeten ya arap-arapan, manpikasi ed si Jehova ya iter to ed sikayo so kakabatan a mangusar ed saraya a mangigalang ed sikato. Say kairapan a sagmaken yo so mamawala na panagsungdo; panagsungdo lapud say aro yo ed si Jehova so mankaukolan na panangabobon to. “Maliket so too a mansungdo ed subok, lapud diad kaabobonan to et awaten to so balanget na bilay, ya insipan nen Jehova ed saraman so mantultuloy a mangaro ed sikato.”—Santiago 1:2-4, 12; Roma 5:3, 4.
16. Anton kalat so nepeg tayon dampoten a gamoran?
16 Aliwan magenap so basta onggapo ed serbisyo ed si Jehova odino mansungdon magano. Sikatayo so wala ed lumba, tan say premyo so nagamoran na saraman so makasabi ed finish line. Maliket ya amin iraman so mangibabanikel na inkasikara a saray mata ra so akateen ed premyo sano sayan daan a sistema so namekmek ed kadederal! Agaylan maglorian ilalo so manatalaran ed sikara!—Hebreos 12:1-3; Mateo 24:13.