Kapitulo 24

Nanaupot La So Panaon!

1. Unong ed saray prominentin sientista, panon inkamaapit so “doomsday”?

¹ Nen 1947, saray sientista so nanggawa na “doomsday clock.” Saman so pinmatnag ed apis na The Bulletin of the Atomic Scientists tan nausar a mangidrama ed no panon inkaatap so inkaapit a sisiaen dan say mundo so wala ed kaderal to ed nuklar. Naulit-ulit a saray lima na satan a “relo” so indere​—no maminsan et paabante, no maminsan et pasener, mandepende ed no panon so pakatebek da ya inkapeligro na internasyonal a kipapasen. Asasakbay nen 1984 et saratan a lima so inyabante ed taloran minutos ed sakbay na pegley-labi. No nasabi ra so pegley-labi lambengat, kabaliksan to a ginmapo la so makapakebbiew a bakal nuklar.

2. Kapigan so inggapo nen Jehova a panagbilang to, tan anto so kabaliksan na zero hour?

² Balet diad apalabas lan 6,000 taon et inggapo la nen Jehova a Dios so pambilang ya inmabantin agnaamper, ya agbalot ompapawil. Diad saman a panagbilang ed zero hour et sikato so panaon ya inggeter na Dios diad pangalangon to ed inkasoberano to, a ditan so pandependian na kareenan tan pankaabigan na amin ed talba. Sipaparungtal ya imbaga to so gagala to tan angitarya na saray panandaan a panaon a nayarian tayon tebeken so kurang to. Kayarin tuloy na rebelyon ed Eden, insipan nen Jehova a pawalaen to a manlapud “biin-pinagkaasawa” to, say organisasyon na saray matoor ya espiritun pinalsa to, so sakey a “bini” a manmekmek ed si Satanas, “say daan ya uleg,” ed ulo tan diad kaunoran et mekmeken ton paandien ed ando lan ando. (Genesis 3:15; Apocalipsis 12:9; Roma 16:20) Agaylan saray manangaro ed inkatunong so manil-iliw ed satan a panaon!

3. (a) Anto so mangipanengneng a say isasabi na Mesias so maalwar ya impanaon? (b) Para ed anto a say letnegan so nilira?

³ Diad aturon panaon na Dios, a nipasakbay lan abayag nensaman, say insipan a “bini,” say Mesias, dilin Anak na Dios so pinmatnag ed dalin. Bilang mabiskeg ya ebat ed mapangayan angat nen Satanas, impansiansia nen Jesus so ayadyarin maridios a debosyon ya anggad patey. Tan diad impatey to a bilang andi-kasalanan a too et intarya to met so paraan diad karondon na anak nen Adan a manlapud kasalanan tan patey. Sirin say letnegan so nilira a para ed ‘kabuybuyak na saray gawa na Diablo’ ed kaunoran.​—1 Juan 3:8; Daniel 9:25; Galacia 4:4, 5.

4. (a) Anton grupo so inggapo nen Jesus a tiponen legan a wadia ed dalin? (b) Mitukoyan ed madibinon eskedyul, kapigan so inggapo nen Kristo a manuley bilang Ari? (c) Anto so sakey ed saray ununan kiwas a ginawa to?

⁴ Legan a si Jesus so wadia ed dalin, ginapoan ton tiponen so lalaki tan bibii a magmaliw a kaiba ton mananawir ed mangatatawen a Panarian to. Saray 144,000 lambengat a pinili, asubok tan matoor so apisakup. Legan a say panaon na panagtipon ed saray unor a membro na sayan grupo so sinmabi, say “pananguley tan karlangan tan panarian” so nipabtang ed si Jesus a mismo ed tawen. (Daniel 7:13, 14) Duga ed eskedyul, nen 1914, sikato so kinmiwas a bilang manuley ya Ari. Si Satanas tan saray demonyos to so tampol ya apagit ed tawen, saya so impanlinis ed letnegan na gobierno. (Apocalipsis 12:7-12) Say peles a sistema na mundo so linmoob ed kaunoran iran agew to.

5. Siopa so mabilay a makatasi ed kaalangon na inkasoberano nen Jehova?

⁵ Say pamibilang a ginmapo ed apalabas lan anemiran milenyo so manasingger la natan ed zero hour to. Asingsingger lan tuloy a saray totoon mabilay nen 1914, tan natan et sikara la so matatken, so agnaandin amin ed eksena sakbay a nagawa so makapalikliket iran ebento a mananda ed kaalangon na inkasoberano nen Jehova.​—Marcos 13:30.

6, 7. (a) Antoran katuaan nipaakar ed “baleg ya ulop” so mangipanengneng a say baleg a kairapan so talagan asingsingger la? (b) Akin a sikara so onnengneng ed arapen a tekep na mabiskeg a panilalo?

⁶ Arum iran matoor ya ariripen na Dios, met, so wadtan a makatasi ed saray nagawa diad satan a baleg ya agew. Nagkalautla ed gapo na 1935, sanen say pakabidbiran ed “baleg a karaklan,” odino “baleg ya ulop,” so malinlinew ya atalosan, a say baleg a bilang na saraya so pinmarungtal. Diad gapo et walaray nilasus, insan nilibo, diad saginonor et nilasus-nilibo, tan natan et wala so minilyon a nikayat ed interon globo. Saray agnalingon Salita na Dios so mangireretrato ed sayan grupo a bilang ‘ompapaway a nanlapud baleg a kairapan,’ a sikara so niliktar ed satan, a manbilay ya onloob ed Balon Sistema na Dios ya agla ompatey. (Apocalipsis 7:9, 10, 14; Juan 11:26) Saray inmunan membro na sayan grupo so wala la natan ed 60’s odino 70’s odino matatken ni. Ag-inyabuloy nen Jehova so panagtipon ed sayan grupo ya onggapon masakbay a tuloy. Say “baleg ya ulop,” a pati saray dakel a sankaunaan a membro to, so makaliktar ya onloob ed “balon dalin.”

⁷ Say ilalo na “baleg ya ulop” so ag-amperen na anggan anton desyang a gawaen na nuklar a maneral ed amin a katooan. Tekep na maabig a rason et sikara so optimistiko tan makpel. Legan a saray nagagawa ed “kaunoran iran agew” so nipaparungtal, saratan so babantayan da a tekep na panalagar, ya iyaaplika so bilin nen Jesus: “Talindeg kayon maptek tan itangwa yoray kauloan yo, lapud say kililiktar yo so manasingger la.” (Lucas 21:28) Balet legan na nakekeraan a panaon sakbay na satan a kililiktar, nagawa niray arum a makatenyeg-mundon kakanaan.

Saray Nagawa Ni ed Arapen

8. (a) Anton makabaliksan a nagawa so nipasakbay ed 1 Tesalonica 5:3 ya onsabi ni? (b) Dakel a taon a linmabas, panon a say kurang so nigeter ed saya? (c) Diad agano niran taon, anton baleg a desdes so wala ya angipaseguro ed deen na mundo?

⁸ Ituturo to so sakey ed saraya, insulat nen apostol Pablo: “Kapiganman ya ibabaga ra: ‘Deen tan kaligenan!’ insan biglan kadederal so tampol ya onsabi ed sikara a singa pasakit na biin malukon; tan ag-iran balot makaliktar.” (1 Tesalonica 5:3) No anto so manibukel na satan a proklamasyon so nanengneng ni. Balet makatantanda a say kurang so niletneg kayari na inloob na mundo ed “kaunoran iran agew” to. Nen 1919 et say gagala na Liga na Nasyones so nideklara a sikato so panangegemtan na “deen tan kaligenan.” Kayari na Guerra Mundial II, say Paknaan na Nasyones Unidas so angigeter lamet ed “deen tan kaligenan” a bilang manunan kalat na satan ya internasyonal ya ulop. Agto agegemtan itan a kalat. Anggaman kuan, diad agano niran taon et saray totoo ed amin a nengneng na bilay ya akibiang ed saray mapublikon demostrasyon diad dakel iran dalin, so manadagdag ed saray papangulo na mundon mangitunda la ed amin a produksion, panagsali tan panangipuesto ed saray armas nuklar. Kaliktan da so kapaseguroan ed kareenan na mundo tan nakikigtot ed saman so sisiaen dan kasandin nagawa.

9. Akin a say biglan kadederal so onsabi ed saraman so mangiyaalibansa ed nipasakbay a panangiyabawag na “Deen tan kaligenan”?

⁹ Balanglan bilang nansumpalan na saya odino arum iran kanonotan, saray papangulo na mundo so agla mabayag et manggawa na nikadkaduman panangiyabawag ed “Deen tan kaligenan!” Satan so apis lambengat. Balet saramay mangiyalibansa ed satan so mangiyaabawag ya agamoran da so kalat da diad panamegley na dilin paraan da, ya agnakaukolan so Panarian na Dios. Diad sayan panangidepak ed inkasoberano nen Jehova, “biglan kadederal so tampol ya onsabi ed sikara.”

10. Panon a say kipapasen so natitibukel la diad kaderal na Babilonia a Baleg?

¹⁰ Saray nagawgawa so maples. Say Babilonia a Baleg, say sankamundoan ya imperyo na palson relihyon, so deralen na saray datin pulitikal a kaarowan to. Natan la, saray manuley so sikakabat a tuloy a say relihyon so manamasanok a puersan angiparngat na gulaan, panagpaagos na dala tan bakal ed interon globo. Saray pulitiko so nakekesawan la diad pananesdes na klero. Diad kaslakan ed mundo, saray onaatendi ed pasen na panagdayewan so dinmaiset a tuloy. Diad ateistikon indengan, balanglan maparungtal o sinakbongan, so mangididikta ed opinyon na publiko. Ontan met, dakel iran membron bansa na Nasyones Unidas so walaan na mabiskeg a sumpad-relihyon iran totontonen. Sano onsabi so dilin aturon panaon nen Jehova diad pangidapo to na panangukom, abuloyan toray mapulitikon manuley, diad maples ya internasyonal a kurang, pian onsumpa ed Babilonia a Baleg tan sigpot a deralen to.​—Apocalipsis 17:15, 16; 19:1, 2.

11. (a) Sumpa ed siopa so ontumbok a bueltaan na nasyones? (b) Diad anto niran malaknab a nagawgawa so pangipaarapan to?

¹¹ Abuek ed ontan ya impanbiktorya tan pinaelengan na agnanengneng a manuley da, si Satanas a Diablo, saray nasyones so mangataki ed saray dilin matoor a tastasi nen Jehova ed dalin. (Ezequiel 38:14-16) Say katuaan a saraya so mareen, maunor-ed-ganggan a totoo ya agmibabali ed saray pulitika odino responsabli ed bakal so agnaikdan na konsiderasyon. Saray nasyones so mankerew na sigpot a suporta, pandayew ed mapulitikan sistema. Balet sano sikara so onkiwas a maneral ed nanengneng a muyongan nen Jehova, say Dios so sigpot ya onkiwas a nisesengeg ed saray matoor ya ariripen to, ya iliktar tora. Saray armada na tawen so sigpot a maneral ed amin a biskeg na nanengneng a muyongan nen Satanas, a deralen to so amin ya ondapag ed satan. Insan, say manunan kabusol, si Satanas a Diablo, so nasingkat tan sigpot a nimedmer ed sanlibon taon a kaleganan to et amin ya epekto na mauges ya impluensya to so naekal tan say dalin so magmaliw a Paraiso. Kayari na satan, si Satanas so nibulos ed antikey a panaon, pian suboken so nipawil a katooan. Amin a totoon mamilin manumbok ed sikato so naderal, a pati si Satanas tan saray demonyos to.​—Apocalipsis 19:19-21; 20:1-3, 7-10.

Onloob ed Sankarakpan a “Balon Dalin”

12. (a) Diad siopa so pangipabtangan na “baleg ya ulop” na kililiktar da? (b) Siopa so akikasakey ed sikara diad pandayew ed Dios?

¹² Diad makapataktakot a nagawa ed anggaan na peles a mundo ed benegan da tan say Milenyon Uley nen Kristo ed unaan da, say apalaboan iran niliktar ed dalin so napano na mabiskeg a pisasalamat legan ya ikasil daray boses da diad pisasalamat ed Dios. Tekep na impapuson aralem a liknaan et say “baleg ya ulop” so onkelyaw ed baleg a boses: “Utang tayo so kilalaban ed Dios [Jehova] tayo, a manyudyurong ed trono, tan ed Kordero [Jesu-Kristo].” Tan amin ed matoor a mangatatawen a muyongan na Dios, apakiwas ed apresasyon diad engranden kabaliksan na sarayan nagawgawa, so miulop ed sikara diad panagdayew, a kuan da: “Amen! Say bendisyon tan say gloria tan say kakabatan tan say pisasalamat tan say dayew tan say pakayari tan say biskeg so kien na Dios tayo ed ando lan ando. Amen.”​—Apocalipsis 7:10-12.

13. Panon so pangiretrato na Biblia ed probisyon ya agawan manustine tan manambal ed katooan?

¹³ Amin a katooan la ed satan so manibukel na nankakasakey a sosyedad na too a mangigagalang ed tuan Dios, “sakey a balon dalin” ed silong na “balon tawen” a mangibabalikas ed maaron inkasoberano nen Jehova. Uusaren to so makapaliket a simbolismo, say unor a libro na Biblia so mangireretrato ed makapakelaw iran gungguna ya unagos ed katooan ed satan a bilang “sakey ya ilog na danum na bilay, malinew a singa kristal, a manaagus a manlapud trono na Dios tan ed Kordero” ya ondalan ed pegley na maawang a dalan na mangatatawen a Balon Jerusalem. Diad saray gilig na sayan ilog ed “saray kiew na bilay” a mamapawala na bungan manustine ed saraman so mangan ed satan tan saray bulong da diad katambal na nasyones. Nirepresenta dia et say interon probisyon na Dios diad katambal tan kasustine na mananisia, matulok a katooan tan gawaen toran manggayaga ed maandon bilay diad panamegley nen Jesu-Kristo.​—Apocalipsis 21:1, 2; 22:1, 2.

14. Diad antoran dalan a saray kipapasen ed “balon dalin” so miduma a manlapud saraman so wala ed mundo natan?

¹⁴ Saray kipapasen a matalona ed satan diad dalin so makarepreskon miduma a manlapud antokaman ya apawala na daan a mundo. Diad panamegley na panangiyaplika ed saray gungguna na bagat nen Kristo tan diad panamegley na edukasyon ed linawa na Dios, saray matulok, pati saraman so napaoli a manlapud saray inaatey, so nabulos a manlapud amin a pakasuysuyan na kasalanan tan natulongan ya onaligwas ed pisikal, mental, emosyonal tan espiritual ya anggad nagamoran da so inkayadyari. Imbes a mamawala na saray manangapag a “gawa na laman,” balang sakey so mangaral a mamawala na daakan a singa say maridios a bunga na aro, gayaga, deen, panangitepel, panangasi, kaabigan, pananisia, tayadno tan dangka. (Galacia 5:19-23) Tekep na ontan ya espiritun matalona, say bunga na dalin so nausar a manustinin mapalangkap ed pankaukolan na amin a katooan. Say bilay so lalon sankarakpan ed kabaliksan nen say nensaman a say katooan so mankimey a mankakasakey a manumpal ed orihinal a gagala na Amalsa ed sayan dalin tan saray manaayam to.

15. (a) Anton makasagyat ya imbitasyon so ninanatnat la ed katooan? (b) Sirin, anto so nepeg a gawaen na balang sakey ed sikatayo?

¹⁵ Diad maliket a panatalaran ed amin na saya, say espiritu na Dios tan say nobya nen Kristo so manginanatnat natan na magunaet ya imbitasyon ed totoo ed anggan iner, a kuan da: “‘Gala!’ Tan siopaman a makadngel kuanto: ‘Gala!’ Tan komon siopaman a napgaan so ondago; komon siopaman a mankaliktan so mangala ed danum na bilay ya andi bayar.” (Apocalipsis 22:17) Natan, sirin, so aliwa lan panaon na basta panalagar ya anggad say panagbilang ed baleg ya agew nen Jehova so makasabi ed zero hour diad baleg a kairapan. Diad impakaawat ed magayagan imbitasyon a “mangala ed danum na bilay ya andi bayar,” sikayo natan so nawalaan na pribilehyon manginatnat ed satan ya imbitasyon. Sikato so sakey a panaon a para ed magunaet a kimey diad biang na amin na saraman so maseseg a manpilalek a niliktar ya onloob ed sankarakpan a “balon dalin” na Dios.