Aktibon Ipapangulo nen Kristo So Kongregasyon To
“Say Dios na Katawan tayon Jesu-Kristo . . . so nanggawa ed sikaton ulo na amin a bengatla ed kongregasyon.”—EFESO 1:17, 22.
1. Panon so nayarin pangebat na arum a membro na iglesia na Kakristianoan ed tepet, ‘Siopa so pangulo yo?’ balet panon so pangebat na saray Tasi nen Jehova?
ANGGAPO so toon bibidbiren na saray Tasi nen Jehova bilang pangulo ra. Say inkasangal na organisasyon da so andian na pipara ed papa na Iglesia Katolika Romana, saray patriarka na saray Iglesia ed Bukig ya Ortudoks, odino saray papangulo na arum ya iglesia tan sektas na Kakristianoan. Say katutulok da et diad si Jesu-Kristo, say Ulo na Kristianon kongregasyon, ya angikuan: “Say Pangulo yo so sakey, say Kristo.”—Mateo 23:10.
2. Akin a bidbiren na saray Tasi nen Jehova si Kristo a bilang Ulo na Kristianon kongregasyon, balet antoran tepet so nayarin itepet?
2 Diad Pentecostes et nantasi si apostol Pedro: “Si David so agsinmegep ed katawenan, noagta sikato a mismo so angikuan, ‘Si Jehova so angikuan ed Katawan ko: “Yurong ka ed nikawanan ko, ya anggad saray kakabusol mo so ipasen ko a gagatinan na saray salim.”’ Sirin naamtaan komon na abung na Israel ed panseguro a sikato so ginawa na Dios a Katawan tan Kristo, sayan Jesus ya impasak yo.” (Gawa 2:34-36) Balet manwarin saman so binidbir da nen 33 K.P. et si Jesus so agawan Katawan tan Ulo na kongregasyon, kasin sikatayo so manisip ed sikato a basta yinmurong labat ed nikawanan nen Jehova, a manaalagar ed kitrono to nen 1914? Kasin sikatayo so sigpot a sikakabat a nanlapulad gapo et si Kristo so aktibon mangipapangulo ed kongregasyon to?
Madibinon Paraan diad Aktibon Kakauleyan
3. Anto so insipan nen Jesus ya ibaki to ed saray babangatan to, tan panon so pikabat tayo ya agto sasalitaen so sakey a too?
3 Diad samay labi ed sakbay ya impatey to, imbaga nen Jesus ed saray matoor ya apostoles to: “Sikato so onkana ed pankaabigan yo a siak so ontaynan. Lapud no siak so ag-ontaynan, say mananulong so agbalot onsabi ed sikayo; balet no siak so ontaynan, sikato so ibakik ed sikayo.” (Juan 16:7) Sikato so mangibaki na aliwan sakey a persona noagta sakey ya aktibon puersa. Saya so pinabitar to diad samay sakbay a tuloy na insegep to ed tawen, a kuanto ed saray nantitipon a babangatan to: “Siak so mangibaki ed sikayo diad saman so insipan nen Amak. Sikayo, anggaman kuan, so manayam ed syudad ya anggad sikayo so nakawesan na pakayari a manlapud tagey.”—Lucas 24:49.
4. Panon so inkausar na masanton espiritu a nanlapud Pentecostes?
4 Saray matoor a babangatan nen Jesus so nanayam ed pasen na Jerusalem ya anggad Pentecostes. Saman ya agew et sikara so “apano na masanton espiritu,” a singa nisipan. Tinasian nen Pedro: “Lapud sikato [si Jesus] so nitandoro ed nikawanan na Dios tan angawat ed insipan a masanton espiritu a nanlapud Ama, saya so inkalbo to a nanengneng tan narengel yo.” (Gawa 2:4, 33) Diad panamegley na sayan paraan et si Jehova so angilalak ed sarayan inmunan Kristiano a bilang espiritual ya ananak to. (Galacia 4:6) Ontan met, si Jesus so angawat ed espiritu a nanlapud si Ama to a bilang sakey a paraan diad aktibon panguuley ed kongregasyon to ed dalin a manlapud mangatatawen a posisyon to diad nikawanan na Dios.
5, 6. (a) Anto so sananey a paraan a niiter ed si Kristo pian nayarian ton uleyan so kongregasyon to ed dalin? (b) Mangiter na saray espesipikon ehemplo no panon so impangusar nen Jesus ed sayan paraan a nisesengeg ed saray babangatan to tan diad panuporta ed kimey na panagpulong.
5 Nagkalalo ni, si apostol Pedro so nansulat nipaakar ed si Jesus: “Sikato so wala ed nikawanan na Dios, lapud sikato so linma ed tawen; tan saray angheles tan pakauley tan pakayari so agawan uleyan to.” (1 Pedro 3:22) Saray angheles, sirin, so sananey a paraan ya inter nen Jehova ya usaren nen Kristo ed aktibon panangipangulo to ed Kristianon kongregasyon.
6 Sirin, sano nabasa tayo ed libro na Gawa a say “anghel nen Jehova” odino “sakey ya anghel na Dios” so kinmiwas diad panuporta ed Kristianon kimey na panagpulong odino sinmalet a nisesengeg ed saray membro na Kristianon kongregasyon, wala so sigpot a rason ed panisia a saratan ya angheles so kinmiwas ed leksab na panangasikaso nen Kristo Jesus. (Gawa 5:19; 8:26; 10:3-7, 22; 12:7-11; 27:23, 24) Bilang “Miguel ya arkanghel,” si Kristo so walaan na saray angheles diad panangikomando to, tan sikara so inusar to diad aktibon panangiwanwan ed Kristianon kongregasyon nen inmunan siglo K.P.—Judas 9; 1 Tesalonica 4:16.
Sakey a Nanengneng a Mananguley ya Ulop
7. Anto ni so arum a paraan ya inusar nen Kristo diad pangiter to na panangiwanwan ed kongregasyon to, tan antoran kasulatan so manasalita ed sayan “inkabetang na panangasikaso”?
7 Ipapanengneng met na Kasulatan a si Jesu-Kristo so angusar ed sakey a grupo na lalaki a bilang mananguley ya ulop a mangiter na panangiwanwan ed kongregasyon to diad dalin. Diad pangigapo, sayan mananguley ya ulop so pinmatnag a sikato so tinibukel na 11 ya apostoles lambengat. Sanen aanapen to so linawa nen Jehova diad kasalatan nen Judas Iscariote, si Pedro so nanaon ed Salmo 109:8, a kuanto: “Say inkabetang to ed panangimaton so alaen na sananey.” Insan, diad pikakasi ra ed si Jehova, si Pedro tan saray kakaiba to so angerew ed Dios na panuro to ed lakin “mangala ed pasen na sayan ministeryo tan inkaapostol, a naplagan nen Judas.” Si Matias so aturon manlingkor a “kaiba na saray labinsakey ya apostoles.”—Gawa 1:20, 24-26.
8. Anton duaran inmunan ehemplo so mangipanengneng no panon so impangusar nen Kristo ed saray membro na nanengneng a mananguley ya ulop?
8 Say inmunan nikurit ya inkagawa ed impanumpal na 12 apostoles ed sayan “inkabetang na panangimanton” a bilang sakey a mananguley ya ulop so sanen sikara so anuro na espiritual a kualipikadon lalakin manlingkor ed agagi ra diad dalem na inmunan kongregasyon. (Gawa 6:1-6) Say komaduan inkagawa et sanen si Felipe so ginmapon angipulong ed si Kristo diad saray Samaritano. Bilang resulta na saya, “saray apostoles ed Jerusalem . . . so angibaki ed si Pedro tan si Juan ed sikara.” Dia lambengat ed kayari na sarayan manangilaman a membro na mananguley ya ulop a saray kalimaan da so nitapew ed saray Samaritano a diad saman et ‘inggapo ra so mangawat ed masanton espiritu.’—Gawa 8:5, 14-17.
Personal a Panangipangulo nen Kristo
9. Kasin si Kristo so naynay a kinmiwas ed panamegley na saray angheles odino say mananguley ya ulop? Mangiter na ehemplo.
9 Sirin, manlapud gapo na Kristianon kongregasyon, si Kristo so walaan na masanton espiritu, saray angheles, tan sakey a nanengneng a mananguley ya ulop ya usaren to pian nayarian ton ipangulon aktibo iray babangatan to ed dalin. No maminsan et sikato ni ingen so personal a kinmiwas. Alimbawa, si Kristo et personal a kinumberte to si Saulo na Tarsus. (Gawa 9:3-6) Taloran agew ed saginonor et si Jesus so nansalitan direkta ed “sakey a babangatan” a manngaran na Ananias. Imparungtal to ed sikato so nankatlon misyon a ninonot ton para ed si Saulo, inkuan nen Jesus: “Sayan laki so sakey a pinilin baseha ed siak a mangitarok na ngaran ko ed saray nasyones tan ontan met ed saray arari tan ed saray anak na Israel.” (Gawa 9:10-15) Tinawag nen Kristo si Saulo a para ed partikular a kimey. Sirin si Saulo so nagmaliw a sakey ya apostol, odino sakey ya imbaki, a lalon magmaong ya akabatan a bilang apostol Pablo.
10. Panon so personal a panangasikaso nen Kristo ed kimey na panagpulong?
10 Personal ya iimatonan nen Kristo so kimey na panagpulong. Diad panamegley na masanton espiritu ya inawat to a nanlapud si Ama ton Jehova, impakiwas toray misioneron impanbaroy nen Pablo tan awalaan na personal ya interes ed saratan. Nabasa tayo: “Imbaga na masanton espiritu: ‘Ed amin a totoo et ibiig yo si Bernabe tan si Saulo a para ed siak diad kimey ya anawagan ko ed sikara.’ . . . Sirin sarayan lalaki, ya imbaki na masanton espiritu, so linma ed Seleucia, tan manlapud’man et sikara so nansakay” diad inmunan misioneron impanbaroy. (Gawa 13:2-4) Siempre, say masanton espiritu, aktibon puersa nen Jehova, so ‘agmakapangibaga’ na bengatla nisay ‘makapangibaki’ na sakey ed inkasikaton dili. Say sakey ya uusaren na espiritun mangidirihe ed saray pamaakaran so mapatnag a si Kristo, say Ulo na kongregasyon.
11. Anto so agawa legan na komaduan misioneron impanbaroy nen Pablo, tan panon a saya so mangipanengneng a malinew ya inusar nen Jesus so espiritu diad panangiwanwan ed kimey na panagpulong?
11 Sayan impangusar nen Jesus ed espiritu legan a sikato so aktibon angiwanwan ed saray inmunan Kristianos so malinlinew a nipanengneng ed awaran na komaduan misioneron impanbaroy nen Pablo. Kayari na impakapawil ton dinmalaw ed saray kongregasyon ed Liconia (sakey a rehyon ed Asia Minor) a niletneg legan na inmunan misioneron impanbaroy, si Pablo tan saray managbiahen kakaiba to so mapatnag a nanggetman mamasagur ya ondalan ed Romanon probinsya na Asia. Akin a sikara so agtinmuloy ed plano ra? “Lapud sikara so inamper na masanton espiritun mansalita ed salita diad luyag na Asia.” (Gawa 15:36, 40, 41; 16:1-6) Balet siopa so manguusar ed masanton espiritu nen Jehova a mangiwanwan ed sikara? Onebat so ontumbok a bersikulo. Ipapanengneng to a sanen sikara so amabaybay, a nanggetman manpulong ed Bitinia, “say espiritu nen Jesus so ag-angabuloy ed sikara.” (Gawa 16:7) On, uusaren nen Jesu-Kristo so espiritun naawat to a nanlapud si Ama to a mangiwanwan ya aktibo ed kimey na panagpulong. Sikato tan si Ama ton Jehova so nanlabay a say maong a balita so nikayat ed Europa, kanian inawat nen Pablo so sakey a pasingawey ed satan a pamaakaran.—Gawa 16:9, 10.
Pinabiskeg nen Kristo Iray Membro na Mananguley ya Ulop
12, 13. Diad panaon na inmunan dalaw nen Pablo ed Jerusalem bilang sakey a Kristiano, anto so agawan mangipanengneng no panon so impamabiskeg nen Kristo ed saray desisyon a ginawa na saray responsablen lalaki ed saman a syudad?
12 Diad samay panaon na inmunan impiabet nen apostol Pablo ed saray babangatan ed Jerusalem, sikara so natalosan a masuyat a mangabet ed sikato. “Sirin si Bernabe so tinmulong ed sikato tan intonton to ed saray apostoles.” (Gawa 9:26, 27) Si Pablo so akipanayam ed si apostol Pedro diad loob na 15 agew. Nabet to met si Santiago ya agi nen Jesus ed ina, a diad saman et sakey ed saray mamatatken ed kongregasyon diad Jerusalem. (Galacia 1:18, 19) Saray ontumbok a salaysay ed Gawa so mangipanengneng a saray mamatatken ed Jerusalem so nagmaliw a kabiangan na mananguley ya ulop na inmunan Kristianon kongregasyon, a kaiba na 12 apostoles.—Gawa 15:2; 21:18.
13 Kaleganan na duaran simban impanayam to ed Jerusalem, si Pablo so nantasi ed saray Judion mansasalita-na-Griego, balet “saraya so nanggetman mamatey ed sikato.” Inyarum nen Lucas a “sanen saya so atakiling na saray agagi, sikato so inyakar da ed Caesarea tan imbaki ra ed Tarsus.” (Gawa 9:28-30) Balet siopa so wala ed benegan na sayan makabat a desisyon? Taotaon ed saginonor, sanen ibibinsabinsa to so parehon inkagawa ed bilay to, imbaga nen Pablo a si Jesus so pinmatnag ed sikato tan angiganggan ed sikaton ontaynan a tampol ed Jerusalem. Sanen sinmuppiat si Pablo, inyarum nen Jesus: “Onla ka, lapud ibaki taka ed saray nasyones a wala ed arawi.” (Gawa 22:17-21) Si Kristo so maapit a manutumbok ed saray pamaakaran a manlapud tagey tan kinmiwas diad panamegley na saray responsablen lalaki ed Jerusalem tan direkta diad panamegley na impisalita to ed si Pablo.
14. Anton pamparengan ed baetan na saray salaysay ed Gawa tan Galacia so mangipanengneng a si Kristo so mangididirihe ed saray pamaakaran no nipaakar ed miting na mananguley ya ulop a manasaglawi ed panaggalsim?
14 Mipadpara, say atentibon panagbasa ed Kasulatan so mangipanengneng a malinew a si Kristo so wala ed benegan na importantin miting na mananguley ya ulop ya agawa diad panguksoy ed suppiatan no kasin saray Hentil a Kristiano so nepeg a nagalsiman tan say Ganggan nen Moises odino andi. Say libro na Gawa so mangibabaga a sanen tinmalindeg so isyu, “sikara [andi-duaruwan saray responsablen membro, odino mamatatken, ed kongregasyon na Antiokia] so angiyuksoy ed si Pablo tan si Bernabe tan arum ed sikara ya ontatdang ed saray apostoles tan mamatatken ed Jerusalem nipaakar ed sayan sangsangan.” (Gawa 15:1, 2) Balet sanen imbinsabinsa nen Pablo iray sirkumstansyan angitonton ed inkiyakar to ed Jerusalem pian oksuyan so salisalan ed panaggalsim, inkuanto: “Siak so linma lapu ed puyan.” (Galacia 2:1-3; ipareng so 1:12.) Bilang say aktibon Ulo na kongregasyon, sayan importantin pamaakaran na doktrina so nilabay nen Kristo ya oksuyen na interon nanengneng a mananguley ya ulop. Diad panamegley na masanton espiritu, inwanwan to so kanonotan na sarayan debosyonadon lalaki diad panggawa ed desisyon da.—Gawa 15:28, 29.
Sakey a Nikadkaduman Desisyon
15, 16. (a) Anto so kinaukolan na mananguley ya ulop ed si Pablo a gawaen kayari na impawil to a nanlapu ed komatlon misioneron impanbaroy to? (b) Akin a sayan bilin so nayarin nikadkaduma, tan akin a si Pablo so tinmulok ed satan? (c) Anton tepet so onlesa?
15 Sananey a makapasagyat ya ehemplo na aktibon panangiwanwan nen Kristo ed saray bengatla a manlapud tawen et samay agawa ed kayari na komatlon misioneron impanbaroy nen Pablo. Insalaysay nen Lucas a diad impawil ed Jerusalem, et si Pablo so nanggawa na malaknab a report ed saray membro na mananguley ya ulop a wala ed saman. Insulat nen Lucas: “Si Pablo so linmoob a kaiba mi ed si Santiago; tan amin na saray mamasiken so wadman. Tan sikara so inlugay to tan inggapo to so mangiter na salaysay ed saray bengatlan ginawa na Dios ed limog na nasyones ed panamegley na ministeryo to.” (Gawa 21:17-19) Kayari na impakadngel ed si Pablo, say nandaragup ya ulop so angiter ed sikato na mabitar a bilin, a kuanto: “Gawam so sayan ibaga mi ed sika.” Sikato so ginanggan dan onla ed templo tan mapublikon iparungtal to ya agto “babangatan so amin a Judios ed limog na nasyones ya ombeneg ed si Moises, ya ibaga ed sikara so agpamagalsim ed saray anak da nisay manakar ed saray kaugalian.”—Gawa 21:20-24.
16 Nayarin suppiaten na sakey so kakabatan na sayan bilin. A singa anengneng tayo la, taotaon ed asasakbay et si Santiago, tan angangko ed arum a mamatatken a wadman ed saratan ya okasyon, so angibaki ed si Pablo a manlapud Jerusalem lapud say bilay to so inyan ed kaatapan na saray “Judion mansasalita-na-Griego.” (Gawa 9:29) Anggaman ed saya, si Pablo so anumbok ed bilin, a mitukoyan ed saman so imbaga to la ed 1 Corinto 9:20. Balet saray miparan sengegan so mamawala na miparan epekto. “Saray Judios a manlapud [Romanon probinsya] na Asia” so nanggulo tan sinali ran pateyen si Pablo. Say aliston inkiwas na saray sundalon Romano so angisalba ed sikato diad patey. (Gawa 21:26-32) Lapud si Kristo so aktibon Ulo na kongregasyon, akin a pinakiwas to so mananguley ya ulop a mankaukolan ed si Pablo ya onla ed templo?
17. Panon a sayan nikadkaduman desisyon so nagmaliw a madibinon tulong, tan anto so ipanengneng na saya?
17 Insan say ebat so mapatnag diad saman so agawa ed komaduan labi ed kayari na inkaerel nen Pablo. Sikato so angiter na maabig ya impantasi ed magulon ulop a nanggetman mamatey ed sikato tan, diad ontumbok ya agew, diad Sanhedrin. (Gawa 22:1-21; 23:1-6) Diad komaduan danay et sikato so ngalngalin pinatey. Balet diad saman a labi, si Jesus so pinmatnag ed sikato tan kuanto: “Manpakpel ka! Lapud legan a sika so mangiter na nagnap a pantasi ed saray bengatla nipaakar ed siak diad Jerusalem, sirin sika met so nepeg a mantasi ed Roma.” (Gawa 23:11) Nonoten so nankatlon misyon ya impasaksay nen Kristo a para ed si Pablo. (Gawa 9:15) Si Pablo so angitarok ed ngaran nen Kristo ed “saray nasyones” tan diad “saray anak na Israel,” balet say panaon so sinmabi la diad pantasi to ed “saray arari.” Lapud satan a desisyon na mananguley ya ulop, nayarian nen Pablo so nantasi ed Romanon prokurador a si Felix tan Festus, diad si Arin Herodes Agrippa II, tan, kaunoran, diad Romanon imperador a Nero. (Gawa, kapitulo 24–26; 27:24) Siopa so manduaruwa a si Kristo so wala ed benegan ya amin na saya?
Si Kristo So Nansiansia nin Mangiwawanwan ed Kongregasyon To
18. Anto so imbaga nen Jesu-kristo sakbay na insegep to ed tawen?
18 Sakbay na impanaynan to ed saray babangatan to tan sinmegep ed nikawanan nen Ama to, inkuan nen Jesu-Kristo: “Amin a pakauley so niiter ed siak diad tawen tan diad dalin. Onla kayo sirin tan manggawa na babangatan a totoo ed amin a nasyones, a bautismoan yo ra ed ngaran na Ama tan ed Anak tan ed masanton espiritu, a bangatan yo ran manumpal ed amin a bengatlan ingganggan ko ed sikayo. Tan, nia! siak so wala ed sikayo ed amin na saray agew ya anggad kasampotan na sistema na bengabengatla.”—Mateo 28:18-20.
19. Panon nen Kristo ya inusar so inter-na-Dios a pakauley to nen inmunan siglo, tan anto so nasalaysay ed ontumbok ya artikulo?
19 Say libro na Gawa, a mangisasalaysay ed akauna ran taon na Inkakristiano, so mangipanengneng ya anggapoy duaruwa a si Kristo so angusar ed pakauley to diad aktibon pangiwawanwan to ed kongregasyon to diad dalin. Saya so ginawa to ed panamegley na masanton espiritu, saray angheles, tan say mananguley ya ulop a tinibukel na 12 apostoles tan saray mamatatken ed kongregasyon na Jerusalem. Imbaga nen Jesus a sikato so wala ed saray babangatan to ya angga ed kasampotan na sistema na bengabengatla, a kawalaan tayo natan. Diad ontumbok ya artikulo, et nanengneng tayo no panon a sikato ni so siansian aktibo ya Ulo na Kristianon kongregasyon tan no panon a sikato so mangiwawanwan ed saray “karnero” to natan.
Saray Punton Nonoten
◻ Akin ya agbidbiren na saray Tasi nen Jehova so anggan siopan too a bilang pangulo ra?
◻ Panon so panguusar nen Kristo ed masanton espiritu a mangiwanwan ed inmunan Kristianon kongregasyon?
◻ Panon so panguusar nen Kristo ed saray angheles diad impangiwanwan ed inmunan-siglon Kristianos?
◻ Panon so panguusar nen Kristo ed nanengneng a mananguley ya ulop diad panangiwanwan ed kongregasyon to ed dalin?
◻ Panon so personal a pangiwawanwan nen Kristo ed saray bengatla no maminsan?
[Mapa ed pahina 9]
(Parad aktual a format, nengnengen so publikasyon)
Komaduan Misioneron Biahe nen Pablo
Antiokia
Seleucia
CILICIA
Tarsus
Derbe
CAPADOCIA
PAMPILIA
GALACIA
Lystra
Iconium
Antiokia
LYCIA
ASIA
BITINIA TAN PONTUS
Troas
MACEDONIA
Filipos
Tesalonica
[Litrato ed pahina 7]]
Iwawanwan met nen Kristo so kongregasyon to diad panamegley na nanengneng a mananguley ya ulop