Kapitulo 3

Say Uley na “Prinsipe na Kareenan” ed Pegley na Kakabusol

1, 2. (a) Antoran panagpatanir a salita so imbaga nen Jesus ed sakey ya ulop na babangatan to? (b) Kasin saya so mankakaukolan na kakumberte na mundo sakbay a sikato so manuley bilang say “Prinsipe na Kareenan”?

¹ Sakbay a tuloy na insegep to ed tawen ed masulok lan 19 siglos a linmabas, say arapen ed saman a “Prinsipe na Kareenan,” si Jesu-Kristo, so angibaga ed sarayan patanir a salita ed sakey ya ulop na babangatan to: “Onla kayo sirin tan manggawa na babangatan a totoo ed amin a nasyones, a bautismoan yora ed ngaran na Ama tan ed Anak tan ed masanton espiritu . . . Tan, nia! siak so wala ed sikayo ed amin na saray agew ya angga ed kasampotan na sistema na bengabengatla.”​—Mateo 28:19, 20.

² Kasin saraman a salita nen Jesus so mankakaukolan na kakumberte na mundo sakbay na “kasampotan na sistema na bengabengatla” a ginmapo nen 1914? Andi. Natan, asingger ed sampot na sayan koma-20 siglo, say mundo na katooan so mansiasiansian arawi diad kakumberte ed kinen Jesu-Kristo a bilang Manangilaban to tan makanepegan ya Ari. Anggaman kuan, saya so ag-angabala ed kasumpalan na impasakbay nen Jehova diad saray propesiya na Biblia. Agbalot gagala na Dios a say interon mundo na katooan so nakumberte sakbay ya igapo nen Jesu-Kristo so panuley a bilang say “Prinsipe na Kareenan.” Direktan sumlang, nipasakbay a sikato so onggapon manuley ed pegley na kakabusol to.

3. Panon a say impanukoy nen Jesus ed Salmo 110 so mangipanengneng a sikato so manuley ed pegley na kakabusol to?

³ Anggan sanen sikato so wadia ed dalin, sayan katuaan so kabat nen Jesu-Kristo. Sakbay a tuloy na impatey to bilang sakey a martir, sikato so akisuppiatan ed saray relihyoson sumusumpa to tan tinukoy to so Salmo 110. Saya so nabasa tayo ed Lucas 20:41-44: “Diad saman et inkuanto ed sikara: ‘Panon ya ibaga ra a say Kristo so anak nen David? Ta si David a mismo so angikuan ed libro na saray Salmo, “Si Jehova so angikuan ed Katawan ko, Yurong ka ed nikawanan ko ya anggad pangyan ko ed saray kakabusol mo a gagatinan na saray salim.” Si David, sirin, so anawag ed sikato na “Katawan”; sirin panon a sikato so anak to?’”

4-6. (a) Panon met so pangipanengneng na Salmo 2 a si Jesus so agnakaukolan a manalagar ed kakumberte na mundo sakbay ya igapo to so panuley to bilang say “Prinsipe na Kareenan”? (b) Diad anton panaon so inkasumpal na Salmo 2:7?

⁴ Mabitar, sirin, si Jesu-Kristo, bilang say Anak nen David, so ag-onggapon manuley kayari na kakumberte na mundo. Noag ingen, sikato so onggapon manuley ed limog na kakabusol a diad kaunoran et gawaen nen Jehova a Dios ed panamegley na bakal a gagatinan na sali na nitronon Anak to. Say Salmo 2 met, ed onggendan iran salita, so mangipanengneng ed gapowan na uley to a bilang say “Prinsipe na Kareenan” ed pegley na kakabusol:

⁵ “Akin a saray nasyones so manggugulo tan saray nasyones so manuumameng na maapan bengatla? Saray arari na dalin so ontalindeg tan saray manuley so nandaragup a bilang sakey a sumpad si Jehova tan sumpad nilanaan to [Kristo to], a kuanto: ‘Pultoten tayo so impanaker da tan ipulisay tayoray lubir da ed sikatayo!’ Say mismon Sakey a manyudyurong ed katawenan so onelek; si Jehova a mismo so mamalaw ed sikara. Diad satan a panaon et sikato so mansalita ed sikara diad sanok to tan diad ampetang ya ingongot to et sikara so guloen to, a kuanto: ‘Siak, anggan siak, so angipasen ed arik diad tapew na Sion, say masanton palandey ko.’

⁶ “Tukoyen ko so ganggan nen Jehova; imbaga to ed siak [Kristo]: ‘Sika so anako; siak, natan, so magmaliw ya amam. [Asumpal so Salmo 2:7 sanen pinaoli nen Jehova so Anak to a manlapud saray inaatey, sirin nagmaliw ya andi-anggaan ya Ama ed si Jesus. (Roma 1:4)] Kerew ka ed siak, pian komon iter koray nasyones a pinagkatawir mo tan saray kasampotan na dalin a dilin kayarian mo. Sikara so misimisien mo ed tayukor a balatyang, a singano say damili na domadamili et sikara so mekmeken mo.’ Tan natan, O arari, agamilen so pakatebek; komon sikayo so napetek, O uko-ukom na dalin. Manlingkor ed si Jehova a tekep na takot tan manggayaga a tekep na panggiwgiw. Anguban so anak, pian Sikato komon so agnasanokan tan sikayo komon so agnatawtaw a manlapud dalan, lapud say sanok to so onliab a magmainomay. Maliket ya amin iraman so mansalimbeng ed sikato.”

7. Anton impanukoy ed Salmo 2 so ginawa na saray apostoles nen Jesu-Kristo ed kayari na agew na Pentecostes?

⁷ Unong ed Gawa 4:24-27, saray apostoles nen Jesu-Kristo so anukoy ed sayan komaduan salmo kayari na agew na Pentecotes, 33 K.P.: “Sikara ed inkasaksakey so angitagey na saray boses da ed Dios tan kuan da: ‘Soberanon Katawan, sika so Sakey a nanggawa na tawen tan say dalin tan say dayat tan amin a bengatla ed sikara, tan angibaga ed panamegley na masanton espiritu diad sangi na ateng min David, say aripen mo, “Akin a saray nasyones so manggugulo tan saray totoo so manmorekdek ed saray maapan bengatla? Saray arari na dalin so tinmalindeg tan saray manuley so nandaragup a sumpad si Jehova tan sumpad nilanaan to.” Anggaman kuan, si Herodes tan si Pontio Pilato a pati saray totoo na nasyones tan diad saray totoo na Israel so diad tua et nandaragup a nankakasakey ed sayan syudad a sumpad masanton aripen mon si Jesus, a nilanaan mo.’”

Manunan Kasumpalan na Salmo 2

8. (a) Kapigan so inkagawa na inmunan kasumpalan na Salmo 2:1, 2? (b) Nanlapulad kapigan so kagagawa na manunan kasumpalan na Salmo 2?

⁸ Say taon 33 nen inmunan siglo so akanengneng ed inmunan kasumpalan na saraman a mapropetikon salita na Salmo 2:1, 2. Saya so misiglaotan ed toon Jesu-Kristo ed dalin. Sikato so alanaan ed masanton espiritu nen Jehova diad samay panaon na impamautismo nen Juan a Managbautismo ed sikato. Balet say manunan kasumpalan na Salmo 2 so nagagawa nanlapulad impanampot na Panaon Hentil nen taon 1914. (Lucas 21:24) Mabiskeg ya apekderan a “saray aturon panaon na nasyones,” a ginmapo ed inmunan inkaderal na syudad na Jerusalem nen 607 K.K.P., so anampot nen 1914.a Insan say dageyem na patey so nipaknol a para ed saray nasyones na sayan mundo, a pati saraman so wala ed Kakristianoan.

9. Anto so agawa diad inmunan inkaderal na Jerusalem nipapaakar ed Panarian na Dios a singa inrepresenta na matoor a linya nen Arin David?

⁹ Diad inmunan inkaderal na Jerusalem, ed panamegley na saray taga Babilonia, say Panarian nen Jehova a Dios ed nasyon na Israel, a singa inrepresenta na maarin linya nen Arin David, so anampot. Nanlapulad saman, saray Judios ed laman so andian na sakey ya ari ed sikara ed linya na maarin abung nen David. Balet say Panarian na Sankatageyan a Dios ed saray lima na kapolian nen David, ya akigawaan nen Jehova na sakey a sipanan a para ed andi-anggaan a Panarian ed linya to, so ag-akatikleb ed dalin lawas.

10, 11. (a) Anto so imbaga na Dios ed panamegley na propeta ton Ezequiel no nipapaakar ed trono nen David? (b) Siopa so sinmabi a walaan “na legal a pankanepegan” ed trono nen David? (c) Anto so imbaga na ulop na saray Judios sanen impresenta to so inkasikato a bilang say legal a mananawir?

¹⁰ Diad ari na kadaanan a Jerusalem, sakbay a tuloy na inmunan inkaderal to, tinenyeg nen Jehova si propeta ton Ezequiel a mangidirihe ed sarayan salita: “No nipaakar ed sika, O asugatan na makapatey, marelmeng a pangulo na Israel, a saray agew to so sinmabi ed panaon na inkauges ed anggaan, saya so imbaga na Soberanon Katawan a Jehova, ‘Iyalis mo so mitra, tan ekalen mo so balanget. Saya so aliwa lan onia. Ipaatagey mo so abeba, tan iyabebam so atagey. Deralen ko, deralen ko, deralen ko. No nipaakar ed saya met, sikato so peteg ya agkayarian na siopa ya anggad onsabi so walaan na legal a pankanepegan, tan iter ko ed sikato.’”​—Ezequiel 21:25-27.

¹¹ Say sakey a walaan “na legal a pankanepegan” so sinmabi ed persona nen Jesu-Kristo, tan say linya na kapolian to a manlapud si David so nikurit ed Mateo 1:1-16 tan Lucas 3:23-31. Sikato so inkalapagan a nibagan “say Anak nen David.” Diad agew na mananalon impankabayo to ed Jerusalem, a nankabayo ed sakey ya asno diad kasumpalan na propesiya, saray manliliket ya ulop na saray Judios ya angulop ed sikato tan saray apostoles to so kinmelyaw a sisasayaksak: “Ilaban mo, pikasi mi, say Anak nen David! Bendito so onsabi ed ngaran nen Jehova! Ilaban mo, pikasi mi, diad saray katagyan ed tagey!”​—Mateo 21:9.

“Say Anak nen David” So Nitrono ed Tawen

12. Sanen anampot so Panaon Hentil nen 1914, iner so nitronoan nen Jesu-Kristo, bilang permanentin mananawir nen David?

¹² Say 2,520 taotaon ed panggatin-gatin na saray Hentiles ed Panarian na Dios diad saray lima na abung nen David so angangga nen 1914. Insan sinmabi so panaon a para ed si Jesu-Kristo, “say Anak nen David,” pian nitrono, aliwan dia ed mangaraldalin a trono, noagta diad sankatageyan a katawenan ed nikawanan a lima nen Jehova a Dios!​—Daniel 7:9, 10, 13, 14.

13. (a) Nanlapulad anton petsa a say taon 1914 so nituro lan asakbay a bilang say anggaan na Panaon Hentil, tan diad panamegley na siopa? (b) Anto so awawey na saray nasyones na dalin ed balobalon nitronon “Anak nen David”?

¹³ Satan a makatantandan petsa so nituro lan asakbay nanlapulad 1876 na saraman so nikasakey ed Watch Tower Bible and Tract Society. Balet saray nasyones na dalin, anggan saraman so walad Kakristianoan, so agmalabay a mamidbir ed satan a bilang say panaon na pangiyawat da ed saray mangaraldalin ya inkasoberano ra ed balobalon nitronon “Anak nen David.” Agda binidbir a bebembenan to so inter-na-Dios a kanepegan na inkasoberano ed interon dalin, a sikato so gagatinan nen Jehova a Dios. (Mateo 5:35) Impanengneng da so pirmin impangipulisay da ed makanepegan ya ari diad impibiang da ed inmunan guerra mundial.

14. (a) Diad interak na Guerra Mundial I, anton awawey so impatnag na nasyones ed saraman so Kristianos a nikasakey ed Watch Tower Society? (b) Nisesengeg ed saya, anto so ituturo na sankamundoan a kipapasen?

¹⁴ Ed amin na saray manbabakal a nasyones, saray dedikadon Kristianos a nikasakey ed Watch Tower Society so nisilong ed mabiskeg a kapairap diad panaynan da ed desisyon dan mansiansian bulos a manlapud kasalanan-ed-dala. Agda atalosan ed saman diad sankagnapan a sukat a para ed Kristianon neutralidad. Say propesiya “na Anak nen David,” si Jesu-Kristo, ed saray babangatan to nipaakar “ed konklusyon na bengabengatla” so makapautot a tinmua: “Sikayo so magmaliw a puntirya na panggula na amin a nasyones nisesengeg ed ngaran ko.” (Mateo 24:9) Sayan panggula so agpinmuyapoy nanlapulad impanampot na Guerra Mundial I. Nisesengeg ed sarayan makabaliksan a katuaan na modernon awaran, anto so ituturo na sankamundoan a kipapasen? Saya: Say “Prinsipe na Kareenan” so manuuley ed pegley na kakabusol a wadian mismo ed dalin!

15. Anto so agawa ed si Satanas a Diablo tan saray demonyon armadas to sanen tinmerak so bakal ed tawen, tan diad anton taon so impanampot na saray nansumpalan?

¹⁵ Say Makapanyarin-amin a Dios so angitarok ed insipan a Mesianicon Panarian ed inkianak diad aturon panaon to anggaman ed amin na saray kakabusol a wala ed tawen tan diad dalin. Ipapanengneng na Apocalipsis 12:1-9 a kayari na inkianak na ‘ugaw-laki’ a Panarian ed katawenan a nanlapud panag-anakan na singa-asawan-biin organisasyon nen Jehova, a singa panangibaga, et tinmerak a tampol so bakal ed tawen a mismo. Saray masanton katawenan so aliwa lan pasen a para ed simbolikon dragon, si Satanas a Diablo, tan saray demonyon angheles to. Diad sayan bakal, agnanengneng na saray mata na totoo, say maarin naikdan na pakayarin “Anak nen David” so akibakal a nambiktorya tan imbantak to si Satanas a Diablo tan saray demonyon ulop to a nanlapud katawenan tan sikara so inkulong to ed kaliberliber na mangaraldalin a globo tayo. Sayan inkiyurak na satanicon puersa so mapatnag a sigpot ya asumpal nen 1918, say taon sanen anampot so Guerra Mundial I.

Nipaabeba, say Diablo So Akibakal

16, 17. (a) Sumpad siopa so akibakalan na nipaabeban Satanas a Diablo? (b) Siopa so pangitutuloyan to ed sayan pibabakal?

¹⁶ Say nipaabeban Satanas a Diablo, say simbolikon dragon, so nagkalautlan sisasanok natan ed singa-asawan-biin organisasyon nen Jehova a Dios. (Apocalipsis 12:17) Sirin sikato so masebeg ya akibakal ed saray nailalak-ed-espiritun nakdaan na dedikadon Kristianos a walaan na pakapatnagan a sikato so espiritual ya ina ra.​—Galacia 4:26.

¹⁷ Si Satanas so akibakal met ed “arum a karnero,” a situtulok a mikikimey ed alanaan a nakdaan diad panagtasi ed inkianak na Panarian. (Juan 10:16) Agto lambengat uusaren iray nipaabeban demonyon puersa, natan ed kaliberliber na dalin, noagta uusaren to met so nanengneng a kabiangan na organisasyon to diad pangitarok na sayan pibabakal a sumpad nakdaan tan say “arum a karnero.”

18. (a) Anggaman say Diablo so masebeg a mibabakal a sumpad alanaan a nakdaan tan saray kakaiba ra, anton mananalimbeng a puersa so wala ed sikara? (b) Anton nengneng na uley na “Prinsipe na Kareenan” so manasingger la ed anggaan to?

¹⁸ Say uley na “Prinsipe na Kareenan” ed pegley na saray kakabusol to dian mismo ed dalin so manasingger la ed sampot to. Ginawa to so sankaabigan a panangasikaso ed kipapasen. Agew tan labi et saray matoor ya angheles to so akatalindeg a maniimano, akaparaan a mangawat na maarin ganggan a manlapud sikato tan onkiwas ed saratan. Sikara so manseserbin mananalimbeng a puersa a para ed alanaan a nakdaan tan saray kakaiba ra, say “baleg ya ulop” na “arum a karnero,” legan a saraya so mantutultuloy a manlilingkor ed saray intereses na Panarian kaleganan na sayan maples-nakekesayan a panaon sano say “Prinsipe na Kareenan” so manuley ed pegley na kakabusol to.​—Apocalipsis 7:9.

[Paimano ed leksab]