Kapitulo 5
Pakaliwawaan a para “ed Konklusyon na Sistema na Bengabengatla”
1. Para ed sayan “konklusyon na sistema na bengabengatla,” anton makatantandan kasal so impasakbay na “Prinsipe na Kareenan,” tan diad anton parabolo?
Nipaakar “ed konklusyon na sistema na bengabengatla,” say “Prinsipe na Kareenan” so angibaga ed Mateo 24:38 a walaray “lalakin mangasasawa tan bibiin miasasawa.” Balet legan na parehon panaon, onggapo ed tawen so sankabalgan a kasal ed amin. Sikato so kasal ya atukoy ed ilustrasyon nen Jesus ed samploran manag-awit na silewan, samploran mamarikit.—Mateo 24:3; 25:1-12.
2. (a) Diad anton oras na agew so kagawa na sayan parabolikon kasal? (b) Anto so ontumbok ed bansal, tan panon so kiiter na liwawa?
2 Say eksena na sayan kasal so diad Pegley Bukig. Nagawa ed aralem a labi, mansumpal ed pegley labi. Say bansal na nobya tan say nobyo to so nagawan ununa tan tumboken na sakey a libot a mamaarap ed abung na panponsiaan. Say dalan so agniliwawaan na saray silew ed kalsada. Say liwawan inter na saraman so mibibiang ed libot, tan saray totoo so makabantay ed idalan na libot, a kaliktan so panliket na balon kasal.
3, 4. (a) Siopa so interesado diad libot ya ontumbok, tan diad antoran panagparaan? (b) Say kasumpalan na sayan parabolo so mangarum na prueba ed anton katuaan? (c) Makapanliket itayo no gawaen tayo so anto?
3 Tua ed liknaan da ed inkabii, saray mamarikit so interesado ed bansal. Sirin, diad panmamartsa, samploran mamarikit so manalagar ya anggad say libot na kasal so makasabi ed pasen da. Kaliktan dan liwawaan so okasyon tan nisengeg ed saya et amin da so mangitarok na saray sankaegnaan a panagsilewan, balet limara lambengat ed sikara so walaan na reserban abasto na panagsilewan a larak. Sarayan limara so makabat a mamarikit. Say kasumpalan na sayan parabolo so nepeg a mamainteres ed sikatayo natan, lapud unong ed si Jesu-Kristo, pekderan ton nagkalalo a sikatayo so wala ed konklusyon na sayan daan a sistema.—Mateo 25:13.
4 Makapanliket itayo no sikatayo so makabat tan natebek tayo so kasumpalan na sayan kasal ed amin na saray kasal tan diad saray katambayan to! Siopa natan so apalaboan a naawat ed ponsia? Kasin wala ed sikatayo? Nengnengen tayo!
5. Anto so manggawa na piduma ed limog na saraman so manugyop na samploran mamarikit, tan anto so agawa legan na impanpaleen na nobyo?
5 Say ilustrasyon ya inter nen Jesus ed samploran mamarikit so walaan na kipaakaran “ed panarian na katawenan,” say sankamundoan a gobierno diad kabendisyonan na amin a katooan. Sirin intuloy ya imbaga nen Jesu-Kristo: “Say panarian na katawenan so magmaliw a singa samploran mamarikit ya angala ed saray silewan da tan linman mangabet ed nobyo. Limara ed sikara so makulangkulang, tan limara so makabat. Lapud saray makulangkulang so angawit ed saray panagsilewan da balet ta ag-ira angawit na larak, bang saray makabat so angitarok na larak ed saray panagkargaan da pati saray silewan da. Legan a say nobyo so nampaleen, amin da so nantemeg tan naugip.”—Mateo 25:1-5.
6. (a) Siopa so iretrato na samploran mamarikit? (b) Akin a say sakey a nobya so ag-asalambit ed parabolo?
6 Natan siopa so iyilustra na saraman a samploran mamarikit? Inyilustra ra iray prospektibon membro na nobya na espiritual a Nobyo, si Jesu-Kristo. Andi-duaruwa a nisengeg ed sayan rason a say sakey a nobya so ag-asalambit ed ilustrasyon nen Jesus; noagta say nobyo lambengat so ompatnag. Sirin, anggapo so kagutgot nipaakar ed paliwawa, a singano saray mamarikit so angiretrato na sananey nin klase.
7. Legan na anton peryodo so ompatnag a say Nobyo so nampaleen diad isabi to a para ed nobya, tan akin?
7 Say pikasakey na saray prospektibon membro na nobyan klase ed mangatatawen a Nobyo ra diad kasal so ag-agawa, a singa inilaloan, diad impansara na “aturon panaon na nasyones” nen 1914. (Lucas 21:24) Makatunongan, diad sikara et pinmatnag a singano say Nobyo so nampaleen ed isabi to, anggaman say kiwawala to ed mangatatawen a Panarian so agawa nen 1914. Saraman a makapaermen a taon na Guerra Mundial I so nansumpal a singa ambilunget a labi diad asagmak na mamarikit a klase.
8. (a) Panon a, piguratibon panagsalita, say impantemeg tan inyugip ed biang na saray mamarikit so agawa? (b) Diad anton gagala a say Nobyo so sinmabi ed templo, tan akin a saya so manasaglawi ed nobyan klase?
8 Piguratibon panagsalita, say pantemeg tan inyugip diad biang na saray mamarikit so agawa. Say mapublikon panagpulong ed maong a balita ed onsasabin sanlibon taon ya uley nen Kristo diad kabendisyonan na amin a katooan so manampot. Manlapud unor a taon na Guerra Mundial I, say agawa so sankakanaan a peryodo na panangukom ed saraman a piguratibon mamarikit. Saya so lapud say manuuley ya Arin Jesu-Kristo so sinmabi la ed espiritual a templo. Diad insabi tod’man, inggapo to so panangukom ta pian linisan to raman so aturo a mangisaklang na serbisyo ed templo diad si Jehova a Dios. (Malaquias 3:1-3) Saman so panaon na kipatnag to sano, bilang say mangatatawen a Nobyo, et nigeter lan pangawat to ed tawen diad saray naabobonan a membro na nobyan klase a diad saman et inatey la.
9. Kapigan so impagmaliw a panaon na saray mamarikit a klase a naliing a manlapud inkainaktibo, tan akin?
9 Nen 1919, kayari inkibulos na saray waloran prominentin membro na Watch Tower Bible and Tract Society diad agmakatunongan ya inkipangaw, saman so nigeter a panaon ed saray mamarikit a klase a siansia nin mabilay ed dalin a napaliing a manlapud ugip na inkainaktibo ra. Say kimey na sankamundoan a pakaliwawaan so akaparaan ed arapen. Saman so panaon ed sikara, a tekep na maliwawan silewan, a pangabet ed Nobyo, a sinmabi ed espiritual a templo. Saya so onia pian saray totoo ed amin a nasyones so onagus ed “abung nen Jehova” a nitandoro ed labas na saray tuktok na palandey, a singa panangibaga.—Isaias 2:1-4.
Panangiparaan ed Saray Silewan da
10. Anto so iretrato na larak ya inala ed kargaan na saray makabat a mamarikit?
10 Saray makabat ed mamarikit a klase so angitarok na saray abasto na panagliwawan larak diad saray kargaan da. Agda asagmak so impanabala diad impangarga ed saray silewan da. Say larak ed pakaliwawaan so angiretrato ed managliwawan Salita nen Jehova tan say masanton espiritu to. Sirin, anto so iretrato na larak ya inala ed saray kargaan na makabat a mamarikit? Say karakel na reserba ed espiritu nen Jehova so mangiter na liwawa diad nisulat a Salita to tan say alanaan a nakdaan a nailalak ed espiritun babangatan na Nobyo so wala ed inkasikara sanen say kayari-bakal a kimey na sankamundoan a pakaliwawaan nipaakar “ed panarian na katawenan” so niganan onggapo.
11. Antoray simbolikon kargaan ya angikargaan ed larak?
11 Saray kargaan so angiretrato ed piguratibon makabat a mamarikit a bilang akankayarian na simbolikon larak na pakaliwawaan. Agkabaliksan na saya a saray mamarikit a klase so inmunan alanaan ed saman na espiritu nen Jehova. Andi, saray mamarikit so agnanlana ed inkasikara na espiritu to. Si Jehova so nanlana!—Isaias 61:1, 2; Lucas 4:16-21.
12. (a) Anton propesiya nen Joel so nigeter lan nasumpal ed saray makabat a mamarikit? (b) Kapigan so insabi na panaon na pangisinag da ed liwawa diad panamegley na saray silewan da?
12 Diad panuporta ed inkapabtangan da ed baleg a kimey na panliwawa ed mundo nipaakar “ed panarian na katawenan,” saray makabat a mamarikit so apalaboan diad kasumpalan na Joel 2:28, 29. Onia so impangaon nen apostol Pedro ed saraman a bersikulo: “‘Tan diad saray kaunoran ya agew,’ inkuan na Dios, ‘Ikalbok so arum ya espirituk ed amin a nengneng na laman, tan saray anak mon lalaki tan saray anak mon bibii so manpropesiya tan saray walad kalangweran mon lalaki so makanengneng ed saray pasingawey tan saray mamasiken mo so mankugip na saray kugip.’” (Gawa 2:17) Sirin nanlapulad 1919 a nampatuloy et saray makabat ed piguratibon mamarikit a klase so mangala ed saray paraan na panagliwawa ra, saray simbolikon silewan da—ed inkasikaran dili. Saya so ginawa ra pian ipanabang so pakaliwawaan ed amin na saraman so wala ed espiritual a kabilungetan. Lapud nengneng na bilay a pambibilayan da ed silong na impluensya na Salita na Dios tan espiritu, sikara so nagmaliw a “silesilew ed mundo.” (Filipos 2:15) Sirin sikara so anumbok ed saray bakat na Nobyo legan ya iparaan ton alaen so amin a membro na nobyan klase ed inkasikato diad mangatatawen a Panarian kayari na impatey to ed dalin.—Mateo 5:14-16.
Saray Pansumpalan na Espiritual a Kakulangkulangan
13. Panoy inkiwas na saray makabat a mamarikit diad kerew na saray makulangkulang a mamarikit?
13 Anto, natan, so nipaakar ed saray makulangkulang a mamarikit a klase? Intuloy nen Jesus ya imbaga: “Inkuan na makulangkulang ed makabat, ‘Ikdan yo kami na arum a larak yo, lapud saray silewan mi so nanaerep la.’ Say makabat so inmebat ed saray salita, ‘Anganko ta anggapo so magenap ed sikami tan sikayo. Onla kayo, ingen, ed saraman so manlalako tan manaliw kayo.’”—Mateo 25:8, 9.
14. Akin a saray mamarikit ya agmalabay a mangipanabang na larak da so makabat imbes a masiblet?
14 Saramay agmalabay a mangipanabang ed saray makulangkulang so aliwan masiblet, makabat lambengat. Sikara so mansiasiansia diad panangitarok ed orihinal, maabig a gagala ra diad panliwawa ed ambilunget a kaliberliber a nisesengeg ed Nobyo. Sikara so agbalot obligadon mikumpromiso, diad pamaraiset da ed dilin karakel na masanton espiritu nen Jehova ta napalugaran da raman so espiritual a makulangkulang. Saratan a makulangkulang so agnamparaan ya onloob a tampol diad pribilehyo na serbisyon nilukas ed sikara nen 1919.
15. (a) Sanen nilukas so panaon na kareenan, siopa ed limog na saray mamarikit a klase so ginmapon mangipatnag na saray tendensya ed espiritual a kakulangkulangan? (b) Akin a saray makabat a mamarikit so agmakayarin ontulong ed saray espiritual a makulangkulang a mamarikit?
15 Legan a say panaon na kareenan so nilukas, arum ed saraman so nibabagan dedikado, bautismadon kaulop so ginmapon mangipanengneng na espiritual a kakulangkulangan. Kayari impatey na inmunan presidente na Watch Tower Society, si Charles Taze Russell, sikara so aglinmoob a sigpot ed espiritu na ibubulaslas a kaiba so nanengneng ya instrumento nen Jehova a Dios ed leksab na balon presidente to, si J. F. Rutherford. Saray kapusoan da so aliwa ran peteg a mitukoyan ed saray paraan na kagagawa na saray bengatla. Impanengneng da so kakulangan na apresasyon ed nengneng na pidedeneng nen Jehova ed totoo to. Sirin, saraman so singa makabat a mamarikit so agmakapangisekar na peteg ya espiritu na impapuson kooperasyon ed sarayan makulangkulang ya angisian na inkasikara a nagkalalo.
16. Panon a say espiritual a kakulangkulangan so agawan pinmarungtal diad biang na saray makulangkulang a mamarikit?
16 Sirin omparungtal so espiritual a kakulangkulangan. Panon? Diad panamegley na insaew ed pakawalaan na simbolikon larak diad panaon na pankaganatan sanen wala so pirmin pankaukolan ed espiritual a pakaliwawaan legan ya onaabante iray balon nagagawa, mangipapanengneng a say Nobyo so sinmabi la. Sirin sikato so panaon na impaway dan pangabet ed sikato a say silewan so masmasnag a manliliwawa, ed piguratibon panagsalita. Balet imbes, saramay miulibay ed saray makulangkulang a mamarikit, a saray silewan da so onkukuyep, so sinmian ed saray makabat.
17. Anton agla naapiger a kabalang so sinagmak na saraman so inretrato na makulangkulang a mamarikit, a singa impanengneng na Mateo 25:10?
17 Agaylan agla naapiger a kabalang so nagawa sano say sakey a mangibabagan nibilang ed limog na saray mamarikit a klase so makasaew ed agla naulit a pribilehyo tan pankanawnawa na pakaabrasa ed espiritual a Nobyo, si Jesu-Kristo! Say ontan a pakabalang so sagmaken na saray makulangkulang ed limog na modernon-agew a mamarikit, a singa impanengneng na malaknab niran salita ed ilustrasyon nen Jesus: “Legan a sikara so linman manaliw, say nobyo so sinmabi, tan saray mamarikit ya akaparaan so linmoob a kaiba to diad piesta na kasal; tan say puerta so akaputan.”—Mateo 25:10.
18. (a) Diad anton pribilehyo so sinmaew ya akikasakeyan na saray makulangkulang a mamarikit ed sayan siglo? (b) Akin a saray makulangkulang so apaneknekan ya atrasadon tuloy diad pibiang ed libot na kasal tan diad iloob ed piesta?
18 Agaylan makapasinagem ya eksperiensia a sagmaken na modernon-agew iran makulangkulang a mamarikit! Diad sayan sankabilungetan a peryodo ed amin ya awaran na too, sikara so sinmaew a mibiang ed kimey na panagliwawa ed saraman so akayurong ed espiritual a kabilungetan tan diad anino na patey “ed bakal na baleg ya agew na Dios a Makapanyarin-amin”! (Apocalipsis 16:14) Anggapo so larak ed saray piguratibon silewan da a manliwawa ed dalan da, sikara so tinmaynan tan sikara so linma ed dalan da diad pegley-labin kabilungetan. Nisengeg ed saya et sikara so anggapo ed panaon a manumbok ed saray bakat na Nobyo diad magayagan libot ya ondalan ed puerta tan onloob ed sankasnagan ya aliwawaan a piesta na kasal. Abalang da so pakabidbiran ed sikara a bilang patumbok a sikara so nidasig diad pikasal ed sikato ed mangatatawen a Panarian. Sikara so agnalmoan ya “akaparaan” diad nidesignan panaon. Agaylan pasakbay ya ehemplo so inter da!
19. Anton eksperiensia so manaalagar ed sikatayo diad panumbok ed sayan pamaakaran diad kasampotan to?
19 Sayan makapautot a katuaan so mabitar a niretrato ed unor a kabiangan na ilustrasyon nen Jesu-Kristo, say Nobyo, nagkalautla ed sikatayon manbibilay ed “konklusyon na sistema na bengabengatla.” Sirin tumboken tayon nagkalalo so pamaakaran! Say makasagyat-gayagan pakaliwawaan so manaalagar ed sikatayo diad panggawa na ontan, a singa nanengneng tayo ed ontumbok a kapitulo.