Tongtongen So Nipaakar ed Gloria na Inkaari na Dios

“Tongtongen da so nipaakar ed gloria na inkaarim, tan salitaen da so nipaakar ed pakapanyarim.”​—SALMO 145:11.

1. Manuna, akin a sikatayo so pinalaboan nen Jehova na panagsalita?

SI Jehova so walaan na gagala diad impangipalabo to na panagsalita ed sikatayo. (Exodo 4:11) Manuna, saray bibil tayo so nayarin “mangibesngaw na dayew” ed sikato. (Salmo 119:171; 172) A singa imbaga nen salmista David: “Amin na saray gawam so mangidayew ed sika, O Jehova, tan saray matoor mo so mamendito ed sika. Tongtongen da so nipaakar ed gloria na inkaarim, tan salitaen da so nipaakar ed pakapanyarim, ya ipaamta ra ed saray anak na totoo iray makapanyarin gawa to tan say gloria na karlangan na inkaari to. Say inkaarim so sakey ya inkaari ed amin a panaon ya andi-geter, tan say pananguley mo so angga ed amin na saray ontumbok a kapolian.”​—Salmo 145:10-13.

2. Sikatayo so naragdag a “mangibesngaw na dayew” ed Dios ed antoran dalan?

² Saray alanaan a patumbok nen Jesu-Kristo tan saray kakaiba ran “baleg ya ulop” so magunaet a mangidayew ed si Jehova, say “Ari ed ando lan ando.” (Apocalipsis 7:9; 15:3) Diad panamegley na magunaet a panagaral ed Biblia a kaiba so Say Panag-Bantayan tan arum iran Kristianon palapagan a bilang katulongan, nagamoran tayo so suston pikakabat nipaakar ed Dios a singa sakey a subol na puro, makarepresko, manangiter-bilay a danum. Sirin, diad kipapasen tayo et ‘say subol na kakabatan so magmaliw a managos a kulos.’ (Uliran 18:4) Sikatayo so naragdag a “mangibesngaw na dayew” diad kabkaabungan a panagtasi tan diad arum niran nengneng na ministeryo ed lawak. Balet wala met so Makasulatan a rason a para ed impormal a panagtasi.

Makasulatan ya Akaunan Agawa

3. Ipangasin isita so sakey ya ehemplo na impormal a panagtasi ed biang nen Jesu-Kristo?

³ Say inmunan panagpulong a ginawa nen Jesus kayari na inkalanaan to na masanton espiritu et diad ayaman ton pasen, a diman et inimbitaan to si Juan, Andres, tan si Pedro. Sikara so wadman ed saman ya agew, mapatnag ya akaawat na malaem a panagtasi ed saman ya impormal a kipapasen. (Juan 1:35-42) Dia met ed silong na impormal iran sirkumstansya​—“legan ya ondaralan”​—anengneng nen Jesus si Mateo diad opisina na panagsingilan na buis tan akagamor na saray positibon resulta sanen inkuan To: “Magmaliw kan patumbok ko.”​—Mateo 9:9.

4. Anto so imbaga nen Jesus sanen mantatasi ed sakey a biin Samaritana, tan saya so angitonton ed anto?

⁴ Si Jesus so sankaabigan ya ehemplo na ‘kulos na kakabatan.’ Anggaman sikato so yinmurong a narasan tan naksawan diad abay na bobon nen Jacob ed Sychar, sikato so nantasi ed sakey a biin Samaritana a sinmabin onasol na danum. “Siopaman ya oninum ed danum ya iter ko so aglan balot napegaan,” so inkuan nen Jesus, “balet say danum ya iter ko ed sikato so magmaliw ed sikato a subol na danum a mangiter na andi-anggaan a bilay.” Sayan impormal a panagtasi so angitonton ed impanpulong nen Jesus ed sakey a grupo a sinagyat na biin ondago tan ondengel ed walan ibaga to.​—Juan 4:6-42.

5. Si Felipe ya ebanghelisador tan si apostol Pablo so angiter na antoran impormal a panagtasi?

⁵ Si Felipe ya ebanghelisador so angilugay ed onlalabas a karwahe tan nantasin impormal ed akalugan, a mamabasa ed propesiya nen Isaias. Naimbitaan ya onsapat ed karwahe, impaliwawa nen Felipe “so maong a balita nipaakar ed si Jesus” ed saman a eunokon Etiope, a say manangapresyan kiwas to so nansumpal diad inkabautismoan to. (Gawa 8:26-38) Sanen saray balor na inkipangaw nen apostol Pablo so naukbar diad sakey a baleg a yegyeg ed Filipos, sikato so nantasin impormal ed samay manangipangaw. Resulta? “Ami-amin, sikato tan say sankaabungan to so abautismoan ya andi-abala.”​—Gawa 16:19-34.

6. Say impormal a panagtasi so nayarin onkiwas ed sakey a biang ed antoran aktibidades na babangatan nen Jesus kayari na inkatupak nen Esteban?

⁶ Natan, say impormal a panagtasi so sakey a paraan na panangiyabawag ed maong a balita ed pasen a say Kristianon kimey tayo so asebelan. Anggaman sikatayo so napasegsegang, anggaman kuan, saray kapusoan tayo so managdag ed sikatayon mangitongtong na nipaakar ed gloria na inkaari na Dios. Kayari na inkatupak nen Esteban ed patey, maslak ed saray apasegsegang a babangatan so abuybuyak. Ingen, intultuloy dan inyabawag so maong a balita, tan andi-duaruwa et apisakup so impormal a panagtasi diad gunaet da ed panangipulong-ed-Panarian.​—Gawa 8:4-8; 11:19-21.

7. Sanen nipisok, anto so ginawa nen Pablo, a saya so mamalesa na anton tepet?

⁷ Say impormal a panagtasi so sakey met a dalan na pangitongtong nipaakar ed gloria na inkaari na Dios no sikatayo so nipangaw odino nipisok ed saray kaabungan tayo nisengeg ed sakit odino agpakayari. Si Pablo so nipisok ed loob na duaran taon ed leksab na Romanon guardia. Balet imbes a sikato so akespay, sikato so akiarap ed saray totoo tan “siuuyamon angawat ed amin na saramay linma ed sikato, ya impulong to so panarian na Dios ed sikara tan imbangat toray bengatlan nipaakar ed Katawan a Jesu-Kristo a tekep na sankabalgan a kawayangan na panagsalita.” (Gawa 28:16-31) Agaylan maabig ya ehemplo! No sika so nipisok a tasi nen Jehova, kasin makagawa ka na bengatlan miulibay?

8. Panon inkaepektibo so impormal a panagtasi nen Pablo?

⁸ Legan a saray guardia nen Pablo so mansasalat a panapanaon, nanduruman totoo so akadngel ed sikato ya angitongtong ed arum nipaakar ed inkaari na Dios. Maseguro itayo, anggaman kuan, a sikato met so nantasin direkta ed saraman a guardia. Epektibon tuloy iyan impormal a panagtasi a nayarian nen Pablo ya isulat: “Saray bengatla ya agawa ed siak so nansumpal ed inkiyabante na maong a balita imbes ya andi, ta pian saray balor ko so nagmaliw a kabat na lapag nipaakar ed Kristo diad limog na amin na saray Bantay a Pretoriano tan ed amin nin arum; tan maslak ed saray agagi ed Katawan, a sikara so matalek nisesengeg ed saray balor na inkipangaw ko, so amin et mangipapanengneng na lalon tepel a salitaen so salita na Dios ya andi-takot.” (Filipos 1:12-14) Singa si Pablo, no sikatayo so nipangaw tan nasibletan na saray pankanawnawa ed pormal a panagtasi, sikatayon siansia so makapangitongtong na nipaakar ed inkaari na Dios. Tan agaylan tepel so ipaliing na saya ed saray agagi tayo!

9, 10. Anton sekular ya ebidensya so wala a saray inmunan Kristianos so nantasin impormal?

⁹ Say impormal a panagtasi so kaslakan a tuloy ed limog na saray inmunan Kristianos ya anggan diad saray saginonor a taon et nayarin nibaga: “Manlapud sakey a Kristianon managsulat, nayarin diad Carthage ed ngalngalin 200, naala mi so sakey a retrato . . . [a] manasaglawi ed saray totoon sikara so edukadon tuloy. Taloran walad kalangweran ya abogado, maapit a sankaaro, so mangusar na sakey ya agew a bakasyon diad gilig na baybay. Duara so Kristiano, say komatlo so pagano. Say tongtongan da so agnambayag et nipaarap ed relihyon . . . Say salaysay ed andukey a singbatan so anampot, ‘Sikami so anempet a maliket, amin min talo. Sakey so maliket lapud sikato so sinmabi ed Kristianon pananisia, saray arum so lapud sikara so angipaarap ed sikato ed satan.’ Say sulat so agmangikukunwarin sikato so aktual ya awaran; sikato so sakey ya Apology, nen Minucius Felix. Balet irerepresenta to so nengneng na bengatla ya agawa ed limog na saray lalon apribilehyoan a totoo.” (Church History 1​—The First Advance: AD 29​—500, nen John Foster, pahina 46, 48) On, tan sayan salaysay so mangipanengneng a say impormal a panagtasi so agnarep ed limog na saray mangibabagan Kristianos ed saman a panaon.

¹⁰ Nipaakar ed saray inmunan Kristianos, nibaga met: “Wala lambengat so pirmin idaraak ed bilang na saray sinansakey a Kristianon mananisia, ya, inerman a nila ra, balanglan diad maparanay a kurang da odino inablog na panamasegsegang, impulong da si Kristo . . . Diad saraman so manggagawa ed kimey da, propesyon da, inagew-agew a kabibilay da, ed antokaman a nengneng, say paraan na pananginatnat na pananisia ra, wala so dakel.” (The Missionary Enterprise, nen Edwin Munsell Bliss, pahina 14) On, saray inmunan manangiyabawag na Panarian so nantasin pormal tan impormal.

Masakbay-a-panagnonot tan Panagparaan

11. Anto so naaralan tayo ed si Jesus nipaakar ed panangiyapasakey na imano ed katuaan na Dios?

¹¹ Singa si Jesus tan saray inmunan patumbok to, sikatayo so nepeg a mantasi ed pormal tan impormal. Say panggawa ed satan ya epektibo so mankaukolan na masakbay a panagnonot tan panagparaan. Diad panagtasi impormal odino mangiter na instruksion, tinukoy nen Jesus iray ugugaw, tagano, kawesen, manomanok, karosasan, kipapasen na panaon, tan saray okupasyon. (Mateo 4:18, 19; 6:25-34; 11:16-19; 13:3-8; 16:1-4) Sikatayo met so nayarin mangusar na ngalngalin anggan anton tema a bilang letnegan ed pangiyapasakeyan na imano ed katuaan na Dios.

12. Sano manpaplanon manbiahe, panon so nayarin pamparaan na sakey a para ed impormal a panagtasi?

¹² Sikatayo so makapantasin impormal ed saray totoon manyudyurong ed saray parke, manalalagey ed saray shopping centers, tan arum nira. Diad Atenas, si Pablo so akikatunongan ed “kada agew ed tiendaan diad saraman so wadman.” (Gawa 17:17) Balet nakaukolan tayo so manparaan a para ed impormal a panagtasi. Alimbawa, kasin sikayo so manpaplano a manbiahe ed panamegley na eroplano, tren, odino bus? Sirin mangawit na Biblia tan pigaran tracts, magasin, odino brosyur. Say pambasa ed saray Kristianon palapagan diad saray transportasyon publiko odino diad inerman a pasen so mabetbet a manelsel na tongtongan.

13. Iyilustra no panon so nayarin pangigapo yo na panagtasi ed sakey a toon matatken legan a manbibiahe.

¹³ Say makaaron panangigapo so mapatnag ya onsabin ununa. Say libron Reasoning From the Scriptures so mangisusuhiri ed saray panangigapon usaren diad lawak na ministeryo, balet arum ed saraya so nayarin malaknab ya usaren sano mantatasin impormal. Alimbawa, no legan a manbibiahe et sikayo so akayurong ed abay na matatken lan too, nayarin ikuan yo: “Say ngaran ko so   . Siak la so mannonot na nipaakar ed gagala ed bilay. Dakel a tuloy a totoo so okupado a mananap na pambilay a sikara so ngalngalin andian na panaon a manisip nipaakar ed gagala na bilay. Legan a sikatayo so ontatken ed saray taon, anggaman kuan, namoria tayo a say bilay so antiktikey tan nayarin umamengen: ‘Kasin onia lambengat so kabaliksan na bilay?’ Kasin isipen yo a say Dios so walaan na gagala ed kiwawala tayo?” Palugaran so ebat. Insan nayarian yon salitaen so nipaakar ed gagala na Dios ed katooan tan mankomento ed saray engranden bengatla a nisipan ed Apocalipsis 21:3, 4. Para ed epektibon impormal a panagtasi, nayarian yon iyaplika so arum a maabig iran punton naaralan diad saray pantitipon ed kongregasyon tan diad saray Kristianon palapagan.

Nayarin Nailaloan Iray Maabig a Resulta

14. Anton aligwas so agamoran na sakey ya agin laki diad impantasin impormal legan na sakey a biahe?

¹⁴ Singa si Jesus tan saray inmunan patumbok to, nawalaan itayo na aligwas sano mantatasin impormal. Diad pangiyilustra: Legan na sakey ya impambiahe ed eroplano, sakey a Tasi so akitongtong ed sakey ya opisyal na militar a walaan na asawa ed loob la na 20 taon. Say asawa na saman a laki so mandudruga, ginetma to so manbitkel ed pigara lan danay, tan ngalngalin sikato la so manaynan ed sikato a miamong ed sakey a lakin malalangwer. Sanen sinalita na Tasi so Makasulatan a tulong a nanaawat to a manlapud The Watchtower tan say kaiba ton palapagan ya Awake!, say opisyal so nansuskribe tan nilabay ton saray magasin so nipawit ed akulaw to. Nadngel na arum iran pasaheros so imbaga na Tasi. Resulta? Akin, lapud diad impantasi ed saman ya okasyon et akala na 22 suskripsion tan akapangipalima na 45 magasin tan 21 libro!

15, 16. (a) Mangiter na saray ehemplo na maaligwas a panagtasin impormal diad saray katrabahowan. (b) Anto so isuhiri na sarayan resulta ed sikayo?

¹⁵ Kumusta so nipaakar ed panagtasin impormal ed saray katrabahowan? Sakey ya agin laki so angitilak na saray kopya na palapagan tayo ed banyo diad pasen na impleyo to. Binasa na sakey a katrabahowan iray magasin, inanap to so agin laki, tan sikato so nansuskribe. Say laki so angawat met na panangiyaral na Biblia tan tinaynanan to la so marutak a kabibilay to, balet say akulaw to so ontaynan ed abung kapag no nasalambit so ngaran na Dios. Sanen nilabay la na laki so pandemiti ed lokal ya iglesia, say ministro so linman mangisingbat ed saya, a say asabian to lambengat ed abung et say asawa na saman a laki. Say kakulangan na pananisia na ministro tan saray katilaan to nipaakar ed saray Tasi nen Jehova so angigtot ed bii, lapud anengneng ton say masiken to so nampasimbalo. Imbaga to laingen ed ministro: “Nayarian mo so mangisulat na sakey a sertipiko na pandemitik tan saray anak ko met!” Sinmabi panaon, sayan laki tan say asawa to so nagmaliw a bautismadon Tastasi.

¹⁶ Taotaon lan linmabas, sakey ya agin lakin manaayam natan ed Estados Unidos so nantasin impormal ed sakey a katrabahowan diad Inglatera tan intagar to so lakin walad kalangweran a manbantay ed sakey a pelikulan inyareglo na saray Tasi nen Jehova. Talumplo-tan-sakey a taon ed saginonor, say agin laki so akaawat ed sayan sulat: “Labay kon ibaga ed sika natan a say panagtasin inter mo [ed samay lakin walad kalangweran] so nambunga, ta diad ngalngalin duay taon ed saginonor et sananey ya agin laki so akitongtong ed sikato, pinalimaan to na magasin, tan intagar to ed lokal a Kingdom Hall . . . Sikato so nagmaliw a sakey a Tasi, abautismoan nen 1959, tan natan et sakey lan matatken ed kongregasyon to . . . Kayari na 14 taon et say akulaw to so nagmaliw a sakey a Tasi tan abautismoan met. Duaran taon ed saginonor et say anak ton bii so abautismoan tan sikato la natan so sakey a regular payunir ed North Derbyshire . . . Manlapud saman a samet ya impantasin ginawa diman ed Ashford, saman a too, asawa to tan anak ton bii, sakey a kapinsan tan say anak ton bii, asawan laki tan limaran ananak, tan sakey ya anak na sananey ya anak a bii na kapinsan so amin et nagmaliw a Tastasi. . . . Labay ko so misalamat ed sika, Ted, a tuloy, ta siak iman so managpaalagey na asero, tan say estoryan insalaysay ko so dilin estoryak diad impantasim ed siak tan no panon so nansumpalan ton amin.”

17. Antoran pankanawnawa ed impormal a panagtasi so wala ed saray malalangwer ya ariripen nen Jehova?

¹⁷ Sikayoran malalangwer ya ariripen nen Jehova so nawalaan met na maabig a teritorya ed panagtasi​—saray kaklase yo tan mamaestro. Kasin sikayo so mangiter na impormal a panagtasi diad tibukelen yon sulat, insangi iran repaso, tan arum nira? Bilang sengegan a materyal a para ed tinibukel a sulat, sakey ya estudyante ed high school a taga Ecuador ya iyaaralan na Biblia so angusar ed Agosto 22, 1985, ya Awake! ya analaysay ed saray serye ed “Hiroshima​—Has Its Lesson Been Lost?” Say komposisyon to so akasagyat ed komendasyon na saray huises diad sakey ya internasyonal a laslasan tan nansumpal ed libren impanbiahe to ed Hapon. Siempre, say panalo ed kontis so aliwan gagala na Kristianon palapagan. Balet saya so mangiyilustra ed kablian na ontan a literatura tan say inkaepektibo na panangiter na panagtasi ed kirayewan na Dios ed eskuelaan.

18. Anto so nansumpalan diad impangiter na antikey a panagtasi ed sakey a toon manaanap na sakey a kuarton abangan?

¹⁸ Nisengeg ed pinansyal iran rason, kinaukolan na sakey ya agin bii so pangabang na sakey a kuarto. Diad impakaawat to ed sakey a panangusisa ed telepono nipaakar ed satan, imbaga to ed biin tinmawag a sikato so sakey ed saray Tasi nen Jehova tan agto nayarin abuloyan so karutakan ed ayaman to. Saray bisita so nakaukolan ya ontaynan a masakbay, tan saray lalakin bisita so nakaukolan a nanengneng ed amin a panaon. Say tinmawag so nanumameng, insan inkuanto: “Siak so nanaral sanen siak ni so sakey a tin-edyer, balet satan so ag-anagyat ed siak. Kanian siak so nampatuloy ed kolehyo.” Atepetan no kaliktan ton itultuloy so panagaral to ed Biblia, inmebat, “On.” Asabi panaon, saman a tinmawag, say ina to, tan say agi ton bii so nagmaliw a dedikadon ariripen nen Jehova​—amin et lapud sakey ya agin bii a nantasi ya impormal.

19. Panon so nagmaliwan na sakey a panagtasin impormal diad kipapasen na sakey a bii ed Bahamas?

¹⁹ Diad Bahamas et sakey a Katolikon bii so ginonigon na konsiensia to lapud sikato so agla mimimisa ed loob na limaran taon. Kanian diad sakey a mauran a kabuasan na Simba, sikato so binmuat ya onla ed simbaan. Diad dalan et sinmabi so taloran Tasi, ya angimbita ed sikaton milugan ed sikara​—tan niiter so panagtasi. Sanen sikara so akasabi ed simbaan, kinaliktan to ni so ondengel na malaem tan sikato so nansiansia ed sikara legan a sikara so nankurang a manamar ed sakey ya iyaaralan na Biblia. Adalanan da lamet so simbaan, ingen nilabay to ni so ondengel tan sirin nantultuloy ya angga ed Kingdom Hall. Say paliwawa ed publiko so diad mismon tema ya asingbat ed kotse. Nigapo so panangiyaral na Biblia ed saman a bii, a pinataynan to la so lakin akiamongan to (say ama na apatiran anak to), tan sikato so abautismoan legan na sakey a kumbension ed Nassau nen 1986. Agaylan sikato so maliket a wala so nantasi ed sikato ya impormal!

Itultuloy a Tongtongen So Nipaakar ed Inkaari na Dios!

20. (a) Panon so nepeg a panmoria ed impormal a panagtasi no nipaakar ed lawak na ministeryo? (b) Anto so nisuhiri no say sakey so masuyat a mantasi ed impormal?

²⁰ Say panagtasin impormal so aliwan kasandi na maparanay a ministeryo ed lawak na saray Tasi nen Jehova. Say panagpulong ed kabkaabungan so malinlinew a Makasulatan tan epektibo. (Gawa 5:42; 20:20, 21) Anggaman kuan, say impormal a panagtasi so mabunga, tan saray ariripen nen Jehova so nepeg a mibiang ed satan. Inerman a walaray totoo​—kakanayon, kaeskuela, katrabahowan, arum ni​—walaray pankanawnawan panongtong ed gloria na inkaari na Dios. Sirin ag-aabuloyan so takot nisay baing a manebel ed sikayo. (Uliran 29:25; 2 Timoteo 1:6-8) No sikayo so masuyat a mantasin impormal, akin ya agmanpikasi a singa ginawa na saray apasegsegang a babangatan nen Jesus? Kinerew da: “Jehovah, . . . iter mo ed saray ariripen mo so pantultuloy a pansalita ed salitam ed amin a tepel.” Kasin naebatan so pikakasi ra? On, lapud “say pasen a nantitiponan da so ayegyeg; tan sikaran amin so napno na masanton espiritu tan mansasalita ed salita na Dios a tekep na tepel.”​—Gawa 4:23-31.

21. Anto so mamakiwas ed sakey a toon mangiter na pantasi ed leksab na amin a sirkumstansya?

²¹ Kanian, sirin, bayuboan so positibon awawey ed impormal a panagtasi. Komon ta say aro ed Dios so mamakiwas ed sikayon mangiter na pantasi ed leksab na amin a nengneng na sirkumstansya. Magmaliw ya entusiastiko, ya ibesngaw so katuaan ed amin a pankanawnawa. Peteg, itultuloy ya itongtong so nipaakar ed gloria na inkaari na Dios.

Antoray Ebat Yo?

◻ Say impormal a panagtasi so walaan na anton Makasulatan a letnegan?

◻ Anto so arum ed saray dalan diad pamparaan a para ed impormal a panagtasi?

◻ No sikatayo so mantasin impormal, antoran resulta so nayarin nailaloan tayo?

◻ Panon so nepeg a panmoria tayo ed impormal a panagtasi no nipaakar ed maparanay a ministeryo ed lawak?

[Litrato ed pahina 23]

No sika so nipisok, kasin mantasi ka a singa ginawa nen Pablo?

[Litrato ed pahina 22]

Say masakbay a panagparaan so ontulong ed sikatayon mantasi ya impormal diad epektibon dalan