Tepetepet Manlapud Managbasa
◼ Kapigan so kipaknol na pitoran laldis na anghelikon trumpeta ed Apocalipsis?
Diad Apocalipsis kapitulo 8, 9, and Apo 11, nabasa tayo so pitoran angheles ya amaknol na pitoran trumpeta, a mangibabando na saray salot ed baleg a kabiskeg diad saray kabiangan na katooan. Saraya so mangirerepresenta ed saray panangiyabawag ed panangukom nen Jehova ya impalapag na saray totoo nen Jehova ed interon panaon na anggaan a ginmapon makatantanda ed samay kumbension ed Cedar Point nen 1922.—Nengnengen so Revelation—Its Grand Climax At Hand!, kapitulo 21 ya anggad 23 tan kapitulo 26.
Say inmunan apatiran laldis na trumpeta so angiwalwal ed inatey a kipapasen ed espiritual na kabiangan na Kakristianoan “ed dalin” tan “ed dayat,” tan ontan met ed naplag a kipapasen na klero tan say espiritual a kabilungetan na Kakristianoan.—Apocalipsis 8:7-12.
Ipapanengneng na awaran a say inkiwalwal ed lapag na sarayan katuaan so aktual a ginmapo ed sakbay na 1922. Alimbawa, say paliwawan “Nilaksalaksa Natan So Manbibilay a Nayarin Aglan Balot Ompatey,” ya inmunan nipaliwawa nen 1918 tan nipalapag ed porman pulyeto nen 1920, so angibaga ed insaew na Kakristianoan tan ed onsasabin anggaan na sayan mundo. Say The Golden Age na Setyembre 29, 1920, so mabitar ya angiwalwal ed Kakristianoan a bilang managlawan, matilan paklap, tan managpalikdo ed totoo.
Akin, sirin, ya ibabaga na libron Revelation Climax a sarayan apatiran trumpeta so ginmapo lambengat a pinaknol diad samay kumbension ed Cedar Point nen 1922? Lapud diad saman a say tawag so pinmaway ya “iyabawag, iyabawag, iyabawag so Ari tan say Panarian,” ya angiter na baleg a biskeg ed kimey na panagpulong. Say Nobyembre 1, 1922, a paway na The Watch Tower, kuanto: “Saray kakaaro . . . so angipasen ed satan a bilang manunan paliwawa ed kumbension a say peteg a pribilehyo tan kimey na konsagrado natan ed dalin et say pangiyabawag ed kiwawala na Katawan, say baleg ya Ari na arari, tan say panarian to so wadia la, tan saya so sankaimportantian a bengatla ed sikara a gawaen.”
Nepeg met ya imanoen a manwarin amin ya apatira ed sayan panangukom a mensahe so impalapag na saray Tasi nen Jehova nanlapulad 1922, kada sakey so akaawaat na makapanyarin biskeg diad impangadapta ed apatiran resolusyon ed saray kumbension ya agawa ed baetan na 1922 tan 1925. Pigamplon laksalaksan kopya na sarayan resolusyon so nibunog ed inimprintan porma, ya epektibon angiwalwal ed inatey a kipapasen na Kakristianoan ed espiritual.—Nengnengen so libron Revelation Climax, pahina 133, parapo 15.
Say unor a taloran laldis na trumpeta so manasaglawi na saray “kairapan.” (Apocalipsis 8:13) Sikara so duma ed saray ununan laldis na apatiran trumpeta unong ta tutukoyen daray espesipikon agawgawa. Say laldis na komaliman trumpeta so anukoy ed inkibulos nen 1919 ed saray totoo na Dios a manlapud “kaaralman.” Say komanem so walaan na kipaakaran ed “de-kabayoan” tan say laganap ya internasyonal a kampanya na panagpulong a ginmapo nen 1922. Say komapito so nisiglaot ed inkianak na Panarian na Dios nen 1914.—Apocalipsis 9:1-19; 11:15-19.
Kada sakey ed sarayan agawgawa so angitarok na kairapan ed si Satanas tan ed mundo to. Say inkibulos na alanaan nen 1919 a manlapud kaaralman na inaktibidad so amautot ed klero na Kakristianoan tan angidemostra ed sigpot ya impangipulisay nen Jehova ed sikato. Manlapud 1922 ya anggad natan, say abalbaleg ya ulop na de-kabayoan so amatey ed Kakrtistianoan, espiritual a panagsalita, ya inwalwal da so inatey a kipapasen to tan impasakbay so onsasabin kadederal to. Tan kayari inkianak na Panarian nen 1914, si Satanas so imbantak a nanlapud tawen, ya angigewgew na makaderal a gulo ed limog na katooan. Magano la et say Panarian so mangekal ed singa maligen a sosyedad na totoon impaalagey nen Satanas (ed dalin), a punasen to so rebelyoson katooan (say dayat) diad Armagedon.—Apocalipsis 11:17–12:12; 21:1.
Diad samay kumbension ed Cedar Point nen 1922, amin a taloran “kairapan” so nagmaliw a mapatnag ed kalaknab na mundo. Say kampanya na panagpulong ya inggapo ed saman so nanggawan mabitar a “saray duron” a pinmaway ed “kaaralman” tan say alibandos na “de-kabayoan” so mankukurang. Tan say makapaligsan tawag ya iyabawag so Ari tan say Panarian so nagnap a mitukoyan ed laldis na komapiton trumpeta. Say Marso 1, 1925, a paway na The Watch Tower so angipaliwawa a saray agawgawa nen 1914, 1919, tan 1922 so nipasakbay ed Apocalipsis kapitulo 12. Saya so araddalem a pakatalos ed inkianak na Panarian, tan saman so matoor ya impalapag na saray Tasi nen Jehova. Niarum ni, say impangiyabawag ed sayan managsalot ya impormasyon so akaawat na manunan biskeg diad impangadapta tan say tinmumbok ya impangibunog ed saray mabibiskeg a resolusyon legan na saray kumbension ya agawa a manlapud 1926 ya anggad 1928.—Nengnengen so Revelation—Its Grand Climax At Hand!, pahina 147, 149, 172.
Sirin, say impamaknol ed pitoran trumpeta so ginmapo nen 1922 tan nantultuloy legan na 1920’s. Nanlapulad saman, saray totoo nen Jehova so akikooperan andi-takot ed saray angheles diad pangibabaga ed amin a katooan a say Kakristianoan so inatey ed espiritual, a saray klero to so naplag a papangulo, tan magano la et sikato tan ed amin a kabiangan na sayan satanikon mundo so naderal.