Agamilen So Pananisia a para ed Andi-anggaan a Bilay
“Nawalaan na pananisia diad kiliktar a mabilay na kamarerwa.”—HEBREOS 10:39.
1. Anto so binidbir na sakey a Katolikon encyclopedia nipaakar ed impangusar na Biblia ed salitan “kamarerwa”?
ANGGAPO so ibabaga na Biblia a saray totoo so walaan na ag-ompatey a kamarerwa a makaliktar ed laman diad patey tan manbilay na ando lan ando ed espiritun ayaman. Anggan say New Catholic Encyclopedia so amidbir: “Say kaisipan ed kamarerwan makaliktar ed kayari na patey so agnatebek ed Biblia. . . . Say kamarerwa ed D[aan] a S[ipan] so mankabaliksan na aliwan sakey a kabiangan na too, noagta say interon too—too a bilang sakey a mabilay a pinalsa. Miulibay, diad B[alon] S[ipan] et ituturo to so atooan a bilay: say bilay na sinansakey.” Sirin saray totoo so andian na kamarerwa, sikara so kamarerwa.
2. (a) Iner so nanlapuan na pananisian ag-ompatey a kamarerwa? (b) Anto so katuaan nipaakar ed kipapasen na too diad kayari na ipatey?
2 A singa inturo na akaunan artikulo, say pananisia ed ag-ompatey a kamarerwa so sakey a paganon kaisipan a nasuysoy ed asakbay iran maawaran a panaon. Say autor to et samay sakey a sinmumlang ed malinew a deklarasyon na Dios a say too so “peteg ya ompatey” nisesengeg ed katutunganga. (Genesis 2:17) Samay sumusumpa, si Satanas a Diablo, so angikuan: “Sika so peteg ya ag-ompatey.” (Genesis 3:4) Tan saman so sakey a tila. (Juan 8:44) Saginonor, si Satanas so angiyalibansa ed doktrinan ag-ipapatey na atooan a kamarerwa. Balet say katuaan nipaakar ed kipapasen na too ed kayari na ipapatey so singa nibaga ed apuyanan a Salita na Dios diad Eclesiastes 9:5: “Say inaatey . . . so andian a balot na pakalikna.”—Nengnengen met so Roma 5:12.
Say Ilalo ed Andi-anggaan a Bilay
3. Nipaakar ed anton ilalo so malaem ya ibabaga na Biblia?
3 Manwarin malinlinew ya ipapanengneng na Biblia ya anggapo so ontan a bengatla a singa say ag-ompatey a kamarerwa, sikato so walaan na malaem ya ibaga nipaakar ed andi-anggaan a bilay. Say ilalo ed agmanganggan bilay so pundamenton bangat nen Jesus. Inkuanto: “Saya et kabaliksan to so andi-anggaan a bilay, say pangala ra na pikakabat ed sika, say alenleneg a tuan Dios, tan ed saman so imbakim, si Jesu-Kristo.” (Juan 17:3) Nipaakar ed saraman so mangagamil na pananisia ed Dios tan si Kristo, inkuan nen Jesus: “Iter ko ed sikara so andi-anggaan a bilay.” (Juan 10:28) Dingan na absoluton talek, inkuanto: “Siopaman a manisia so walaan na andi-anggaan a bilay. . . . Sikato so manbilay na ando lan ando.” (Juan 6:47, 51) Tan inkuanto met: “Ontan la so impangaro na Dios ed mundo ya inter to so bogbogtong ya Anak to, ta pian siopaman a mangagamil na pananisia ed sikato so agkomon naderal noagta nawalaan na andi-anggaan a bilay.”—Juan 3:16.
4. Anto so imbaga nen Jesus nipaakar ed ilalo ed arapen?
4 Lapud anggapo so ag-ompatey a kamarerwan makaliktar ed patey, panon so pakagungguna ed sipan na Biblia ya andi-anggaan a bilay? Inter nen Jesus so malaem ya impormasyon nipaakar ed saya sanen dinalaw to si Marta tan Maria ed samay kayari na impatey nen agi ra a Lazaro. Inkuanto ed si Marta: “Siak so kiolian tan say bilay. Siopaman a mangagamil na pananisia ed siak, anggamano sikato so ompatey, so nabilay.” Intepet to ed si Marta: “Kasin saya so sisiaen mo?” Inmebat: “On, Katawan; siak so anisia a sika so Kristo ya Anak na Dios.”—Juan 11:25-27.
5, 6. Anto so idemostra na impamangon nen Jesus ed si Lazaro diad bilay?
5 Diad pangipatnag a sikato, bilang Anak na Dios, so naikdan na pakayarin mamangon ed saray inaatey diad bilay, si Jesus so linma ed lubok nen Lazaro. Si Lazaro so inatey la ed loob na apatiran agew, tan say laman to so ginmapo lan nabulok. Anggaman ontan, “[Si Jesus] so kinmelyaw ed maksil a boses: ‘Lazaro, paway ka!’ Say toon inatey la so pinmaway a saray sali tan lima to so abalkot, tan say lupa to so abalkot na abel. Inkuan nen Jesus ed sikara: ‘Okbaran yo tan paunla yo.’” (Juan 11:43, 44) Say inatey a Lazaro so nipawil ed bilay!
6 Si Lazaro so agnipawil a nanlapud tawen odino inerman a pasen ed espiritun ayaman. Sikato so aglinma ed espiritun ayaman sanen sikato so inatey noagta sikato so andian-na-pakalikna ed lubok, a kawalaan na amin ya inaatey. (Salmo 146:4; Juan 3:13; Gawa 2:34) Aliwan matudio so panisip a say ag-ompatey a kamarerwa nen Lazaro so manggagayaga na mangatatawen a liket tan insan satan a kamarerwa so nasamsam a manlapud tawen pian mikasakey ed ag-ayadyarin laman to ed dalin a manbilay nin maminsan ed sakey a mundon napno na paniirap, sakit, tan patey. Balet lapud sikato so anggapo ed tawen, say impawil to ed bilay so inabrasan tuloy, lapud kabaliksan to so kaaruman iran taon na kiwawala to tan kikasakey to lamet ed saray inad-aro to. Saginonor, sikato so ompatey lamet.
7, 8. (a) Diad anto niran arum ya inkagawa a si Jesus so amaoli ed inaatey? (b) Akin a ginawa nen Jesus iraman a milagro na panangipawil ed totoo diad bilay?
7 Sanen pinaoli nen Jesus so sakey a biin walad kalangweran ya inatey, saray atateng to “so wala ed abay to a tekep na baleg a liket.” (Marcos 5:42) Ingen, saman a bii so diad kaunoran et inatey lamet. Sanen pinaoli nen Jesus so inatey ya anak a laki na balo ed Nain, “say takot so sinmabi ed sikaran amin, tan inggapo ran inggloria so Dios.” (Lucas 7:16) Balet saman a laki so diad kaunoran et inatey. Nipaakar ed sarayan milagro, pepekderan na The New International Dictionary of New Testament Theology: “Saramay pinaoli nen Kristo ed mangaraldalin a ministeryo to so nakaukolan ya ompatey, unong ta sarayan panamaoli so agmangipapabtang na ag-ipapatey.”
8 Akin a pinaoli nen Jesus iraya a nanlapud saray inaatey? Aliwan pian ipabtang so andi-anggaan a bilay ed saman a panaon, noagta pian idemostran sikato so Mesias tan pian ipanengneng no anto so inter na Dios a pakayari ed sikato a gawaen. Saman so angipaalagey na pananisia ed ilalo na kikioli tan say maandon bilay ed leksab na arapen ya uley na mangatatawen a Panarian na Dios ed saray lima nen Kristo.—Mateo 6:9, 10; Juan 11:41, 42.
9. Panon so suston impantalos nen Marta tan si Pablo ed bangat nen Jesus nipaakar ed ilalo ed kikioli?
9 Kabat nen Marta so nipaakar ed satan ya ilalo diad impilimog to ed si Jesus, lapud akauna lan imbaga to ed sikato so nipaakar ed si Lazaro: “Kabat ko a sikato so ombangon ed kioli diad unor ya agew.” (Juan 11:24) Kabat to a say kikioli so, aliwan diad unor ya agew to (Lazaro), noagta diad arapen, “dia ed unor ya agew.”—Agew na Panangukom, sano saray inaatey so napaoli diad leksab na uley na Panarian na Dios. Satan so kabat met nen apostol Pablo, ta imbaga to: “[Say Dios] so angigeter na sakey ya agew a ginagala ton pangukom ed panaayaman a dalin diad inkatunong.” (Gawa 17:31) Imbaga met nen Pablo: “Wala so nagawan kioli na matunong tan say agmatunong.” (Gawa 24:15) Agto imbaga a say kioli so nagagawa la noagta satan so “nagawa” ed arapen—diad silong na uley na Panarian.
10. Anto so komento na sakey a propesor a Pranses nipaakar ed saray sisisiaen na Kakristianoan nipaakar ed kioli a singa nipareng ed malinew a bangat na Biblia?
10 Diad libron Immortality of the Soul or Resurrection of the Dead? insulat nen Pranses a Protestantin propesor a si Oscar Cullman: “Wala so radikal a pandumaan ed baetan na Kristianon tatalaranan diad kioli na inaatey tan say Griegon sisisiaen diad ag-ipapatey na kamarerwa. . . . Anggaman say Inkakristiano so diad saginonor et angiletneg na siglaotan ed baetan na sarayan duaran sisisiaen, tan natan et say kaslakan a Kristiano so mangugutgot ed saratan a sigpot, anggapo so nanengneng kon rason diad pangisanib ko ed kipapasen ko tan say impasen na karaklan ya eskolar a katuaan. . . . Say bilay tan kaisipan na Balon Sipan so interamentin dinomina na pananisia ed kikioli. . . . Say interon too, a sikato so peteg ya inatey, so nipawil ed bilay diad sakey a balon panamalsan gawa na Dios.”
Kikioli—Ed Iner?
11, 12. (a) Anto so gagala na Dios a para ed totoo tan ed sayan dalin? (b) Panoy impangidemostra nen Jesus a say gagala na Dios a para ed dalin so ag-anguman?
11 Sanen pinalsa na Dios so totoo, inter to ed sikara so dalin a bilang maandon ayaman da tan ginagala ton panoen iyan planeta na matunong a rasa na totoo. (Genesis 1:26-28; Salmo 115:16) Sasalitaen na Biblia si Jehova a bilang “say Mananibukel na dalin tan say Managgawa ed sikato, Sikato so Sakey ya angiletneg a malet ed satan, sikato ya agto pinalsa ed andi-kakanaan, a tinibukel to ta pian napanayaman.”—Isaias 45:18.
12 Anggaman ed nilibulibon taon na ag-inkayadyari tan patey nanlapulad impanrebelde na too, siansia nin gagala na Dios a say dalin so magmaliw a maandon ayaman na too: “Saray matunong a mismo so mangayarian ed dalin, tan sikara so manayam ed tapew to diad ando lan ando.” (Salmo 37:29) “Maliket iray mauyamo, lapud tawiren da so dalin.” (Mateo 5:5) Sirin, sanen binilay nen Jesus iray inaatey, sikara so pinaoli ton mismo diad dalin, tan sikaran tampol so abidbir na arum iran indibidual ya inatey. Saya so amekder a diad silong na uley na Panarian et saray inaatey so nabilay ed dalin pian nawalaan na pankanawnawan manbilay ed ando lan ando diad tapew to. (Apocalipsis 20:12, 13) Satan so manumpal ed gagala na Dios a para ed totoo tan para ed dalin.—Isaias 46:9-11; 55:11; Tito 1:1, 2.
13. Anton kagutgutan so nidunget ed saray iglesia na Kakristianoan, tan panon so panggetma ran manulbar ed satan?
13 Anggaman kuan, lapud saray iglesia na Kakristianoan so manisia ed ag-ipapatey na kamarerwa, saya so mangipresenta ed sikara na kagutgutan: Panon dan pantukoyen so kioli na “interon too,” a singa indemostra nen Jesus, diad pananisia ra ed ag-ompatey a kamarerwa a wala la ed tawen odino diad impierno? Inkuan na The Catholic Encyclopedia: “Say Komapat a Konsilyo na Lateran so mangibabangat ya amin a totoo, balanglan pinili odino impulisay, ‘so ombangon lamet ed saray dilin laman da a satan natan so itarok da ed sikara.’” Inyarum to: “Unong a say laman so kapareha na saray krimen na kamarerwa, tan say kaiba na saray birtud to, say hustisya na Dios so singa mankaukolan a say laman so minanabang ed kadudusa na kamarerwa tan tumang.” Unong ed sayan pananisia, say laman so nikasakey lamet ed kamarerwa diad tawen odino diad impierno. Ed panon kabayag? “Saray binangon a labay na saray sasantos tan makasalanan so nakawesan ed ag-ipapatey,” so kuan na satan a nanlapuan.
14. Panoy pamalinew na sakey a managsulat a Jesuita ed panmoria na Kakristianoan ed kioli na laman?
14 Diad libron The Future Life, nen Jesuit J. C. Sasia, nabasa tayo: “Say bilay ed tawen sirin so sakey a liket met diad panamegley na saray niglorian pakalikna [na laman a nikasakey-lamet ed kamarerwa].” Nipaakar ed saray laman a nikasakey-lamet ed saray kakamarerwa ed impierno, satan a nanlapuan so angikuan: “Diad impierno, kayari na kioli [na laman], kada liknaan na atooan a laman so walaan na dili ton kadudusa . . . Say pakalikna odino pakariwit so nagkalautlan napairap, lapud nagkalautlan diad saray kasalanan na laman a saray abaat so amasanok ed Dios. . . . Say pikakasakey da ed saray laman da so diad sikara et sakey a kaaruman na kapairap tan kasinageman.”
15. Akin a sankaugesan so pangibangat a pairapen na Dios so totoo diad impierno ed ando lan ando?
15 Sirin, say pangawat ed paganon kaisipan na ag-ipapatey na kamarerwa so angilukas ed dalan na Kakristianoan a mangawat met ed paganon kaisipan na makapautot a kapairap na saray kakamarerwa—tan anggan saray laman—diad impierno ed ando lan ando. Ingen, nipaakar ed kadaanan ya ugali na panagpool ed saray ugugaw bilang bagbagat ed saray palson dirios, inkuan nen Jehova: “Sikara . . . so nampool ed saray anak da ed apuy a singa interon pinoolan ya iyaapay ed si Baal, bengatlan agko ingganggan odino sinalita, tan agsinmabi ed pusok.” (Jeremias 19:5) Sirin mabanbanday so pangibangat a say Dios so mamairap ed totoo diad ando lan ando, sano say dilin Salita to so malinlinew a mangipapanengneng a saray agmanagbabawin mauges so naderal, naandi ed kiwawala. “Anggan dinan a kamarerwan ag-ontalineng ed satan a Propeta [si Jesus] so sigpot a naderal.”—Gawa 3:23; nengnengen met so Mateo 10:28; Lucas 17:27; Juan 3:16; 2 Pedro 2:12; Judas 5.
Ag-ipapatey
16. Anto so ibabangat na Biblia nipaakar ed ag-ipapatey?
16 Anggaman ontan, agta ibabangat na Biblia a saray totoo so naawit ed tawen pian manbilay na ag-ipapatey a bilay diman? On, ibabangat to. Balet saya so andian na gawaen ed ag-ompatey a kamarerwan too. Say ag-ipapatey so mansumpal diad kapaoli na sakey a too bilang sakey ya espiritun pinalsa (a singa si Jesus) tan aliwan manlapud impakawalaan to na ag-ompatey a kamarerwa ya akaliktar ed patey. Say arapen a tumang ya ag-ipapatey so intandoro na arum a matoor, saray singa-Kriston totoo tan namoria lambengat sano si Kristo so onsabi ed pakayari na Panarian diad tawen, aliwan tampol kayari na insegep nen Kristo ed tawen nen inmunan siglo.—Salmo 110:1; 1 Corinto 15:53, 54.
17. Panon karakel so makagungguna ed ag-ipapatey, tan anton betang so kikiwasan da diad gagala na Dios a para ed dalin?
17 Nagkalalo ni, satan ya ilalo so nipabtang ed daiset diad pamilya na too. Saraya so tinawag nen Jesus a “melag a pulok.” (Lucas 12:32) Sayan grupo, 144,000 ed bilang, so napaoli ed mangatatawen a bilay bilang ag-ompatey ya espiritun pinalsa a manuley ed dalin a kaiba nen Kristo ed mangatatawen a Panarian to. (2 Pedro 3:13; Apocalipsis 7:4; 14:1, 4; 20:4) Say dalin ya uleyan da so natooan, ed nasabin panaon, na saray ayadyarin totoo, anggapoy duaruwan nilasuslasus laksa ed sikara. Dakel ed saratan a totoo so ompawil ed dalin diad “kioli na matunong tan say agmatunong.” (Gawa 24:15) Ingen, walaray arum a makagamor na bilay ed balon mundo nilikud ed saraman so napaoli a manlapud saray inaatey. Siopa irayan arum?
“Aglan Balot Ompatey”
18. Niarum ed ilalo na kikioli na inatey a totoo, anton makapakelaw a bengatla so impasakbay nen Jesus?
18 Manwarin say seguradon ilalo na inaatey a totoo et say kioli, wala so sananey a mamilagron ilalo ed panaon tayo. Satan so walaan na kipaakaran ed saman so inakaran nen Jesus ya ibaga ed si Marta. Kayari na impangikuanto: “Siopaman a mangagamil na pananisia ed siak, anggamano sikato so ompatey, so nabilay [ed kioli],” inyarum nen Jesus, “tan siopaman a manbibilay tan mangagamil na pananisia ed siak so aglan balot ompatey.” (Juan 11:25, 26) Diad sayan saginonor a balikas, impasakbay nen Jesus so makapakelaw a bengatla: Onsabi so panaon sano saray totoon manbibilay so agla nakaukolan ya ompatey! Balet kapigan itan?
19. (a) Legan na anton panat na panaon so pakamoria ed ilalo na aglan balot ipatey? (b) Panoy paneskribe na Biblia ed saraman so walaan na ilalon aglan balot ompatey?
19 Natan—ed agew tayo—so panaon diad pakamoria ed satan a sipan! Ipapanengneng na amin ya ebidensya a sikatayo la so asingger a tuloy ed anggaan na sayan mauges a mundo. (Mateo 24:3-14; 2 Timoteo 3:1-5, 13) Sirin, saray totoon mangagamil natan na pananisia ed Dios tan diad Anak to so nawalaan na makapaliket ya ilalon makaliktar ed anggaan na sayan sistema tan mantultuloy a mabilay ya onloob ed balon mundo na Dios—ya aglan balot ompatey! Saraya so asalita ed Apocalipsis 7:9, 14 a bilang “baleg ya ulop, ya anggapo so toon makayarin mamilang, a nanlapud amin a nasyones tan tribu tan totoo tan pansasalita . . . [a] nanlapu ed baleg a kairapan,” inliktar na Dios lapud pangaagamil da na pananisia. Sinalita nen Jesus so onsasabin katunaw na sayan peles a sisteman mauges a bilang “baleg a kairapan ya agni agawa nanlapulad gapo na mundo ya anggad natan, andi, nisay nagawa lamet.”—Mateo 24:21; nengnengen met so Uliran 2:21, 22; Salmo 37:10, 11, 34.
20, 21. Panoy pangaagamil na nilaksalaksa natan na pananisia ed Dios tan ed si Kristo, tan anto so agla nakaukolan na dakel ed sikara?
20 Diad interon mundo, saray nilaksalaksa ed baleg ya ulop a malabay a manbilay na ando lan ando ed dalin so mangaagamil la na pananisia ed saray sipan na Dios tan diad samay sakey ya inutorisaan ton “say kiolian tan say bilay,” si Jesu-Kristo. Tan indedika ra so inkasikara ed Dios, a saya so insimbolo ra diad bautismo ed danum. (Mateo 28:19, 20) Bibidbiren da ya utang dan sigpot so kilalaban ed “Dios, ya akayurong ed trono, tan ed Kordero,” si Jesu-Kristo.—Apocalipsis 7:10.
21 Saramay wala ed baleg ya ulop a makaliktar ed anggaan na sayan mundo so agla mankaukolan na kioli a manlapud saray inaatey lapud sikara “so aglan balot ompatey”! Kasin aalaen yoray kundang diad pagmaliw a sakey ed sayan grupo? No ontan, agaylan makapakelaw, nikadkaduman pribilehyo so akalukas ed sikayo—salanti say pakaliktar ed anggaan na mauges a sistema nen Satanas tan onloob ed matunong a balon panaon a mangitarok ed sikayo na ayadyarin bunigas tan andi-anggaan a bilay ed paraison dalin! (Lucas 23:43; Apocalipsis 21:4, 5) Diad panaral ed no anto so linawa na Dios tan mansungdon manggawa ed satan, nayarin ipanengneng yo a sikayo ‘so aliwan nengneng na saman so onsener ed kadederal.’ Sikayo met so nayarin “nawalaan na pananisia ed kiliktar a mabilay na kamarerwa.”—Hebreos 10:39; 1 Juan 2:15-17; Apocalipsis 7:15.
Tepetepet ed Repaso
◻ Anto so tuan ilalo na inaatey?
◻ Akin a say sisisiaen na Kakristianoan ed kioli na laman so sakey ya insulto ed Dios?
◻ Anto so ibabangat na Biblia nipaakar ed ag-ipapatey?
◻ Anton makapakelaw ya ilalo so nayarin niwala ed totoo natan?