Sano Tigwayen na Patey So Sakey ya Inad-aro

“NEN 1981 say inak so inatey ed kanser. Sikato so nantagibi ed siak ya ina. Say impatey to so sankairapan ed siak tan diad agik a lakin tagibi. Siak so 17, tan say agik a laki so 11. Kaililiw ko so inak a tuloy. Siak so pinabaleg a Katoliko, tan diad inkibangat a sikato so wala ed tawen, bueno, nilabay kon tigwayen so bilay ko pian mikasakey la ed sikato. Sikato so sankamaongan a kaarok.”​—Roberta, 25 anyos.

Kasin walaan ka na miulibay ya eksperiensia? No ontan, amtam lan antimano so ot-ot a mangantabay diad kaandi na sakey ya inad-aro. Ompatnag ya aliwan makatunongan a say patey so walaan na pakayarin manamsam ed sakey ya inarom. Tan sano satan so nagawa, say kaisipan ed aglan balot pakayarin makapitongtong ed sikato, mielekan ed sikato, odino pakalakap ed inad-arom so sankairapan a sungdoan. Tan singa ipanengneng na saray salita nen Roberta, satan ya ot-ot so agnabural diad pangibaga ed sika a say inad-arom so wala la ed tawen.

Panon, anggaman kuan, so liknaan mo no amtam a posibli so pikasakey lamet ed inatey ya inad-arom diad asingger ya arapen, andi, aliwan diad tagey ed tawen noagta dian mismo ed dalin ed leksab na mareen, matunong iran kipapasen? Tan anto no naaralan mo met a diad satan a panaon et saray totoo so nawalaan na ilalo diad panggayaga ed ayadyarin bunigas tan sikara so aglan balot ompatey? ‘Seguradon satan so kugip lambengat!’ so nayarin ikuan mo.

Ingen, nen inmunan siglo K.P., makpel ya imbaga nen Jesu-Kristo: “Siak so kiolian tan say bilay. Siopaman a mangagamil na pananisia ed siak, anggaman sikato so ompatey, sikato so manbilay.” (Juan 11:25) Satan so sakey a sipan a saray inaatey so manbilay lamet​—peteg a makapalikliket ya ilalo!

Anganko, anggaman kuan, molimolien mo: ‘Kasin wala so letnegan na panisia ed ontan a sipan? Panon so pakasegurok a satan so aliwan basta kugip lambengat? Tan no wala so letnegan na panisia ed satan, anto so nayarin kabaliksan na sayan sipan ed siak tan diad saray inad-arok?’ Say onggendan ya artikulo so manalaysay ed saraya tan diad saray arum a tepet.