Nilaksalaksan Inatey Natan So Manbilay Lamet

NILAKSALAKSAN inatey natan so manbilay lamet​—agaylan makapaligsay-puson ilalo! Balet kasin satan so petepeteg? Anto so mangumbinsi ed sika? Pian makapanisia ed sakey a sipan, nakaukolan mon seguroen a say sakey a mangisisipan so namparan mabulos tan makayarin manumpal ed satan. Siopa, sirin, so mangisisipan a saray nilaksalaksan inatey natan so manbilay lamet?

Nen luglog na 31 K.P., makpel ya imbaga nen Jesu-Kristo a sikato so inikdan nen Jehova a Dios na pakayarin mamaoli ed saray inaatey. Insipan nen Jesus: “Unong a singa say Ama so mamaoli ed saray inaatey tan sikara so bilayen to, sirin say Anak so mamabilay met ed saraman so labay to. Agmankelaw ed saya, lapud say oras so onsabi sano amin na saramay wala ed pakanodnonotan a lubok so makadngel na boses to [Jesus] tan ompaway.” (Juan 5:​21, 28, 29) On, insipan nen Jesu-Kristo so nilaksalaksan inatey so manbilay lamet ed sayan dalin tan nawalaan na ilalo ed pantultuloy ya ontan diad ando lan ando. (Juan 3:​16; 17:​3; ipareng so Salmo 37:​29 tan Mateo 5:5.)a Lapud si Jesus so angisipan, maligen so panilalo a sikato so mabulos a manumpal ed satan. Balet kasin sikato so makayarin manggawa ed satan?

Unong ed kuritan na Biblia, anggad samay panaon ya impanggawa nen Jesus ed satan a sipan, sikato so agnin balot amaoli na siopaman. Balet ta kulang a duay taon ed saginonor, impanengneng to ed makapanyarin paraan a sikato so mabulos tan makayarin manggawa ed panamaoli.

“Lazaro, Paway Ka!”

Saman so makatenyeg ya eksena. Si Lazaro so graben tuloy ed beblay. Saray duaran agagi ton bibii, si Maria tan Marta, so angipasabi na salita ed si Jesus, a wala ed biek na Ilog Jordan: “Katawan, nia! samay sakey ya inad-arom so mansasakit.” (Juan 11:3) On, sayan pamilya so inad-aron tuloy nen Jesus. Sikato so sakey a sankaili ed abung da diad Betania, anganko ta mabetbet. (Lucas 10:38-42; ipareng so Lucas 9:58.) Ingen natan et say pinabpabli nen Jesus a kaaro so mabeblay a tuloy.

Anto, anggaman kuan, so iilaloan nen Maria tan si Marta a gawaen nen Jesus? Agda kinerew ed sikato ya onla ed Betania. Balet amta ra ya inad-aro nen Jesus si Lazaro. Agta labay nen Jesus a dalawen so mansasakit a kaaro to? Andi-duaruwan inilaloan da a sikato so mamilagron tambalen nen Jesus. Tutal, diad sayan panaon na ministeryo to, si Jesus so nanggawa la na dakerakel a milagro na panagtambal, tan aliwan anggan say kaarawi so makasbel ed sikato. (Ipareng so Mateo 8:5-13.) Kasin anggapo so gawaen ed ontan a pinabpablin kaaro? Ingen, imbes a sikato so onlan tampol ed Betania, si Jesus so nampaleen ni ed kawalaan to diad ontumbok a duaran agew.​—Juan 11:5, 6.

Si Lazaro so inatey agnambayag kayari na impangipawit ed mensahe, anganko diad panaon ya impakaawat nen Jesus ed balita. (Ipareng so Juan 11:​3, 6, 17.) Balet anggapo la so kaaruman nin mensahe a nakaukolan. Kabat nen Jesus no kapigan so impatey nen Lazaro, tan kinanonotan ton gawaen so bengatla nipaakar ed satan. Mansasalita nipaakar ed impatey nen Lazaro, inkuanto ed saray babangatan to: “Si Lazaro a kaaro tayo so nampainawa, balet siak diman so manbiahe pian liingen ko a manlapud ugip.” (Juan 11:11) Diad akauna la et pinaoli nen Jesus so duaran totoo a manlapud patey, diad kada inkagawa et kayarin tuloy na impatey na too.b Diad sayan panaon, anggaman kuan, et duma. Diad panaon ya insabi nen Jesus ed Betania, say pinabpabli ton kaaro so inatey la ed loob na apatiran agew. (Juan 11:17, 39) Kasin nayarian nen Jesus a papawilen ed bilay so sakey ya inatey la ed ontanlan kabayag tan say laman to so onggagapo lan nabulok?

Diad impakadngel a si Jesus so onsasabi, si Marta, sakey a bii na kiwas, so binmatik a mangabet ed sikato. (Ipareng so Lucas 10:38-42.) Anggad bektan si Jesus so nabet to la, say puso to so anagdag ed sikato a mangikuan: “Katawan, no wadia ka komon say agik so ag-inatey.” Ingen, imbalikas to so pananisia to: “Amtak ya anggan panon karakel na bengatlan kerewen mo ed Dios, satan so iter na Dios ed sika.” Atenyeg ed kaermenan to, impaseguro nen Jesus ed sikato: “Say agim so ombangon.” Sanen impatnag to so pananisia to ed arapen a kikioli, mabitar ya imbaga nen Jesus ed sikato: “Siak so kiolian tan say bilay. Siopaman a mangagamil na pananisia ed siak, anggaman sikato so ompatey, so nabilay.”​—Juan 11:20-25.

Sanen sinmabi ed lubok, ingganggan nen Jesus ya ekalen so baton impulet ed wangalan. Diad gapo et agnilabay nen Marta: “Katawan, natan et sikato la so ambanget, ta apat agew la.” Ingen impaseguro nen Jesus ed sikato: “Agta imbagak ed sika a no sika so manisia et nanengneng mo so gloria na Dios?” Insan, kayari na impanpikasi ton maksil, ingganggan to: “Lazaro, paway ka!” Diad ganggan nen Jesus et si Lazaro so pinmaway, anggamano sikato la so inatey ed loob na apat agew!​—Juan 11:38-44.

Kasin Saman So Peteg ya Agawa?

Say awaran na impamaoli ed si Lazaro so nipresenta ed Ebanghelyo nen Juan a bilang maawaran a katuaan. Saray detalye so mabitar a tuloy ed pangipasen a satan so kunkunwari lambengat. Say panuppiat ed inkamaawaran to so panuppiat ed amin na saray milagro ed Biblia, a pati say inkioli nen Jesus a mismo.c Tan say pangiburi ed inkioli nen Jesus so pangibuburi ed Kristianon pananisia a sigpot.​—1 Corinto 15:13-15.

Diad tua, no awaten yo so kiwawala na Dios, anggapo komon so problema yo diad pangagamil na pananisia ed kikioli. Diad pangiyilustra: Nayarian na sakey a toon ivideotape so panamatawir to tan testamento to, tan kayari na ipatey to et sikato so nayarian a nanengneng tan narengel na saray kakanayon tan kakaaro to, ed epekto, legan ya ibinsabinsa to no panon so panguksoy ed saray kayarian to. Diad apalabas a sanlasus taon, say ontan a bengatla so agnaisip. Tan diad arum a totoo natan a manaayam ed sankasulinekan a pasen na mundo, say “milagro” na panagrekord ed video so agnarandan na nonot. No saray sientipikon prinsipyon inletneg na Manamalsa so nayarian ya usaren na totoo diad panggawa ed ontan a nanengneng tan narengel ya eksena, agta nayarian na Manamalsa so manggawa na mas nagkalalo? Agta makatunongan, sirin, a say Sakey ya amalsa ed bilay so makayarin mamaoli ed sakey a too diad pamawala lamet ed personalidad to diad balobalon atibukel a laman?

Say milagro na inkipawil nen Lazaro ed bilay so manserbin mamabiskeg na pananisia ed si Jesus tan diad kioli. (Juan 11:41, 42; 12:9-11, 17-19) Diad makatenyeg a dalan, iparungtal to met so inkamabulos tan pilalek nen Jehova tan say Anak to a manggawa ed panamaoli.

‘Say Dios So Walaan na Pantamitam’

Say kiwas nen Jesus ed impatey nen Lazaro so mangiparungtal na sankamatamoyan a dapag na Anak na Dios. Saray aralem a liknaan to ed sayan inkagawa so malinlinew a mangipapatnag na mabiskeg a pilalek to a mamaoli ed saray inaatey. Nabasa tayo: “Si Maria, sanen sikato so sinmabi ed kawalaan nen Jesus tan sikato so anengneng to, dinmakmomo ed saray sali to, a kuanto ed sikato: ‘Katawan, no wadia ka komon, say agik so ag-inatey.’ Si Jesus, sirin, sanen sikato so anengneng ton mannangis tan saray Judios a dinmago ed sikato so mannangis, nanagugol ed espiritu tan agonigon; tan inkuanto: ‘Iner so anginan yo ed sikato?’ Inkuan da ed sikato: ‘Katawan, gala tan nengneng mo.’ Si Jesus so nannangis. Sirin inkuan na saray Judios: ‘Nia, agayla so panangaro to ed sikato!’”​—Juan 11:32-36.

Say impapuson panangabagey nen Jesus so impanengneng dia na taloran balikas: “nanagugol,” “agonigon,” tan “nannangis.” Say orihinal-a-lenguahen inusar nen apostol Juan diad impangikurit ed sayan makatenyeg ya eksena so mangipanengneng ed kabiskeg na inkatenyeg nen Jesus ed emosyon.

Say Griegon salitan impatalos a “nanagugol” so nanlapud berbon (em·bri·maʹo·mai) a mangituturo na inkatenyeg na ansakit, odino aralem. Imbaga nen William Barclay a komentarista na Biblia: “Diad ordinaryon klasikon Griego say gendagendat ya usar na [em·bri·maʹo·mai] so diad pampunges na kabayo. Dia et kabaliksan to lambengat a say ontan ya aralem ya emosyon so angemgem ed si Jesus a say aliwan boluntaryon panagugol so binmetag ed puso To.”

Say balikas ya impatalos ya “agonigon” so nanlapud sakey a Griegon salitan (ta·rasʹso) mangipapanengneng na katanagelan. Unong ed The New Thayer’s Greek-English Lexicon of the New Testament, kabaliksan to so “kakusokuso ed dalem, . . . mangapekta ed baleg ya ot-ot odino kaermenan.” Say balikas a “nannangis” so nanlapud sakey a Griegon berbo (da·kryʹo) a kabaliksan to so “pamaagus na lua, pannangis a mareen.” Saya so miduma ed “pannangis” nen Maria tan saray Judios a kaiba to, ya asalambit ed Juan 11:33. Ditan et say Griegon salita (manlapud klaiʹo) ya inusar et kabaliksan to so pannangis a narengel odino maksil.d

Si Jesus, sirin, so atenyeg a tuloy diad impatey na pinabpabli ton kaaro a Lazaro tan diad impakanengneng ed pannanangis na agin bii nen Lazaro. Say puso nen Jesus so napno na emosyon a saray mata to so sinminag ed saray lua. Say makatantandan tuloy et si Jesus so akauna lan amaoli ed bilay ed duaran arum. Tan diad sayan inkagawa et sigpot a ginetma ton gawaen met so ontan ed si Lazaro. (Juan 11:11, 23, 25) Ingen, sikato so “nannangis.” Say panangipawil ed totoo diad bilay, sirin, so aliwan basta oksuyan a para ed si Jesus. Saray matamoy tan aralem a liknaan to a singa nipatnag ed sayan inkagawa so mabitabitar ya angipanengneng na mabiskeg a pilalek ton mamaandi ed saray deral na patey.

Lapud si Jesus so ‘nagnap a talintao nen Jehova a Dios,’ manepenepeg a nailaloan tayo met so ontan ed mangatatawen ya Ama tayo. (Hebreos 1:3) Diad dilin inkamabulos nen Jehova a manggawa ed panamaoli, inkuan nen matoor a toon si Job: “No say sakey a toon makayari so ompatey kasin sikato so manbilay lamet? . . . Sika so ontawag, tan siak a mismo so onebat ed sika. Ta say kimey na saray limam et wala so pantamitam mo.” (Job 14:14, 15) Say orihinal-a-lenguahen salitan impatalos a “nawalaan ka na pantamitam” so mangituturo na magunaet a pampilalek tan pampirawat. (Genesis 31:30; Salmo 84:2) Malinew, si Jehova so peteg a manatalaran ed kikioli.

Kasin peteg a napanisiaan tayo so sipan ed kikioli? Bueno, anggapoy duaruwan si Jehova tan say Anak to so parehon mabulos tan makayarin manumpal ed satan. Anto so kabaliksan na saya ed sika? Sika so nawalaan na ilalo diad kikasakey lamet ed saray inararo dian mismo ed dalin ed leksab na mareen iran kipapasen!

Sikato ’tan natan so ilalo nen Roberta (a singa asalambit ed akaunan artikulo). Pigaran taon kayari impatey nen ina to, saray Tasi nen Jehova so anulong ed sikato diad maalwar a panagaral ed Biblia. Nanonotan to: “Kayari na impakaaral ko ed ilalo na kioli, siak so inmakis. Makapakelaw so impakaamta a nanengneng ko lamet si inak.” No say pusom so miulibay a manpirawat a makanengneng lamet ed sakey ya inad-aro, andi-duaruwan labay mon aralen so malaglaem nipaakar ed sayan makapakelaw ya ilalo. Say inkaseguro na sayan ilalo so asingbat ed malalaknab a detalye diad pahina 13-23 ed sayan magasin.

[Saray paimano ed leksab]

[Litrato ed pahina 5]

Say impamaoli nen Jesus ed anak a bii nen Jairo so mangiter na letnegan diad pananisia ed arapen a kioli na saray inaatey

[Litrato ed pahina 6]

Si Jesus so atenyeg a tuloy diad impatey nen Lazaro

[Litrato ed pahina 7]

Say gayaga na saramay makatasi ed kikioli so singa say gayaga na samay balo ed Nain sanen pinaoli nen Jesus so inatey ya anak to