“Say Salita na Dios so Mabilay tan Mangisekar na Biskeg”
1, 2. (a) Anto so pansengegan na pananguman ed bilay na saraman so magmaliw a Kristianos? (b) Panon kinaaralem so pakapangimpluensya na Biblia ed sakey a too?
DIAD kapegleyan na inmunan siglo K.P., si apostol Pablo so nansulat ed Kristianon kongregasyon diad Roma. Ditan et impabitar to so nakakaukolan a saray tuan Kristianos so nepeg a manpasimbalo. Inkuanto: “Tundaan yo so miabobon ed sayan sistema na bengabengatla, balet ta pasimbaloen yo so kanonotan yo, pian komon et napaneknekan yo ed inkasikato so maong tan makapaliket tan ayadyarin linawa na Dios.” (Roma 12:2) Anto so mamasimbalo ed saray patumbok nen Jesus, a manguman ed mismon dalan na panagnonot da? Manuna, say pakayari na Salita na Dios, say Biblia.
2 Impanengneng nen Pablo no panon so pakaimpluensyan tuloy na Biblia ed sikatayo sanen insulat to: “Say salita na Dios so mabilay tan mangisekar na biskeg tan mamakdem nen say anggan dinan a duaray-tarem a kampilan tan talosen to so anggan diad pansianan na kamarerwa tan espiritu, tan ed saray langulangoan tan utek da, tan nayarian ton tebeken iray kanonotan tan saray getma na puso.” (Hebreos 4:12) Peteg, say ekstraordinaryon biskeg na Biblia a manggawa ed ontan iran pananguman ed totoo so makatangguyor a prueban satan so nagkalalo nen say basta salita na too.
3, 4. Diad anton kalaknab so inkauman na saray personalidad na Kristianos?
3 Say Griegon salitan nipatalos a “napasimbalo” ed Roma 12:2 so nanlapud me·ta·mor·phoʹo. Ituturo to so kumpleton pananguman, singa say pananguman na sakey a katerpilar ed kumpapey. Satan so kumpleton tuloy a satan so sasalitaen na Biblia a bilang sakey a pananguman na personalidad. Diad sananey a bersikulo na Biblia, nabasa tayo: “Lakseben so daan ya inkatoo a tekep na saray agamil to, tan ikawes yo so balon inkatoo, a diad panamegley na suston pikakabat et nagawan balo unong ed indengan na samay Sakey ya amalsa ed satan.”—Colosas 3:9, 10.
4 Nansulat ed kongregasyon diad Corinto, impanengneng nen Pablo so kalaknab na pananguman ed personalidad ya agawa nen inmunan siglo. Inkuanto: “Saray managlawan, saray managtalintao, saray managkalugoran, saray lalakin binabai, saray lalakin miakdol ed lalaki, saray matatakew, saray maagum a totoo, saray managbuanges, saray managpabanday, saray managpatubo so agmakatawir ed panarian na Dios. Tan ingen ontan so arum ed sikayo nensaman. Balet sikayo la so naurasan a malinis.” (1 Corinto 6:9-11) On, saray totoon imoral tan makulkol, matatakew tan managbuanges, so apasimbalo ed maabig-ehemplo iran Kristianos.
Saray Pananguman na Personalidad Natan
5, 6. Panoy inkauman a sigpot na personalidad na sakey a lakin walad kalangweran diad panamegley na biskeg na Biblia?
5 Saray miulibay a pananguman ed personalidad so nanenengneng natan. Alimbawa, sakey ya ugaw a laki ed Abalaten ya America so naulila ed edad a siamira. Sikato so binmaleg ya anggapo so panangiwanwan na ateng tan abayuboan to so sankaugesan iran problema na personalidad. Imbinsabinsa to: “Diad panaon a siak so 18, siak la so sigpot a naapiang ed druga tan siak la so nipisok ed prisowan nisesengeg ed panagtakew pian suportaan so ugalik.” Say panginaen to, anggaman kuan, so sakey ed saray Tasi nen Jehova, tan diad kaunoran ed sikato so ayarian ton tinulongan.
6 Impaliwawa na walad kalangweran: “Say panginaen ko so ginmapon mangiyaral na Biblia ed siak, tan kayari na pitoran bulan et ayarian ko lan ekalen so ugalin panagdruga.” Sikato met la so sinmian ed saray akaunan kakaiba to tan akaromog na kakaaro ed limog na saray Tasi nen Jehova. Intuloy to: “Sarayan balobalon kakaiba, a tekep na maparanay a panagaral ko ed Biblia, so tinmulong ed siak a manggawa na iyaaligwas tan kaunoran et pian idedikak so bilay ko pian manserbi ed Dios.” On, sayan datin apiang ed druga tan matakew so aktibo la natan, malinis-pambibilay a Kristiano. Panon so inkagawa na ontanlan baleg ya impanguman ed personalidad? Diad panamegley na biskeg na Biblia.
7, 8. Deskribien no panon so inkaresolbe na mairap a problema ed personalidad diad tulong na Biblia?
7 Sananey ya ehemplo so nanlapud abalaten a Europa. Ditan, sakey a lakin walad kalangweran so binmaleg a tekep na mairap a problema ed personalidad: masanok. Sikato so pirmin milalaban. Kaleganan na sakey a sangsangan ed pamilya, pinekpek to ni ingen so ama to, a binaktar to ed dalin! Kabekta, anggaman kuan, sikato so nanaral na Biblia ed saray Tasi nen Jehova tan tinandaan to so ganggan na Dios ed libro na Roma: “Ag-ibales so mauges ed mauges. . . . No nayari, anggad nayarian yo, magmaliw a mareen ed amin a totoo. Agkayo ombabales, noagta isuko so pasen na sanok.”—Roma 12:17-19.
8 Saratan a salita so tinmulong ed sikaton makamoria no panon so inkauges na kaleteyan. Say ombubulaslas a pikakabat ed Biblia so nanggugol ed konsiensia to, a tinmulong ed sikaton manalona ed aliston inkasanosanok to. Aminsan, kayari na inyaligwas to ed panagaral to, sikato so binandoan ya ininsulto na sakey ya estranghero. Alikna na lakin walad kalangweran so gendagendat a liab na sanok ed dalem. Insan alikna so sananey ni: liknaan na kababaingan; tan saya so amatunda ed sikato diad pangipalugar to ed sanok. Abayuboan to la so dangka, sakey ya importantin bunga na espiritu. (Galacia 5:22, 23) Say personalidad to so duma la natan, salamat ed pakayari na Salita na Dios.
9. Unong ed si Pablo, diad panamegley na anton ahensya a say personalidad tayo so nauman?
9 Panon, anggaman kuan, so pamawala na Biblia ed ontanlan mabiskeg ya epekto? Si Pablo, ed Colosas 3:10, so angikuan a saray personalidad tayo so nauman diad panamegley na suston pikakabat, a satan a pikakabat so naromog ed Biblia. Ingen panon so pamasimbalo na pikakabat ed totoo?
Say Betang na Suston Pikakabat
10, 11. (a) Sano aralen tayo so Biblia, anto so naaralan tayo nipaakar ed saray kalikaliktan tan agkalikaliktan a walewaleng na personalidad? (b) Anto so nakaukolan a niarum ed pikakabat diad iyepekto na pananguman ed personalidad tayo?
10 Ununa, ipapabidbir na Biblia so agkalkaliktan iran ugali na personalidad a nakaukolan ya lakseben. Isakup na saraya so ontan iran bengatla a singa say “mapaatagey a mata, matilan dila, tan saray liman mamapaagus ed andi-kasalanan a dala, puson managpabrika na makapasakit iran getma, saray salin manapurastan ombatik ed kaugsan, tilan pantasi a mamawala na katilaan, tan siopaman a mamawala na pankukulkol ed limog na saray agagi.” (Uliran 6:16-19) Komadua, dedeskribien na Biblia so kalikaliktan iran ugali a nepeg tayon bayuboan, a pati say “aro, liket, deen, sungdo, panangasi, kaabigan, pananisia, tayadno, dangka.”—Galacia 5:22, 23.
11 Say ontan a suston pikakabat so ontulong ed sakey a toon masimoon a mangusisa ed inkasikato tan nengnengen to no dinan a walewaleng na personalidad so nakaukolan ton bayuboan tan nakaukolan ton kimeyan ya ekalen. (Santiago 1:25) Anggaman kuan, satan lambengat so gapoan. Niarum ed pikakabat, say motibasyon so nakaukolan, bengatlan manenyeg ed sikato ta pian labayen to so manguman. Dia lamet, nakaukolan to so suston pikakabat a manlapud Biblia.
Napakiwas ed Pagmaliw a Maong
12. Panoy panulong ed sikatayo na pikakabat ed personalidad na Dios a manguman?
12 Inkuan nen Pablo a say kalikaliktan a balon personalidad so namoldi “unong ed indengan na samay Sakey ya amalsa ed satan.” (Colosas 3:10) Sirin say Kristianon personalidad so nepeg a miulibay ed dilin personalidad na Dios. (Efeso 5:1) Diad panamegley na Biblia, say personalidad na Dios so niparungtal ed sikatayo. Nanengneng tayoray pidedeneng to ed katooan tan imatonan iray maabig a kalidad to, a singa say aro to, panangasi, kaabigan, panangabagey, tan inkatunong. Say ontan a pikakabat so mamakiwas ed matunong-impanpuson too a mangaro ed Dios tan malabay a magmaliw a nengneng na toon abobonan na Dios. (Mateo 22:37) Bilang maaron ananak, labay tayon paliketen so mangatatawen ya Ama tayo, sirin sikato so salien tayon aligen so personalidad to ed anggaan na nayarian tayo diad maletey, ag-ayadyarin kipapasen tayo.—Efeso 5:1.
13. Anton pikakabat so mangibangat ed sikatayo a ‘mangaro ed inkatunong tan manggula ed kaugsan’?
13 Say motibasyon tayo so pabiskegen na pikakabat ya iter na Biblia ed no iner so pangitontonan na saray maong a walewaleng na personalidad tan saray mauges. (Salmo 14:1-5; 15:1-5; 18:20, 24) Naaralan tayo a si David so apapalar diad maridios a debosyon to tan aro to ed inkatunong balet ta sikato so nanirap sanen abalang to so dangka. Nanengneng tayoray maermen a nansumpalan sanen saray maabig a kalidad nen Solomon so dineral na katatkenan ya edad to. Saray bendisyon a nanresulta ed kaptekan nen Josias tan Hezekias so miduma ed saray makadesyang ya epekto na kakapuyan nen Ahab tan kaawetan na apostasya nen Manases. (Galacia 6:7) Sirin naaralan tayon ‘aroen so inkatunong tan gulaen so kaugsan.’—Hebreos 1:9; Salmo 45:7; 97:10.
14. Antoray gagala nen Jehova a para ed mundo tan para ed saray sinansakey?
14 Sayan motibasyon so siansia nin pabiskegen na suston pikakabat ed saray gagala na Dios. Say ontan a pikakabat so ontulong a manguman ed mismon ‘biskeg a mamapakiwas ed saray kanonotan tayo,’ say espiritun mamakiwas ed saray kanonotan tan kiwas tayo. (Efeso 4:23, 24) Sano aralen tayo so Biblia, naaralan tayo ya ag-abuloyan nen Jehova so karelmengan ed ando lan ando. Magano la, sayan agmatunong a mundo so deralen to tan itarok to so ‘balon katawenan tan sakey a balon dalin a ditan so panayaman na inkatunong.’ (2 Pedro 3:8-10, 13) Siopa so manbilay ed sayan balon mundo? “Saray maptek so manayam ed dalin, tan saray andi-tilol so natilak ed sikato. No nipaakar ed marelmeng, sikara so napegpeg a manlapud mismon dalin; tan no nipaakar ed saray managliput, sikara so nabisangbisang a manlapud sikato.”—Uliran 2:21, 22.
15. No tuan sisiaen tayo so ibabaga na Biblia nipaakar ed saray gagala nen Jehova, panon so pangapekta na saya ed sikatayo bilang totoo?
15 No tuan manisia itayo ed sayan sipan, say interon dalan na panagnonot tayo so naapekta. Si apostol Pedro, kayari na impanpropesiya to ed kaderal na karelmengan, kuanto: “Lapud amin na sarayan bengatlan so natunaw sirin, anton nengneng na totoo so nepeg yon pagmaliwan ed masanton gawa na ugali tan gawa na maridios a debosyon, ya alagden tan lawas nonoten so kiwawala na agew nen Jehova.” (2 Pedro 3:11, 12) Saray personalidad tayo so nepeg a namoldi diad mabiskeg a pilalek tayon magmaliw a kaiba na saray maptek a natilak sano saray marelmeng so naderal.
16. Antoran nengneng na personalidad so andian na pasen ed balon mundo, tan panon so nepeg a pangapekta na sayan pikakabat ed sikatayo?
16 Say libro na Apocalipsis so mangisisipan ed saray maptek a, kayari pangangga na sayan mundo, “punasen [na Dios] so amin a lua ed kamataan da, tan anggapo la so patey, nisay pannangis niray pandageyem nisay ot-ot. Saray gendat a bengatla so naandi la.” Balet insan impasakbay to a “saray matakot tan saramay andian na pananisia tan saramay makapadimla ed karutakan da tan saray managpatey tan saray managlawan tan saramay mangaagamil na espiritismo tan saray managtalintao tan amin na saray matitila” so nipulisay. (Apocalipsis 21:4, 8) Agaylan makabat so ipaliis ed saray agkalikaliktan a kalidad ya ag-abuloyan na Dios ed balon mundo!
Tulong a Manlapud Paway
17. Anton nengneng na tulong so isisimbawa na Biblia ed sikatayo ya anapen?
17 Anggaman kuan, saray totoo so makabos, tan gendagendat et nakaukolan da so bengatla a niarum ed impormasyon tan motibasyon no labay da so manpasimbalo. Nakaukolan da so personal a tulong, tan ipapanengneng na Biblia ed sikatayo no iner so pakaromogan tayo ed sayan tulong. Alimbawa, kuanto: “Siopaman a mikurang ed saray makabat a totoo so magmaliw a makabat, balet samay walaan na pidedeneng ed saray makulangkulang so mansumpal a mauges.” (Uliran 13:20) Miulibay, no sikatayo so milimog ed saramay mangipapatnag na kalidad a labay tayon bayuboan, sikatayo so natulongan a mapalalo a magmaliw a lalon singa sikara.—Genesis 6:9; Uliran 2:20; 1 Corinto 15:33.
18, 19. Anto so nakaukolan tayon gawaen pian nilukas tayoray kanonotan tan kapusoan tayo ed espiritu na Dios?
18 Niarum ni, si Jehova a mismo so mangitarya na tulong diad porma na masanton espiritu—say parehon espiritu ya inusar to diad impanggawa na saray milagro ed akauna ran panaon. Peteg, saray kalikaliktan a tuloy a kalidad na “aro, liket, deen, sungdo, panangasi, kaabigan, pananisia, tayadno, dangka” so tinawag “na bunga na espiritu.” (Galacia 5:22, 23) Panon so pakagungguna tayo ed tulong na masanton espiritu? Lapud say Biblia so pinuyanan na masanton espiritu, sano satan so basaen tayo odino itongtong tayo ed arum so nipaakar ed satan, ilulukas tayo so kanonotan tan puso tayo diad mananangguyor a pakayari na satan ya espiritu. (2 Timoteo 3:16) Peteg, insipan nen Jesus a sano salitaen tayo ed arum so nipaakar ed ilalo tayo, nayarin naeksperiensia tayo so direktan aksion na satan ya espiritu.—Mateo 10:18-20.
19 Niarum ni, igaganggan na Biblia: “Mantultuloy ed pikakasi.” (Roma 12:12) Diad pikakasi et sikatayo so mitongtong ed si Jehova, sikato so dayewen, pisalamatan, tan kerewen so tulong to. No kerewen tayo so tulong diad panalona ed saray agkalikaliktan a walewaleng na personalidad, a singa say inkasanok, inkapaweg, agpakankaanos, odino kinon, say espiritu na Dios so ontulong ed anggan anton sagpot a gawaen tayo a mitukoyan ed satan a pikakasi.—Juan 14:13, 14; Santiago 1:5; 1 Juan 5:14.
20. Akin a nakaukolan na saray Kristianos so pantultuloy a mankimey diad panangisulong ed balon personalidad?
20 Sanen insulat nen Pablo: “Pasimbaloen yo so kanonotan yo,” sikato so mansusulat ed sakey a kongregasyon na saray bautismado, alanaan a Kristianos. (Roma 1:7; 12:2) Tan diad orihinal a Griego, inusar to so sakey a porma na berbon manutukoy ed mantultuloy ya aksion. Isusuhiri na saya a say kapasimbalon pakikiwasen ed sikatayo na suston pikakabat a manlapud Biblia so progresibo. Sikatayo natan—singa saray Kristianos ed agew nen Pablo—so niliktub na sakey a mundon napno na makaderal iran impluensya. Tan sikatayo—singa sikara—so ag-ayadyari, nailuam a manggawa na mauges. (Genesis 8:21) Sirin, nakaukolan tayon itultuloy a kimeyan so panalona ed daan, masiblet a personalidad tan isulong so balo, unong a singa ginawa ra. Saray inmunan Kristianos so tinmalona ed ontan a kalaknab a sikara so tinmalindeg a duman sigpot a manlapud mundo ed kaliberliber da. Saray Kristianos natan so manggawa met na ontan.
Totoon “Binangatan nen Jehova”
21. Anto so arum ed saray propesiyan asumpal ed totoo na Dios diad sarayan kaunoran ya agew?
21 Peteg, say espiritu na Dios natan so mankikimey ya aliwan diad saray sinansakey lambengat noagta diad interon organisasyon na saray Kristianos, a manbilang na nilaksalaksa. Diad sayan organisasyon et asumpal iray mapropetikon salita nen Isaias: “Tan dakel a totoo so peteg ya onla tan kuan da: ‘Dago kayo, sikayon totoo, tan ontatdang itayo ed palandey nen Jehova, ed abung na Dios nen Jacob; tan bangatan to itayo ed saray dalan to, tan manakar itayo ed saray basbas to.’” (Isaias 2:3) Say malaknab nin propesiya nen Isaias so asumpal met ed kipapasen da: “Amin na saray anak mo so totoon imbangat nen Jehova, tan say kareenan na saray anak mo so daakan.” (Isaias 54:13) Siopa irayan totoo a manggagayaga na kareenan lapud ibabangat nen Jehova?
22. (a) Siopa natan so ibabangat nen Jehova? (b) Mangiter na saray ehemplo ed pangipanengneng a saray taga paway so mamidbir a saray Tasi nen Jehova so duma.
22 Bueno, imanoen iyan segek a nanlapud sakey a sulat ed New Haven Register, sakey a diaryo ed Baybay ya America: “Balanglan sikayo so inagrabiado odino pinasyudot (pinasanok), a singa siak, diad panagproselita ra, nakaukolan yon dayewen so dedikasyon da, inkabunigas da, say matalunggaring ya ehemplo ra ed atooan ya ugali tan mabunigas a panagbilay.” Siopa so totongtongen na managsulat? Say parehon grupo a sinalaysay na Herald ed Buenos Aires, Argentina, sanen inkuanto: “Saray Tasi nen Jehova so amaneknek ed inlabas na saray taon a sikara so managkimey na impasya, alisto, masimpit tan matakot-ed-Dios iran mibabaley.” Miulibay, inkuan na diaryon Italyano a La Stampa: “Sikara so agmansasaol ed buis odino ompapaliis ed saray aliwan kumbenientin leyes a para ed dilin kagunggunaan da. Saray moral ya ideyal na panangaro ed kaabay, agpanlabay ed pakayari, ag-inkamarawal tan personal ya inkamatua . . . so onloob ed ‘inagew-agew’ a dalan na bilay da.”
23. Akin a saray Tasi nen Jehova bilang sakey ya organisasyon so ontalindeg a duma?
23 Akin a saray Tasi nen Jehova bilang sakey a grupo—singa saray inmunan Kristos—so ontalindeg a duma? Diad dakel iran pamaakaran, sikara so pareho a singa arum ni. Sikara so nianak a walaan na miulibay iran atooan ya ag-inkayadyari, tan sikara so walaan na saray parehon problema ed ekonomya tan manunan nakakaukolan. Anggaman kuan, bilang sankamundoan a kongregasyon, aabuloyan da so Salita na Dios a mangisekar na biskeg ed saray bilay da. Say nansumpalan ya internasyonal ya impanaagi na saray puron Kristianos so mabiskeg ya ebidensyan say Biblia so impuyan a Salita na Dios.—Salmo 133:1.
Say Biblia So Pinuyanan
24. Anto so pikakasi tayo a nisesengeg ed dakel nin totoo?
24 Diad sarayan duaran artikulo, siningbat tayo so duara lambengat a linya na ebidensya ed pangidemostra a say Biblia so Salita na Dios, aliwan too. Balanglan iimanoen da so agnaparaan a kakabatan na Biblia odino say pakayari ton mamasimbalo ed totoo—odino saray dakel a bengatlan mananda ed satan a bilang nikadkaduma—saray masimoon a totoo so mairap ya onsaew a makamorian satan so talagan pinuyanan na Dios. Bilang Kristianos, ipipikasi tayo a dakel ni so onsabin mamidbir ed sayan katuaan. Insan sikara met so mangiyaniweng ed saray magayagan salita na salmista: “O nengneng mo ya inarok iray dilin bilin mo. O Jehova, unong ed maaron-panangasim et siak so inliktar mon mabilay. Say belas na salitam so katuaan, tan amin a matunong a panangigeter mo so diad panaon ya andi-geter.”—Salmo 119:159, 160.
Kasin Nanonotan Yo?
◻ Anto so epekto na Biblia ed saray tuan Kristianos?
◻ Panoy panulong na suston pikakabat diad pamasimbalo ed sikatayo?
◻ Panoy panulong na Biblia a mamakiwas ed sikatayo a mamayubo ed saray maong a kalidad tan manalona ed saray mauges?
◻ Anton tulong so wala diad pamayubo ed saray maridios a kalidad?
◻ Anto so ebidensya a say Biblia et impuyan so nanengneng ed limog na saray totoo nen Jehova?