Makabat a Kundang Sakbay na Desyang

LAPUD ankabaleg la ra so ananak nen Mary, wala la ed lima to so panaon tan mandeside a mangala na part-time a sekular a trabaho. Sanen imbaga to ed masiken to, si Enos, anggaman ontan, impalinew to ya anggapo so pankaukolan para ed sikaton manggawa ed satan. “No nayaryan kon mangitarya para ed sika tan saray anak, maseguroak a makapansiansia itan dua natan,” imbaga to. Imbes a pantrabahoen toy asawa to a sekular, sikatoy angisuheri a sipipikasi ton konsideraen a magmaliw a sakey a payunir, sakey a sigpot-panaon a manangibawag na Panarian.

Anggaman si Mary so magayagan mangipapanabang ed mensahe na Panarian ed saray kakaabay to, sikatoy mabaing tan mankulang na talek. Ingen, labay ton tomboken so simbawa na masiken to. Kanian, tekep na liknaan a panduaruwa, sikato so nanpalista bilang sakey ya auxiliary payunir nen Abril 1981.

Tampol ya abayoboan nen Mary so aro ed panagpulong-a-Panarian a kimey ya agton balot naeksperiensia nensaman. Kabekta, sikato so mangikokondukta na apatiran panagaral na Biblia ed interesadon totoo. Diad loob na sakey a taon sikatoy nagmaliw a sakey a regular a payunir, a mangikokondukta na samploran panagaral na Biblia. Si Christine, sakey a Tasi nen Jehova a walaan na duaran ananak a manaaral ni et magayagan akiulop ed si Mary bilang say kaiba ton payunir. Balobalo niran interesado a totoo so ginmapon inmatendi ed saray pantitipon diad lokal a Kingdom Hall, no iner ya ombabaleg so maabig ya epiritu na panagpayunir. Tan sankabalgan a liket nen Mary so sinmabi sanen say dili ton anak, si Christopher et amilin ontombok ed ehemplo to tan manpayunir met.

Insan, kamamangta, nen 1985 sakey a trahedya so sinmabi. Si Mary so nalmay. Sakey ya aneurysm ed ulo to so angitonton ed masyadon impandala ed utek, tan kayari na taloran agew say 45-años a Mary so inatey.

Kaleganan na saraman ya apatiran taon a panagpayunir, anggaman ontan, si Mary so akapaalagey na sakey a maabig a talindeg ed komunidad to. Say impangitulor ed sikato so inatendian na ngalngali 300 iran totoo, a pati dakel iran kakaabay. Sakey ed saraman so presenti so sakey a kaaro to eskuelaan ya angapresya ed pananisia nen Mary, labay ton manaral ni na dakel nipaakar ed satan, tan kinmerew na panagaral na Biblia. Say ministeryo nen Mary so siansia nin manbubunga.

“Siak so sakey met ya auxiliary payunir natan,” inkuan nen Enos, “ingen pilalek ko lambengat ya akiulop komon ed si Mary sanen sikato so manpapayunir. Naynay ton tontontongen so nipaakar ed saray eksperiensia to tan masyadon maliket. Diad tua, saraman a pigaran taon so sankaliketan a panaon ed sikamin dua, ingen natan ko lambengat naapresya no akin.”

Anggapo so makapanparles sano “say panaon tan ag-iilaloan a nagawgawa” et gawaen to, unong a ginawa ton ag-iilaloan ed kipapasen nen Mary. Anggaman ontan, saraman so mansiansian matoor bilang manangibawag na Panarian so maseguro ed inkasikara a walaan na pabor ed Dios tan too, anggan ingen ed arap na desyang.​—Ecclesiastes 9:​11; 11:1, 2.

[Saray litrato ed pahina 31]

Pibibiang ed ministeryo so sankaabigan a pakausaran na panaon