Maliket Iran Tobonbalo ed Serbisyo Nen Jehova

“Anggan say sakey ya ugaw so nakabatan ed saray kiwas to, balanglad say kondukta to so dalisay tan maptek.”​—ULIRAN 20:​11, New International Version.

1. Anto iray arum a manunan bengatla ya ibabaga na Biblia nipaakar ed si Samuel?

SAY ugaw a si Samuel so nayarin talora odino limaran taon ni lambengat sanen ginapoan ton “nankatambayan” ed tabernakulo nen Jehova ed Shiloh. Sakey ed saray kimey to so mangilukas “ed saray puerta na abung nen Jehova.” Ibabaga na Biblia itan a “si Samuel so ombabaleg lan ombabaleg tan mas lablabayen a nampara ed arap nen Jehova tan manlapud too.” Sanen binmaleg, inpawil to ed Israel so tuan panagdayew. Sikatoy nanlingkor ed Dios “ed amin na saray agew na bilay to.” Anggan sanen sikatoy “masiken tan obanan” sikato nin siansia so amaseseg ed saray totoo ya “ontakot ed si Jehova, tan . . . manlingkor ed sikato ed katuaan.” Agta marakep no amin a totoo so makapangibaga ed sarayan maaabig a bengabengatla nipaakar sikayo a singa unong ed sasalitaen na Biblia nipaakar ed si Samuel?​—1 Samuel 1:24; 2:18, 26; 3:15; 7:2-4, 15; 12:2, 24.

2. Anto iray naaralan na ugugaw ed saray miting na saray totoo nen Jehova natan?

² No sikayo so sakey ed saray Tasi nen Jehova odino onaatendi kayo ed saray Kristianon pantitipon da, nengneng kayo ed kaliberliber na Kingdom Hall no iner a naaralan iyan leksion. Nanengneng yoray nanduruman edad na totoo. Palagi walaray totoo lan “masiken tan obanan.” Walara met iray atateng, tobonbalon totoo, ankelag iran ugugaw, tan anggan ugugaw a melag ni ed taklay da. Kasin saray ankekelag a tuloy so makaaaral la? On. A singa ed saraman so inkasikaray nitarok met ed ontan iran pantitipon sanen sikaray melag. Ipatua dan ibaga itan ed sikayo a manlapud inkaugaw da sikaray manaaral a manrespeto ed Dios, a mangaro ed saray totoo to, tan mangapresya ed saray pasen no iner a sikato so nadayew. Legan na ilabas na panaon, manaral iray ugugaw ed makapakelaw iran katuaan. Dakel iran tobonbalo, a kayarin binmaleg ed kakabatan tan panamabli et nagmaliw iran kabiangan na ‘tobonbalon lalaki tan mamarikit, mamasiken tan ugugaw iran lalaki’ a pinaseseg na salmista a “mandayew ed ngaran nen Jehova, lapud say ngaran ton bokbokor so agnadampot.”​—Salmo 148:12, 13.

3. Panon a saray tobonbalon totoo a kabat da so Biblia et onnengneng ed bilay a duma a manlapud saramay agda kabat?

³ No sikayo so sakey a tobonbalon maparanay ya itatarok na saray atateng yo ed ontan iran pantitipon, sikayo so nikadkaduman apapalaran. Nagogonigon iray dakel a tobonbalon totoo ed saray minumundon problema. Nayarin ontakot iray arum a deralen na saray totoo so dalin. Kabat yon ag-abuluyan na Dios itan a nagawa, ya agto abuluyan iray totoo a mantultuloy a maneral ed sayan masanting a planeta. Imbes ya abuluyan itan a nagawa, say Dios, unong ed say Biblia et “deralen to iramay manederal na dalin.” Kabat yon mangisisipan itan a Biblia na sakey a maliwawan arapen ed matunong a balon mundo na Dios ya asingger la.​—Apocalipsis 11:18; Salmo 37:39; 2 Pedro 3:13.

Say Dilin Pananisia Yo

4. Anton responsabilidad so nipasen ed saray kalangweran diad pakaamta ed saray dalan na Dios, tan panon a si ugaw a Samuel so sakey a maabig ya alimbawa na saya?

⁴ Nen inmuna, say dalan na Kristianon katuaan so nayarin pilalek na saray ateng yo. Nayarin linma kayo ed saray Kristianon pantitipon lapud itagar da kayo, tan nayarin akibiang kayo ed maridios a lingkor lapud gagawaen da itan. Ingen, legan ya ilalabas na saray panaon, magmaliw a dilin liket yo so panaglingkor tan itotolok ed si Jehova. Ginapoan nen ina nen ugaw a Samuel ed dugan dalan, ingen sikaton mismo so ontombok ed satan. Nabasa tayo: “Anggan say sakey ya ugaw so nakabatan ed saray kiwas to, balanglad say kondukta to so dalisay tan maptek.”​—Uliran 20:11, NIV.

5. (a) Diad anton baleg a kablian so say Biblia? (b) Anto so imbaga nen Pablo ed si Timoteo nipaakar ed kaimportantian na nisulat a Salita na Dios?

⁵ Ibabaga na saray Kasulatan ed sikatayo no anto iray panlabayan na Dios ed sikatayo. Sikaray malinlinew a mangipanengneng ed sikatayo no panon a sikatoy naliketan, mangitatarya na dakel ya ipormasyon a makapanggawa na kaabigan ed sikatayo. Imbaga nen apostol Pablo ed tobonbalon katulongan ton si Timoteo ya: “Amin a Sulat so impuyan na Dios tan maabig a pakaaralan, pakasumalan, pakasimbawaaan, pakapanontonan a sikato so wala ed katunongan, pian say too na Dios anggapo komon so pankulangan to, a nabangatan a maong ed amin a gawan maabig.”​—2 Timoteo 3:16, 17.

6. Anto ta so ibaga na libron Uliran nipaakar ed kaimportantian na kakabatan tan maridios a pikakabat?

⁶ Ibabaga met na Biblia ed sikatayo ya “ondengel ed disiplina tan magmaliw a makabat.” Inkuan ton “pablien” iray ganggan na Dios, a “mankaukolan ed pakatalos,” tan “mantultuloy a mananap” na pakatebek a singa mananap kayo na mabli iran kayamanan. No tomboken yo iyan simbawa, insan “natalosan yo so ontakot ed si Jehova, tan naromogan yo so kakabatan na Dios.” Naromogan tayo met iyan simbawa: “Natan, O ananak, talineng kayo ed siak; on, maliket iramay mansiansia ed saray dalan ko. Ontalineng ed disiplina tan magmaliw a makabat, tan agyo ikaindan. Maliket so saman a too ya onderengel ed siak . . . Lapud saman so makaromog ed siak so seguradon makaromog na bilay, tan makawat na pamalangkap a manlapud si Jehova.” Kasin papablien yo so Biblia ya ontan tan mangiyan ed ontan a nengneng na gunaet a manaral ed saray bengabengatla ya ibabaga to?​—Uliran 2:1-5; 8:32-35.

Makagamor na Kakabatan

7. Anto iray sankaimportantian a bengatlan nepeg ya aralen tayo?

⁷ Kabat na dakel iran kalangweran iray amin a statistika ed esport, odino nayarin ibaga ra ed sikayo so amin a bengatlan nipaakar ed paboriton musikon grupo ra. Naromogan darayan bengabengatla a mainomay ya aralen tan nanonotan lapud sikara so interesado ed saratan. Ingen say sankaimportantian a tepet so, Anto so amta da nipaakar ed Dios? Isipen pa no anto so ginawa to. Ginawa na Dios so talba. Impasakbay to no anto so gawaen na too tan no anto so nagawa sakbay na saray ebento et nagawa. Aliwa lambengat ya ibaga na Biblia ed sikatayoy nipaakar ed Dios noag ingen ibangat to itayo no panon a sikatayoy mamaliket ed sikato. Ipanengneng to ed sikatayo no panon a sikatayoy nawalaan na maliket a bilay natan tan no panon a nagamoran tayo so andi-anggan a bilay ed mantunong a balon mundo to. Agta satan so mas importanti nen say pakaamta no siopa so analo ed basketbol odino panaral ed saray kangaranan na musikero a tampol a nalingwanan na saray totoo?​—Isaias 42:5, 9; 46:9, 10; Amos 3:7.

8. Anton maabig ya alimbawa so impanengneng nen Josias tan si Jesus?

⁸ Sanen say kalangweran ya Arin Josias so manedad na 15, sikato “so ginmapon nananap ed Dios na ateng ton si David.” Sanen manedad na 12 si Jesus, aromogan a sikatoy “akayorong ed limog na saray managbangat” ed templo nen Jehova, “onderengel tan ontetepet ed sikara.”a Antokaman so edad yo, kasin singa kayo si Josias tan si Jesus, ya amayobo ed tuan interes ed panaral nipaakar ed saray bengatlan ginawa na Dios tan gawaen to ni?​—2 Awaran 34:3, Lucas 2:46.

9. (a) Anto so walan problema na dakel iran tobonbalon totoo? (b) Anto so manggawa ed panagbasa tan panagaral a mainomay, tan sika ta so personal ya akaromog ed sayan tua?

⁹ Anggaman ontan, nayarin ikuan yo: ‘Say panagaral so mairap a kimey.’ Dakel a totoo, kisibaya ugaw o matatken, so agbalot nambasan magenap pian magmainomay so panagbasa. No kaunongan a dakel so basaen yo, mas mainomay so panagbasa. No kaunongan a manaral kayo, mas mainomay so manaral. Napankokonektaan yoray balon ideya ed saray bengabengatlan kabat yo la, manggawan magmainomay a talosan tan nanonotan iraman.

10. (a) Panon yon makaaral a maong manlapud saray Kristianon miting? (b) Anto so dilin eksperiensiam nipaakar ed saya?

¹⁰ Anto so makatulong ed sika a nagkalalon makaaral nipaakar ed Dios? Nayarin nagkalalon maparanay kayo ed iyaatendi ed saray Kristianon pantitipon. Kasin makapanparaan kayon masasakbay tan peteg a mibiang? Singa alimbawa, kasin mangala kayo na mas aralem a kakabatan a manlapud sayan leksion ed inengneng ed saray teksto na Kasulatan a nisitas ingen ag-inaon? Kasin sikayo so nansulat na sakey a salita odino duara ed mardyin pian mangipanonot ed sikayo no anto so iyarum na kada sakey ed sarayan teksto ed parapo odino ed leksion? Walaan kayo ta na ugalin mangilaktip na anggan sakey ed sarayan teksto ed komento a mangidemostra na apresasyon yo ed Makasulatan a diskusyon? Sakey a matatken ed kongregasyon a maparanay ya onaatendi ed saray miting ed loob na dakerakel iran taon so angikuan ya: “Aromogan kon mairap ya isepsep ko ed kanonotan ko so anggan dinan a leksion ya agkon tuan imparaan, ingen sikato so sakey ya absoluton liket so itombok ed kompleton naaralan ko la.”

11. Panon a makaala kayo na dakel a manlapud saray nibase ed Biblian paliwawa, tan akin ya importanti iya?

¹¹ Sano onderengel kayo ed saray paliwawa ed Biblia, kasin manginota kayo ya antikey pian makatulong ed sikayo a mantalos no panon a say paliwawa so niuksoy tan mansiansian agnagiing iray nonot yo no anto so sasalitaen? Kasin ipapareng yo no anto so nadngelan yo ed no anto so kabat yo la pian natalosan yo itan a nagkalalon mainomay tan nanonotan itan a maong? Nampikasi si Jesus: “Saya et kabaliksan to so bilay ya andi-anggaan, diad pangala ra na pikakabat ed sika, say aleneleneg a tuan Dios, tan ed saman so imbakim, si Jesu-Kristo.” (Juan 17:3) Agta say kakabatan a mangitonton ed bilay et sankaabigan a kakabatan a nagamoran yo? Imanoen no anto so ibabaga na Biblia nipaakar ed saya: “Ta mangiter si Jehova na pikakabat; a manlapud sangi to walaray kakabatan tan pakatebek. Sano onloob ed puso yo so pikakabat tan magmaliw a maliket ed dilin kamarerwam so kakabatan a mismo, say kalakal sikato naani bantay ed tagey mo, iyagel to ka na pakatalos.”​—Uliran 2:6, 10, 11.

Ombaleg ed Apresasyon

12. Anto iray pigaran manunan bengatlan ginawa na Dios para ed sikatayo?

¹² Kasin tuan pablien tayoray ginawa na Dios para ed sikatayo? Amalsa na marakep a dalin tan imparaan itan para ed bilay. Pinalsa to so inmunan ateng tayo, sirin ginawa ton posiblin nianak tayo. Inyarunsa to para ed sikatayo a nawalaan na suporta na saray pamilya tan maaron kongregasyon. (Genesis 1:27, 28; Juan 13:35; Hebreos 10:25) Sikatoy angibaki ed dilin panguloan ya Anak to ed dalin pian manbangat a nagkalalo ed sikatayo nipaakar ed Inkasikato tan mangitarok na dondon a mamaposibli ed andi-anggan a bilay. Kasin peteg ya apresayaen yo so ontan a makapakelaw a palangkap? Kasin pakiwasen to kayon mangawat ed imbitasyon a manaral nipaakar ed sikato tan manlingkor ed sikato?​—Mateo 20:28; Juan 1:​18; Roma 5:21.

13. Akin a liknaen yon say Dios so interesado ed saray indibidual?

¹³ Say Manamalsa na talba so interesado ed saray totoo. Tinawag to si Abraham a “kaarok,” tan inkuanto ed si Moises: “Kabat ta ka ed ngaran.” (Isaias 41:8; Exodo 33:12) Say libro na Apocalipsis inturo to a satan a Dios so walaan na sakey a simbolikon libro, odino “lukot na bilay,” a mankarga na saray ngaran na matoor iran ariripen to a “Manlapud ikiletneg na mundo.” Kasin say ngaran yo so nilaktip diman?​—Apocalipsis 3:5; 17:8; 2 Timoteo 2:19.

14. Panon a say itotombok ed saray prinsipyo na Dios et paaligwasen toy bilay yo?

¹⁴ Kinmiwas iray prisipyo na Dios. Diad panggawa ed saray bengatla unong ed dalan to naekal iray dakel a problema​—imoralidad, panag-abuso ed druga, panagbuek, agginagalan panaglokon, benereal iran sakit, karelmengan, panagpatey, tan sakey ya andukey a listaan na arum a sakisakit. Ontulong met ed sikayon naromogan iray tuan kakaaro tan manbilay a maliket a panagbilay diad itombok ed sikato. Agta mablin tuloy so panggawa ed satan? (1 Corinto 6:9-11) Anggan say sakey a tobonbalo so petepeteg a determinado lan manggawa ed saray bengatla ed dalan na Dios a makagamor na nagkalalon biskeg a gawaen no anto so duga. Ibabaga na Biblia a: “Diad sakey a matoor ed si [Jehova] onkiwas a matoor.” Mamaseguro met itan ed sikatayo ya agto “paulianan iray matoor to” nisay “ikaindan iray totoo to.”​—Salmo 18:25; 37:28; 94:14; Isaias 40:29-31.

Onkiwas a Manlingkor ed Dios

15. Anton maridios a simbaway inter nen Solomon ed saray kalangweran?

¹⁵ Kasin nisentro iray kalat yo ed ompapatey a daan a mundo odino ed say matunong a balon sakey? Kasin ontatalineng kayo ed Dios, odino ontatalineng kayo ed minumundon-makabat iran totoo a manusumlang ed sikato? Kasin say panliliket, atagtagey iran edukasyon, odino sakey a managupot-na-panaon a sekular a karera so iyuuna yo nen say Dios tan panaglingkor ed sikato? Insulat na makabat ya Arin Solomon so interon libro na Ecclesiastes ed Biblia pian ipanengneng no anto so nepeg ya iyuna ed saray bilay tayo. Sinampotan ton: “Nonoten, mo met so Manamalsam diad saray agew na inkaugaw mo, ed arapen a saray mauges ya agew onsabi, odino saray taon onasingger ira sano ikuan mon: ‘Andian ak na liket ed sikara.’ Saya so anggaan na kanonotan amin sikara so nadngel: Takotan mo so Dios tan unoren mo iray ganggan to ta saya sikato so katipunan na kanepegan na too.”​—Ecclesiastes 12:1, 13.

16. Panon a saray tobonbalon totoo et dampoten daray kaaruman a pribilehyo?

¹⁶ Amin na saray mamasiken a Kristianon agagi a kabat yo​—saray matatken, payunir, tan manangasikaso na sirkito tan distrito yo​—so datin ugugaw. Anto so angitonton ed saray bendisyon ed sikara natan? Inaro da so Dios tan mankaliktan a manlingkor ed sikato. Dakel ed sikara diad kalangweran et angala na malaglaem a panaon pian makagamor na kakabatan tan eksperiensia. Sikaray nanaral tan akibiang ed saray miting. Akinabang ira ed panagbangat, tan dinampot daray kaaruman a pribilehyo​—panagpayunir, panaglingkor ed Bethel, odino arum iran kimey. Aliwa iran ‘superyor a kalangweran’; sikaray walaan na normal iran interes tan kaliktan a singa ontan yo met. Ingen, iyaplika ra ed inkasikara a mitunosan ed simbawan: “Antokaman so gawaen mo, gawaen mon amin itan ed interon-kamarerwam unong ed si Jehova, tan aliwan diad too.”​—Colosas 3:23, ipareng so Lucas 10:27; 2 Timoteo 2:15.

17. Anto so makatulong ed saray tobonbalon totoo ya onaligwas ed panaglingkor ed Dios?

¹⁷ Anto met ed sikayo? Kasin peteg a pablien yoray maridios a bengatla? Kasin pipilien yoray kaaro yo ed limog na saramay mangiyuna ed espiritual iran pamaakaran? Kasin papasesegen yoray arum a minabang ed sikayo diad Kristianon aktibidad? Kasin onla kayo ed Kristianon panaglingkor a kaiba iray matatken, mas eksperiensiado pian makaral a manlapud sikara, pian natawayan so liket da, tan pian napaseseg ed saray maabig a kimey da? Anonotan na sakey a Tasi so agew, a ngalngalin 20 taon lay apalabas, sanen diad inmunan pankanawnawa et sakey a matatken a too so ampetapetang ya angabrasa ed sikato diad lawak na ministeryo. Saya, inkuanto, so sakey a sankaimportantian ed bilay to: “Diad sankaunaan a pankanawnawa a siak so onla lapud labay ko, aliwan lapud itatagar ak na saray ateng ko.”

18. Anto iray bengatlan isipen sakbay ya italaga na sakey so inkasikato ed bautismo?

¹⁸ No sikayo la so onaaligwas ed panggawa na saray bengabengatla ed dalan na Dios, diad saginonor et gapoan yo lan nonoten so nipaakar ed bautismo. Sikato so importanti a nonoten a satan a bautismo so aliwan ilalabas na panaon ed inkatatken. Agto ipanengneng a sikayo so ombabaleg, nisay sikato so bengatlan gawaen yo lapud inala iyan kundang na saray kakaaro yo. Sakbay a kerewen a manpabautismo, kaukolan yon nawalaan na manuna iran kakabatan na katuaan tan manbilay a mitunosan ed Salita na Dios. Nepeg yon nawalaan na makatunongan ya eksperiensia ed pinabang ed satan a kakabatan ed saray arum tan namorian saya so sakey a makanan kabiangan na tuan panagdayew. (Mateo 24:14; 28:19, 20) Nepeg a kabat yo met a kayarin mangala ed sayan importantin Kristianon kundang nailaloan kayon manbilay a mitunusan ed matunong iran prisipyo ed Bilia.bDiad pusom, nepeg a nitalagam so bilay mo ed maaron mangatatawen ya Amam.​—Ipareng so Salmo 40:8, 9.

19. Kapigan a say sakey a too so bautismoan?

¹⁹ Bautismo so sakey a kundang a laen sano walaan kayo na mabiskeg a desisyon ya antokaman so nagawa ed nakekeraan a bilay yo, sikayo so manlingkor ed Dios. Sikato so sakey ya inkalapagan a tanda a nanggawa kayo na kompleton, ag-areserbaan, tan andian-kondisyon a dedikasyon ed si Jehova ed panamegley nen Jesu-Kristo a manggawa ed linawa na Dios. Anonotan na sakey a Kristianon matatken so agew, a ngalngalilan kapalduan siglo lay apalabas, sanen amoria ton: “Manggawa ak na bengatla ed satan!” Si Michelle, a sakey a tobonbalon Tasin abautismoan ed Newcastle, England, pigaran taon ed asasakbay, ya inkuanton: “Diad edad a 13, amoriak a nepeg kon italaga so bilay ko tan manpabautismo; anggapoy labay kon gawaen noagta say panlingkor ed Dios.”

20. (a) Anton maabig ya alimbawa so niparaan la na samplon nilibo iran tobonbalon totoo? (b) Panon a moriaen iyan kundang?

²⁰ Diad agano ni samplon nilibo iran tobonbalon totoo so abautismoan. Nanaral ira ed Salita na Dios tan akabatan iray dalan to, insan, diad bautismo ed danum, sikaray magayagan akiulop ed dakel iran matatken ed inkalapagan a panagsimbolo na dedikasyon da ed Dios. Kabat dan say baustimo et aliwan sampot noagta gapoan lambengat na matuan pangitalaga ed dalan na panagbilay a sikara so determinadon ontombok ed satan diad panaglingkor ed si Jehova ed ando lan ando.

[Saray paimano ed leksab]

Panon So Pangebat Yo?

◻ Akin a say kakabatan ed Salita na Dios so importantin tuloy?

◻ Panon kayon makaala na malaglaem a manlapud saray Kristianon miting?

◻ Anto iran bendisyon a manlapud Dios so nepeg a mamayobo ed sikatayon ontolok ed sikato?

◻ Panon kayon mangyuna ed panaglinkor ed Dios?

◻ Kapigan a nepeg a bautismoan so sakey?