Kasin Manadampot Kayo?

“No wala so manadampot ed betang a manangasikaso, sikato so panpirawatan na maabig a gawa.”​—1 TIMOTEO 3:1.

1. Say panumpal na anton getma so manunan importanti ed limog na saray Tasi nen Jehova?

SARAY TASI NEN JEHOVA so walaan na manepeg iran getma a niderekta tan nasusumpal ed maridios a dalan. Agmakapakelaw iya, lapud say Dios da so walaan na marakep a getma tan lawas susumpalen iray gagala to. (Isaias 55:8-11) Saray ariripen nen Jehova so agnepeg a singa saramay totoo a mankulang ed maabig a getma tan ipalabas ya agmanginonang ed panamegley na bilay a daiset a nagungunaaan so siopakaman a nibiig a manlapud inkasikara. Say manunan kaimportantian ed saray Tasi na Dios so panumpal ed marakep a getma na pangiyabawag na mensahe na Panarian tan panginabang ed saray arum ed manangiter-bilay a kakabatan ed Salita na Dios.​—Salmo 119:105; Marcos 13:10; Juan 17:3.

2. Anton getma ed saray Kristianon lalaki so abitla nen Pablo ed 1 Timoteo 3:1?

² Diad organisasyon nen Jehova, walara met iray arum a marakep a getma. Angisitas si apostol Pablo na sakey ed saraya sanen insulat ton: “Matua so sayan salita. No wala so manadampot ed betang na manangasikaso, sikato so panpirawat na maabig a gawa.” Ontan a laki so manlabay a manumpal na bengatlan pankaabigan na saray arum. Pirawat to so “sakey a maabig a gawa,” aliwan kabibilay ya inomay tan gloria. Inkuan na sananey a patalos: “Nayarin satan so tua ed pangibagan say lakin angiteen na puso to ed panangipangulo so walaan na mapagalang ya ambisyon.”​—1 Timoteo 3:​1, Phillips.

Saray Peligro ed saray Mamatatken

3, 4. Akin a say lakin manadampot a magmaliw a sakey a manangasikaso so manbantay ed puso to?

³ Diad anton dalan a say sakey a lakin angiteen na puso to ed pagmaliw a Kristianon manangasikaso so walaan na “mapagalang ya ambisyon”? Bueno, say ambisyon so sakey a mabiskeg a pilalek a dampoten so sakey a nisiglaot a getma. Tua, walaray marakep tan masiblet iran ambisyon. Ingen no say sakey a laki et sipapaabeban dampoten to’y sakey a betang a manangasikaso lapud labay ton tulongan iray arum, say serbisyo to so agawa ed maptek iran motibo tan manresulta ed espiritual a bendisyon. Ingen nepeg ton bantayan so puso to.​—Uliran 4:23.

⁴ Manpirawat iray arum a maambisyon a totoo na dayew. Saray arum labay dan uleyan iray kaparan totoo. Say agum parad inkabantog odino pakayari so singa sakey ya abulok a lamot a sengegan na sakey a masalompapak-itsoray kiew a natomba. Say sakey a Kristiano nayarin natangguyor met ed ontan a mauges ya abayuboan ya ambisyon. (Uliran 16:18) “Nansulat ak na bengatla ed kongregasyon,” inkuan nen apostol Juan, “balet si Diotrepes, ya aroen to a wala ed sikatoy katagtagian ed limog da [“a malabay a mangipangulo ed amin a bengatla,” Phillips], agto akoey anggan dinan a manlapu ed sikami a tekep na galang. Kanian, no onsabi ak, ipanonot ko so kagagawa to a mantultuloy a gagawaen to, a tatalabotoben to itayo na maramsak iran salita. Ontan met, ya agnapenek ed sarayan bengatla, nisay akoen toray agagi a tekep na galang, tan salien ton sebelan iramay malabay a mangako ed sikara tan papawayen ira ed kongregasyon.” (3 Juan 9, 10) Say ambisyon nen Diotrepes so aliwan kristiano. Say inkamaapatagey tan inkaambisyon a gegemtan ed pakayari ed saray arum so andian na pasen ed limog na saray tuan patumbok nen Jesus.​—Uliran 21:4.

5. Diad anton awawey so nepeg ya asikasoen na saray manangasikaso ed kimey da?

⁵ Say sakey a Kristianon manangasikason manpaga ed saray kimey to a tekep na maptek a motibo so agmanagamil na masiblet iran ambisyon. Konsideraen to iyan maabig a kimey na Kristianon panangasikaso a bilang inter-Dios a pribilehyo tan mamastol ed pulok na Dios “aliwan ed silong na inkamapilit, noagta sibubulos; nisay panangaro ed agmatuan gungguna, ingen akatarya; nisay pakatawan ed saraman so tawir na Dios, noag ingen magmaliw [a sakey ya alimbawa] ed pulok.” (1 Pedro 5:2, 3) On, nepeg a saray manangasikaso so manbantay a sumpad pamayubo na kinon tan mananap na pangabuso ed pakayari.

6. Akin a nepeg a say matatken so agpakatawan ed totoo na Dios?

⁶ Nepeg ya agpakatawan so sakey a matatken ed arum a Kristianos, lapud sikatoy kakimeyan da, aliwan ‘sakey a katawan ed pananisia ra.’ (2 Corinto 1:24) Sanen nankaliktan iray arum ya apostoles na inkabantog, si Jesus inkuanto: “Amta yo a saray manuley na saray nasyones pakatawan ed sikara, tan saray manunaan agamilen da so pakauley da ed sikara. Saya so aliwan dalan ed limog yo; noag ingen siopakaman a labay toy magmaliw a manunaan ed sikayo nepeg ya aripen yo. Singa say Anak na too ya aglinma a panlingkoran noag say manlingkor tan inter toy bilay to a panondon ed amayamay.” (Mateo 20:20-28) Say sakey a matatken so aliwan Manunaan a Pastol noagta sakey lambengat a katulungan a pastol. No sikatoy pakatawan ed pulok, sikatoy mangipatnag na espirituy kinon. Nagkalautlan maneral ed resulta no sikatoy managyat ed saray arum a manpatulong a manpalaknab ed mapaatagey iran ambisyon to. Ibabaga na uliran: “Balang sakey a mapangta ed puso sikato so makapadimla ed si Jehova. Anggan say lima ompeket ed lima, ingen anggapoy anggan sakey a bulos a manlapud dusa.”​—Uliran 16:5.

7, 8. (a) Akin makanepegan a saray Kristianon mamatatken a magmaliw a mapaabeba? (b) Mangiter na alimbawa na sakey a mapaabeban matatken.

⁷ Nepeg sirin a saray Kristianon mamatatken a ‘manpaabebay inkasikara ed silong na mabiskeg a lima na Dios.’ Mangamper so kinon ed dalan na espiritual ya inkamausar, lapud saray mapaabeba lambengat so walad dugan kipapasen na puso tan nonot a manggawa ed madibinon linawa. “Ta say Dios ikaindan toray atagey a linawa, ingen iter toy agkanepegan a panangasi ed saray mapaabeba.” (1 Pedro 5:5, 6) On, papalaren nen Jehova iray mapaabeba-ed-nonot. Diad limog na saraya so panlapuan na saray kualipikadon lalakin naturo a manlingkor bilang Kristianon mamatatken.

⁸ Say modernon-agew ya awaran na saray Tasi nen Jehova so napnoan na salaysay nipaakar ed saray mapaabeba ed serbisyo ed panamegley na maridios iran indibidual. Singa bilang, konsideraey maabig-ugalin si W. J. Thorn, datin sakey a managtawataw, odino managbaroy a manangasikaso, tan sakey ya abayag a panaon a nankimey ed Bethel. Nipaakar ed sikato, sakey a Kristiano so nankuan ya: “Agkon balot nalingwanan so sakey a balikas nen Agin Thorn ya akatulong ed siak anggad sayan agew. Inkuan to, tan inaon ko, ‘Kapigan man ya isipen koy baleg a bengatla nipaakar ed siak, onla ak ed sukong, pian mansalita, tan ibagan: “Sikan melag a dabok. Anto so walan ilastog mo ed inkasika?”’” Agaylan nakomendaan a kalidad na saray mamatatken tan ipanengneng na saray arum! Nonoten, “say pansumpalan na inkamaapabeba tan takot ed si Jehova so kayamanan tan gloria tan bilay.”​—Uliran 22:4.

Say Inter-Dios a Pilalek a Manlingkor

9. Akin a nayarin ibagan say pilalek a manlingkor bilang sakey a manangasikaso so sakey ya inter-Dios?

⁹ Kasin say pilalek a manlingkor bilang sakey a manangasikaso so inter-Dios? On, lapud itatarya na espiritu nen Jehova iray pamayubo, tepel, tan biskeg ed sagradon serbisyo ed sikato. Alimbawa, anto so agawa sanen saray apasegsegang a patumbok nen Jesus so nampikasi parad inkatepel a manpulong? “Say pasen no iner a sikaray nanduruypo so yinmenyeg; tan sikara so sakey tan napnoan ya amin na masanton espiritu tan mansasalita ra na salita na Dios a tekep na inkatepel.” (Gawa 4:​27-31) Lapud ta say masanton espiritu so manbunga na ontan iran resulta, pakiwasen to so too a mandampot.

10. (a) Anto so sakey a rason no akin a sakey a Kristianon laki so nayarin manadampot? (b) No itdan itayo na Dios na pribilehyo ed serbisyo, ed anto a napaseguro tayo?

¹⁰ Akin a nayarin say matatken a Kristiano so agmandampot? Sikato so nayarin maespiritual a laki ingen manliknan onkulang. (1 Corinto 2:​14, 15) Siempre, walaan tayo na mapaabeban pangikuenta ed inkasikatayo, a sinonot ed kakulangan tayo. (Mikias 6:8) Imbes a makpel so loob a mannonot a sikatayoy sankakualipikadoan ed sakey a kimey, sikato so maabig no nonoten a “say pikakabat so wala ed saray mapaabeba.” (Uliran 11:2) Ingen moriaen tayo a no abuloyan tayo na Dios ed pribilehyo ed serbisyo, sikatoy mangitarya met na biskeg a kakaukolanen a manumpal. Unong ya imbaga nen Pablo; “Diad amin a bengatla walaan ak na biskeg diad panamegley na saman so mangiter na pakayari ed siak.”​—Filipos 4:13.

11. Anto so nayarin gawaen na sakey a Kristiano a manadampot lapud liknaen ton onkulang na pikakabat a mangiter na simbawa?

¹¹ Say sakey a Kristiano so nayarin agmakadampot lapud liknaen ton onkulang ed pikakabat a mangiter na simbawa. Bueno, nayarin nagamoran to so pikakabat diad panamegley na nagkalalon kuli to a manaral na Salita na Dios, tan petepeteg a manpikasi parad pikakabat. Insulat nen Santiago: “No wala ed sikayo so mankulang ed pikakabat, onkerew komon ed Dios, lapud sikatoy mangiter na dakel ed amin tan andian na pakabalawan; tan niiter itan ed sikato. Balet sikatoy pakerewen na pananisia, ya agmanduaruwan balot, lapud siopaman a manduaruwa so singa daloyon na dayat ya ibasibas na dagem tan ipalir. Diad tua, ag-isipen na satan a too a naawat so antokaman ed si Jehova; sikato so sakey a toon agmaseguro, agmaligen ya amin a dalan to.” (Santiago 1:5-8) Diad ebat ed pikakasi, initdan na Dios si Solomon na “sakey a makabat tan makatalos a puso” a mamakayari ed sikato a mantalos ed maabig tan mauges sano manhusga. (1 Arari 3:9-14) Say kaso nen Solomon so nikadkaduma, ingen ed magunaet a panaral tan ed tulong na Dios, saray lalakin apabtangan na responsabilidad ed kongregasyon so makampansimbawa ed arum a matunotunong. “Ta si Jehova mangiter na pikakabat, ya ompaway ed sangi to so kakabatan tan pakatalos.”​—Uliran 2:6.

12. No makasengeg ed kapagaan a say sakey a laki so agmanadampot, anto so nayarin makatulong ed sikato?

¹² Sakey a sukat na kapagaan so mangamper ed sakey a laki a mandampot. Nayarin isipen ton agto nayarin legpeten iray ambelat a responsabilidad bilang sakey a matatken. Anggan si Pablo binidbir to: “Wala so mangelat ed siak ya agew-agew, say kapagaan parad amin iran kongregasyon.” (2 Corinto 11:28) Ingen kabat na apostol no antoy gawaen sano makaeksperiensia na kapagaaan, lapud insulat ton: “Agkayo mapaga ed antokaman, noag dia ed ganagana lapu ed pikakasi tan pikekerew a tekep na pisasalamat nipakabat komon ed Dios so saray kerew yo. Tan say deen na Dios a talonaan ton amin a pakatalos et manbantay na kapusoan yo tan saray pakayari na nonot yo ed panamegley nen Kristo Jesus.” (Filipos 4:6, 7) On, say pikakasi tan talek ed Dios so ontulong a mamawas ed kapagaan.

13. Panon a nayarin manpikasi so sakey a laki no sikatoy mapaga nipaakar ed dadampoten?

¹³ No pigaran kapagaan so mansiansia, say sakey a toon mapaga nipaakar ed dadampoten so nayarin manpikasi a singa si David: “Sukayan moak, O Dios, tan amtaan so pusok. Usisaen moak, tan amtaen iray agmaligen a nonot ko, tan nengnengen mo no wala ed siak so anggan dinan a makapasakit a kundang, tan itonton mo ak ed maando lawas a dalan.” (Salmo 139:23, 24) Antokaman so nengneng na “agmaligen” odino “mapaga” iran kanonotan tayo, natulongan itayo na Dios ed saratan pian makaaligwas tayo ed esperitual. (Nengnengen so The New International Version.) Satan so maabig ya inyan na sananey a salmo: “Sanen inbagak so: ‘Say salik so nikakaronias, say dilin maaron-panangasim, O Jehova, inegnaan toak. Sanen dinmakel iray agmaligen a kanonotan ko ed loob ko, saray ligliwam pinaliket da so kamarerwak.”​—Salmo 94:18, 19.

Magayagan Manlingkor unong a Linawa nen Jehova

14. Akin a nepeg a say lakin agmanadampot so manpikasid masanton espiritu?

¹⁴ No makasengeg ed kapagaan, liknaan ya agmakasarag, odino kulang na motibasyon, a say sakey a Kristianon laki so onsaew a mandampot, maseguron kaukulan a manpikasi parad espriritu na Dios. Inkuan nen Jesus: “No sikayo sirin, anta mauges kayo, amta yo so mangiter na saray maong a panangaro ed saray anak yo, agkasi nagkalalo a say Ama a walad tawen a mangiter na masanton espiritu ed saramay onkerew ed sikato!” (Lucas 11:13) Lapud say deen tan dilin-panagtepel so sakey ed saray bunga na espiritu, say espiritu so makatulong ed sikatayon makaarap ed kapagaan odino liknaan na inkakulang.​—Galacia 5:22, 23.

15. Anton nengneng iran pikakasi so makatulong ed saraman so mankulang na panamayubo a gawaen day inkasikaran akaparaan ed saray pribilehyo ed serbisyo?

¹⁵ Anto met ed kakulangan na panamayubo? Bilang abautismoan iran Kristianos, nepeg ya ipikasi tayon say Dios et panggawaen to itayo no anto so makapaliket ed sikato. Akikasi si David: “Iparungtal mo ed siak iray dalan mo, O Jehova . . . ibangat mo ed siak iray basbas mo Itonton mo ed siak ed katuaan tan bangatan moak.” (Salmo 25:4, 5) Saray pikakasin singa onia so makatulong ed sikatayon makaiwas ed mauges a dalan, tan makapanpikasi itayo ed sakey a miparan dalan no mankulang itayo na panamayubon mandampot. Nayarin onkerew itayo ed si Jehova a panlabayen to itayon mangawat na saray pribilehyo ed lingkor. Diad tua, no manpikasi tayo parad espiritu na Dios tan mikasi ed panangiderehi to, andiduaruwan akaparaan tayo no saray pribilehyo ed lingkor so niyopresi ed sikatayo. Anggaman ontan, anggapoy dalan ya inkaindan na saray ariripen na Dios so espiritu to.​—Efeso 4:30.

16. Anton awawey so mangitarok na mabiskeg a sagyat pian dampoten so kimey ed kongregasyon?

¹⁶ Unong a walaan na “kanonotan nen Kristo,” makaromog itayo na gayaga ed panggawa na dibinon linawa. (1 Corinto 2:16) Walaan na miparan awawey so salmista, ya inkuan: “Diad panggawa na linawam, O Dios ko, nanliketan ko, tan say ganggan mo so walad dalem na pusok.” (Salmo 40:8) Inkuan nen Kristo: “Nia! Sinmabi ak pian gawaen so linawam,” tan akasabi iman ya anggad patey ed panamairapan a kiew. (Hebreos 10:9, 10) Say pilalek a gawaen a balang bengatlan posibli ed serbisyo ed si Jehova et mangitarok na mabiskeg a panamayubo a dampotey responsabilidad ed kongregasyon.

Onnengneng ed Arapen

17. (a) Akin a nepeg a saray lalakin agla manlilingkor natan a nagnap a tuloy unong a singa datin ginawa ra so ag-onletey? (b) Anto so sankabalgan a pribilehyo ed amin?

¹⁷ Lapud problema ed kabunigasan odino arum iran rason, saray arum a datin nanasikaso ed importantin kimey ed kongregasyon so andian na ontan a pribilehyo ed kaplesan. Saraya so agnepeg a nadismaya. Kabat tayo a dakel iran matoor a lalaki so nanlingkor a nagnap unong a datin ginawa ra so siansianin akatalindeg bilang manamenben na katooran. (Salmo 25:21) Peteg, saray mapaabeban abayag-lan mamatatken so mantultuloy a manggawan akatarya’y eskperiensia ra diad panamegley na pansiansian membro na ulop na mamatatken. Angaman naamper ed edad odino agpakayari, agkaukulan ya onekal ira. Legan, a balang sakey komon a Tasi nen Jehova so mangayaga ed sankaabigan a pribilehyo ed amin, satan so ‘pansalita nipaakar ed gloria na inkaari na Dios’ bilang mananumpal ed masanton ngaran to.​—Salmo 145:10-13.

18. (a) No say sakey a matatken odino ministeryal ya aripen so nakal, anto so nayarin kaukolan? (b) Anton maabig ya awawey so impanengneng na sakey a nakal a matatken?

¹⁸ No sika ed aminsan a panaon et sakey a matatken odino sakey a ministeryal ya aripen ingen agmanlingkor ed satan a kipapasen natan, maseguron siansian asikasoen kayo na Dios, tan nayarin itdan to kayo na pigaran ag-ilaloan iran pribilehyo ed arapen. (1 Pedro 5:6, 7) No kaukolan yo a manggaway pigaran panangilugar, mabulos a bidbiren so lingo tan mankimey ed satan ed tulong na Dios. Saray arum a naekal iran mamatatken so angadpata na agkristianon awawey, tan pigara so nagmaliw ya inaktibo odino naplag a manlapud katuaan. Ingen agaylan makabat so pagmaliw a singa saramay walan angipatnag na maabig ya espiritu! Singa alimbawa, sanen say sakey a matatken so nanlingkor a matatken ed dakel a taon ed Central ya Amerika so nakal, inkuanto: “Ansakit a maong ed siak a nabalang so pribilehyok a pinablik ed abayag. Ingen siak so manggunaet a mankimey ed antokaman a dalan a panlabayan na saray agagin pangusaran ed siak tan mankimey pian nipawil iray pribilehyok ed panaglingkor.” Diad dugan panaon, sayan agi so apribilehyoan a manlingkor bilang sakey a matatken lamet.

19. Anton matukoy a simbawa so inter ed sakey ya agin nakal bilang sakey a matatken odino ministeryal ya aripen?

¹⁹ No sikayo so nakal bilang sakey a matatken odino bilang sakey a ministeryal ya aripen, sirin, pansiansiaen so mapaabeban espiritu. Oniwas ed ampait iran awawey a nayarin agmangikualipika ed sika ed arapen iran pribilehyo. Sakey a maridios ya espiritu so mamawala na respeto. Imbes a magmaliw ya onletey, ya ipanengneng no panon a benindisyonan nen Jehova so ministeryo yo odino kaabungan yo. Ipaalagey so espiritual na pamilya yo, dalawen so mansasakit, tan pasesegen iray mabeblay. Ununa ed amin, pablien so pribilehyo yo ed pandayew ed Dios tan pangiyabawag na maong a balita bilang sakey ed saray Tasi nen Jehova.​—Salmo 145:1, 2; Isaias 43:10-12.

20. Panon a nayarin say ulop na mamatatken so makatulong ed datin manangasikaso odino ministeryal ya aripen?

²⁰ Sakey ya ulop na mamatatken so nepeg a makamoria a say pangekal so nayarin sengegan na panaborido na sakey a datin manangasikaso odino ministeryal ya aripen, anggano sikatoy boluntaryon onekal ed pribilehyo. No sikato so ag-adispelo, balet ta nanengneng na saray mamatatken a satan ya agi so aboridon tuloy, nepeg dan itarok so maaron espiritual a tulong. (1 Tesalonica 5:14) Nepeg dan tulongan pian namoria ton sikato so nakakaukolan ed kongregasyon. Anggan no say simbawa so nakaukolan, aliwan andukey a panaon say sakey a mauyamo tan misasalamat a laki so makawat lamet na kaaruman iran pribilehyo na serbisyo ed kongregasyon.

21. Siopara so nanalagar na pribilehyo ed serbisyo, tan anto so nisuheri ed saraman so manalagar ed ontan natan?

²¹ No sikayo so manadampot, nayarin manalagar kayo sakbay a naawat yo so kaaruman iran pribilehyo. Agkayo naalipangesan. Si Moises so nanalagar na 40 taon sakbay a say Dios so angusar ed sikaton mangibulos ed saray Israelitas a manlapud inkaaripen na Ehipto. (Gawa 7:23-36) Sakbay ya aturo bilang onsublay ed Moises, si Josue so nanlingkor bilang ayudante to. (Exodo 33:11; Numero 27:15-23) Si David so nanalagar sakbay a sikato so niiyan ed trono na Israel. (2 Samuel 2:7; 5:3) Mapatnag a tuloy ya akasagmak si Pedro tan si Juan Marcos na panaon a panagpino. (Mateo 26:69-75; Juan 21:15-19; Gawa 13:13; 15:36-41; Colosas 4:10) Kanian no anggapo so saray kimey yo ed kongregasyon natan, nayarin aabuloyan kayo nen Jehova a namoldi diad panamegley na pakagamor na nagkalalon eksperiensia. Anggan dinan a kipapasen, sikayoy onkerew na tulong na Dios unong a manadampot, tan nayarin bendisyonan to kayo ed kaaruman iran pribilehyo ed serbisyo. Anggaman ontan, mankimey a makuli pian onkualipika parad responsabilidad ed kongregasyon tan ipatnag so espiritu nen David, ya angiyabawag: “Say dayew ed si Jehova isalitak; tan amin komon a laman so mamendisyon ed masanton ngaran to ed andi-anggaan, ya anggan ando lan ando.”​—Salmo 145:21.

Panon so Pangebat Yo?

◻ Sumpa ed anto iran kapeligroan so nepeg a bantayan na saray Kristianon matatken?

◻ Anto so makatulong ed saraman so makasengeg ed kapagaan odino liknaan na inkakulang et agmanadampot?

◻ Anto so mamayubo ed toon gawaey inkasikaton akatarya ed kimey diad kongregasyon?

◻ Tekep na anton awawey so nepeg a negnengen na saray datin mamatatken tan ministeryal ya aripen ed arapen?

[Litrato ed pahina 14]

Si W. J. Thorn so angitarya na maabig ya eksperiensia bilang sakey a mapaabeban matatken

[Litrato ed pahina 16]

Singa si Jesus, kasin mabulos kayon manggawa ed amin a bengatlan posibli ed serbisyo ed si Jehova?