Kasin Pablien Yo No Anto so Walan Ginawa na Dios?

“No siopaman a too a maliket ya ontombok ed siak, iburi to so inkasikato tan sakbaten to so panamairapan a kiew ed inagew-agew tan mantultuloy a tumbokoen toak.”​—LUCAS 9:23.

1. Anto iray pigaran makapakelaw a palangkap ya intarok na Dios?

OTANG tayo iray bilay tayo ed Dios. No agto pinalsa so katooan, agtayon balot nianak. Ingen amalsa so Dios na nagkalalo ni nen say bilay. Ginawa to itayo pian sikatayoy makapanliket ed nambabangil iran bengatla: say taway na tagano, say petang na liwaway banwa, say anniweng na musiko, say inkatartariway agew na sobol, say sulming na aro. Nagkalalo ni, initdan itayo na Dios na kanonotan tan pilalek a manaral nipaakar ed sikato. Impuyan to so Biblia, a mangiter ed sikatayo na maong a panangiwanwan, ya ipanengneng to no panon itayon manbilay na malikeliket iran panagbilay, tan mangiparaan na ilalo ed panbilay ya ando lan ando ed matunong a balon mundo to. Itarok met na Dios so masanton espiritu to, say tulong ed sakey a lokal a kongregasyon, tan maaron mamatatken a lalaki tan bibii a makatulong ed sikatayon mansiansian mabiskeg ed serbisyo to.​—Genesis 1:1, 26-28; 2 Timoteo 3:15-17; Hebreos 10:24, 25; Santiago 5:14, 15.

2. (a) Anto so sankamanunaan a bengatlan ginawa na Dios parad sikatayo? (b) Nagamoran tayo kasi so kilalaban ed panamegley na saray kimey?

² Diad kaaruman na amin na satan, imbaki na Dios so dilin sankapangulwanan ya Anak to a mangibagan nagkalalo ed sikatayo nipaakar ed no anto so iilaloan ed sikatayo na Ama tan mangitarok na “pakabulos diad dondon” parad sinansakey a mangawat ed satan. (Efeso 1:7; Roma 5:18) Satan ya anak, si Jesu-Kristo, imbaga to: “Ta ontan la’y impangaro na Dios ed mundo, ya inter to so bogbogtong ya Anak to, pian siopaman a manisia ed sikato agnatawtaw, noag ingen wala so bilay to’n andi-anggaan.” (Juan 3:16, King James Version) Say kilalaban ya agawan posibli diad panamegley na satan a dondon so ontan lan sankatageyan a kablian ya anggapoy sigpot a dalan a nayarin gawaen a kimkimey na siopakaman pian nagamoran itan, peteg aliwan saray kimey ya agawa ed leksab na Mosaicon Ganggan. Sirin, insulat nen Pablo: “Say too so niyabawag a matunong, aliwan ed saray gawa na ganggan, noag lapu ed pananisia ed si Jesu-Kristo.”​—Galacia 2:16; Roma 3:20-24.

Pananisia tan saray Gawa

3. Anto so imbaga nen Santiago nipaakar ed pananisia tan saray gawa?

³ Onsabi so kilalaban ed panamegley na pananisia, ingen say pananisia tan apresasyon parad amin a ginawa na Dios so nepeg a mamakiwas ed sikatayon onakto. Nepeg a mamayubo itan ed sikatayon gawaen iray bengatla a mangipanengneng na pananisia tayo. Insulat na agi nen Jesus ed ina a si Santiago: “Say pananisia, no satan so andian na saray gawa, so inatey ed inkasikaton dili.” Intuloy ton imbaga: “Ipanengneng mo ed siak so pananisia ya andi so saray gawam et ipanengneng ko naani pananisiak lapu ed saray gawak.” Indanet nen Santiago ya anggan saray demonios “anisia tan nangiwgiw,” ingen mapatnag a saray demonios so agnanggawa na maridios a gawgawa. Diad biek a dapag, si Abraham so walaan na namparan pananisia tan saray gawa. “Say pananisia to so nankimey a tekep na saray gawa to tan ed panamegley na saray gawa to say panansia to so apayadyari.” Inulit nen Santiago: “Say pananisian andian na saray gawa so inatey.”​—Santiago 2:17-26.

4. Anto so imbaga nen Jesus a nepeg a gawaen na saramay malabay ya ontumbok ed sikato?

⁴ Impanengneng nen Jesus so kaimportantian na saray dugan gawa, ya ibabagan: “Ontan met pasindagen yo komon so silew yo ed arap na saray totoo, pian nanengneng daray maong a gawa yo tan galangen da so Ama yo a walad tawen.” “No siopakaman so malabay ya ontumbok ed siak, iburi to komon so inkasikato tan alaen to so panamairapan a kiew ed inagew-agew tan mantultuloy a tumboken toak.”a No “iburi” tayo so inkasikatayo, ipulisay tayo iray dakel a personal a kaliktan. Bidbiren tayo ya otang tayon amin a bengatla ed Dios, kanian iter tayo so inkasikatayo bilang ariripen to, a mangugunaet a manaral tan gawaen so linawa to, unong a ginawa nen Jesus.​—Mateo 5:16; Lucas 9:23; Juan 6:38.

Nalalanor Iray Bilay

5. (a) Anto so impanengneng nen Pedro a nepeg a mangapekta ed interon dalan na bilay tayo? (b) Anton maabig a kimey so inrekomenda to?

⁵ Inturo nen Pedro a saman a “mablin dala” nen Kristo, a niiter ed biang tayo, so ontan lan kablian a say apresasyon tayo ed satan so nepeg ya ompatnag ed interon dalan na bilay tayo. Inlista na apostol iray dakel a bengatla a say panamabli tayo so nepeg a mamakiwas ed sikatayon manumpal. Insimbawa ton: “Ikaindan ya amin so kaugsan.” “Panpilalekan yo so dalisay a gatas a kayaryan na salita.” “Mangibelyaw na karlangan na saman so angekal ed sikayo ed kabilungetan a tinawag to kayo ed makapakelaw a silew to.” “Onarawi ed no anto so mauges tan gawaen no anto so maabig.” “Manparaan ya onebat ed arap na siopakaman a mankaukolan ya ipaliwawa yo so ilalo a wala ed sikayo.” “Manbilay ed nakdaan na agew [yo] ed laman, ya aliwan diad saray pilalek na katooan, noag dia ed linawa’y Dios.”​—1 Pedro 1:19; 2:1, 2, 9; 3:11, 15; 4:2.

6. (a) Panon ya indemostra na saray inmunan-siglon Kristianos so pananisia ra? (b) Anton alimbawa so itarya na saya ed sikatayo?

⁶ Nambilay iray inmunan-siglon Kristianos tukoy ed pananisia ra. Inoman to’y pakaimano ra tan saray personalidad da, a babayuboan iratan a mangitarok ed bilay da a mitunusan ed linawa na Dios. Nanlikna iray inkadakep, saray inkabatobato, saray inkapekpek, inkipangaw, tan anggan patey imbes a sumlangen so pananisia ra. (Gawa 7:58-60; 8:1; 14:19; 16:22; 1 Corinto 6:9-11; Efeso 4:22-24; Colosas 4:3; Filemon 9, 10) Say bantog a Romanon manag-awaran a si Tacitus, nianak a ngalngalin 56 K.P., mangibabaga a saratan a Kristianos “so nigana ed saray manliob ya apuy tan akalot, ya onkana bilang labilabin liwawa, sano sinmelek lay liwaway agew.” Ingen ag-ira tinmunda!​—The Annals, Book XV, parapo 44.

7. Diad anton kipapasen a nayarin naromog na arum a totoo so inkasikara?

⁷ Diad saray pigaran kongregasyon nayarin naromog yoray totoon inmatendi ed saray pantitipon ed dakel a taon. Inaro ra so organisasyon nen Jehova, isipen a saray totoo to so sankaabigan a totoon naabet da, nanggaway maabig iran komento nipaakar ed katuaan, tan idepensa ra so katuaan ed saray tagapaway. Balet arum a bengatla so omparungtal ed dalan da, bengatlan mamokpok ed sikara. Agdan balot inala so maabig a kundang a ginawa na saray 3,000 ed agew na Pentecostes, unong a tinepet na mananisian Etiope, odino saman so impaseseg nen Ananias ed si Saulo a gawaen a tamtampol unong a satan a datin managpasegsegang et amoria ton si Jesus so tuan Mesias. (Gawa 2:41; 8:36; 22:16) Anto so onkulang ed saray ontan natan? Akin ya agda inala so kundang a tatawagen na Biblia a “pankerew ed Dios parad maong a konsiensia”? (1 Pedro 3:21) No aromog yo so inkasikayo ed onyan kipapasen​—kakabaten so katuaan ingen manduwaruwan manggawa na bengatla nipaakar ed satan​—moriaen iyan artikulo bilang nitarya lapud nikabiig a panangaro ed sikayo.

Talonaen Iray Babeng ed Bautismo

8. No sikayo so agbalot nagmaliw a maong ya estudyante, anto so makabat a kurson laen yo natan?

⁸ Anto so mangamper ed dalan yo? Impanengneng na akaunan artikulo ya aromog na arum a say personal a panagaral et sakey a problema. Initdan itayo na Dios na makapakelaw iran kanonotan, tan ilaloan to itayon usaren iratan ed panaglingkor ed sikato. Arum ni ingen a totoon ag-akapanaral a manbasa so angaplika ira ed inkasikara ed satan a kimey pian nagkalalon naaralan so nipaakar ed Dios tan saray gagala to. Anto met ed sikayo? No amta yo la so manbasa, kasin tuan manaaral kayo, a singa ginawa na saray Bereanos, “maalwar a susukimaten iray Kasulatan ya inagew-agew” pian nengnengen irayan bengatla ya ontan? Kasin asukayan yo so “kalapar tan karukey tan kaatagey tan kaaralem” na katuaan? Kasin magenap a kaaralem so ipankotkot yo ed Salita na Dios? Kasin aromog yon agaylan makapasagyat a taltalaga? Kasin abayuboan yon peteg so pilalek a kabatey linawa na Dios? Kasin walaan kayo na petepeteg ya inkaerasan ed say katuaan?​—Gawa 17:10, 11; Efeso 3:18.

9. Anto so dugan bengatlan gawaen yo no walaan kayo na sakey a problema dingan na siopaman ed kongregasyon?

⁹ No maminsan ontunda iray totoo lapud tua odino isisipen a problema a wala ed sikara dingan na siopaman ed kongregasyon. Kasin seryoson naopende kayo na arum? Sirin tumboken so giya ya inturo na salita nen Jesus: “Onla kan ipaliwawam so kasalanan to ed sikayon dua tan sikato lambengat.” (Mateo 18:15) Nayarin onkelaw kayon makasukay a saman a too et agto ingen amta a sikayoy naopende. Balet anggaman kabat to, nayarin nin ‘nagamoran yo so agi yo,’ unong ya imbaga nen Jesus. Nayarin natulongan yo met a makapanalwar a natiror so siopakaman ni. Onarum ni, sano manisip nipaakar ed satan, siopan peteg so panlilingkoran yo​—satan a too odino Dios? Kasin agetaran a tuloy so panangaro yo ed Dios ya abuloyan yo so dinan man ya ag-inkanaspot a lingo na too a mangamper ed panangaro ed Sikato?

10, 11. Anto so nepeg yon gawaen no wala so pigaran sekreton kasalanan a nayarin mamokpok ed sikayo?

¹⁰ Say sekreton kasalanan so nayarin mamokpok ed sakey a manpabautismo. Nayarin agawa iyan bengatla ed apalabas, odino nayarin satan so sakey a mantultuloy ya aliwan padron. No saya so problema yo, agta panaon lan korehien iyan bengatla? (1 Corinto 7:29-31) Dakel ed saray totoo nen Jehova so kaukulan a manggawa na pansalat ed saray bilay da. Ibabaga na Biblia: “Manbabawi, sirin, tan ibeneg pian napaandi iray kasalanan, pian say panaon na pakarepreskoan so onsabi a manlapud say inkatoo nen Jehova.”​—Gawa 3:19.

¹¹ Antokaman so agawaan yo ed apalabas, nayarian yon manbabawi, mansalat, tan onkerew ed panamerdona na Dios. “Pateyen, yo sirin, so kabiangan na laman yo a wadia ed dalin unong na panaglawan, inkarutak, kaalakan, mauges a pilalek . . . Ilakseb yo so daan a personalidad, pati iray ag-agamil, tan ikawes yo ed inkasikayo so balon personalidad, a diad panamegley na suston kakabatan ya agawa unong ed nengneng na Sakey ya amalsa ed satan.” Nitarok yo so bilay yo a mitunusan ed saray dalan to, a mangayaga ed malinis a konsiensia, tan walaan na ilalo ed andi-anggaan a bilay ed matunong a balon mundo to. Agta satan so mablin tuloy ed antokaman a gunaet a laen yo?​—Colosas 3:5-10; Isaias 1:16, 18; 1 Corinto 6:9-11; Hebreos 9:14

12. Anto so nepeg a gawaen yo sano say tabako, panag-abuso ed alkohol, odino inkaadikto ed druga so onsalinga ed baetan yo tan ed sakey a malinis a konsiensia?

¹² Kasin say pangusar na tabako, panag-abuso ed alkohol, odino inkaadikto ed druga so onsalinga ed baetan yo tan ed sakey a malinis a konsiensia? Agta saratan ya ugalin makasigensigen ed bilay so mangipanengneng na agpanrespeto ed makapakelaw a langkap na Dios? No ontan iran ugali so mangamper ed dalan yo, peteg a panaon lan korihien ira. Kasin sarayan ugali so kasimbang na bilay yo? Imbaga nen Pablo: “Linisan tayo komon so inkasikatayon dili ed amin a tilol na laman tan espiritu, ya ayadyarien so kasantosan dia ed takot ed Dios.” Kasin pablien yo so malinis tan matunong iran dalan na Dios a magenap a gawaen itan?b​—2 Corinto 7:1.

Materyal Iran Bengatla

13, 14. (a) Anto so ibabaga na Kasulatan nipaakar ed materyal iran kalat? (b) Akin ya importantin iyuna iray mangatatawen a bengatla?

¹³ Natan iteen na mundo so aligwas tan “maapan gloria na bilay” a manunaan ed amin a bengabengatla. Ingen impara nen Jesus so “say kapagaan na sayan sistema na bengatla tan say pakayari na kayamanan” ed “sabit” a manenyeg ed salita na Dios. Tinepet to met: “Anto so pinanabang na sakey a too no nagamoran toy interon mundo et nabalang toy kamarerwa to?”​—1 Juan 2:16; Marcos 4:2-8, 18, 19; Mateo 16:26.

¹⁴ Inturo nen Jesus a tinaryaan na Dios iray manok a makaromog na tagano tan saray lirio ya ompalnak a marakerakep. Insan intepet to: “Ag kayo ta mamabli nen saray manok? . . . Agaylan mas kawesan kayo na [Dios]!” Sikakabat, si Jesus imbaga to ya “ikaindan so kapagaan” nipaakar ed materyal iran bengatla. Inkuanto: “Mantultuloy ya anapen so Panarian na [Dios], tan sarayan amin a bengatla so niarum ed sikayo.” Indanet to a nepeg tayon iyan a manunaan so mangatatawen iran bengatla lapud ‘no iner iray kayamanan tayo, diman so puso tayo met.’​—Lucas 12:22-31; Mateo 6:20, 21.

Maridios a Debosyon a Tekep na Tulong na Dios

15. Anton maabig a makapaseseg ya alimbawa na saray inmunan-siglon Kristianos so niiter ed sikatayo?

¹⁵ Kasin say panag-tasi ed saray arum so mangiter na problema ed sikayo? Kasin say inkapilekpilek so makasengeg a mamatunda ed sika? No ontan, saman so makanan nonoten a saray inmunan-siglon Kristianos so walaan na mipadparan nengneng na liknaan a wala ed sikatayo natan. Agpinili na Dios iray dakel a makabat a totoo tan saray mabiskeg, noagta pinili to “iray makapuy a bengatla ed mundo, pian niiyan toray mabiskeg a bengatla ed kababaingan.” (1 Corinto 1:26-29) Saray mabiskeg iran relihyoson pampangulo so onsumpa ed sarayan “kabanyakan” a totoo tan inganggan iran ontundan manpulong. Anto so ginawa na saray Kristianos? Sikaray nanpikasi. Kinmerew iray tepel ed Dios, tan inter to ed sikara. Bilang resulta, napnoay Jerusalem na mensahe ra tan kaunuran ayegyeg so interon mundo!​—Gawa 4:1-4, 13, 17, 23, 24, 29-31; 5:28, 29; Colosas 1:23.

16. Anto so naaralan tayo a manlapud baleg a “lurem na saray tasi” ya adeskribe ed Hebreos kapitulo 11?

¹⁶ Sirin, agnepeg a mangamper a balot ed sikatayo so takot ed too tan ed panaglingkor ed Dios. Ibabaga na Hebreos kapitulo 11 a sakey a baleg a “lurem na saray tasi” a tinmakot, aliwan ed totoo, noagta ed Dios. Nepeg a sikatayoy mangipanengneng na mipadparan pananisia. Insulat na apostol: “Lapud walaan tayo na sankabalgan a lurem na saray tasi ed kaliberliber tayo, ikaindan tayo met so amin a pakabelatan tan say kasalanan a magmainomay a makaliktob ed sikatayo, tan batiken tayo a siaanos so babatiken a niiyan ed arap tayo.”​—Hebreos 12:1.

17. Anton panamaseseg so inter na Dios ed panamegley nen Isaias?

¹⁷ Makapangitarok so Dios na balbaleg a tulong. Imbaga na Manamalsa na talba ed si Isaias: “Saraman so manilalo ed si Jehova so mangala na pakauley. Mamaatagey ira naani ya akapayak a singa say agila. Ombatik ira naani tan ag-ira nakesawan; a manakar ira naani tan ag-ira onkapuy.”​—Isaias 40:31.

18. Panon yon talonaan so inkatantan pian minabang ed panagpulong na Panarian?

¹⁸ Saray sitetepel tan maliket iran Tasi a nanenengneng yo ed lokal a kongregasyon so melag lambengat a kabiangan na masulok nen talora tan kapalduan laksan masimoon iran ariripen ed sankadalinan. Sikaray mangayagan awalaan na betang ed kimey ya impasakbay nen Jesu-Kristo a mismo ed sarayan salita: “Sayan maong a balita na panarian so nipulong ed amin ya atooan a dalin parad pantasi ed amin a nasyones; tan insan onsabi so anggaan.” No say pibibiang ed panagpulong na Panarian so mangiter na problema ed sikayo anggaman onkualipika kayo lan gawaen itan, akin ya agkerewen so sakey a Tasi a maong ed ministeryo ya abuloyan to kayon miulop ed sikato a minabang ed panagpulong a kimey? Peteg a mangitarya so Dios na “pakayari a lampas no anto so normal,” tan nayarin nasorpresa kayo a naromogan so agaylan liket ed sayan maridios a serbisyo.​—Mateo 24:14; 2 Corinto 4:7; negnengen met so Salmo 56:11; Mateo 5:11, 12; Filipos 4:13.

19. Anton panagbangat a kimey so inganggan nen Jesus ed saray patumbok to a gawaen?

¹⁹ Ilaloan nen Jesus iramay mangaapresya ed mensahe na Panarian ya onakto ed satan. Inkuanto: “Onla kayo sirin tan manggawa na babangatan ed totoo na amin a nasyones, bautismoan yora ed ngaran na Ama tan ed Anak tan ed espiritu santo, a bangatan ira ya ontolok ed amin a bengatlan inganggan ko ed sikayo.” ​—Mateo 28:19, 20.

20. No sikayo so onalibansa ed espiritual, anton tepet so matukotukoy ed kaunoran?

²⁰ Kasin say apresasyon yo ed saray palangkap na Dios, ed “mablin dala” nen Jesus, tan ed makapakelaw ya ilalo na andi-anggaan a bilay so mamakiwas ed sikayon onakto? (1 Pedro 1:19) Kasin intarok yo so kabibilay yo a mitunusan ed matunung iran kakaukolanen na Dios? Kasin maparanay kayon manginanabang ed panggawa na babangatan? No say ebat ed amin na sarayan tepetepet so sakey a peteg ya on, nayarin panaon la pian kerewen ed sakey ed saray mamatatken na kongregasyon ya aatendian yo ed parehon tepet na saman so mananisian Etiope ed si Filipe: “Anto so mangamper ed siak pian manpabautismo?”​—Gawa 8:36.

[Saray paimano ed leksab]

Nanonotan Yo Ta?

◻ Anto iran nikabiig a rason a walan pisalamatan tayo so Dios?

◻ Anto so nepeg a bayuboan ed sikatayo na pananisia tan panamabli a gawaen?

◻ Anto iran problema so nayarin onsalinga ed sikatayo tan ed katotolok ed Dios, tan anto so nayarin gawaen tayo nipaakar ed saratan?

◻ Anto iran tepet so nayarin itepet na saray agni abautismoan a totoo ed inkasikara?

[Kahon ed pahina 10]

Angiter si Jesus na sakey ya ilustrasyon nipaakar ed toon pinmaway a mantanem na bukel. Saray arum a bukel so dinmapo ed gilig na dalan tan kinan na saray manok. Saray arum so dinmapo ed mabaton pasen ya anggapoy dakel a dalin. Sarayay tinmobo, ingen sanen tinmayagtag so agew, naldab ira tan amagaan. Naplag iray arum ed leet na espinos tan sikaray atabonan. Inkuan nen Jesus a sarayan taloran grupo et mangirepresenta ya: ununa, say toon “ondengel ed salita na panarian ingen agto natalosan itan”; komadua, sakey a mangawat na salita ingen sikatoy nigapol ed petang na “kairapan odino pasegsegang”; tan komatlo, say toon lapud “kapagaan na sayan sistema na bengabengatla tan panamalingon pakayari na kayamanan et leneren to so salita.”

Ingen imbaga met nen Jesus so nipaakar ed sananey a bukel a naplag ed maong a dalin. Inkuanto: “Saya man so makadngel na salita tan natalosan to, a sikatoy tuan manbunga.”​—Mateo 13:3-8, 18-23.

Maabig no tepetan tayo so inkasikatayon: ‘Anton nengneng na “dalin” ak?’

[Kahon ed pahina 11]

Wala ta so kabat yo a malabay ya ompatey imbes a sumlangen to so pananisia to? Walan ginawa itan na nilibo iran Tasi nen Jehova. Diad The Nazi State and the New Religions: Five Case Studies in Non-Conformity, ya insulat nen Dr. Christine E. King: “Sakey ed kada duaran Tasin Aleman so nipangaw, sakey ed apatira so akabalang na bilay da.”

Sanen diad kaunoran anampot so inkakebbiew ed saray kampo nen 1914, “dinmaak iray bilang na Tasi tan anggapoy pikokompormison agawa.” Diad The Nazi Persecution of the Churches, insulat nen J. S. Conway so nipaakar ed saray Tasi: “Anggapoy arum a sekta so angipanegneng na ontan lan determinasyon ed arap na sigpot a puersan terorismo na Gestapo.”

Ag-apasegsegang iray Tasi nen Jehova lapu ed politika odino rasa. Imbes, sikaray nanirap lapu ed panangaro ra ed Dios tan ed pangitalirak dan sumlangen iray apasal-a-Biblian konsiensia ra.