Tepetepet Manlapud Managbasa

◼ Lapud amta na saray Tasi nen Jehova a saray inatey et agmakalikna, akin a siansia nin liknaen dan importante ya onatendi ed saray panangiponpon na kapananisiaan?

Say suston pikakabat ed Biblia nipaakar ed kondisyon na inatey et manalimbeng ed saray Tasi nen Jehova a manlapud sililingon awawey tan agmakabat a kondukta ed panangiponpon. Mangikatunongan met ed sikara ya onatendi ed saray Kristianon panangiponpon.

Ipanengneng a mabitar na Salita na Dios a sano ompatey so too, agto manbilay ed sakey ya ag-ompatey a kamarerwa. (Eclesiastes 9:5) Kayariy patey, say laman so ompawil ed dabok, balangla ed natural ya inkabulok odino ed panamegley na panagpool. Say inatey so agla mabilay; sikatoy manbilay lamet lambengat no sikatoy paolien na Dios ed arapen.​—Juan 5:28, 29; Gawa 24:15.

Sirin, agtomboken na saray Tasi nen Jehova iray agamil ed panangiponpon a nibased pananisia a say inatey a too et walaan na ag-ompatey a kamarerwa, a manbilay ed inerman. Ag-ira mibabali ed panlamay, a tekep na maksil ya akis odino pannanggis a mantaktakot ed “saray espiritu,” odino ed panlamay odino alablabas a pannangis a ginagalan pamareen ed inatey.

Agkaliksan na saya, anggaman ontan, a saray totoo na Dios et agmanermen. Say impatey na kanayon odino sakey a maapit a kaaro so sakey a makapaermen ya eskperiensia, anggano ed tua iran managdayew a walaan na suston pikakabat nipaakar ed inatey. Alimbawa, sanen si Jacob et nanisip a sakey ya atap ya ayep so amatey ed si Jose, say patriaka so “nanermen ed anak to ed dakel iran agew.” Nabasa tayo ya “amin ananak to tan amin a mamarikit to so nansiansian ontalindeg a manligliwa ed sikato.” (Genesis 37:33-35) Sanen inatey si matoor a Jacob, si Jose “angiganggan ed saray ariripen to, saray doktores, a man-imbalsamo ed ama to,” tan “saray Ehipsios so nantultuloy a nanakis ed sikato ed loob na pitomplon agew.” Anggaman say pamilya nen Jacob so ag-mamemben na palson panmoria ed inatey, mabitabitar a naermenan ira ed impatey nen Jacob. “Amin ed kaabungan nen Jose tan saray agagi to” so malabay a marakep so pangiponpon ed si Jacob, tan anggan saray tagapaway so akaimano a sikaray nanangis.​—Genesis 50:1-11.

Dakel nin bilang na alimbawa na Biblia so nisitas no iner a saray ariripen nen Jehova so petepeteg ya apakiwas ed impatey na kapananisiaan odino sakey a kanayon to tan sirin mangiter na dalan ed dugan panayunal.a Sanen si Jesus so walad naeermenan a kakanayon nen Lazaro, si Jesus so bastabasta agmakalikna odino agmatukoy a nanelek. Anggaman walaan na talek ed pakayari na kioli, si Jesus so nanangis. (Juan 11:33-35) Kayarin mismon impatey nen Jesus, saray babangatan to so nanayunal, anggaman imbagato ed sikara a sikatoy napapatey tan napaoli lamet ed bilay.​—Mateo 16:20; Juan 16:17-20; 20:11.

Saray ariripen na Dios natan so makasarag tan makalikna na ermen ya itarok na patey. Ingen, say Biblikan pantalos da so ontulong ed sikaran mamawas o mamalanse ed panayunal da, a mitunosan ed 1 Tesalonica 4:13, 14: “Agagi, agmi labay kayon ompasen ya andi amta nipaakar ed saray naugip ed patey; pian agkayo onermen a singa saray arum ya anggapo so ilalo ra. Tano sisiaen tayo a si Jesus et inatey tan inmolin binmilay lamet, kanian, ontan met, saray naugip ed Jesus awiten ira na Dios naani a piolopen ed sikato.”

Anto, sirin, so nipaakar ed iyaatendi ed Kristianon pananggiponpon (odino sakey a paliwawa ed memoryal a nipaakar ed sakey a mananisia)? Walara so Biblikon katunongan akin a saray Tasi so manliknan makangungguna a nawalaan tan onatendi ed ontan.

Nonoten a sanen ompatnag ya abalang nen Jacob so anak to, “amin ya anak ton lalaki tan amin ya anak ton bibii so nansiansian manligliwa ed sikato.” (Genesis 37:35) Diad dakel iran dalin walan kustombre ed saray kakanayon a mankakasakey ed pangiponpon. Satan so mangitarok na sakey ya okasyon parad saray arum, a nayarin ag-ontanlan maapit a singa agnaapektan emosyonal, pian mangiyopresi na saray salitan simpatiya tan ligliwa. Kayarin inatey si Lazaro ‘dakel ed saray Judios so linma ed si Marta tan Maria pian ligliwaen ira nisesengeg ed agi ra.’ (Juan 11:19) Lalanoren met na saya iray Kristianos a malabay a “manligliwa ed saramay ed dinanman a nengneng na irap.”​—2 Corinto 1:4.

Saray manangasikason Kristiano, anggaman sikaray okupadon maong, so nepeg a mangitonton ed pangitarok na ligliwa ed pulok. Sinononot ed alimbawa ran si Jesus, say Maabig a Pastol, so niganggan a ‘mamedber ed puso na maermen tan manligliwa ed amin na saray managugol.’ (Isaias 61:1, 2; Juan 10:14) Ag-angiyopresi si Jesus ed ontan a ligliwa lambengat sano konbenyente itan. Sikatoy sibubulos ya onarawi ed dalan to pian onla ed naeermenan a kakanayon nen Lazaro​—pian mibiang ed ermen da.​—Juan 11:11, 17, 33.

Anggan saray Kristianos ya agmakayarin mansalita na dakel ed inateyan ed sakey a pangiponpon so makapanggawa na maabig diad kiwala da. Saray naeermenan a membro na pamilya so nayarin makaligliwa a manlapud simpatetekon kiwawala na dakel​—ugaw o matatken–​a manlapud Kristianon kongregasyon. Nonoten so reaktion na pigaran Judios sanen linma si Jesus ed saray naeermenan ya agagin bibii nen Lazaro: “Nengneng yo, agay la so inpangaro to ed sikato!” (Juan 11:36) Saray agmananisian kakanayon, kakaabay, odino kanegosyo so makaatendi ed pangiponpon na sakey a Kristiano so walan paborablen alagyat ed baleg a bilang na presentin Tastasi tan sirin nagmaliw a lalon manabrasa na Bibliko iran katuaan sano nipresenta.

Say kondukta na saray Tasi ya onaatendi so nepeg a mitukoyan ed okasyon. Anggaman amta a say inatey so agmaniirap, tan matalek a manaalagar so kioli ed amin a matoor a totoo, ipapuso ra so simbawa: ‘Panaon a pannangis tan panaon a panelek, panaon a panagogol tan panaon a pansayaw.’ (Eclesiastes 3:4) Say pangiponpon odino serbisyo na memoryal so aliwan panaon a maksil, makapalek a tongtongan. Satan so sakey ya okasyon ya empatya, a mitunosan ed simbawan: “Mililiket kayo ed saray manliliket; minangis kayo ed saray mannangis.”​—Roma 12:15.

Wala ni so sananey a rason no akin a saray Tasi nen Jehova et onatendi ed saray panangiponpon. Ikuan na Salita na Dios: “Magmaong so yakar ed abung a panagogolan nen say yakar ed abung a panliketan, ta satan so kasumpalan na amin a totoo; et say mabilay sikato so igaton to ed puso to. . . . Say puso na makabat wala ed abung na panagogolan, balet say puso na saray maatiw wala ed abung na liket.”​—Eclesiastes 7:2-4.

Anggaman wala so rason parad ilalo na saray Tasi nen Jehova, saraman a salita so apuyanan tan impasen ed Biblia parad gungguna tayo. Say panangiponpon so nayarin ipareng ed “abung na panangis.” Legan ya onaatendi tayo, saray isip tayo so nipaarap ed saray normal a paga tayo o kimkimey tan nipuntirya ed inkatikey na bilay. Balangla ed panamegley na sakit odino pigaran “ag-iilaloan iran nagawa,” say patey so onsabi ed sikatayo tan tamtampol a mangitarok na inkaandi, ta “agkabat met na too so panaon to.” (Eclesiastes 9:11, 12) Saray ateng a kaiba iray anak da ed sakey a Kristianon pangiponpon so nayarin makaromog ed sayan mangitonton ed diskusyon ed katuaan na ipapatey, say pankaukolan tayo ed dondon, tan say kakabatan ed panlikor ed “Dios a mamaoli a manlapud patey.”​—2 Corinto 1:9; Eclesiastes 12:1, 13.

Ag-ikuenta na saray Tasi nen Jehova iray pangiponpon a bilang sacramento, balet sisisiaen da a sarayan maermen iran ebento so mangiyopresi na okasyon ed panligliwa. Diad iyaatendi ed saratan, saray Kristiano so makapangiter na ebidensya na say aro tan galang a wala ed sikara parad kapara dan Kristiano. Tan nayarin sikaray napakiwas a mannonot a lalon seryoso ed kabaliksan na bilay, nipaakar ed no panon dan usaren so dilin bilay da ed arap na Dios.

[Paimano ed leksab]