Aligen so Panangasi na Dios Natan

“Napelag tayo komon, ipangasi, ed lima nen Jehova, ta dakel iray panangasi to.”​—2 SAMUEL 24:14.

1. Anto so liknaan nen David nipaakar ed panangasi na Dios, tan akin?

AMTA nen arin David manlapud eksperiensia a si Jehova so nagkalalon mapangasi nen saray totoo. Matalek a sankaabigan iray dalan, o basbas na Dios, kinaliktan nen David ya aralen iray dalan To tan manakar ed katuaan To. (1 Awaran 21:13; Salmo 25:4, 5) Kasin naliliknam so singa ed si David?

2. Anton simbawa so inter nen Jesus ed Mateo 18:15-17 nipaakar ed panamenben na seryoson kasalanan?

² Itarok na Biblia so pakatebek ed sikatayo ed kanonotan na Dios, anggan ed saray pamaakaran ed nepeg a gawaen tayo no siopakaman et akapankasalanan a sumpad sikatayo. Imbaga nen Jesus ed saray apostoles to, a nagmaliw iran Kristianon manangasikaso ed saginonor: “Et no akapankasalanan so agim ed sika, onla ka a mipalinewan ed sikato so kasalanan to a sikayon dua lambengat. No dengelen toka, tinalom so agim.” Say lingon nalalanor dia so aglambengat personal ya agpanginonang balet sakey a seryoson kasalanan, a singa tila tan panleglemew. Inkuan nen Jesus a no sayan kundang et agmanresolbe ed kaso tan no walaray mantasi, say akapankasalananan so mangitagar ed sikara pian paneknekan a wala so lingo. Kasin sayan kundang so kaunoran a solusyon? Andi. “No [say managkasalanan] agtora labay a denglen, ibagam ed kongregasyon. No sikato so ag-ondengel ed kongregasyon, sikato so ipasen mo a singa too ed nasyones tan sakey a sumisinggil na buis.”​—Mateo 18:15-17.

3. Anto so labay ya ibaga nen Jesus ed sakey ya agmanbabawin managkasalanan so magmaliw “a bilang too na nasyones tan sakey a sumisinggil na buis”?

³ Bilang Judios, natalosan na saray apostoles so kabaliksan ed panatro ed managkasalanan “a bilang too na nasyones tan sakey a sumisinggil na buis.” Inmarawi iray Judios ed piuulop ed totoo na nasyones, tan binalaw daray Judios a nankimey a bilang sumisinggil na buis na Romano.a (Juan 4:9; Gawa 10:28) Sirin, manisimbawa si Jesus ed saray babangatan a no ikaindan na kongregasyon so managkasalanan et ontunda ra a milimog ed sikato. Anggaman ontan, panon itan a mitukoyan ed impedeneng nen Jesus ed sumisinggil na buis no maminsan?

4. Kayari na impanisip ed saray salita to ed Mateo 18:17, akin a si Jesus et makapideneng ed arum a sumisingil na buis tan managkasalanan?

⁴ Ikuan na Lucas 15:1: “Amin na sumisingil na buis tan managkasalanan so inmasingger ed sikato pian ondengel ed sikato.” Aliwan balang sumisingil na buis o managkasalanan so wadman, balet “amin” ed pantalos a dakel. (Ipareng so Lucas 4:40.) Dinan iraman? Saraman so interesadon naperdona iray kasalanan da. Saray arum ya ontan so alagyat ed mensahe na panagbabawi nen Juan a Managbautismo. (Lucas 3:12; 7:29) Kanian sanen saray arum et inmasingger ed si Jesus, say impanpulong to ed sikara so agsinmumlang ed konseho to ed Mateo 18:17. Imanoen a “dakel a sumisingil na buis tan managkasalanan [dinmengel ed si Jesus] tan ginmapo ran tinmunbok ed sikato.” (Marcos 2:15) Saraya so agmankaliktan a mantultuloy ed mauges a dalan na panagbilay, a mangikakaindan ed antokaman a tulong. Imbes, nadngel da so mensahe nen Jesus tan saray puso ra so akidwit. Anggaman sikara ni so mankakasalanan, anggan mamapasimbalo, “say maabig a pumapastol” diad panamegley na panpulong ed sikara so mangaalig ed mapangasin Ama.​—Juan 10:14.

Panamerdona, sakey a Kristianon Obligasyon

5. Anto so manunan posisyon na Dios ed panamerdona?

⁵ Walaan tayorayan ampetang a paneguro ed inkabunlok na Ama tayon mamerdona: “No ipatua tayoray kasalanan tayo, sikato so matoor tan matunong a mamerdona na saray kasalanan tayo tan linisan to itayo ed ganaganay aginkatunong.” “Insulat ko irayan bengatla ed sikayo pian agkayo mankasalanan. Tan ingen, wala so mankasalanan, wala so apireng tayo ed Ama, si Jesu-Kristo, a matunong.” (1 Juan 1:9; 2:1) Kasin posibli so panamerdona ed toon dispelo?

6. Panon a naperdona tan nipawil so sakey a dispelo?

⁶ On. Diad panaon na panispelo ed sakey ya agmanbabawi ed kasalanan, saray mamatatken a mangilalaman ed kongregasyon so mangisalaysay ed sikato a posiblin sikato so manbabawi tan manawat na panamerdona na Dios. Nayarin onatendi ed saray miting ed Kingdom Hall, no iner a makadngel na instruksion ed Biblia a makatulong ed sikaton manbabawi. (Ipareng so 1 Corinto 14:23-25.) Diad dugan panaon nayarin sikato so onkerew a nipawil ed malinis a kongregasyon. Sano miarap iray mamatatken ed sikato, determinaen da balanglan sikato so nambabawi tan anaynan ed makasalanan a kurso to. (Mateo 18:18) No ontan so kipapasen, nayarin sikato so nipawil, mitunosan ed padron ed 2 Corinto 2:5-8. No agawan sikato so dispelo ed dakel a taon, nepeg to so manggawa na nankakasakey a gunaet ya onaligwas. Nayarin nakaukolan to so malaem a tulong manlapulad satan a mangipaalagey na pikakabat tan panamabli to ed Biblia pian sikato so magmaliw a mabiskeg ed espiritual a Kristiano.

Ipapawil ed si Jehova

7, 8. Anton padron so ingeter na Dios mitukoyan ed adakep a totoo to?

⁷ Balet kasin saray mamatatken a mismo so mangala na dinan man a pangiyuna ed iyaasingger ed toon dispelo? On. Ipanengneng na Biblia a say panangasi so nibalikas aliwa lambengat ed negatibon pamokpok ed dusa balet maparanay diad positibo iran kiwas. Walaan tayo na alimbawa nen Jehova. Sakbay ya imbaki toray agmatoor a totoo to ed inkadakep, mapropetikon angilukas na ilalo ed ipapawil da: “Nodnonoten morayan bengatla, O Jacob, tan sika, O Israel, ta sika so aripen ko. . . . punasen koray pakaloksoam mo a singa ed lurem, tan saray kasalanan mo a singa makapal a lurem. Pawil ka ed siak, ta dondonen ta ka.”​—Isaias 44:21, 22.

⁸ Insan, legan na inkadakep, angala na kaaruman a kundang si Jehova, ya onkikiwas ed positibon dalan. Angibaki na saray propeta, saray manangilaman to, pian mangimbita ed Israel a ‘sikato so anapen tan sikato so naromog.’ (Jeremias 29:1, 10-14) Diad Ezequiel 34:16, inyaliling to so inkasikato ed sakey a pumapastol tan saray totoo na nasyon na Israel ed abalang a karnero: “Anapen ko so abalang, tan ipawil ko so pinataynan.” Diad Jeremias 31:10, inusar met nen Jehova so impangitalintao ed impagmaliw to a pumapastol ed saray Israelitas. Andi, agto iretrato so inkasikato a bilang pumapastol ed kasimpukokan a manalagar ed abalang ya ompawil; imbes, impanengneng to so inkasikato a bilang sakey a pumapastol a mananap ed saray abalang. Imanoen ya anggaman kaslakan ed saray totoo et agmanbabawi tan adakep, ginapoan na Dios so nanggunaet pian anapen so ipawil da. Tan mitunosan ed Malaquias 3:6, agsalatan na Dios iray dalan to ed pidedeneng ed Kristianon oksuyan.

9. Panon a say alimbawa na Dios so natumbok ed Kristianon kongregasyon?

⁹ Agta mangipatnag iya a wala so katunongan ed panangiyuna na saray kundang ed saray dispelo tan manbabawi la natan? Nonoten ya angiter na direksion si Pablo ya ekalen so mauges a too ed limog na Kristianon kongregasyon. Diad saginonor binaat to so kongregasyon ya ipanengneng da so panangaro ra ed too lapud panagbabawi to, a mangipaarap ed manutumbok a kipawil to ed kongregasyon.​—1 Corinto 5:9-13; 2 Corinto 2:5-11.

10. (a) Anton motibo so nepeg a mamakiwas ed antokaman a gunaet a mangabet ed arum a totoon dispelo? (b) Akin ya aliwan saray Kristianon kakanayon so agmangiyuna ed pangabet?

¹⁰ Say inaon ya encyclopedia ed akadkauna angikuan: ‘Say manunan rason ed pangekal so say panalimbeng ed saray estandarte na say grupo: “say daiset a lebadura palebagen to so interon masa” (1 Cor. 5:6). Sayan motibo so malinew ed kaslakan a biblikal tan ekstrakanonikal iran balikas, balet say paga ed indibidual, anggan kayariy pakaekal, so manunan kerew nen Pablo ed 2 Cor. 2:7-10.’ (Kien mi so italiko.) Sirin, say paga ed onyan nengneng so nepeg a lohikon nipanengneng natan na saray pumapastol na pulok. (Gawa 20:28; 1 Pedro 5:2) Saray datin kakaaro tan kakanayon so maniilalon makapawil so dispelo; ingen lapud respeto ed ganggan ed 1 Corinto 5:11, ag-ira milimog ed sakey a toon nisian.b Ipalima da ed aturo iran pumapastol so pangala na pangiyuna pian nengnengen no kasin satan a sakey et interesado ed ipapawil.

11, 12. Anton nengneng na saray nisian ya aganggan piabetan na saray mamatatken, balet anton nengneng so nayarin bisitaen?

¹¹ Agmatukoy ed saray mamatatken a mangala na panangiyuna ed pigaran nisian, a singa saray apostata, a ‘manpikewet ed bengabengatla pian tanguyoren iray babangatan ed inkasikara.’ Saraya so ‘palson managbangat a mangiloloob na pakaderalan tan palikdoen so kongregasyon ed kunkunwarin salsalita.’ (Gawa 20:30; 2 Pedro 2:1, 3) Agmangitarok so Biblia na antokaman a basiyan ed pananap na saray dispelon makolkol o aktibon mamaseseg na kalilingo.​—2 Tesalonica 2:3; 1 Timoteo 4:1; 2 Juan 9-11; Judas 4, 11.

¹² Anggaman ontan, dakel iran nisian so aliwan ontan. Nayarin say sakey et tinmunda la ed seryoson kasalanan ya akadispelosipan to. Sananey et say panangusar na tabako, o sikato so nayarin alabas a mainum ed apalabas, balet sasalien to lan itangguyor iray arum ed kasalanan. Nonoten ya angga ni sakbay a pinmawil ed Dios so Israel, sikato so angibaki na saray mangilalaman to pian mamaseseg ed sikaran ompawil. Balanglan si Pablo o saray mamatatken ed kongregasyon na Corinto so angala na pigaran panangiyuna a manusisa ed toon dispelo, agibaga na Biblia. Sanen saman a too et walan nambabawi tan anampot ed imoralidad to, inderehi nen Pablo ed kongregasyon so kipawil to.

13, 14. (a) Anto so mangipanengneng a pigaran nisian et nayarin onkiwas ed mapangasin panangiyuna? (b) Panon a say ulop na mamatatken et mangiyarunsa ed nagawan pakabet?

¹³ Diad saginonor iran panaon wala ra so kaso no iner a sakey a matatken so walan akiarap ed toon dispelo.c No iner a matukoy, say pumapastol so antikey a mangidalatdat ed saray kundang a nepeg a kapeten ed kipapawil. Arum ed onyaran totoo so nambabawi tan nipawil. Say ontan a magayagan pansumpalan so mangipanengneng a wala so dispelo o nisian ya inmebat ed mapangasin iyaasinger a ginawa na saray pumapastol. Balet panon a nabenbenan na saray mamatatken iyan pamaakaran? Maminsan ed sakey a taon o nagkalalo ni, say ulop na mamatatken so nepeg a mangonsidera no kasin walaray ontan a totoo a manaayam ed teritoryo ra.d Onarap iray mamatatken ed saraman so nisian ed masulok lan sakey taon. No satan so matukoy, unong ed saray sirkumstansya, sikara so mangiasain ed duaran mamatatken (maseguro ed saramay pamilyar ed situasyon) ya ondalaw ed ontan ya indibidual. Anggapo so ibibisitan nagawa ed siopaman a mamaneknek na kritikal, peligroson awawey o walan angipakabat ya agda labay so tulong.​—Roma 16:17, 18; 1 Timoteo 1:20; 2 Timoteo 2:16-18.

¹⁴ Saray duaran pumapastol so makapantelepono ed ikerew nipaakar ed antikey ya idadalaw, o nayarin onsamar ira ed sakey a matukoy a panaon. Legan na dalaw, nepeg ya ag-ira anawet o ni ambetel noagta kaukolan a sipepetang a mangipatnag na mapangasin paga. Imbes a repasoen so apalabas a kaso, singbaten daray teksto ed Biblia a singa Isaias 1:18 tan 55:6, 7 tan Santiago 5:20. No say too et interesado ed ipapawil ed pulok na Dios, siaabagey iran mangisalaysay ed saray kundang a nepeg ton laen, a singa panagbasa na Biblia tan saray palapagan na Watch Tower Society tan iyaatendi ed saray pantitipon ed Kingdom Hall.

15. Anto so nepeg ya isepsep ed kanonotan na saray mamatatken a miabet ed toon dispelo?

¹⁵ Sarayan mamatatken so mankaukolan na kakabatan tan pakatalos ed panetermina no kasin wala so pakapatnagan na panagbabawi tan no kasin sakey ya ontumbok a panagpawil so makanepegan. Sinononot ira, siempre, ya arum a totoon dispelo so agbalot ‘mannonot ed panagbabawi.’ (Hebreos 6:4-6; 2 Pedro 2:20-22) Kayari na say dalaw, say duara so mangiter na antikey ya insalitan report ed Serbisyo Komite na Kongregasyon. Insan, sikara so mangipakabat ed ulop na mamatatken ed ontumbok a miting da. Say mapangasin pangiyuna na saray mamatatken so mangiretrato ed panmoria na Dios: “‘Ompawil ka ed siak, tan ompawil ak ed sika.’ kuan nen Jehova na saray ehercitos.”​—Malaquias 3:7.

Arum a Mapangasin Tulong

16, 17. Panon so panmoria tayo ed saray kakanayon a Kristiano ed siopaman a dispelo?

¹⁶ Anto met ed sikatayon aliwan manangasikaso tan agmangala na ontan iran pangiyuna ed totoon dispelo? Anto so nagawaan tayo a mitukoyan ed sayan oksuyan tan ed pangalig ed si Jehova?

¹⁷ Leleg a say sakey et dispelo o nisian, nepeg tayon tomboken so bilin: “Agmiulop ed siopaman ya atawag ya agi a milalawan o maagum o sakey a managtalintao o maayew o buanges o managpatobo, ya anggan miakan ed ontan a too.” (1 Corinto 5:11) Balet say Biblikan totontonen so nepeg ya agmangapekta ed panmoria tayo ed saray membro na Kristianon pamilya a manaayam a kaiba so toon dispelo. Saray kadaanan a Judios so kinmiwas a siaarawi ed saray sumisingil na buis a say panamusol da so linmaknab ya anggad pamilya na sumisingil na buis. Ag-isusuheri itan nen Jesus. Inkuanto a say managkasalanan a mangikaindan na tulong so natraton “singa too na nasyones tan sakey a sumisingil na buis”; agto inkuan ya itrato na otan iray membro na Kristianon pamilya.​—Mateo 18:17.

18, 19. Anto iray arum a dalan a nipanengneng tayo so Inkakristiano ed matoor iran kanayon na sakey a toon nisian?

¹⁸ Nagkalautlan nepeg tayon masuporta ed saray membro na pamilya a matoor iran Kristianos. Niarap la ra ed ampait tan saray babeng lapud manaayam ed abung a kaibay sakey a toon nisian a nayarin manismaya ed espiritual a babatiken da. Nayarin labayen ton agmanbisita iray Kristiano ed abung; o no sikara so minengnengan ed saray matoor a membro na pamilya, sikato so agmarespeton onarawi manlapud saray bisita. Nayarin sikato met so mangamper ed saray gunaet na pamilyan onatendin amin ed Kristiano iran miting tan asamblea. (Ipareng so Mateo 23:13.) Sirin saray Kristiano ya agapalaboan so peteg a makanepegan na panangasi tayo.​—2 Corinto 1:3, 4.

¹⁹ Sakey a dalan a nipanengneng tayo so maaron panangasi so diad ‘mansalitan siaabagey’ tan nawalaan na makapaseseg iran tongtongan ed ontan iran matoor ed sankaabungan. (1 Tesalonica 5:14) Walara met iray maabig a pankanawnawa a mangiter na panamabiskeg ed sakbay tan kayari na saray miting, legan a walad lawak na kimeyan, o sano manulop ed arum a panaon. Nepeg ya agtayo manasaglawi nipaakar ed panagdespilo noagta maningbat ed dakel a makapaalagey a bengabengatla. (Uliran 25:11; Colosas 1:2-4) Legan a saray mamatatken et mantultuloy a mamastol ed saray Kristiano ed pamilya, nalmoan tayo met a sikatayo so makapanbisita ya andian na pidedeneng ed toon nisian. No nibanbanan say dispelo so onebat sano ondalaw tayo o mantelepono, simplen anapen lambengat so Kristianon kanayon. No maminsan saray membro na Kristianon pamilya so makawat na sakey ya imbitasyon ed abung tayo parad piuulop. Say punto so: Sikara​—balanglan tobonbalo tan matatken​—​so kaparan ariripen tayo, inadaron membro na kongregasyon na Dios, ag nipuera.​—Salmo 10:14.

20, 21. Panon so liknaan tayo tan ikiwas ed sakey a nipawil?

²⁰ Sananey a pasen a nipanengneng tayo so panangasi so nilukas sano sakey a nisian et nipawil. Ipabitar na saray ilustrasyon nen Jesus so gayaga ed tawen sanen ‘sakey a managkasalanan et nambabawi.’ (Lucas 15:7, 10) Nansulat si Pablo ed saray taga-Corinto nipaakar ed toon dispelo: “Manwarin ontan nepeg yon sipapangasin perdonaen tan ligliwaen, agla piga sayan too et agnalener ed alabas ya ermen to. Kanian pikasik ed sikayo a paeleten yo so aro yo ed sikato.” (2 Corinto 2:7, 8) Nepeg tayon iyaplika itan a simbawan maseryoso tan siaaro ed saray agew tan simsimba kayariy kipawil na sakey a too.

²¹ Say ilustrasyon nen Jesus nipaakar ed managdarak ya anak so mangiparungtal na peligron nepeg tayon arawian. Say panguloan ya anak so agnangayaga ed impawil na managdarak imbes ag-aliketan. Agtayo komon magmaliw ya ontan, walaan na sakit na linawa ed apalabas a lingo o maneemem ed kipawil na sakey a too. Imbes, say kalat tayo so singa say ama, ya angiyulustra na ebat nen Jehova. Say ama so maliket a say anak to, ya abalang tan ompatnag a kuanmono inatey, so aromog, o apaoli. (Lucas 15:25-32) Mitukoyan, sikatayo so mansalitan sibubulos ed nipawil ya agi tan sikato so pasesegen ed miduman dalan. On, nepeg tayon ipatnag a sikatayo so mangipapanengneng na panangasi, unong ed manamerdona tan mapangasin mangatatawen ya Ama tayo.​—Mateo 5:7.

22. Anto so nalalanor ed pangalig tayo ed si Jehova a Dios?

²² Anggapo so duaruwa a no labay tayon aligen so Dios tayo, nepeg tayon ipanengneng so panangasi a mitunosan ed saray ganggan to tan hustisya to. Sikato so ideskribe na salmista ed sayan pamaakaran: “Si Jehova maong a linawa tan mapangasi, matantan a manpasnok tan baleg ed abig na linawa. Si Jehova maong ed amin, tan saray matamoy a panangasi to wala ed amin na saray kimey to.” (Salmo 145:8, 9) Agaylan maaron padron a kopyaen na saray Kristianos!

[Saray paimano ed leksab]

Naimano Yo Ta Irayan Puntos?

◻ Panon so impanatro nen Jesus ed saray sumisinggil na buis tan managkasalanan, balet akin a si Jesus et walaan na pidedeneng ed pigaran ontan?

◻ Anton Makasulatan a basiyan a wala so mapangasin pangiyuna ed dakel ya abalang?

◻ Panon a saray ulop na mamatatken so mangala na ontan a pangiyuna, tan ed siopa?

◻ Panon a nepeg tayon nipanengneng so panangasi ed saray nipawil tan ed saray pamilya na dispelo?

[Kahon ed pahina 17]

Siopaman a datin kabiangan na malinis tan maliket a kongregasyon na Dios balet dispelo o nisian la natan so agnakakaukolan a mansiansia ed satan a kipapasen. Imbes, satan so makapanbabawi tan mangala na pangiyuna a mitongtong ed saray mamatatken ed kongregasyon. Akalukas so ipapawil.

[Picture Credit Line ed pahina 18]

Garo Nalbandian