Tepetepet Manlapud Managbasa
◼ Anto so “maptek” ya agnagawaan nen apostol Pablo, unong ya asaglawi to ed Roma 7:19?
Gendagendat, tutukoyen nen Pablo so kakulangan na abilidad a gawaen ya amin iray maptek a bengatlan nidalatdat ed Mosaikon Ganggan. Saman so imposibli parad Pablo tan saray arum, pati sikatayo, lapud ag-inkayadyari tan inkamakasalanan. Balet anggapo so pankaukolan na kaandian na ilalo. Inlukas na bagat nen Kristo so dalan na panamerdona na Dios tan sakey a maabig a talindeg ed Sikato.
Nabasa ed Roma 7:19: “Ta say maptek a kaliktan ko so agko nagawaan, bangbalet say mauges ya agko kaliktan so aagamilen ko.” Ipanengneng na konteksto a manunan sasalitaen nen Pablo so nipaakar ed “maptek” diad pantalos ed no anto so nanpaknaan ed Ganggan. Diad bersikulo 7 walan inkuanto: “Kasin kasalanan so Ganggan? Andin balot! Anggaman ontan, agko akabatan so kasalanan noag lapu ed Ganggan; tan, alimbawa, agko met akabatan so inka-agum no ag-inkuan na Ganggan; ‘Agka managum.’” On, impalinew na Ganggan a lapud agda nakompleton natumbok, amin a totoo et makasalanan.
Intuloy a sinaglawi nen Pablo a sikato so “mabilay a wari andi ganggan.” Kapigan itan? Bueno, sanen sikato so walad loobloob sakbay ya intarok nen Jehova so Ganggan. (Roma 7:9; ipareng so Hebreos 7:9, 10.) Anggaman si Abraham so ag-ayadyari, say Ganggan so agni niiter, kanian sikato so ag-apanonotan ed inkamakasalanan to diad insaew ya itumbok ed dakel iran ganggan. Kasin kabaliksan na satan a bektan niiter so Ganggan tan angipanengneng ed ag-inkayadyari na too et mamawala na mauges iran pansumpalan? Andi. Intuloy nen Pablo: “Ta no, diad kabiangan to, say Ganggan so masanto, tan say bilin so masanto tan matunong tan maptek.”—Roma 7:12.
Imanoen a deneskribe nen Pablo so Ganggan a bilang “masanto” tan “maptek.” Diad ontumbok iran bersikulo, insalaysay to a “no antoy maptek”—say Ganggan—so apalinew a sikato et sakey a managkasalanan, tan sayan kasalanan so nanggawa ed sikaton makana ed ipapatey. Insulat nen Pablo: “Say maptek a kaliktan ko agko nagawaan, bangbalet say mauges ya agko kaliktan so aagamilen ko. No, natan, no antoy agko kaliktan sikato so gagawaen ko, say mankikimey ed satan so aliwa lan siak, noag say kasalanan a manayam ed siak.”—Roma 7:13-20.
Sirin, diad sayan konteksto, si Pablo so agmansasalita ed kaslakan a kamaongan, odino simplin maabig iran gawa. (Ipareng so Gawa 9:36; Roma 13:3.) Nagkalautlan tutukoyen to so panggawa (odino agpanggawa) na bengabengatlan agmitunosan ed maptek a Ganggan na Dios. Diad akadkauna sikato so walan siseseet ya angagamil na Judion relihyon tan—no ipareng ed saray arum—so walan “andi tilol.” Anggmaan kuan, anggaman ed kanonotan to so walan sakey a maanus ya aripen ed satan a maptek a Ganggan, sikato so nansiansian agtinmunbok a nanagnap ed satan. (Filipos 3:4-6) Iretrato na Ganggan so ayadyarin estandarte na Dios, ipapanengneng a say apostol a sikato ed laman et sikato ni so sakey ya aripen ganggan na kasalanan tan sirin akondena ed ipapatey. Anggaman ontan, si Pablo so misalamat a diad panamegley na bagat nen Kristo sikato so niyabawag a matunong—niliktar manlapud ganggan na kasalanan tan satan so matunotunong a pansumpalan, sakey a dusa na ipapatey.—Roma 7:25.
Saray Kristiano natan so anggapo ed silong na Mosaikon Ganggan, ta satan so nipasak ed panamairapan a kiew. (Roma 7:4-6; Colosas 2:14) Ingen maabig no bidbiren tayo a satan so agmakapabelat a bilin a magmainomay tayon lingwanan. Andi, manuna ed amin say Ganggan so maptek. Walaan tayo sirin na katunongan a basaen iray libro ed Biblia a manlugan na Ganggan tan aralen no anto so kakaukolanen to ed Israel. Saray Tasi nen Jehova ed liktob na dalin so asingger lan manggawa ed satan, mantultuloy ed sinimban pambasa ra na Biblia.
Legan a basaen tayo so Ganggan, nepeg tayon isindag iray prinsipyon importanti ed nanduruman bilin to tan ed saray gunggunan nagamoran na totoo na Dios unong a salien dan tumboken iraman a maptek a ganggan. Nepeg tayo met ya apresyaen, a sikatoy ag-ayadyari tan agmakayarin makatumbok a kompleto ed maabig a naaralan tayo manlapud Salita na Dios. Balet sanleleg a mibabakal a sumpad ganggan na kasalanan, makapangayaga itayo ed ilalon niliktar ed panamegley na kausar na bagat nen Kristo ed sikatayo.