Kasin Nepeg Yo A Panisiaan So Trinidad?
Kasin say Dios so Lawas Atagey nen si Jesus?
1, 2. Anto so malinew ya impanengneng nen Jesus nipaakar ed siglaotan to ed Dios?
ANGGAN kapigan ag-imbaga nen Jesus a sikato so Dios. Amin ya imbaga to nipaakar ed inkasikato so mangipatnag ya agto impara so inkasikato ed Dios ed anggan anton nengneng—diad pakayari, pikakabat, tan edad.
2 Kada peryodo na kiwawala to, balanglan diad tawen o diad dalin, ipatnag na salita tan kondukta to so panagpasakup ed Dios. Say Dios so lawas atagey, si Jesus so abebbeba a pinalsa na Dios.
Nipanengneng so Pidumaan na Dios ed si Jesus
3. Anto so imbaga nen Jesus nipaakar ed inkasikato a mangipanengneng a sikato so biig manlapud Dios?
3 Naulit-ulit, ya impanengneng nen Jesus a sikato so pinalsan biig ed Dios tan sikato, so Jesus so walaan na Dios ya atagtagey nen sikato, sakey a Dios a dadayewen to, sakey a Dios a tinawag to na “Ama”. Diad pikakasi ed Dios, salanti, say Ama, inkuan nen Jesus, “Sika, say saksakey a tuan Dios.” (Juan 17:3) Diad Juan 20:17 inkuantod si Maria Magdalena: “Onla ak ed Amak tan Ama yo, Dios ko tan Dios yo.” (RS, Katolikon edisyon) Diad 2 Corinto 1:13 pinalinew nen Pablo so sayan siglaotan: “Nadayew komon so Dios tan Ama na Katawan tayo a Jesu-Kristo.” Lapud si Jesus so walaan na Dios, say Ama to, agnayarin sikato met iyan Dios.
4. Panon so impangipanengneng nen apostol Pablo a say Dios tan si Jesus so nambiigan tan nandumaan?
4 Si apostol Pablo so andiduaruwan angibaga a si Jesus tan say Dios so peteg a nambiigan: “Diad sikatayo wala so sakey a Dios, say Ama, . . . tan wala so sakey a Katawan, si Jesu-Kristo.” (1 Corinto 8:6, JB) Impanengneng na apostol so pandumaan nen sinalambit to so “kiwawala na Dios tan si Kristo Jesus tan ed saray pinilin angheles.” (1 Timoteo 5:21, RS Common Bible) Unong a sinalita nen Pablo a si Jesus tan saray angheles so nambiigan ed balang sakey dimad tawen, ontan met ed si Jesus tan say Dios.
5. Lapud say Mosaikon Ganggan so mankaukolan na duaran tasi pian pekderan so sakey a bengatla, anto so ipanengneng na saya nipaakar ed si Jesus tan say Dios diad impantasi ra?
5 Saray salita nen Jesus ed Juan 8:17, 18 so makabaliksan met. Inkuanto: “Walan nisulat ed dilin ganggan yo, ‘Say pantasi na duaran totoo so tua.’ Siak so mantasi ed inkasiak, tan say Ama ya angibaki ed siak so mantasi ed siak.” Ipapanengneng dia nen Jesus a sikato tan say Ama, salanti, say Makapanyarin-amin a Dios, so duaran nambiigan a persona, ta no andi panon so pagmaliw dan peteg a duaran tastasi?
6. Diad Marcos 10:18, panon nen Jesus ya impanengneng a sikato so aliwan kabiangan na sakey ya inka-Dios?
6 Nagkalalon impanengneng nen Jesus a sikato so biig ed Dios diad impangikuanto: “Akin a tawagen yoak na maabig? Anggapo so maabig noag say Dios lambengat.” (Marcos 10:18, JB) Ibabaga nen Jesus ya anggapon balot so maabig a singa say Dios, anggan si Jesus a mismo. Say Dios so maong diad dalan a mangibiig ed sikato ed si Jesus.
Matulok ya Aripen na Dios
7. Antoran balikas so inusar nen Jesus a mangipanengneng a say Dios so atagtagey?
7 Naulit-ulit, a nambalikas si Jesus: “Say Anak so agmakapanggawa na antokaman ed dilin panliketan to, saray nanengneng to ed Ama so nayarian to lambengat a gawaen.” (Juan 5:19, The Holy Bible, nen Monsenyor R. A. Knox) Siak so linmasor a nanlapud tawen pian gawaen, aliwan say dilin linawak, noag say linawa na samay angibaki ed siak.” (Juan 6:38) “Agko kien so ibabangat ko, noagta kien na samay angibaki ed siak.” (Juan 7:16) Agta atagtagey so angibaki nen say imbaki?
8. Panon a say sakey ya ilustrasyon ya inter nen Jesus so angiparungtal na inkamatulok to ed Dios?
8 Sayan siglaotan so mabitar ed ilustrasyon nen Jesus ed ubasan. Impara to so Dios, say Ama to, ed akankayarian na ubasan, a nambaroy ed biek-taew tan impia to so pangasikaso ed saray managbayubo, a mangirerepresenta ed Judion klero. Nen say makankayarian so angibaki na aripen pian miala na bunga na ubasan, say aripen so pinepekpek na saray managbayubo tan pinatakyas dan kalimalima. Kanian angibaki na komaduan aripen, tan saginonor say komatlo, tan sikaran dua so akaawat na namparan tratamento. Kaunoran, inkuan na makankayarian: “Ibakik so inararok ya anak ko [si Jesus]. Angangko ta sikato so respetoen da.” Ingen inkuan na saray marelmeng a managbayubo: “‘Saya so mananawir; pateyen tayo, pian nakayarian tayo so tawir.’ Kanian imbantak dad paway tan sikato so pinatey da.” (Lucas 20:9-16) Inyilustra dia nen Jesus so dilin talindeg to bilang say imbaki na Dios pian gawaen so linawa na Dios, a singa say pangibaki na sakey ya ama ed matulok ya anak.
9. Panon so impangipasen na saray patumbok nen Jesus ed sikato?
9 Si Jesus so lawas impasen na saray patumbok to bilang matulok ya aripen na Dios, aliwan kapara na Dios. Nanpikasi ra ed Dios nipaakar ed “say matoor ya aripen mon Jesus, a nilanaan mo, . . . tan saray tanda tan pakelaw so agawa ed panamegley na masanton aripen mo a Jesus.”—Gawa 4:23, 27, 30, RS, Katolikon edisyon.
Lawas Atagtagey so Dios
10. Panon a say bautismo nen Jesus so mangipanengneng a sikato so aliwan Dios?
10 Diad gapo na ministeryo nen Jesus, sanen inmemwas manlapud danum a nanpabautismoan to, inkuan na boses na Dios a nanlapud tawen: “Saya so Anako, say inad-arok, ya inabobonan ko.” (Mateo 3:16, 17) Kasin ibabaga na Dios a sikaton dili so anak, ya inabobonan to so inkasikato, imbaki to so inkasikato? Andi, bilang atagtagey, ibabaga na Dios a Manamalsa a sikato so mangaabobon ed abebbeban sakey, say Anak ton Jesus, parad arapen a kimey.
11. Anto so ipatnag na impanlana nen Jehova ed si Jesus?
11 Indanet nen Jesus so katagyan na Ama to sanen inkuanto: “Say espiritu nen Jehova so walad siak, lapud siak so nilanaan to a mangiyabawag na maong a balita ed saray duka.” (Lucas 4:18) Say panlana et say pangiter na kanepegan o kimey ed sakey ya andian na autoridad a saya so nanlapud atagtagey a sakey. Malinew say Dios so atagtagey, lapud sikato so nanlana ed si Jesus, ya inikdan to na kanepegan a sipor ya anggapo ed sikato.
12. Sanen mitotongtong ed ina na duaran babangatan to, panon nen Jesus ya impanengneng a say Ama to so atagtagey?
12 Pinalinew nen Jesus so katagyan na Ama to sanen kinerew na ina na duaran babangatan to a say sakey so onyurong ed nikawanan tan say sakey ed nikawigi nen Jesus no onsabi ed Panarian to. Inmebat si Jesus: “No nipaakar ed yurongan diad nikawanan tan nikawigin limak, say pangiter ed saraya so agko kanepegan; ingen sikato so nipaakar ed saraman so angiteran nen Amak,” salanti, say Dios. (Mateo 20:23, JB) No si Jesus so Makapanyarin-amin a Dios, nayarian to komon ya ipabtang irayan kipapasen. Ingen agnayarian nen Jesus ya ipabtang, lapud say Dios so akankanepegan a mangiter ed saratan, tan si Jesus et aliwan sikato so Dios.
13. Anto so ipanengneng na saray pikakasi nen Jesus?
13 Saray dilin pikakasi nen Jesus so mabiskeg ya alimbawa ed abebbeban kipapasen to. Sanen si Jesus so asingger lan ompatey, impanengneng to no siopa so atagtagey diad impanpikasi: “Ama, no kaliktan mo, iyarawim iyan kopa ed siak. Ingen, komon, aliwan say linawak so nasumpal, noag say linawam.” (Lucas 22:42) Siopa so panpipikasian to? Diad sakey a kabiangan ton dili? Andi, sikato so manpipikasi ed sakey a sigpot a biig, a Dios, say Ama to, a say linawa to so atagtagey tan niduma ed sikato, say mogmon Sakey a makayarin “mangiyarawi ed sayan kopa.”
14. Sanen si Jesus so asingger lan ompatey, panon a say inkelyaw to so mangiparungtal a say Dios so atagtagey?
14 Sanen manpapanabos la, kinmelyaw si Jesus: “Dios ko, Dios ko, akin ya inkaindan moak?” (Marcos 15:34, JB) Siopa so kekelyawan nen Jesus? Diad inkasikato o diad kabiangan na inkasikato? Seguradon, satan a kelyaw, “Dios ko,” so agmanlapud sakey ya impasen ton sikato so Dios. Tan no si Jesus so Dios, siopa sirin so angikaindan ed sikato? Sikaton dili? Magutgut itan. Inkuan met nen Jesus: “Ama, diad saray limam imatalek ko so espirituk.” (Lucas 23:46) No si Jesus so Dios, akin a nakaukolan nin imatalek to so espiritu to ed Ama?
15. Panon a say impatey tan inkioli nen Jesus so sumlang ed pagmaliw ton Dios?
15 Kayari impatey nen Jesus, sikato so taloy agew a walad lubok. No sikato so Dios, sirin alingo so Habacuc 1:12 ed impangikuan: “O Dios ko, say Masantok a Sakey, sika ya ag-ompatey.” Ingen ibabaga na Biblia a si Jesus so inatey tan andian na liknaan ed lubok. Tan siopa so amaoli ed si Jesus manlapud inaatey? No sikato so peteg ya inatey, agto nayarian a paolien so inkasikato. Diad biek a dapag, no sikato so agpeteg ya inatey, say impankunwari ton inatey so ag-akabayar ed bili dondon parad kasalanan nen Adan. Ingen sigpot a binayaran to so bili diad panamegley na peteg ya impatey to. Sirin say “Dios [sikato] so amaoli ed si [Jesus] diad impangukpos to ed irap na patey.” (Gawa 2:24) Say atagtagey, Makapanyarin-amin a Dios, so amaoli ed abebbeban, aripen to a Jesus manlapud inaatey.
16. Akin a say pakayari nen Jesus a manggawa na milagro so agmangipatnag a sikato so Dios?
16 Kasin say pakayari nen Jesus a manggawa na saray milagro, a singa say pamaoli ed totoo, so paneknek a sikato so Dios? Bueno, saray apostol tan di propeta Elias tan Eliseo so awalaan met na satan a pakayari, ingen satan so agnanggawa ed sikaran atagtagey nen totoo. Say pakayarin manggawa na saray milagro so inter na Dios ed saray propeta, si Jesus, tan apostoles pian ipanengneng a Sikato so ontutulong ed sikara. Balet satan so agnanggawad siopaman ed sikara a kabiangan na inka-Dios.
Si Jesus so Walaan na Limitadon Kakabatan
17. Akin ya agkabat nen Jesus no kapigan so anggaan na sayan sistema na bengabengatla?
17 Sanen impropesiya nen Jesus so nipaakar ed anggaan na sayan sistema na bengabengatla, inkuanto: “Diad satan ya agew odino oras anggapo so makapikabat, anggan saray angheles ed tawen, nisay Anak, noag say Ama lambengat.” (Marcos 13:32, RS, Katolikon edisyon) No si Jesus so Anak a pareho ed inka-Dios, kabat to met komon so kabat na Ama. Balet satan so ag-amta nen Jesus, lapud sikato so agmipara ed Dios.
18. Panon so pangipanengneng na Hebreos 5:8 ya agnayarin si Jesus so Dios?
18 Mipadpara, nabasa tayo ed Hebreos 5:8 a si Jesus so “akaaral na katutulok ed saray bengatlan intepel to.” Isipen tayo kasin wala ni bengatlan aralen na Dios? Andi, ingen ginawa nen Jesus, lapud aliwan amin a kabat na Dios et amta to. Tan nakaukolan ton aralen so sakey a bengatlan agnakaukolan ya aralen na Dios—say katutulok. Say Dios so agbalot ontulok ed siopaman.
19. Panon so pangipanengneng na Apocalipsis 1:1 ya agnayarin si Jesus so Dios?
19 Naimano tayo met so pandumaan ed kakabatan na Dios tan si Kristo sanen si Jesus so apaoli ed tawen pian nakaiba na Dios. Imanoen so ununan balikas ed unor a libro na Biblia: “Say puyan ed Jesu-Kristo, ya inter na Dios ed sikato.” (Apocalipsis 1:1, RS, Katolikon edisyon) No si Jesus a mismo so kabiangan na inka-Dios, kaukolan ni kasin sikato so puyanan na sakey a kabiangan na inka-Dios—say Dios? Seguradon amta to lan amin komon itan, lapud satan so kabat na Dios. Ingen ag-amta nen Jesus, lapud aliwan sikato so Dios.
Si Jesus so Nantultuloy a Nanpasakup
20, 21. Say inkitandoro nen Jesus kayari inkioli to so mangibaga ed sikatayo na anto?
20 Diad sakbay-toon kiwawala to, tan sanen wadiad dalin, si Jesus so nanpasakup ed Dios. Kayari na inkioli to, sikato so nantultuloy a nanpasakup, a komadua ed posisyon.
21 Nipaakar ed inkioli nen Jesus, inkuan nen Pedro tan saray kakaiba to ed Judion Sanhedrin: “Intandoro na Dios so sayan sakey [Jesus] . . . ed nikawanan a lima to.” (Gawa 5:31) Inkuan nen Pablo: “Sikato so intandoro na Dios ed matalonggaring a kipapasen.” (Filipos 2:9) No si Jesus so Dios, panon a nitandoro, salanti, nitandoro ed atagtagey a kipapasen nen say gendat a nanggayagaan to? Sikato so sipor lan nitandoro a kabiangan na Trinidad. No sakbay na inkitandoro to, et si Jesus so kapara na Dios, say pangitandoro ed sikato so manggawad sikaton atagtagey nen say Dios.
22-24. Diad anton dalan a saray onggendan a salaysay nipaakar ed apaolin Jesus so onsumlang ed Trinidad? (a) Hebreos 9:24 (b) Gawa 7:55; (c) Apocalipsis 4:8 ya anggad 5:7.
22 Imbaga met nen Pablo a si Kristo so “linmoob ed tawen a mismo, pian onapireng ed arap na Dios lapud sikatayo.” (Hebreos 9:24, JB) No onapireng kayo ed arap na sananey, panon a sikayo met imay toon apirengan? Agnayari. Nepeg a sikayo so duma tan biig.
23 Mipadpara, sakbay na impantupak dad sikato anggad patey, say martir ya Esteban so “tinmangay ed tawen tan anengneng to so gloria na Dios tan si Jesus ya akaalagey ed nikawanan a lima na Dios.” (Gawa 7:55) Malinew, anengneng to so duaran nambiigan ya indibidual—balet anggapo so masanton espiritu, anggapo so Trinitaryon inka-Dios.
24 Diad salaysay na Apocalipsis 4:8 angggad 5:7, say Dios so nipanengneng ya akayurong ed mangatatawen a trono to, balet anggapo si Jesus. Sikato so nepeg ya onasingger ed Dios pian alaen so lukot manlapud kawanan a lima na Dios. Ipanengneng na saya a diad tawen si Jesus so aliwan Dios noagta biig ed sikato.
25, 26. Anton obserbasyon so ginawa na Rylands Bulletin nipaakar ed apaolin Jesus?
25 Mitunosan ed asalambit, say Bulletin of the John Rylands Library ed Manchester, Inglatera, kuanto: “Diad mangatatawen a bilay kayari inkioli to, si Jesus so niletraton mangaakbibit na personal ya indibidualidad to ed kada nengneng bilang duma tan biig ed persona na Dios a singa say impanbilay to ed dalin bilang toon Jesus. Iyabay tan ipareng ed Dios, sikato so peteg a nanengneng, bilang sakey a mangatatawen a pinalsa ed mangatatawen a korte na Dios, a singa met saray anghel—ingen bilang Anak na Dios, sikato so niduma ed kategorya, tan atagtagey nen sikara.”—Ipareng so Filipos 2:11.
26 Inkuan met na Bulletin: “Anggaman ontan, nibagan say bilay tan kipapasen to bilang mangatatawen a Kristo so agmankabaliksan nisay mangipatnag a diad madibinon talindeg et sikato so miparad Dios a mismo tan sigpot a sikato so Dios. Diad kasuniyan, diad impangiletrato na Balon Sipan ed mangatatawen a persona tan ministeryo to nanengneng tayo so sakey a piguran namparan biig tan abebbeba ed Dios.”
27. Panon kabayag a si Jesus so mantultuloy a pauleyan ed Dios?
27 Diad andi-anggaan a bilay ed tawen, siansian si Jesus so biig, papauleyan ya aripen na Dios. Satan so imbalikas na Biblia ed onian dalan: “Kayari na satan onsabi so anggaan, no [si Jesus ed tawen] iyawat to so panarian ed Dios Ama . . . Tan say Anak a mismo so pauleyan met ed samay Sakey ya anguley ed amin, pian say Dios so manguley ed amin a ganagana.”—1 Corinto 15:24, 28 NJB.
Agbalot Binirbir nen Jesus a Sikato so Dios
28. Panon a say 1 Corinto 11:3 so mangipanengneng a say Dios so atagtagey nen si Jesus?
28 Malinew so talindeg na Biblia. Si Jehova, so aglambengat Makapanyarin-amin a Dios tan sakey a personan biig manlapud si Jesus noagta Sikato met so sankatagyan ed amin a panaon. Si Jesus so lawas nipresenta bilang biig tan abebbeba, sakey a mapaabeban aripen na Dios. Kanian malinew so ibabaga na Biblia a “say Dios so ulo nen Kristo” a singa met “say ulo na balang laki et si Kristo.” (1 Corinto 11:3) Makasengeg ed saya inkuan nen Jesus a mismo: “Say Ama so babaleg nen Siak.”—Juan 14:28, RS, Katolikon edisyon.
29-31. Say agano nin impansukimat so angitonton ed ondadakel a bilang na saray manag-awaran ed anton konklusyon?
29 Say katuaan et si Jesus so aliwan Dios tan agton balot impasen so inkasikaton ontan. Saya so abirbir na ondarakel a bilang na saray eskolar. Unong ya ibabaga na Rylands Bulletin: “Nepeg ya arapen so katuaan a say impansukimat ed Balon Sipan, salanti, say apalabas a talomplo odino apataplon taon so angitonton ed onbabaleg a bilang na saray napanmatalkan ya eskolar na Balon Sipan ed konklusyon a si Jesus . . . so agbalot anisian sikato so Dios.”
30 Ikuan met na Bulletin nipaakar ed saray inmunan-siglon Kristiano: “Kanian, no ipabtang dad [si Jesus] iray mapagalang a titulon singa say Kristo, Anak na too, Anak na Dios tan Katawan, saraya so mangipakabat a sikato so aliwan Dios, noagta ginawa to so kimey na Dios.”
31 Kanian, aksobien na anggan saray relihyoson eskolar a say ideyan si Jesus so Dios et sumlang ed interon paneknek na Biblia. Ditan, say Dios so lawas atagtagey, tan si Jesus so abebbeban aripen.
(Ituloy ed ontumbok a paway.)