Kasin Nepeg Yo A Panisiaan So Trinidad?
Dayewen so Dios Unong ed Saray Kondisyon To
1. Anton nengneng na pikakabat so makana parad andi-anggaan a bilay?
INKUAN nen Jesus diad pikakasi to ed Dios: “Kabaliksan na saya so andi-anggaan a bilay, say pangala da na pikakabat ed sika, say saksakey a tuan Dios, tan say imbakim, salanti si Jesu-Kristo.” (Juan 17:3) Anton nengneng na pikakabat? “Linawa na [Dios] ya amin a nengneng na totoo so nilaban tan ondago ed suston pikakabat ed katuaan.” (1 Timoteo 2:4) Onia so impangipatalos na Amplified Bible ed saginonor a balikas: “Amtaen a tekep na inkaeksakto tan inkasusto so [madibinon] Katuaan.”
2. (a) Ibaga no anto so lapuan na katuaan nipaakar ed Dios? (b) Say pakaamta ed katuaan so ontulong ed sikatayon makapaliis ed anto?
2 Kanian labay na Dios a sikato tan saray gagala to so amtaen tayo ed suston paraan, a mitunosan ed madibinon katuaan. Tan say subol na katuaan et say Salita na Dios, say Masanton Biblia. (Juan 17:17; 2 Timoteo 3:16, 17) Sano naaralan na totoo so suston ibabaga na Biblia nipaakar ed Dios, napaalisan da so pagmaliw a singa ibabaga na Roma 10:2, 3, a walaan ira na “seseg ed Dios; balet aliwan unong ed suston pikakabat.” O singa saray Samaritano, ya angibagaan nen Jesus: “Dadayewen yo so agyo amta.”—Juan 4:22.
3. No kaliktan tayo so abobon na Dios, anto so nakaukolan tayon itepet ed inkasikatayo?
3 Kanian, no kaliktan tayo so abobon na Dios, nepeg tayon itepet ed inkasikatayo: Anto so ibabaga na Dios nipaakar ed inkasikato? Panon so kaliktan ton pandayew ed sikato? Antoray gagala to, tan panon tayon onnepeg ed saraya? Say suston pikakabat ed katuaan so mangiter na suston ebat ed sarayan tepet. Sirin nadayew tayo so Dios unong ed saray kondisyon to.
Panagmodmora ed Dios
4. Panon a say bangat a Trinidad so panagmodmora ed Dios?
4 “Pagalangan koramay mangigagalang ed siak,” kuan na Dios. (1 Samuel 2:30) Panangigalang ta ed Dios so pangipasen ed siopaman a kapara to? Kasin panangigalang ed sikato so panawag ed si Maria bilang “ina na Dios” tan “[biin] Manamegley . . . ed Manamalsa tan saray pinalsa To, unong ya ibabaga na New Catholic Encyclopedia? Andi, panagmodmora ed Dios irayan pananisia. Anggapoy kapara to; nisay awalaan na ina a too, tan si Jesus et aliwan Dios. Tan anggapo so “[biin] Manamegley,” lapud say Dios so anuro lambengat na “sakey a manamegley ed Dios tan totoo,” si Jesus.—1 Timoteo 2:5; 1 Juan 2:1, 2.
5. Anto so nansumpalan manlapud bangat a Trinidad?
5 Andiduaruwan, winetwet tan pinakilot na doktrinan Trinidad so pakatebek na totoo ed tuan kipapasen na Dios. Saya so anebel ed totoon kabaten a susto so Sankatalbaan a Soberano, si Jehova a Dios, tan sikatoy dayewen unong ed saray kondisyon to. Unong ed inkuan nen Hans Küng: “Akin a labayen ni na siopaman a laokan na antokaman a kaisipan so inkasaksakey tan inkadumaruma na Dios no satan so mamakilot lambengat odino mamaandi-kana ed satan ya inkasaksakey tan inkadumaruma?” Ingen satan a mismo so ginawa na pananisian Trinidad.
6. No agbidbiren na too so Dios unong ed “suston pikakabat,” antoran kiwas so ontumbok a gawaen da?
6 Saramay manisia ed Trinidad so “agmamidbir ed Dios unong ed suston pikakabat.” (Roma 1:28) Inkuan met na satan a bersikulo: “Inkaindan ira na Dios ed mauges a kanonotan da, pian gawaen daray bengatlan agmakanepegan.” Indatak na bersikulo 29 ya anggad 31 so arum ed saramay ‘agmakanepegan’ a bengatla, a singa say ‘panagpatey, kolkolan, ag-inkatoor ed sipan, anggapoy aro ed nianakan, anggapoy panangasi.’ Sarayan mismo so aagamilen na saray relihyon a mananisia ed Trinidad.
7. Panon a saray Trinitaryo so nanmodmora ed Dios?
7 Alimbawa, mabetbet a saray Trinitaryo so amasegsegang tan amatey ni ingen ed saramay angipulisay ed doktrinan Trinidad. Tan alablabas so ginawa ra. Pinatey da so kapara ran Trinitaryo ed panaon na bakal. Wala ta ni so lalon ‘agmakanepegan’ nen say pamatey na Katoliko ed kapara ton Katoliko, Ortudoks ed kapara ton Ortudoks, Protestante ed kapara ton Protestante—amin ed ngaran na saksakey a Trinitaryon Dios?
8. Panon so impangiparungtal na Salita na Dios ed saramay walaan na katuaan tan ed saramay andian?
8 Ingen, malinew ya inkuan nen Jesus: “Diad saya nakabatan da a sikayoray babangatan ko, no wala so aro ed limog yon dili.” (Juan 13:35) Saya so pinalaknab na Salita na Dios diad impangikuan: “Diad sayan katuaan mapatnag iray anak na Dios tan anak na Diablo: Siopaman ya agmangagamil na inkatunong so agnanlapud Dios, anggan say agto aroen so agi to.” Saramay mamatey ed espiritual ya agagi ra so niolibay ed si “Cain, a nanlapud marelmeng a sakey [si Satanas] tan pinatey to so agi to.”—1 Juan 3:10-12.
9. Anto so imbaga na sakey a teologon taga-Denmark nipaakar ed Kakristianoan?
9 Kanian, say pambangat na makawetwet iran doktrina nipaakar ed Dios so angipaarap ed saray kiwas a sumlang ed saray ganggan to. On, say nagagawa ed interon Kakristianoan so unong ed impaneskribe nen teologon taga-Denmark a si Søren Kierkegaard: “Say Inkakristiano so intalirak na Kakristianoan ya agto namamtaan.”
10. Panon so nayarin paneskribe ed espiritual a kipapasen na Kakristianoan?
10 Say kipapasen na Kakristianoan so matukotukoy ed insulat nen apostol Pablo: “Ipaliwawa ran kabat da so Dios, ingen ikaindan da ed panamegley na saray gawa ra, lapud sikaray karimdimla tan masugnar tan agnaabobonan ed antokaman a nengneng na gawan maabig.”—Tito 1:16.
11. Panon so asingsingger lan kaukom na Kakristianoan, tan akin?
11 Agla mabayag, sano panganggaen na Dios iyan peles a marelmeng a sistema na bengabengatla, peteg a mikuentaan so Trinitaryo na Kakristianoan. Tan sikatoy alablabas a naukom lapud saray kiwas tan doktrina ton nanmodmora ed Dios..—Mateo 24:14, 34; 25:31-34, 41, 46; Apocalipsis 17:1-6, 16; 18:1-8, 20, 24; 19:17-21.
Ipulisay so Trinidad
12. Akin a nepeg tayon ipulisay so Trinidad?
12 Agnayarin ikompromiso iray katuaan na Dios. Kanian, say pandayew ed Dios unong ed saray kondisyon to so mankabaliksan na pangipulisay ed doktrinan Trinidad. Satan so sumlang ed imbangat tan sinisia na saray propeta, si Jesus, saray apostol, tan saray inmunan Kristianos. Satan so sumlang ed ibabaga na Dios nipaakar ed inkasikato diad mismon impuyan a Salita to. Kanian isisimbawa to: “Amtaen yo a siak lambengat so Dios tan anggapoy anggan sakey a singa siak.”—Isaias 46:9, TEV.
13. Diad pankaabigan na siopa so panlilingkoran na bangat a Trinidad?
13 Saray pankaabigan na Dios so agnalingkoran no sikatoy pagmaliwen a makawetwet tan misteryo. Imbes, no nawetwet so totoo nipaakar ed Dios tan saray gagala to, saya so lalon kaliktan na Kabusol na Dios, si Satanas a Diablo, say ‘dios na sayan mundo.’ A sikaton mismo so mangiyaalibansa na onian palson doktrina pian ‘bulagen so kaisipan na saray agmananisia.’ (2 Corinto 4:4) Tan say doktrina na Trinidad so manseserbi met ed interes na saray klero a kaliktan dan pansiansiaen so panamanlong ed totoo, a paleletawen dan saray teologo lambengat so makatebek ed saya.—Nengnengen met so Juan 8:44.
14. Akin a say suston pikakabat ed Dios so mangitarok na baleg a pakainawaan?
14 Say suston pikakabat ed Dios so mangitarok na baleg a pakainawaan. Ibulos to itayo ed saray bangat a sumlang ed Salita na Dios tan ed saray muyongan a nanapostata. Unong ya inkuan nen Jesus: “Nakabatan yo so katuaan, tan say katuaan gawaen to kayon bulos.”—Juan 8:32.
15. Anton maganat a rason so walad sikatayo pian pagalangan so Dios?
15 Diad pangigalang ed Dios bilang sankatagyan tan pandayew ed sikato unong ed saray kondisyon to, napaliisan tayo so panangukom ya asingsingger lan ondapo ed apostatan Kakristianoan. Imbes, makapanilalo itayo ed abobon na Dios sano mangangga iyan sistema: “Say mundo so mangangga ontan met ed saray pilalek to, balet say manggawa na linawa na Dios so mansiansia lawas.”—1 Juan 2:17.