Say Dios so Mamabaleg​—Kasin Gagawaen Yo so Biang Yo?

ISIPEN pay eksena. Sikayo so wala’d marakerakep a tanamanan, aliber na ankabaleg iran kiew, mabunan tantanaman, tan kumpog na mararakep iran de-kolor a rosas. Saray berdin karikaan a mamalusor ed saray pangdel na manburaboran agus a walaay singa kristal-kalinew a danum. Anggapoy makaderal ed nenengnengen. Mandinayew, itepet yo no siopa so nanggawa ed sayan marakep a pasen. Diad ebat say managtanaman so maulimek a mangibagan say Dios so mamapabaleg ed amin a bengatla.

Siempre, satan so kabat yo. Tan nanonotan yoray balikas na managtanaman sano sikayoy makasabi ed abung tan naimano yoy dilin benegan ya agmasinop, ya anggaporay nanengneng ya ombabaleg, noagta atipon iran basura, tan danum na uran ya atipon ed saray marutak ya abot ed dalin. Kaliktan yon tuloy a nawalaan na tanamanan a singa samay apasyar yo. Kanian, lapu’d mapekder a sisiaen yoray balikas na managtanaman, sikayo’y ontalimukor tan masimoon a manpikasi ed Dios pian mamatuboy mararakep iran rosas ed sular yo. Anto’y pansumpalan? Siempre, anggapo.

Anto so nipaakar ed espiritual ya ibabaleg? Nayarin walaan kayo na magunaet a pilalek ya imanoen so ibaleg na espiritual a bengabengatla, a singa diad ikikiwas na saray balon babangatan ed katuaan na Salita’y Dios odino diad dilin iyaaligwas yo ed espiritual. Tan nayarin masimoon kayon manpikasi ed si Jehova pian mamawala na ontan ya ibabaleg, tekep na aralem a kumbiksyon a sikato so walaan na pakayarin manggawa na ontan. Balet kasin say magunaet a pilalek, masimoon a pikakasi, tan panagmatalek yo ed pakayari na Dios et mamapawalan mismo na iyaaligwas?

Say Dios so Mamabaleg

Anganko ta liknaen yon say biang yo ed pamapawala na espiritual ya ibabaleg so aliwan makana, andiay kabaliksan ni ingen. Agta isusuhiri nen apostol Pablo so saya diad 1 Corinto 3:5-7? Insulat to: “Siopa sirin si Apolos? tan siopa sirin si Pablo? Saray ministros a lapu ed sikara so anisiaan yo; singa say inter na katawan ed balang sinansakey. Siak so angitanem, si Apolos so analog; bangbalet say Dios so amabaleg. No ontan sirin say mantanem tan manalog andi gapo’ra no ag say Dios a sikato so mamabaleg.”

Makatunongan a bibidbiren nen Pablo a sano onbaleg iray bengatla, amin et kidayewan na Dios. Nayarin iparaan na managtanaman so dalin to, isibo toy bini, tan maalwar a bayuboan iray tanaman, balet diad kaunoran saray bengatla so onbaleg lapud makapakelaw a pakapanyari na Dios ed panamalsa. (Genesis 1:11, 12, 29) Anto, anggaman ontan, so labay ya ibaga nen Pablo sanen inkuanton “say mantanem tan manalog andi gapo’ra”? (“Aliwan say panagtanem tan panagsalog na managtanaman so kawalaay kana,” The New English Bible.) Kasin pamemelagen toy kaimportantian ed biang na indibidual a ministro diad panaggaway balo iran babangatan, a mangisusuhirin diad kaunoran et melag labat so nagawaan ed dilin ministeryo tayo?

“Say Mantanem tan Manalog Andi Gapo’ra”

Tandaan a diad sayan kabiangan na sulat to, ag-isasalaysay nen Pablo so Kristianon ministeryo noagta say kakulangkulangan ed itutumbok ed totoo imbes a si Jesu-Kristo. Arum a taga Corinto so angiiter na alablabas a kaimportantian ed bantog ya ariripen nen Jehova, a singa si Pablo tan si Apolos. Arum so angiyaalibansa na sektarianismo tan angitatandoro ed totoo ya inisip dan sikaray atagtagey nen saray Kristianon agagi ra.​—1 Corinto 4:6-8; 2 Corinto 11:4, 5, 13.

Say pangidayew ed totoo ed onian dalan so agmaabig. Satan so silalaman a panagnonot, tan mamapawala na imon tan gutgutan. (1 Corinto 3:3, 4) Ipapanengneng nen Pablo iray pansumpalan na ontan a panagnonot. Kuanto: “Labay ko ya ibaga, ya balang sinansakey ed sikayo kuan to, Siak kien ak nen Pablo; tan Siak kien ak nen Apolos; tan Siak kien ak nen Cefas; tan Siak kien ak nen Kristo.”​—1 Corinto 1:11, 12.

Kanian, sanen insulat to, “say tomatanem tan sumasalog andi-gapo ra” (Phillips), lalabanan na apostol so ontan a silalaman a panagnonot, ya idadanet to so pankaukolan na itumbok ed si Jesu-Kristo bilang Manangidaulo tan diad pamidbir a say amin a dayew para’d aligwas ed kongregasyon so onla’d Dios. Saray apostoles tan arum a mamatatken so ariripen labat ed kongregasyon. Anggapo so nepeg ya itandoro nisay sikaran mismo so nepeg a mananap na kirayew odino kibantog. (1 Corinto 3:18-23) Kanian say tomatanem tan say sumasalog andi-gapo ra, kuan nen Pablo, “ikumpara ed sikato a mamibilay ed bini.”​—1 Corinto 3:7, Phillips.

Kaiban Kumikimey na Dios

Sirin, diad pangibabaga’d saya, si apostol Pablo so agmamabawas na biang tayo ed panagtanem tan panagsalog. Agkabaliksan na saya para’d sikatayo ya onggapon manisip a, “Say Dios so mamabaleg ed saray bengatla diad dilin panaon to,” tan insan la manmeneng tan manalagar a sikato so mamabaleg. Kabat to a say gawaen tayo tan panggawa tayo ed satan so walaay kana ed no panon so ibaleg na saray bengatla.

Sikato no akin a si Pablo so maparanay ya amaseseg ed saray Kristiano a mankimey na impasya ed ministeryo ra tan paaligwasen iray dunong da bilang managbangat. Nonoten pay simbawan inter to ed si malangwer a Timoteo. “Imatonan mo so kaabigan na laman mo’ tan say ibabangat mo. Mansiansia ka ed saraya’n bengatla; ta no gawaen mo so saraya, nilaban mo so inkasika tan saray ondengel met ed sika.” (1 Timoteo 4:16) “Ibilin ko ed sika . . . , Ipulong mo so salita; manseet ka no panaon to . . . , mantepel ka ed saray irirap, gawam so gawa na evangelista, sumpal mo so ministeriom.” (2 Timoteo 4:1, 2, 5) Nayarin wala labat lay melag a pakalikas ed impasyan pankikimey nen Timoteo diad pamaaligwas to’d saray dunong to no say panagtanem tan panagsalog to so anggapoy nabang ed ibaleg na saray bengatla.

Singa si Pablo tan Apolos, nawalaan kayo met na agnasukat a pribilihyo ed panlingkor bilang sakey ed saray kakimeyan na Dios. (1 Corinto 3:9; 2 Corinto 4:1; 1 Timoteo 1:12) Sirin, say kimey yo so importante. Ag-iilaloan na managtanaman a mamilagron pawalaen na Dios so marakerakep a tanamanan ya anggapoy sagpot na managtanaman. Kasin kasunian na satan ed espiritual ya ibabaleg? Seguradon andi. Singa say dumaralos a maanos ya “alagden to so mablin bunga na dalin,” nepeg ya panbanikelan tayon ununa so panagtanem tan panagsalog, a manalagar legan a pabalegen na Dios.​—Santiago 1:22; 2:26; 5:7.

Gawaen Yoy Biang Yo

Lapud ta, singa ibabaga nen apostol Pablo, “balang sakey awaten to so upa ton dili ya onong na sagpo’to,” nepeg a tepetan tayo so inkasikatayo no panon so pankikimey tayo.​—1 Corinto 3:8.

Inkuan nen Geoffrey Smith ya onsiano ed panagtanaman: “Anggapo so nikaduman kualipikasyon a nakakaukolan pian magmaliw a managtanaman, say interes labat ed saray tanaman.” (Shrubs & Small Trees) Mipadpara, anggapo so nikaduman nakakaukolan tayo pian magmaliw a kakimeyan na Dios, say puron interes labat ed totoo tan inkamabulos a pausar ed Dios.​—2 Corinto 2:16, 17; 3:4-6; Filipos 2:13.

Konsideraen so arum a maabig a simbawan inyopresi na saray onsianon managtanaman. Singa kuan na sakey ya autoridad, no say balobalo nin managtanaman so mabulos ya ontalineng ed saramay mas eskperiensiado nen say sikato, “say manaaral so nayarin tampol a magmaliw ya eksperto.” Tan, kuan na parehon autoridad, “say eksperto so naynay a makakaromog na bengatlan balo ya aralen.” (The Encyclopedia of Gardening) Kasin mabulbulos yon awaten so tulong tan panangipasal a pawawalaen nen Jehova ta pian sikayo so makapantanem tan makapansalog ya epektibo? No gawaen yo, balanglan balo kayo ni ed kimey odino eksperiensiado la ed satan, napaaligwas yon nagkalalo iray dunong bilang kakimeyan na Dios tan sirin magmaliw a “manepeg a mangibangat met ed saray arum.”​—2 Timoteo 2:2.

No sikatoy mabulos ya ontalineng tan manaral, kuan nen Geoffrey Smith, “paliisan na balobalo ni iray patit.” No sikatayo’y ontalineng ed panangiwanwan ya iiter nen Jehova diad panamegley na Salita tan muyongan to, gawaen tayoray bengatla unong ed panlabayan to. Sirin paliisan tayo, alimbawa, so saray patit a singa say makulangkulang a pisangsangan ed saramay pilalek da lambengat so mikolkol tan misuppiatan ed saray salita.​—Uliran 17:14; Colosas 4:6; 2 Timoteo 2:23-26.

Sananey nin kabiangan na maabig a simbawa ed panagtanaman et say pannonot ed saray bengatla a maalwar sakbay a manapura diad panbukalkal ed dalin. “Sakbay yon igapo’y panbukalkal ed dalin,” kuan na The Encyclopedia of Gardening, “mangusar na panaon diad pangalkula’d [saray iilaloan yo]. Kasin sikayoy apurado ya onla ed Kristianon ministeryo ya anggapoy maalwar tan sipipikasin pannonot ya ununa ed no anto so kaliktan yon sumpalen tan no panon so sankaabigan a panggawa ed satan? Isipen yon maong iray gagala yo sakbay yon igapo. Nonoten, alimbawa, so nipaakar ed klase na toon nayarin naabet yo tan saray probleman nayarin naarap yo, tan manparaan diad pangasikaso ed saraya. Saya so mangiyabuloy ed sikayo pian “makatalo ni dakdakel [legan yon] magmaliw ya ami ganagana ed ami’n day toto-o.”​—1 Corinto 9:19-23.

“Agmo Ipiko So Limam”

No apresyaen tayo’y pribilihyon manlingkor bilang kaiban komikimey na Dios, agtayo lilimitaan so pibibiang tayo ed impiiba. “Dia ed kabuasan itanem mo so binim, tan dia ed labi agmo ipiko so limam; ta agmo amta no anto so onaliguas, no saya kasi odino saman, no sikara kasi nampadpara naani a maong.” (Eclesiastes 11:6) Saray kaunoran iran resulta so wala’d lima nen Jehova, balet sikatayo’y makapan-ani labat no sikatayo’y makulin mantanem.​—Eclesiastes 11:4.

Anggapo ni agawan marakerakep a tanamanan diad panamegley na paspasaray, patit-patit a panagbukalkal tan panagsibuag na bini. Mipadpara, dakel so nakakaukolan diad Kristianon ministeryo nen say paspasaray a pibiang diad panangibunog na literaturay Biblia. Bilang kaiban komikimey na Dios, nakaukolan tayo’y maseseg tan nagnap diad pangiyabawag na maong a balita’y Panarian na Dios, ya anapen so saramay peteg a mabulos. (Gawa 13:48) Tandaan so prinsipyo diad saray salita nen apostol Pablo diad 2 Corinto 9:6: “Say mantanem na daiset manani met na daiset; tan say mantanem na daakan, manani met na daakan.”

Singa amin na maong a managtanaman, panggunaetan tayoy mantanem ed maong a dalin. Anggaman ontan, anggan nitanem la diad sankaabigan a dalin, satan so aliwan sampot na bengatla. Inkuan nen Geoffrey Smith: “Agkabaliksan na saya a sano nitanem la et anggapo lay responsabilidad na too.” Andi, pian ombaleg iray bengatla, say sagpot so nakakaukolan diad panagsalog tan panangasikaso’d saray tanaman.​—Ipareng so Uliran 6:10, 11.

Diad katuaan, say Kristianon ministeryo so nayarin kabaliksan to’y andukey a peryodo na impasyan kimey sano ompatnag ya anggapoy nagawa. Balet biglabigla, tan no maminsan ag-iilaloan et makapakelkelaw iran resulta so onsublay. Inkuan nen Geoffrey Smith: “Say panagtanaman et nayarin tugyopen toy andukey a periodo na maparanay a panagbayubo tekep na angkabaleg a panliket a say amin na panagbukalkal, panagpalin, tan kesaw so nalingwanan.” Sikayo met so nawalaan na saray angkabaleg a pangayaga sano say lukas a puso so onebat ed mensahe na katuaan​—no sikayo’y mabulbulos a manggawa ed ununan panagbukalkal, panagtanem, panagpalin, tan panagsalog.​—Ipareng so Uliran 20:4.

Kabat nen Pablo tan Apolos a say kimey dan panagpulong na Panarian tan panaggaway babangatan so agmangitarok ed sikara na nikaduman kitandoro ed Kristianon kongregasyon. Kabat da a say Dios so mamapabaleg. Siansia ni, sikaray mantanem tan mansalog​—a siseseseg. Komon ta tumboken tayoy ehemplo ra tan gawaen so inkasikatayon akaparaan ed Dios bilang “ministros a lapud sikara [saray arum so nagmaliw] a mananisia.”​—1 Corinto 3:5, 6.

[Litrato ed pahina 22]

Say Dios so mamabaleg ed amin a bengatla​—balet gawaen na managtanaman met so biang to