“Saray Manangiyabawag na Panarian” so Manlalayag ed Danudanum na Guyana

GUYANA.a Sayan Amerindian salita so mankabaliksan na “pasen na danudanum.” Agaylan matukotukoy so panedeskribe na satan ed nengneng na sayan pasen, say alenleneg a bansa ed Abalaten ya Amerika a mansasalitay-Inglis. Say pasen so binelbeltang na dakel iran ilog tan kelakelas, a saratan so kinmawelkawel manlapu’d Guiana Highlands angga’d tropikon takel a mamaarap ed Dayat Atlantiko. Sarayan ilog so manitibukel ed pambibilayan na dakel iran taga-uma tan ditan et saray kaalogan so nikaykayat ed saray pangdel da.

Moriaen na saray Tasi nen Jehova ed Guyana a sanen impasakbay nen Jesus a “saya ya evangelio na panarian so [kaukolan a] nipulong naani ed sankamundoan ya onkanan pamintuaan ed saray amin a naciones,” isasakup na satan so pangipulong na maong a balita ed totoon manaayam ed sarayan teritorya a walad gilig na ilog. (Mateo 24:14) Kanian, diad loob na taotaon, saray grupo na Tastasi a dakel ed sikara et payunir, so angusar na saray ankelag tan ankabaleg a baluto, pian layagen so danudanum na Guyana pian itarok ed totoo so maong a balita.

Pian ontulong ed kimey, anggad natan et pakukurangen na Sosyedad na Watch Tower ed Guyana so limaran baluto a tinawag na Kingdom Proclaimer I ya anggad Kingdom Proclaimer V. Saratan so 7 metro, andiay atep, nikurba ed balang diking tan patayusok ed kasko, saray baluton kiew a tinawag na balahoo, a ginawa tan aasikasoen na sakey a Tasin pamilya. Satan so siaaron tinawag na lokal a Tastasi bilang Proclaimers, say datin duaran baluto so aderal la kayari impanserbi ed loob na saray dekada. Anggaman ontan, saray numeron III, IV, tan V so siansian aktibo ed serbisyo diad saray ilog Pomeroon, Mahaica, tan Demerara.

Diad Demerara

Diad Britanya tan saray parte na Europa, say salitan “demerara” so nayarin mangipanonot ed binmalitok-kapen unas a kristal, a kaslakan ed saray taneman diad sayan mapitek tan mabuer ya ilog. Diad sagur a pangdel, say dalan ed baybay so angangga ed sampot na kaunasan. Diad labas na satan, saray Tasi so mandedepende ed saray baluton Kingdom Proclaimer a mangitarok ed ambalingit a mensahe na Panarian nen Jehova diad saray manaayam ed gilig na ilog​—saray Hindu, Muslim, tan kuan a Kristianos.

Saray kampanya na panagpulong ed Demerara so nayarin sakey-agew a biahien odino diad pigaran simba, a pawil patubo, manlapud kabuasan ya anggad mansirunget. Diad saray sanlabin biahe, saray payunir so aglambengat manluto tan mangan ed baluto noagta sikaray onugip met ditan. Sano onlalabi la, say Proclaimer so insinger ed kiew a pakkar odino insadsar ed gilig na doongan no walay bakante. Duaran duara tan kapalduan metron palitek so inpalpal diad arap tan ebet na baluto. Sakey a lubir so impinat a tuloy diad tapew na sarayan akaalagey a palitek, tan say baleg a tarapal so inbilkag ed tapew to a pinagkaatep, odino sakbong. Saray datal so pinagkakatre, tan say ules tan apis so kinmanan pinagkakutson. Anggaman ontan, magmainomay so naugip kayari impasyan kimey a sanagew.

“Manaames kayo’d mapitek a danum?” tinepetan iray payunir.

“Andi no satan so naiwasan mi!” so ebat. “Bektan ondalan kami’d danum na karayan, saray pananginan mi so panoen mi na danum parad panluto, inumen, tan panames.”

Say inkasungdo ra so natutumangan na dakel iran maabig ya eksperiensia. Aminsan, sakey a laki so dinmoong, nantanyareg, nanbalangbang, tan binantayan to kami a tekep na interes. “Kingdom Proclaimer V”! Babasaen ton maksil so ngaran ed arap na baluto. “Tasi nen Jehova kayo sirin. Ta sikayon totoo lambengat so manguusar ed salitan ‘panarian’ diad onian paraan. Walaan kayo’y Kingdom Hall tan natan Kingdom Proclaimer.”

Manlapu’d Gilead ya Angga’d Pomeroon

Say kimey ed Ilog Pomeroon so talagan nidumaduma, unong a nanonotan nen Frederick McAlman. Sakey taon kayari impangraduar to ed Watchtower Bible School of Gilead nen 1970, sikatoy linma ed Charity, sakey ya uma ed ilog a 34 kilometro diad bukig a pangdel na Pomeroon, a ditan et walay sakey a grupo na limaran manangipalapag na Panarian.

“Diad loob na limaran andukey a taon, awalaan kami ‘liket’ diad impangibegsay ed Proclaimer II manlapud sampot kon sampot na Pomeroon sakbay ya awalaan kami na usaren ya anemiran-horsepower a baluton de-motor,” insalaysay nen Agin McAlman. “Diad impansakay ed agos, sikami so manpulong diad bukig a pangdel ya anggad makasabi kami’d Hackney, a labinsakey a kilometro manlapud sabangan. Diman, sikami so komportablen onugip ed labi diad abung nen Sister DeCambra, say manamianak a manseserbi ditan diad saman a panaon. Masakbay ed ontumbok a kabuasan, sikami so ontuloy ed sabangan sakbay ya ombaliw ed sagur a pangdel. Insan kami mamapawil a 34 kilometro ya onarap ed Charity.”

Say anemiran-horsepower a motor so nanserbin tuloy ed sikara diad loob na samploran taon. Insan, nen 1986, satan so sinaltan na balon 15-horsepower a modelo. Kayari matoor ya impanserbi ed Pomeroon diad 21 taon, nayarian nen Brother McAlman so onlingay a walaay liknaan na agawaaan ed kapkapanpaalagey a Kingdom Hall diad Charity, a natan et uusaren na kongregasyon a walaay 43 manangipalapag, manlapud sampot kon sampot na ilog. Say promedyon onaatendi ed miting so onsulok ed 60, tan sanen 1992 a Memoryal na impatey nen Jesu-Kristo, awalaan iray inmatendin 190!

Panaanap ed “Lakin Watchtower”

Say Lunes so agew na tinda ed Charity. Kanian satan so maabig a panaon ed pangipulong na maong a balita, tan saray Tasi so wadman tekep na Watchtower tan Awake! iran magasin. Sakey ya agew diad asasakbay a 1970’s, si Monica Fitzallen a taga Warimuri diad Moruka so linma’d tindaan tan akaawat na duaran magasin ed si Brother McAlman. Balet kasempet to, saray magasin so inyan to ed dalem na kaban na kawes to.

“Sikaray wadtan ed loob na duaran taon tan agko’ra binasa,” nanonotan nen Monica. “Insan akainagem ak tan akarukol ed andukey a panaon. Sanen inmabig ak, inggapok ya usisae’y kada artikulo na babasaen a materyal ed abung pian pansiansiae’y inkasiak ya okupado. Kaunoran, anonotan ko’y duaran magasin diad kaban na kawes tan saratan so ginapoan kon usisaen.” Abidbir ton tampol so tanol na katuaan.

Sanen inmabig si Monica, kinerew to’d masiken ton si Eugene, a mananap na trabaho ed Pomeroon ta pian naromog to so lakin angiter ed sikato na saray magasin. Si Eugene so inmabuloy balet akaromog lambengat na trabaho ed alog a lugar na Pomeroon diad loob na sakey simba, manlapud Lunes ya anggad ngarem na Sabado.

Diad saman a Sabado, siansian ag-aromog nen Monica so lakin angiter ed sikato na saray magasin. Sanen onngangarem la, intepet to’d masiken to no iyabuloy na agos a sikaray mansakay a mamaarap ed Charity pian anapen so “lakin Watchtower.” Kasumpal ton tuloy a mansalita, akadngel iray kansag ed pasilyo tan anengneng da so makakaimis a lupa na agin bii ya ondadagon mangiyopresi na sankabaloan iran kopya na magasin. “Sakey ka’d saray totoon Watchtower?” intepet nen Monica. Dakerakel so tinmumbok a tepet, say agin bii so kaukolan ya ompawil ed baluto pian onkerew na ontulong. Siopa’y tinmulong? Anggapoy arum noag si Brother McAlman!

Niyuksoy so panagaral na Biblia diad panamegley na sulat. Diad antikey a panaon ed saginonor, inpawit nen Monica so sulat ton panresain ed Iglesia Aglikano. Naawat toy ebat na pari: “Agka ondedengel ed saray JW’s. Ataptapew so pakatalos da’d Biblia. Onlaak ed sika pian singbaten so pamaakaran.” Anggad natan, say pari so agni pinmarungtal. Kabekta, si Monica so abautismoan nen 1975. Diad saginonor a taon, si masiken to a natan et siaaron tinawag na saray Tasi ya Uncle Eugene, so abautismoan met kayari maalwar ya impangusisa to’d saray Kasulatan. (Gawa 17:10, 11) Anggaman manaayam iran 12 oras ed baluto manlapud sankaasinggeran a kongregasyon ed Charity, sikaray mansiasiansian aktibon manangipalapag na Panarian anggad sayan agew.

Saray Misioneron Impanbaroy Diad Nisulinek

Diad agano niran taon say Sosyedad na Watch Tower so mangiyaarunsa na regular iran misioneron panagbaroy ya anggad nisulinek. Diad panamegley na saray baluton de-motor, atawayan na saray mabulos a boluntaryo so liket ed panangitarok na maong a balita diad totoon manaayam ed saray pasen a nigana’d saray Amerindian tan diad nisian iran panagbatangan tan daralosan a komunidad diad arum iran ilog ed nisulinek. Saray payunir unong ed peteg a kabaliksan na salita, so awalaan na pribilihyon mangitarok na manangisalban “ngaran nen Jehova” diad sarayan ararawin pasen diad sankaunaan. (Roma 10:13-15) Nakaukolan a sungdoan na agagi so dakel iran kairapan, a no maminsan et manbaluto ed saray ilog diad loob na taloran agew pian nasabi so arum ed sarayan pasen. Balet saray tumang so makagunggunan tuloy.

Sakey a malangwer a lakin Pentecostal a manaayam ed asingger a panagbatangan a komunidad na Kwebanna diad Ilog Waini, so apitongtongan diad ununan misioneron impanbaroy ed satan a pasen nen Hulyo 1991. Diad impawil nen Oktubre, nigapo so panagaral na Biblia. Diad ununan pankanawnawa, anengneng to ed dilin Biblia to a say ngaran na Dios et Jehova, a si Jesus so aliwan Makapanyarin-amin, tan say doktrinan Trinidad so aliwan Makasulatan. (Salmo 83:18; 1 Corinto 11:3) Sikato so entusiastikon tuloy a, kasipot na agagi, tinipon to so arum a kapara ton Pentecostal tan ginapoan ton ipanengneng ed sikara diad dilin Biblia ra so katuaan nipaakar ed si Jehova a Dios tan si Jesu-Kristo. Sanen ag-inawat na karaklan so katuaan, denisidi ton panaon la pian manresain tan ompaway ed “Babilonia a Baleg.” (Apocalipsis 18:2, 4) Sanen pinmawil iray agagi pian minengneng ed sikato nen Pebrero 1992, imbaga to’d sikara so agawa tan inyarum to: “Labay ko’y miulop ed sikayo. Labay ko’y magmaliw a sakey ed saray Tasi nen Jehova. Labay kon ibangat iray totoo ed katuaan!”

Saray eksperiensian singa satan so ontutulong ed agagi a mantultuloy ed sayan makaangat a kimey. Saramay oonla ed saray misioneron panagbaroy so nepeg a mangisakripisyo ed saray inawa ed abung, onarap ed sakisakit a singa say malaria, tan mansungdo ed saray kapilegroan na bilay ed takel. Balet saramay mansiansia ed abung so mansakripisyo met. Saray pamilya so makailiw ed saray inadaro ra, no maminsan diad loob na saray simba. Saray kongregasyon so nepeg ya onkireg diad inkaandi na mamatatken tan arum a malangwer iran lalaki a, singa diad arum iran kaso et sakey lambengat ya agin laki so atilak a mangasikaso ed saray pankaukolan na kongregasyon. Ingen, agaylan gayaga tan panamaseseg so wadtan sano narengel na kongregasyon so makapaliing iran eksperiensia diad ipawil da! Saray sakripisyo so singa anggapoy kuenta no ipareng ed gayaga.

Pangagayagaan na saray manangiyabawag na Panarian a manlalayag ed danudanum na Guyana tekep na maong a balita so peteg a nikadkaduman eksperiensia. Kaiba na saray kapara ran kumikimey ed interon mundo, sikaray siseseseg tan mabulos a “mangisaklang ed Dios a naynay na bagat a panangidayew, salanti, say bunga na saray bibil a mangiwakawak na ngaran to.”​—Hebreos 13:15.

[Paimano ed leksab]

[Saray Mapa ed pahina 24]

(Parad aktual a format, nengnengen so publikasyon)

HONDURAS

NICARAGUA

COSTA RICA

PANAMA

VENEZUELA

COLOMBIA

GUYANA

SURINAME

FRENCH GUIANA

BRAZIL

BOLIVIA

ATLANTIC OCEAN

[Saray litrato ed pahina 25]

Tagey: Panangisingbat na maong a balita diad Ilog Demerara

Nikawanan a tagey: Grupo na misionero a mansasakay a mamapawil ed kampo