Apocalipsis—Asingger la so Engranden Kapantokan To!
Katuloyan na Kapitulo 19
Say Israel na Dios Natan
14. Anto so mangipanengneng a saray Tasi nen Jehova so matukotukoy ya amidbir a say 144,000 so literal a bilang na saraman so manitibukel na espiritual ya Israel?
14 Makapasagyat, say inmunan presidente na Watch Tower Society, si Charles T. Russell, so amidbir ed 144,000 a sakey a literal a bilang na saray sinansakey a manitibukel na espiritual ya Israel. Diad The New Creation, Tomo VI na Studies in the Scriptures to, impalapag nen 1904, insulat to: “Walaan itayo na kada rason a manisia a say piho, nigeter a bilang na pinili [pinilin alanaan] so pigaran danay a nibaga ed Apocalipsis (7:4; 14:1); salanti, 144,000 ‘a dinondon a manlapud limog na totoo.’” Diad Light, Libro Uno, impalapag nen 1930 na komaduan presidente na Watch Tower Society, si J. F. Rutherford, nibaga met: “Say 144,000 a membro na laman nen Kristo so sirin wala ed dagup na nipanengneng a bilang pinili tan alanaan, odino atatakan.” Saray Tasi nen Jehova so nansiansia ed panmoria a literal a 144,000 iran alanaan a Kristianos so manitibukel na espiritual ya Israel.
15. Sakbay a tuloy na agew na Katawan, anto so inisip na saray masimoon ya estudyante na Biblia a panggayagaan na saray Judios ed laman diad kayari pangangga na Panaon Hentil?
15 Anggaman kuan, agta say Israel ed laman natan so mankanepegan ed arum a nikaduman pabor? Diad panaon sakbay a tuloy na agew na Katawan, sanen saray masimoon ya estudyante na Biblia so mausisa ed saray dakel a manunan katuaan ed Salita na Dios, inisip a diad impangangga na Panaon Hentil et saray Judios so manggayaga lamet na apribilihyoan a talindeg ed arap na Dios. Sirin, say libro nen C. T. Russell ya The Time Is at Hand (Tomo II na Studies in the Scriptures), impalapag nen 1889, so angiyaplika ed Jeremias 31:29-34 ed saray Judios ed laman, tan nankomento: “Say mundo so tasi ed katuaan a say dusa na Israel ed leksab na pananguley na saray Hentiles so nantultuloy nanlapula’d K.P. [607], a siansia nin mantutultuloy, tan anggapo so rason a panilalo ed sankanasyonan a kaorganisa-lamet a mas masasakbay nen say A.D. 1914, say getar na ‘pitoran panaon’ da—2520 tao-taon.” Pinmatnag a saray Judios so makaeksperiensia ed saman na sankanasyonan a kipawil, tan sayan inilaloan so mapatnag a sinminag nen 1917, sanen say Deklarasyon na Balfour so angisipan ed suporta na British diad panggawa ed Palestina a sakey a sankanasyonan ya ayaman na saray Judios.
16. Antoran sagpot so ginawa na saray Tasi nen Jehova diad panabi ed saray Judios ed laman ed Kristianon mensahe, tan tekep na anton nansumpalan?
16 Kayari na inmunan guerra mundial, say Palestina so nagmaliw a teritorya ed leksab na Gran Britanya, tan say dalan so nilukasan a para ed ipawil na saray dakel a Judios ed satan a dalin. Nen 1948, say pulitikal ya Estado na Israel so apawala. Kasin saya so mangipanengneng a saray Judios so wala ed dasig na madibinon bendisyon? Diad dakel iran taon, saray Tasi nen Jehova so anisia ya ontan. Sirin, nen 1925 et impalapag da so 128-pahinan libro, Comfort for the Jews. Nen 1929 et impaway da so marakerakep a 360-pahinan tomo, Life, a niganan onapelo ed saray Judios tan manasalaysay met ed libro na Biblia a Job. Agawa so baleg a sagpot, nagkalautla ed syudad na Nueva York, pian sabien iray Judios ed sayan Mesianikon mensahe. Makapaliket, wala so pigaran sinansakey ya inmebat, balet saray Judios ed inkalapagan, singa saray atateng da nen inmunan siglo, angipulisay ed ebidensya na kiwawala na Mesias.
17, 18. Anto so atalosan na saray ariripen na Dios ed dalin nipaakar ed balon sipanan tan saray propesiya na Biblia ed panangipawil?
17 Mapatnag a say inka-Judio, bilang sakey a totoo tan bilang sakey a nasyon, so aliwan say Israel ya adeskribe ed Apocalipsis 7:4-8 odino diad arum iran propesiya na Biblia a misiglaotan ed agew na Katawan. Diad impanumbok ed tradisyon, saray Judios so nantultuloy a pinmaliis diad panangusar ed madibinon ngaran. (Mateo 15:1-3, 7-9) Diad impanalaysay ed Jeremias 31:31-34, say libron Jehovah, impalapag na Watch Tower Society nen 1934, so angikuan: “Say balon sipan so andian na kipaakaran ed saray silalaman a kapolian na Israel tan ed katooan ed inkalapagan, noagta . . . nigeter ed espiritual ya Israel.” Saray propesiya na Biblia ed kipawil so agmanutukoy ed saray silalaman a Judios nisay pulitikal ya Israel, a sakey a membro na Nasyones Unidas tan sakey a kabiangan na mundon sinalita nen Jesus ed Juan 14:19, 30 tan 18:36.
18 Nen 1931 et saray ariripen na Dios ed dalin so angawat, tekep na baleg a gayaga, ed ngaran a Tastasi nen Jehova. Nayarian da so mipaknan sigpot-puso ed saray salita na Salmo 97:11: “Say liwawa a mismo so sinminag ed matunong, tan panliliket ed anggan diad saray maptek ed puso.” Nayarian dan malinew a tebeken a say espiritual ya Israel lambengat so nitarok ed balon sipan. (Hebreos 9:15; 12:22, 24) Say agkinmiwas ya Israel ed laman so andian na kabiangan ditan, nisay say katooan ed inkalapagan. Sayan pakatalos so nanlinis ed dalan a para ed masnag a sinag na madibinon liwawa, a matalona ed saray egpang na teokratikon awaran. Saya so mangiparungtal ed daakan a pananginatnat nen Jehova na panangasi, maaron-kaabigan, tan katuaan ed amin a totoon onasingger ed sikato. (Exodo 34:6; Santiago 4:8) On, saray arum nilikud ed Israel na Dios so nagunggunaan diad pamupukpok na saray angheles ed apatiran dagem na panagderal. Siopa iraya? Kasin sakey ka ed sikara? Nengnengen tayo natan.