Apocalipsis—Asingger la so Engranden Kapantokan To!
Kapitulo 21
Saray Bakbak nen Jehova ed Kakristianoan
Pasingawey 5—Apocalipsis 8:1–9:21
Tema: Say panangipaknol ed anemira ed saray pitoran trumpeta
Panaon na Kasumpalan: Manlapud inkitrono nen Kristo Jesus nen 1914 ya anggad baleg a kairapan
1. Anto so nagawa sano lukasan na Kordero so komapiton tatak?
“Saray apatiran dagem” so pinukpokan ya anggad say 144,000 na espiritual ya Israel so atatakan tan say baleg ya ulop so naabobonan a para ed kilalaban. (Apocalipsis 7:1-4, 9) Anggaman kuan, sakbay na satan a manaloboob a bagyo so onterak ed dalin, saray masebeg a panangukom nen Jehova a sumpad mundo nen Satanas so nepeg met a nipakabat! Legan a lukasan na Kordero so komapito tan unor a tatak, si Juan so mamanbantay ya onnenengneng ed no anto so nilukas. Natan et ipanabang to so eksperiensia to ed sikatayo: “Tan sanen nilukasan to [say Kordero] so komapiton tatak, kareenan so agawa ed ngalngalin kapalduay oras. Tan anengneng ko so pitoran anghel a manalalagey ed arap na Dios, tan pitoran trumpeta so niiter ed sikara.”—Apocalipsis 8:1, 2.
Panaon a Para ed Masimoon a Panagpikasi
2. Anto so nagawa legan na simbolikon kapalduan oras na silensyo ed tawen?
2 Saya so nikadkaduman kareenan! Say kapalduay oras so singa andukey a panaon sano manaalagar ka na bengatlan nagawa. Natan, anggan say pirmin mangatatawen a koro na panagdayew so agla narengel. (Apocalipsis 4:8) Akin? Anengneng nen Juan so rason diad pasingawey: “Tan sananey ya anghel so sinmabi tan nanalagey ed altar, a walaan na binmalitok ya insenson baseha; tan dakerakel ya insenso so niiter ed sikato pian iyapay to a tekep na saray pikakasi ed amin na saray sasantos diad binmalitok ya altar a wala ed arap na trono. Tan say asewek na insenso so sinmegep a nanlapud lima na anghel a tekep na saray pikakasi na saray sasantos ed arap na Dios.”—Apocalipsis 8:3, 4.
3. (a) Ed anto so ipanonot ed sikatayo na panagpool na insenso? (b) Anto so gagala na kapalduan oras na silensyo ed tawen?
3 Saya so mangipanonot ed sikatayo a diad silong na Judion sistema na bengabengatla, say insenso so pinoolan ya inagew-agew diad tabernakulo tan, diad saginonor a taon, diad templo ed Jerusalem. (Exodo 30:1-8) Kaleganan na satan a panagpool na insenso, saray aliwan-saserdoten Israelitas so nanalagar ed paway na sagradon pasen, a manpipikasi—andi-duaruwan mareereen ed kapusoan da—diad samay Sakey a segepan na asewek na insenso. (Lucas 1:10) Natan et anengneng nen Juan so bengatlan miulibay a nagagawa ed tawen. Say insenson inyapay na anghel so nisiglaot ed “saray pikakasi na saray sasantos.” Diad tua, diad akadkaunan pasingawey, say insenso so nibagan mangirepresenta ed ontan iran pikakasi. (Apocalipsis 5:8; Salmo 141:1, 2) Mapatnag, sirin, say simbolikon kareenan ed tawen so mangiyabuloy ed saray pikakasi na sasantos ed dalin a narengel.
4, 5. Antoran maawaran ya agawgawa so ontulong ed sikatayon manitermina ed peryodo na panaon a mipetekan ed simbolikon kapalduan oras na silensyo?
4 Kasin nadetermina tayo no kapigan so inkagawa na saya? On, nayarian tayo, diad pangusisa ed konteksto, a pati saray maawaran ya agawgawa diad asasakbay ed agew na Katawan. (Apocalipsis 1:10) Kaleganan na 1918 tan 1919, saray agawgawa ed dalin so akitukoyan a nikadkaduma ed senaryon adeskribe ed Apocalipsis 8:1-4. Diad loob na 40 taon sakbay na 1914, saray Estudyante na Biblia—ya akatawagan na saray Tastasi nen Jehova ed saman—so mangiyaabawag a sitetepel a saray panaon na Hentil so mangangga ed satan a taon. Saray kaguloan ya agawgawa nen 1914 so amaneknek ed sikara a duga. (Lucas 21:24, King James Version; Mateo 24:3, 7, 8) Balet dakel ed sikara so anisia met a nen 1914 et sikara so naala a manlapud dalin diad mangatatawen a tawir da. Saman so ag-agawa. Imbes, kaleganan na inmunan guerra mundial, sinungdoan da so panaon na ansakit ya inkapasegsegang. Nen Oktubre 31, 1916, say inmunan presidente na Watch Tower Society, si Charles T. Russell, so inatey. Insan, nen Hulyo 4, 1918, say balon presidente, si Joseph F. Rutherford, tan saray pitoran arum a representante na Sosyedad so inyakar ed Atlanta, Georgia, a panangipukokan, a sililingon asentensyaan ed andukey iran taon diad pangawan.
5 Saray masimoon a Kristianos ed Juan a klase so agonigon. Anto so labay na Dios ed sikara a gawaen ya ontumbok? Kapigan so kaawit da ed tawen? Sakey ya artikulon apauloan na “Say Panagani So Angangga—Anto So Ontumbok?” so pinmatnag ed Mayo 1, 1919, a paway na The Watch Tower. Insindag to iyan kipapasen na agpanseguro tan pinaseseg to so matoor diad pantultuloy a mansungdo, ya inyarum to: “Manisia kami a natan la so tuan pangibaga a say panagani ed panarian a klase so asumpal a katuaan, ya amin na saray ontan so atatakan tan say puerta so nikaput.” Kaleganan na sayan mairap a panaon, saray masimoon a pikakasi na Juan a klase so onsesegep, a singano diad asewek ed baleg a karakel na insenso. Tan saray pikakasi ra so narerengel!
Panangipabanto na Apuy ed Dalin
6. Anto so nagawa kayari na silensyo ed tawen, tan saya so ebat ed anto?
6 Ibabaga nen Juan ed sikatayo: “Balet tampol ya inala na anghel so baseha na insenso, tan pinano to ed arum ya apuy na altar tan impabanto to ed dalin. Tan saray karol so agawa tan saray boses tan saray kirmat tan sakey a yegyeg.” (Apocalipsis 8:5) Kayari na silensyo, wala so tampol a dramatikon aktibidad! Saya so mapatnag ed ebat na saray pikakasi na sasantos, lapud pinarngat na apuy ya inala a nanlapud altar na insenso. Nen 1513 K.K.P., ed Palandey Sinai, saray karol tan kirmat, maksil a boses, apuy, tan say inkayegyeg na palandey so ananda ed impangipaarap nen Jehova na imano to ed totoo to. (Exodo 19:16-20) Say miulibay iran inkipatnag ya inreport nen Juan so mangipanengneng met ed impangibaling nen Jehova na imano ed saray ariripen to ed dalin. Balet say anengneng nen Juan so nipresenta ed tanda. (Apocalipsis 1:1) Sirin panon ya ipatalos so simbolikon apuy, karokarol, saray boses, saray kirmat, tan yegyeg natan?
7. (a) Anton simbolikon apuy so sinelselan nen Jesus ed dalin legan na ministeryo to? (b) Panon so impanelsel na saray espiritual ya agagi nen Jesus na sakey ya apuy ed Kakristianoan?
7 Diad sakey ya inkagawa, imbaga nen Jesus ed saray babangatan to: “Siak so sinmabi a mangigapo na apuy ed dalin.” (Lucas 12:49) Tua, sikato so anelsel na sakey ya apuy. Diad magunaet ya impanpulong to, ginawa nen Jesus so Panarian na Dios a manunan salisalan ed arap na Judion totoo, tan saya so angikiddiam na ampetang a gutgutan ed saman a nasyon. (Mateo 4:17, 25; 10:5-7, 17, 18) Nen 1919 et saray espiritual ya agagi nen Jesus ed dalin, say melag ya ulop na alanaan a Kristianos ya akaliktar ed saray makasubsubok iran agew na Guerra Mundial I, so anelsel na liwawa ed miulibay ya apuy diad Kakristianoan. Nen Setyembre ed saman a taon, say espiritu nen Jehova so nikadkaduman mapatnag legan a saray matoor a Tastasi to so nantitipon a nanlapud asingger tan arawi ed Cedar Point, Ohio, E.U.A. Si Joseph F. Rutherford, ya agano nin nibulos a nanlapud pangawan tan agnambayag et sigpot ya alukpos ed kasalanan, so sitetepel a nampaliwawa ed saman a kumbension, a kuanto: “Matulok ed ganggan na Katawan tayo, tan bidbiren so pribilihyo tayo tan kimey a mibakal a sumpad saray kuta na katilaan ya abayaglan itatandoro na totoon naaripen, say kimey tayo et say pangiyabawag ed onsasabin maglorian panarian na Mesias.” Satan so manunan salisalan—Panarian na Dios!
8, 9. (a) Panoy impaneskribe na presidente na Sosyedad ed awawey tan pilalek na saray totoo na Dios legan na saray mairap a taotaon na bakal? (b) Panon a say apuy so nipabanto ed dalin? (c) Panon a saray karol, boses, kirkirmat, tan yegyeg so agawa?
8 Tutukoyen toray agano nin mairap ya eksperiensia na totoo na Dios, inkuan na managpaliwawa: “Ontanlan anggapoy panangasi so panagpatey na kabusol a dakerakel a mabli ed pulok na Katawan so atalagnaw tan tinmanyareg ed pankelaw, nampikasi tan nanalagar ed Katawan a mangipatnag na linawa to. . . . Balet ag-ibabaliwala so maganon pakadismayaan, wala so mandarlang a pilalek diad pangiproklama ed mensahe na panarian.”—Nengnengen so Setyembre 15, 1919, a paway na The Watch Tower, pahina 280.
9 Nen 1919 et saman a pilalek so apenek. Sayan melag balet ta aktibon grupo na Kristianos so anelsel na apuy, espiritual a panagsalita, diad pangigapo na sankamundoan a kampanya na panagpulong. (Ipareng so 1 Tesalonica 5:19.) Say apuy so nipabanto ed dalin unong a say Panarian na Dios so agawan mandarlang a salisalan, tan sirin nantultuloy ya ontan! Saray mabiskeg a boses so sinandian na silensyo, ya impaknol so mensahe na Panarian a mabitabitar. Saray makarol a pasakbay na bagyo a manlapud Biblia so pinmaway. Singa saray kiddiam na kirmat, saray mandarlang a sinag na katuaan so sinminag a manlapud mapropetikon salita nen Jehova, tan, singano ed mabiskeg a yegyeg, say relihyoson ayaman so atenyeg ed saray pundasyon to. Say Juan a klase so akanengneng a wala so kimey a gawaen. Tan anggad sayan agew, satan a kimey so nantultuloy ya onnatnat a magloria ed interon panaayaman a dalin!—Roma 10:18.
(Ituloy ed ontumbok a paway.)