Apocalipsis—Asingger la so Engranden Kapantokan To!
Katuloyan na Kapitulo 20
Say Baleg ya Ulop So Pinmatnag
17. (a) Anton tepet so pinalesa na sakey ed saray 24 a mamatatken, tan say katuaan a say matatken so makalmo ed ebat so mangisusuhiri na anto? (b) Kapigan so inkaebatan na tepet na matatken?
17 Manlapud panaon nen apostol Juan ya angga ed agew na Katawan, saray alanaan a Kristianos so nikelawan no nipaakar ed pakabidbir ed baleg ya ulop. Matukotukoy, sirin, a sakey ed saray 24 a mamatatken, a mangirerepresenta ed saray alanaan a wala la ed tawen, so mamaliing ed kanonotan nen Juan diad impamalesa na matukoy a tepet. “Tan diad ebat et inkuan na sakey ed saray mamatatken ed siak: ‘Saraya ya akakawes na amputin kawes, siopa iraya tan iner so nanlapuan da?’ Kanian tampol ya imbagak ed sikato: ‘Katawan ko, sika so mikabat.’” (Apocalipsis 7:13, 14a) On, satan a matatken so makayarin mananap ed ebat tan inter to ed si Juan. Saya so mangisusuhiri a saray apaoli ed saray 24-mamatatken a grupo so nayarin alanor diad panangipatalos ed saray madibinon katuaan natan. Diad biang da, saraman so wala ed Juan a klase ed dalin so akaamta na pakabidbiran ed baleg ya ulop diad maapit a panangobserba ra ed gagawaen nen Jehova ed pegley da. Sikara so aliston mangapresya ed makaseleng a sinag na madibinon liwawa a nanliwawa ed teokratikon liwang nen 1935, diad inggeter nen Jehova a panaon.
18, 19. (a) Anton ilalo so indanet na Juan a klase kaleganan na 1920’s tan 1930’s, balet siopa so kinmiwas ed mensahe diad ondaraak a bilang? (b) Say pakabidbiran ed baleg ya ulop nen 1935 so angipanengneng na anto no nipaakar ed 144,000? (c) Anto so ipaparungtal na estadista ed Memoryal?
18 Kaleganan na 1920’s tan asasakbay a 1930’s, say Juan a klase so angidanet ed mangatatawen ya ilalo, namparan diad saray palapagan tan diad panangipulong a kimey. Mapatnag, say nagnap a bilang a 144,000 so panoen ni. Balet say ondaraak a bilang na saraman so ontatalineng ed mensahe tan angipanengneng na seseg ed panagtasin kimey so sinmabin angipatua na interes diad pambilay na ando lan ando ed Paraison dalin. Sikara so andian na pilalek ya onla ed tawen. Aliwan satan so akatawagan da. Sikara so aliwan kabiangan na melag a pulok noagta ingen ed arum a karnero. (Lucas 12:32; Juan 10:16) Say inkabidbir da nen 1935 a bilang baleg ya ulop na arum a karnero so pamatnagan a say impanpili ed 144,000 so diad saman et ngalngalilan kumpleto la.
19 Kasin say estadista so manuporta ed sayan konklusyon? On. Nen 1938, sankamundoan, 59,047 a tastasi nen Jehova so akibiang ed ministeryo. Diad saraya, 36,732 so akibiang ed saray emblema diad tinaon a selebrasyon na Memoryal na impatey nen Jesus, sirin mangipapanengneng a sikara so walaan na mangatatawen a tawag. Diad saray taon nanlapulad saman, say bilang na sarayan mibibiang so nantultuloy a dinmaiset, manuna lapud saray matoor a tastasi nen Jehova so akasumpal la ed mangaraldalin a kurang na bilay da diad patey. Nen 1987 et 8,808 lambengat so akibiang ed saray emblema na Memoryal—0.1 lambengat a porsiento na 8,965,221 ya inmatendi ed saman a sankagloboan a selebrasyon.
20. (a) Kaleganan na Guerra Mundial II, anton komento so pribadan ginawa na presidente na Sosyedad nipaakar ed baleg ya ulop? (b) Antoran katuaan natan so mangipanengneng a say baleg ya ulop so peteg a baleg?
20 Sanen tinmerak so komaduan guerra mundial, imbanikel nen Satanas so sagpot ton mamatunda diad panagani ed baleg ya ulop. Say kimey nen Jehova so apegetan ed dakel iran bansa. Kaleganan na saraman ya ambilunget ya agew, tan sakbay a tuloy na impatey to nen Enero 1942, si J. F. Rutherford, presidente na Watch Tower Society, so nadngel ya angibaga: “Bueno . . . nengneng to so singano say baleg ya ulop so aliwa lamlamang a baleg.” Balet say madibinon bendisyon so angipaarap ed kasuniyan! Nen 1946 et say bilang na saray Tastasin manlilingkor ed sankamundoan so linmukso ed 176,456—maslak ed saraya so kabiangan na baleg ya ulop. Nen 1987 et wala so 3,395,612 a Tastasin manlilingkor ed si Jehova a sitotoor ed 210 nanduruman daldalin—tuan SAKEY A BALEG YA ULOP! Tan say bilang so mantutultuloy ya ondaraak.
21. (a) Panon a say panagani ed saray totoo na Dios kaleganan na agew na Katawan so sigpot a mitukoyan ed pasingawey nen Juan? (b) Panon a saray arum ya importanten propesiya so ginmapon nasumpal?
21 Say panagani na totoo nen Jehova kaleganan na agew na Katawan so sirin et sigpot a mitukoyan ed pasingawey nen Juan: ununa et say kimey na panagtipon ed nakekeraan na 144,000; insan say katipon na baleg ya ulop. A singa impropesiya nen Isaias, natan “ed unor a kabiangan na saray agew,” saray totoo ed amin a nasyones so onaagus a mibiang diad puron panagdayew ed si Jehova. Tan, peteg, manliket itayo diad apresasyon ed impamalsa nen Jehova ed “balon katawenan tan sakey a balon dalin.” (Isaias 2:2-4; 65:17, 18) Say Dios so manitipon ed “amin na saray bengatla lamet ed si Kristo, saray bengatlan wala ed katawenan tan saray bengatla ed dalin.” (Efeso 1:10) Saray alanaan a mananawir ed mangatatawen a Panarian—pinili ed inlabas na saray siglos nanlapulad agew nen Jesus—so “saray bengatlan wala ed katawenan.” Tan natan, say baleg ya ulop na arum a karnero so pinmatnag a bilang ununa ed “saray bengatla ed dalin.” Say panlilingkor yo a mitukoyan ed satan ya oksuyan so mankabaliksan na maandon liket ed sikayo.
Saray Bendisyon na Baleg ya Ulop
22. Anton malaknab ya impormasyon so naawat nen Juan nipaakar ed baleg ya ulop?
22 Diad panamegley na madibinon paralanan, inawat nen Juan so malaknab nin impormasyon nipaakar ed sayan baleg ya ulop: “Tan inkuanto [say matatken] ed siak: ‘Saraya so nanlapud baleg a kairapan, tan inurasan daray kawes da tan pinaputi da ra ed dala na Kordero. Satan no akin a sikara so wala ed arap na trono na Dios; tan sikara so mangisasaklang ed sikato na sagradon lingkor ed agew tan labi diad templo to; tan say Sakey ya akayurong ed trono so mangibilkag na tolda to ed sikara.’”—Apocalipsis 7:14b, 15.
23. Anto so baleg a kairapan a “pinawayan” na baleg ya ulop?
23 Diad asasakbay ya inkagawa, imbaga nen Jesus a say kiwawala to ed gloria na Panarian so mamantok ed “baleg a kairapan ya agni agawa nanlapulad gapo na mundo ya anggad natan, andi, nisay nagawa lamet.” (Mateo 24:21, 22) Diad kasumpalan na satan a propesiya, saray angheles so mangilukpos ed apatiran dagem na dalin a manesyang ed sistema na mundo nen Satanas. Say ununan naderal et say Babilonia a Baleg, say sankamundoan ya imperyo na palson relihyon. Insan, diad pantok na kairapan, iliktar nen Jesus so nakekeraan ed 144,000 ed dalin, a kaiba na saray dakerakel a baleg ya ulop.—Apocalipsis 7:1; 18:2.
24. Panoy ikualipika na saray sinansakey ed baleg ya ulop diad kililiktar?
24 Panoy ikualipika na saray sinansakey ed baleg ya ulop a para ed kililiktar? Say matatken so mangibaga ed si Juan a sikara so ‘anguras ed saray kawes da tan pinaputi da ra ed dala na Kordero.’ Diad arum a salita, sikara so angagamil na pananisia ed si Jesus a bilang Mananondon da, nanggawa ra na sakey a dedikasyon ed si Jehova, insimbolo ra so dedikasyon da diad bautismo ed danum, tan “binembenan da so maabig a konsiensia” diad panamegley na maptek a kondukta ra. (1 Pedro 3:16, 21; Mateo 20:28) Sirin, sikara so malinis tan matunong ed pakanengneng nen Jehova. Tan pansiasiansiaen da so inkasikaran “anggapoy tilol ed mundo.”—Santiago 1:27.
25. (a) Panon a say baleg ya ulop so mangisasaklang ed si Jehova na “sagradon lingkor ed agew tan labi diad templo to”? (b) Panon a si Jehova so “mangibilkag na tolda to” ed baleg ya ulop?
25 Nagkalalo ni, sikara so nagmaliw a magunaet a tastasi nen Jehova—a “mangisasaklang ed sikato na sagradon lingkor ed agew tan labi diad templo to.” Kasin sakey ka ed sayan dedikadon baleg ya ulop? No ontan, pribilihyom so manserbi ed si Jehova ya anggapoy tunda diad mangaraldalin a patio na baleg ya espiritual a templo to. Natan, diad silong na panangiwanwan na saray alanaan, say baleg ya ulop so manggagawa na mas babaleg a betang ed panagtasin kimey. Anggaman ed saray sekular a responsabilidad da, nilasus nilibo ed sikara so angilugar ed sigpot-panaon a ministeryo a bilang payunir. Balet balanglan sika so wala ed satan a grupo odino andi, bilang sakey a dedikadon membro na baleg ya ulop, makapanliket ka a nisesengeg ed pananisiam tan kimey et sika so niyabawag a matunong a bilang sakey a kaaro na Dios tan naabrasa bilang sakey a sankaili ed tolda to. (Salmo 15:1-5; Santiago 2:21-26) Si Jehova sirin so ‘angibilkag ed tolda to’ ed saraman so mangaaro ed sikato tan, bilang sakey a maong a mananankaili, salimbengan to ra.—Uliran 18:10.
26. Antoray arum a bendisyon a panggayagaan na baleg ya ulop?
26 Ituloy na matatken: “Sikara la so agnaerasan nisay napegaan, nisay sikara so sakitan na agew nisay anggan anton mansasnit a petang, lapud say Kordero, a wala ed pegley na trono, so mamastol ed sikara, tan mangitonton ed sikara diad saray subol na saray danum na bilay. Tan say Dios so mamunas ed amin a lua ed kamataan da.” (Apocalipsis 7:16, 17) On, si Jehova so tuan maparawes! Balet anton kaaralman na kabaliksan so wala ed sarayan salita?
27. (a) Panon a say propesiya nen Isaias so bengatlan miulibay ed saray salita na matatken? (b) Anto so mangipanengneng a say propesiya nen Isaias so ginmapon nasumpal ed Kristianon kongregasyon ed agew nen Pablo?
27 Imanoen tayo so miulibay a salita na propesiya: “Saya so imbaga nen Jehova: ‘Diad sakey a panaon na abig-linawa et inebatan taka, tan diad sakey ya agew na kilalaban et tinulongan taka . . . Sikara so agnaerasan, nisay napegaan, nisay makalanok a petang odino agew so mangabil ed sikara. Lapud say Sakey a walaan na panangasi ed sikara so mangitonton ed sikara, tan diad saray subol na bilay et sikara so ipaarap to.’” (Isaias 49:8, 10; nengnengen met so Salmo 121:5, 6.) Si apostol Pablo so angaon ed kabiangan na sayan propesiya tan inyaplika to ed “agew na kilalaban” a ginmapo nen Pentecostes 33 K.P. Insulat to: “Inkuan nen [Jehova]: ‘Diad makapaliket a panaon et dinengel taka, tan diad agew na panangilaban et tinulongan taka.’ Nia! Natan so nagkalautlan makapaliket a panaon. Nia! Natan so agew na kilalaban.”—2 Corinto 6:2.
28, 29. (a) Panoy inkasumpal na saray salita nen Isaias nen inmunan siglo? (b) Panon a saray salita ed Apocalipsis 7:16 so asumpal no nipaakar ed baleg ya ulop? (c) Anto so mansumpal diad kitonton na baleg ya ulop ed “saray subol na saray danum na bilay”? (d) Akin a say baleg ya ulop so nikadkaduma ed limog na katooan?
28 Anton aplikasyon na sipan nipaakar ed agla inkaerasan odino inkapgaan odino impanagmak na makalanok a petang ed saman? Peteg, saray Kristianos nen inmunan siglo so anagmak na literal ya eras tan inkapgaan no maminsan. (2 Corinto 11:23-27) Anggaman kuan, diad espiritual a dalan, sikara so walaan na daakan. Sikara so siyayaman a nitaryaan, ta pian sikara so agnaerasan odino napegaan ed saray espiritual a bengatla. Nagkalalo ni, si Jehova so agnanggawa ed petang na sanok to ya onliab a sumpad sikara sanen dineral to so Judion sistema na bengabengatla nen 70 K.P. Saray salita ed Apocalipsis 7:16 so walaan na miulibay ya espiritual a kasumpalan ed baleg ya ulop natan. Dingan na saray alanaan a Kristianos, panggagayagaan da so daakan iran espiritual a probisyon.—Isaias 65:13; Nahum 1:6, 7.
29 No sakey ka ed satan a baleg ya ulop, say maabig a kipapasen na pusom so manggawa ed sikan “onkelyaw a magaygayaga,” anggaman anto so nansungdoan mo ed dalan na saray inkasibletan tan kairapan kaleganan na saray mankapisdem a taon na sistema nen Satanas. (Isaias 65:14) Diad ontan a pantalos, anggan natan, say Kordero so “mamunas ed amin a lua a ed kamataan da.” Say mansasnit ya “agew” na Dios ed masebeg a panangukom so agla manaktakot ed sika, tan sano saray apatiran dagem na panagderal so lukposan, nayarin sika so niliktar ed “mansasnit a petang” na agpanliket nen Jehova. Kayari kasumpal na satan a panagderal, say Kordero so mangitonton ed sika pian nagunggunaan a sigpot diad kapabiskeg ed “saray subol na saray danum na bilay,” saraya so mangirepresenta ed amin a probisyon a gawaen nen Jehova diad pakagamor mo ed andi-anggaan a bilay. Say pananisiam ed dala na Kordero so naalangon unong a sika so kalkalnan makarateng ed atooan ya inkayadyari. Sika a kabiangan na baleg ya ulop so nikadkaduma ed limog na katooan unong ta saray “nilaksalaksa” so agla anggan ompatey! Diad sankagnapan a pantalos, kada lua so apunas la ed saray matam.—Apocalipsis 21:4.
Seguroen So Inkatawag
30. Anton makapasagyat a nenengnengen so nilukas ed sikatayo diad pasingawey nen Juan, tan siopa so makayarin “makaalagey”?
30 Agaylan sankarakpan a nenengnengen so ilukas na sarayan salita ed sikatayo! Si Jehova a mismo so walad trono to, tan amin na saray ariripen to, mangatatawen tan mangaraldalin, so nankakasakey diad panangidayew ed sikato. Saray mangaraldalin ya ariripen to so mangapresya ed agaylan makapakelaw a pribilihyon pibiangan diad manyabeng a koro na panagdayew. Maganggano la, si Jehova tan si Kristo Jesus so mangidapo ed panangukom, tan say kelyaw so narengel: “Say baleg ya agew na sanok da so sinmabi, tan siopa so makaalagey?” (Apocalipsis 6:17) Say ebat? Daiset lambengat ed katooan, a pati saraman so atatakan a 144,000 a siansia nin nakekeraan ed laman tan sakey a baleg ya ulop na arum a karnero a “makaalagey,” salanti, makaliktar a kaiba ra.—Ipareng so Jeremias 35:19; 1 Corinto 16:13.
31. Panon a say kasumpalan na pasingawey nen Juan so mangapekta ed saray Kristiano, namparan ed saray alanaan tan ed baleg ya ulop?
31 Nisesengeg ed sayan katuaan, saray alanaan a Kristianos ed Juan a klase so mangisekar na inkasikaran magunaet diad “pakagamor ed kalat a para ed tumang ed mamaatagey a tawag na Dios ed panamegley nen Kristo Jesus.” (Filipos 3:14) Sikara so sigpot a sikakabat a saray nagawa kaleganan na sarayan agew so mankaukolan na nikadkaduman panagsungdo ed biang da. (Apocalipsis 13:10) Kayari na matoor a panlilingkor da ed si Jehova ed dakel laran taon, sikara so nansiansian malet ed pananisia, manliliket a saray kangaranan da so “nisulat ed katawenan.” (Lucas 10:20; Apocalipsis 3:5) Saramay kabiangan na baleg ya ulop met so mikabat a “saman [lambengat] so nansungdo ya anggad kasampotan so nilaban.” (Mateo 24:13) Manwarin say baleg ya ulop bilang sakey a grupo so atandaan ya ompaway ed baleg a kairapan, saray sinansakey ditan so nepeg a mangisekar na inkasikaran mansiansian malinis tan aktibo.
32. Anton maganat a kipapasen so nipabitar ed katuaan a duara lambengat a grupo so “makaalagey” ed agew na sanok nen Jehova?
32 Anggapoy ebidensya ya anggan anton kabiangan na sarayan duaran grupo so “makaalagey” ed agew na sanok nen Jehova. Anto so kabaliksan na saya ed saray nilaksalaksa a kada taon et mangipanengneng na respeto ed bagat nen Jesus diad iyaatendi ed selebrasyon na Memoryal na impatey to balet ta agni angagamil na pananisia ed bagat nen Jesus diad punto na pagmaliw a dedikado, bautismadon ariripen nen Jehova, aktibo ed serbisyo to? Nagkalalo ni, anto so nipaakar ed saraman so aminsan ya aktibo balet ta inabuloyan daray kapusoan dan “magmaliw a nabelatan ed . . . saray kapagaan ed bilay”? Komon ta amin na saratan so naliing, tan mansiansian aliing, ta pian “ontalona diad pakaliktar ed amin na sarayan bengatla a niganan nagawa, tan makaalagey ed arap na Anak na too”—si Jesu-Kristo. Say panaon so antikey la!—Lucas 21:34-36.
[Kahon ed pahina 26]
Saray membro na baleg ya ulop
▪ nanlapu’d amin a nasyones tan tribu tan totoo tan pansasalita
▪ manalalagey ed arap na trono nen Jehova
▪ inurasan daray kawes da a pinaputi diad dala na Kordero
▪ manlalapu so kilalaban da ed si Jehova tan si Jesus
▪ nanlapu’d baleg a kairapan
▪ manlilingkor ed si Jehova ed agew tan labi diad templo to
▪ mangaawat na maaron salimbeng tan talima nen Jehova
▪ ipapastol nen Jesus diad saray subol na danudanum na bilay