Posibli so Pangaro ed Kaabay

SAY ilustrasyon nen Jesu-Kristo nipaakar ed Samaritano so angipanengneng no anton talaga so kabaliksan na tuan panangaro ed kaabay. (Lucas 10:25-37) Imbangat met nen Jesus: “Aroen mo so Katawan [Jehova] a Dios mo ed masimoon a pusom, tan dia ed masimoon a kamarerwam, tan dia ed masimoon ya nonot mo. Sikato ya so baleg tan unona’n gangan. Tan say komadua a mipadpara ed sikato, saya, Aroen mo so kaparam a too ooong [unong] ed sikan dili.”​—Mateo 22:37-39.

Singa ed dakel a totoo, kasin naromog mon mairap ya aroen so kaabay mo ya agmo kaparay poli? Angangko ta onia lapud naaralan mo odino sikan mismo so akaeksperiensia na panagmaltrato tan ag-inkahustisya. Sika odino saray inadarom so nayarin akasagmak na panangabuso manlapud totoon duma so poli ra.

Lapud sinaglawi nen Jesus a say sakey ed saray ganggan na Dios et say pangaro tayo ed kaabay tayo, maseguron posiblin natalonaan so ontan iran panamusol. Say tombok ed panggawa na ontan et say pangalig ed panmoria na Dios tan si Kristo ed totoo. Diad sayan pamaakaran et kunsideraen tayo so alimbawa nen Jesus tan saray inmunan Kristiano.

Say Maabig ya Alimbawa nen Jesus

Saray Judio nen inmunan-siglo so mamubusol ed saray Samaritano, totoon manaayam ed sakey a lugar diad baetan na Judea tan Galilea. Aminsan et mapaatagey a tinepetan na saray sumusumpan Judio si Jesus: “Ag kasi maong so pankuan mi ya sakey ka a Samaritano, tan walaan ka na demonio?” (Juan 8:48) Ontanla so panamusol da ed saray Samaritano ya arum ni ingen a Judio so parungtalan ya angayew ed saray Samaritano ed saray sinagoga tan inagew-agew a nampikasin agkomon napagamoran iray Samaritano na bilay ya andi-anggaan.

Say pikakabat ed sayan alabas a panamusol so seguradon anagdag ed si Jesus ya iter so ilustrasyon nipaakar ed Samaritanon amaneknek a sikatoy tuan kaabay diad impangasikaso to ed lakin Judio a kinabil na saray matakew. Panon kasi pangebat nen Jesus ed tepet na lakin Judio a marunong ed Mosaikon Ganggan: “Siopa [a talaga] so kaparak a too?” (Lucas 10:29) Bueno, nayarin direktan inmebat komon si Jesus diad pangikuan: ‘Say kaabay mo so aliwa lambengat a say kaparam a Judio noag ontan met ed arum a totoo, anggan say Samaritano.’ Anggaman ontan, mairap ya aksobien na saray Judio iman. Kanian angisalaysay na ilustrasyon nipaakar ed sakey a Judio a kinasian na sakey a Samaritano. Diad ontan et atulongan nen Jesus iray Judion dumerengel a manggawa na konklusyon a say tuan panangaro ed kaabay so onnatnat ed saray aliwan-Judio.

Si Jesus so andian na panamusol ed saray Samaritano. Aminsan nen manbabaroy ed Samaria, sikatoy nampainawa ed abay na sakey a bobon legan a saray babangatan to so linma ed asingger a syudad pian manaliw na tagano. Sanen say Samaritana so sinmabin onasol, inkuanto: “Itdan moak na inumen.” Lapud saray Judio so agmidedeneng ed saray Samaritano, tinmepet so bii: “Panon a sika, anta sakey ka’n Judio, mikerew ka’y inumen ed siak, ya sakey ak a bii’n Samaritana? (Ta saray Judios ag ira misalita ed saray Samaritanos).” Diad ontan et akapantasi si Jesus ed sikato, ya inyabawag to ni ingen ed sikato a sikatoy Mesias. Sikatoy kinmiwas (say bii) diad inyakar to’d syudad tan anawag na arum pian ondago tan ontalineng ed si Jesus. Say nansumpalan? “Nanlapu ed saman a ciudad amayamay so Samaritanos ya anisia ed sikato.” Agaylan maabig a resulta ed ag-impangalig nen Jesus ed awawey ya ipapanengneng na kabaleyan toran Judio!​—Juan 4:4-42.

Say Dios so Agmanangiduma

Gagala na Dios a si Jesus so manpulong ya ununa ed saray Judio, “saray abalang a carnero na abung na Israel.” (Mateo 15:24) Kanian, saray inmunan patumbok to so Judio. Balet taloran taon lambengat kayari inkikalbo na masanton espiritu nen Pentecostes 33 K.P., impalinew nen Jehova a labay ton say panaggaway-babangatan so ilaknab na saray mananisian Judio ed totoo na nasyones, saray Hentil.

Diad kanonotan na Judio, say pangaro ed sakey a Samaritano a singa ed pangaro ed inkasikaton mismo so mairap a tuloy. Nagkalalon mairap so pangipanengneng na panangaro ed kaabay ed ag-agalsiman iran Hentil, totoon walaan na baleg a pidumaan ed saray Judio nen saray Samaritano. Diad pankomento ed awawey na saray Judio ed saray Hentil, say The International Standard Bible Encyclopaedia so nankuan: “Naromog tayo, ed panaon na B[alon] S[ipan], so sanka-alablabasan a panamusol, panleglemew tan panggula. Sikara [saray Hentil] so impasen a bilang agmalinis, ya agnepeg a pidenengan a singa saray kaaro. Sikaray kakabusol na Dios tan totoo To, ya insiblet so pikakabat ed Dios anggad sikaray magmaliw a proselita, tan anggan ontan et sikara, singa diad kadaanan a panaon, so agnaawat a bilang sigpot a kalimog. Saray Judio so sinebelan a manimbawa ed sikara, tan no sikaray mantepet na bengabengatlan nipaakar ed Dios, sikaray nepeg a naayew.”

Anggaman dakel so walaan na onia iran panmoria, ginawa nen Jehova a naeksperiensia nen apostol Pedro a nawalaan na pasingawey ya imbaga ed sikato a ‘say nilinisan na Dios, ag mo gawaen a karaklan.’ Insan sikato so inwanwan na Dios ed ayaman na Hentil a si Cornelio. Si Pedro so nantasi nipaakar ed Kristo ed si Cornelio, say pamilya to, tan ed arum niran Hentil. “Tua a nanengneng ko,” inkuan nen Pedro, “a say Dios angapo so pangiduma to ed saray totoo; no ag ingen dia ed balang nacion akuen to so antakot ed sikato tan mangawa na matunong.” Legan a manpupulong ni si Pedro, say masanton espiritu so niwalad saray balon mananisia, a diad saman et abautismoan tan nagmaliw ya unaan iran Hentil a patumbok nen Kristo.​—Gawa, kapitulo 10.

Sayan agawa so inawat na saray patumbok a Judio, diad impakamoria a say ganggan nen Jesus a ‘mangawa na saray babangatan ed amin a naciones’ so aliwa lambengat a para’d saray Judio ed amin a daldalin noagta pati ed saray Hentil. (Mateo 28:19, 20; Gawa 11:18) Kayarin atalonaan so antokaman a liknaan sumpad saray Hentil a nayarin wala ni’d sikara, sikaray siseseseg ya angorganisa na sakey a kampanya na panagpulong pian manggawa na saray babangatan ed nasyones. Anggapo ni apalabas a 30 a taon, nibaga a say maong a balita so nipulong la ed “amin a pinalsa ed leksab na tawen.”​—Colosas 1:23.

Say angidaulo ed sayan panagpulong et si apostol Pablo, sakey a Kristianon nanlapud poli na Judio. Sakbay a nagmaliw a patumbok nen Kristo, sikatoy maseseg a membro na relihyoson sekta na saray Pariseo. Agda lambengat nileglemew iray Hentil noag pati saray kabanyakan a totoo ed dilin rasa ra. (Lucas 18:11, 12) Balet ag-inabuloyan nen Pablo iraman a panmoria a mangamper ed pangipanengneng to ed arum na aro ed kaabay. Imbes, sikatoy nagmaliw ya “apostol na saray Gentiles,” ya intalaga to so bilay to ed panaggaway-babangatan ed interon daldalin na Mediteraneo.​—Roma 11:13.

Diad panmiministeryo to, si Pablo so tinupak, pinekpek, tan impangaw. (Gawa 14:19; 16:22, 23) Kasin saratan a maruksan eksperiensia so sengegay pakadismaya to tan manisip a sikatoy mandadarak na panaon to ed pigaran nasyon tan grupo na poli? Andin balot. Kabat ton walaray matuan-impanpuson sinansakey a nitaytayak ed limog na dakel iran poli ed panaon to.

Sanen aromog nen Pablo iray Hentil a mabulos a paibangat ed saray dalan na Dios, sikaray naaro to. Alimbawa, diad saray taga Tesalonica et insulat to: “No ag say maoyamo kami ed pegley yo, a singa sakey a sigsiwa a managano na dili’n anak to. Ontan mi met, a maibibeg kami’n mangaro ed sikayo, apaliket kami’n toloy a mangipanabang ed sikayo, na aliwa’n say evangelio na Dios labat, noag met saray dili’n kakamarerwa mi, ta nagmaliw kayo a sankablian ed sikami.” (1 Tesalonica 2:7, 8) Sarayan impapuson salita so mangipapanengneng a talagan inadaro nen Pablo iray Hentil ed Tesalonica tan agto inabuloyan so antokaman a maneral ed gayaga na sakey a maong a siglaotan ed sikara.

Say Panangaro ed Kaabay et Katekep To so Gawa

Natan, a singa ed inmunan siglo, saramay mililimog ed Kristianon kongregasyon so mamabayubo na panangaro ed kaabay para’d totoo ed amin a poli. Diad pamaaligwas na maridios a panmoria ed arum tan pangipanabang ed sikara na maong a balita na Panarian, apalaknab na saray tuan Kristianos so pakatalos da ed totoo a nayarin agda nakabatan noag diad onman a paraan. Sikara ni ingen so walaan na inaagin panangaro ed sikara. (Juan 13:34, 35) Saya so nayarin naeksperiensiam met.

Say ontan a panangaro so walad limog na saray Tasi nen Jehova, anggaman sikaray naromog ed 229 a daldalin tan mangilalaman ed “balang nacion tan amin na saray kailalakan, tan binaleybaley, tan salita.” (Apocalipsis 7:9) Bilang sankagloboan ya impanaagi, sikaray mankakasakey ed panagdayew ed si Jehova, ed panangipulisay dan mibiang ed saray kolkolan tan laslasan na poli, tan ed panangikaindan da ed saray panaglabi a mangeekal ed totoo na maapit iran siglaotan ed kapara ran too.

Milimog ed saray Tasi, tan naimatonan yo no panon a saray totoo ed nanduruman nanlapuan so manggagawa na linawa na Dios. Nanengneng mo so panangaro ed kaabay a katekep na gawa legan ya iyaabawag da so maong a balita na Panarian na Dios. On, tan diad saray kongregasyon da, nakabat moray mapangasi, masimoon a totoo a diad panamegley na kabibilay da et mangipapanengneng a talagan naaaralan da so mangaro ed kaabay da.

[Litrato ed pahina 6]

Diad saray kongregasyon na Tastasi nen Jehova et naromog moray totoon maliket a nanlapud amin a rasa

[Picture Credit Line ed pahina 4]

Insabi na Maong a Samaritano ed Darawesan/The Doré Bible Illustrations/Dover Publications, Inc.