Naromog so Tombok ed Inaagin Panamabli
“Itekep yo so . . . maridios a debosyon ed inaagin panamabli.”—2 PEDRO 1:5-7, NW.
1. Anto so sakey ed saray manunan rason no akin a saray pandoroypo na totoo nen Jehova so ontanlan maliket iran okasyon?
AMINSAN ed apalabas et sakey a doktor ya aliwan Tasi nen Jehova so inmatendi ed impangraduar na anak ton bii manlapud Watch Tower Bible School of Gilead, a ditan nipasal pian magmaliw a misionera. Sikato so ontanlan nandinayew ed maliket ya ulop, a diad padesir to et agtanton masakit iray walad limog na sarayan totoo. Anto so amaliket a tuloy ed satan ya ulop? Nipaakar ed satan, anto so mamapaliket ed amin a pandoroypo na totoo nen Jehova diad saray kongregasyon, diad saray sirkiton asamblea, tan diad saray distrito kumbension? Agta say inaagin panamablin ipapanengneng da ed balang sinansakey? Anggapo so duaruwa, a say inaagin panamabli so sakey a rason no akin a nibagan anggapo so arum a relihyoson grupon walaan na ontanlan pangayaga, liket, tan pakapenek a nagagamoran manlapud relihyon a singa ed Tastasi nen Jehova.
2, 3. (a) Anton duaran Griegon salita nipaakar ed no panon so nepeg a liknaan tayo ed balang sinansakey, tan anto so liknaan da?
2 Nailaloan tayon makanengneng na ontan a inaagin panamabli lapud saray salita nen Pedro ed 1 Pedro 1:22: “Dia ed inpakalinis na kamarerwa yo lapu’d katotolok yo ed katuaan, dia ed panamegley na Espiritu, ed agnaomas ya aroan na sanaagi [inaagin panamabli, NW], manaaroan kayo komon a malet ya anga ed utel na puso yo.” Sakey ed saray manunan kabiangan na Griegon salitan nipatalos ya “inaagin panamabli” et say phi·liʹa (panamabli). Say kabaliksan na saya so maapit a nisisiglaot ed kabaliksan na say a·gaʹpe, say salitan gendagendat a nipapatalos ya “aro.” (1 Juan 4:8) Bangta say inaagin panamabli tan aro so mabetbet a napansalatan, saraya so walaan na ispisipikon kalidad. Agtayo ira nepeg a pansasalatan, a singa gagawaen na dakel a manangipatalos na Biblia. (Diad sayan artikulo tan ed ontumbok, nasingbat tayo so kada sakey ed sarayan salita.)
3 Nipaakar ed pandumaan na sarayan duaran Griegon salita, inkuan na sakey ya eskolar a say phi·liʹa so “pihon salita a walaay petang tan inkamaapit tan panamabli.” Diad biek a dapag, say a·gaʹpe so nisisiglaot a tuloy ed kanonotan. Kanian anggaman nibaga ed sikatayon aroen (a·gaʹpe) iray kabusol tayo, anggapoy panamabli tayo ed sikara. Akin ya andi? Lapud “saray mauges a kaolop deralen da so saray maong ya ugugali.” (1 Corinto 15:33) Nagkalalon mangipapatnag ni a wala so pandumaan et saray salita nen apostol Pedro: “Itekep yo . . . so inaagin panamablin aro.”—2 Pedro 1:5-7; ipareng so Juan 21:15-17.a
Saray Alimbawa na Nikadkaduman Tuloy a Inaagin Panamabli
4. Akin a si Jesus tan si Juan so walaan na nikadkaduman panamabli ed balang sinansakey?
4 Say Salita na Dios so mangiiter ed sikatayo na pigaran maabig ya alimbawa na nikadkaduman tuloy ya inaagin panamabli. Sayan nikadkaduman panamabli so aliwan resulta na panlabay noagta nibabase’d apresasyon ed matalonggaring iran kalidad. Anggapoy duaruwan say sankabantogan ya alimbawa et say panamabli nen Jesu-Kristo ed si apostol Juan. Anggapoy suppiat, si Jesus so walaan na inaagin panamabli ed amin a matoor ya apostol to, tan satan so walaan na maong a rason. (Lucas 22:28) Sakey a paraan ya impanengneng to iya et diad impanguras to ed saray sali ra, diad ontan et iikdan tora na leksion na inkamapaabeba. (Juan 13:3-16) Balet si Jesus so walaan na nikadkaduman panamabli ed si Juan, ya aminpigan sinalambit itan nen Juan. (Juan 13:23; 19:26; 20:2) No panon a si Jesus so walaan na katunongan a mangipanengneng na panamabli para’d saray babangatan tan apostol to, maseguron si Juan so angiter ed si Jesus na rason a nawalaan na nikadkaduman panamabli ed sikato lapud araldalem ya apresasyon to ed si Jesus. Nanengneng tayo iya ed saray sulat nen Juan, namparan diad Ebanghelyo to tan saray impuyan a sulat to. Agaylan mabetbet ton sasalambiten so aro ed saratan a sulat! Say babaleg ya apresasyon nen Juan para’d saray espiritual a kalidad nen Jesus so nanengneng ed insulat to ed Juan kapitulo 1 tan 13 ya anggad 17, tan ontan met ed naulit-ulit ya impanaglawi to ed sakbay-toon kiwawala nen Jesus.—Juan 1:1-3; 3:13; 6:38, 42, 58; 17:5; 18:37.
5. Anto so nibaga nipaakar ed nikadkaduman panamabli ed baetan nen Pablo tan si Timoteo?
5 Mipadpara, agtayo labay ya ibaliwala so nikadkaduman tuloy ya inaagin panamabli ed baetan nen apostol Pablo tan say Kristianon kaulop ton Timoteo, a satan, diad tua, et nibase’d pangapresya ed saray kalidad na balang sakey. Saray insulat nen Pablo so mankarga na maabig iran komento nipaakar ed si Timoteo, a singa say: “Ta angapo so took a kapara’y kalakal ko, a mangisakit a peteg ed kipapasen yo. . . . Et kabat yo a say inpakasali la ed sikato, ya, singa sakey ya ugaw a manlinkor ed ama, ontan so inpiolop to ed siak a nanlinkor ed kikayat na evangelio.” (Filipos 2:20-22) Dakel ira so personal ya impanukoy ed si Timoteo ed saray sulat to a mangipaparungtal ed ampetang a panamabli nen Pablo ed si Timoteo. Alimbawa, imanoen pa so 1 Timoteo 6:20: “O Timoteo, imatonan mo so nimatalek ed sika.” (Nengnengen met so 1 Timoteo 4:12-16; 5:23; 2 Timoteo 1:5; 3:14, 15.) Nagkalautla no ipareng iray sulat nen Pablo ed si Timoteo tan say sulat to ed si Tito so lalon mangipapabitar ed nikadkaduman panamabli nen Pablo ed sayan balolaki. Maseguron ontan met so liknaan nen Timoteo nipaakar ed impankaaro ra, a singa naimano tayo ed saray salita nen Pablo diad 2 Timoteo 1:3, 4: “Andi ebas a pinono’taka ed saray pikakasik, . . . A pirawat ko a maposapos a nanengneng taka, a pinonot ko so lua-luam, ta pian komon napano ak na gayaga.”
6, 7. Anton liknaan so wala ed baetan nen David tan si Jonatan, tan akin?
6 Mangiiter met na saray maabig ya alimbawa so Hebreon Kasulatan, a singa si David tan si Jonatan. Nabasa tayo a kayarin pinatey nen David ed si Goliat, “say kamarerwa nen Jonatan nisiglaot ed kamarerwa nen David, et sikato so inaro nen Jonatan a singa dili a kamarerwa to.” (1 Samuel 18:1) Say pangapresya ed alimbawa nen David ed seseg para’d ngaran nen Jehova tan say andi-takot ya iyarap ed si alan a Goliat so andi duaruwan sengegan a nawalaan na nikadkaduman panamabli si Jonatan ed si David.
7 Ontanla so panamabli nen Jonatan ed si David ya impusta toy dilin bilay to diad pangidepensa ed si David manlapud si Arin Saul. Anggapoy panaon a si Jonatan so angimbel ed si David lapud sikato so pinili nen Jehova pian magmaliw ya ontumbok ya ari na Israel. (1 Samuel 23:17) Si David so walaan na mipadparan aralem a panamabli ed si Jonatan, a satan so mapatnag ed imbaga to sanen nanayunal ed impatey nen Jonatan: “Maermen ak nipaakar ed sika, agik a Jonatan, makapaliket ka a toloy nen saman ed siak. Say arom ed siak sikato nen saman so makapakelaw, a talonaan to so aro na saray bibii.” On, say masimoon ya apresasyon so tanda na siglaotan da.—2 Samuel 1:26.
8. Siopan duaran bibii so angipatnag na nikadkaduman panamabli ed balang sinansakey, tan akin?
8 Walaan tayo met na maabig ya alimbawa diad Hebreon Kasulatan na nikadkaduman panamabli ed baetan na duaran bibii, si Naomi tan say balon manugang to a si Rut. Nonoten pa iray salita nen Rut ed si Naomi: “Agmo kerewen ed siak a paulian ta ka, tan ompawil ak a manlapu ed itotombok ed sika; ta angan iner a laen mo, onla ak; tan iner a tondaan mo, ontonda ak; say baley mo sikato so balay [baley] ko tan say Dios mo, Dios ko.” (Rut 1:16) Agta naisip tayo a si Naomi, diad kondukta tan panagsalita to nipaakar ed si Jehova, so akatulong ed si Rut pian liingen iyan panangibalikas na sayan apresasyon?—Ipareng so Lucas 6:40.
Say Alimbawa nen Apostol Pablo
9. Anto so mangipapanengneng a si Pablo so alimbawa na inaagin panamabli?
9 Unong ed anengneng tayo, si apostol Pablo so awalaan na nikadkaduman tuloy ya inaagin panamabli ed si Timoteo. Balet impanengneng to met so makapakelaw ya alimbawa na panangibalikas na ampetang ya inaagin panamabli ed amin ya agagi to. Imbaga to ed saray mamatatken a taga Efeso “a dia ed legan na taloran taon, agak tinmonda a nanbilin ed labi tan agew ed balang sakey a katekep na saray lua.” Agta ampetang ya inaagin panamabli? Anggapoy panduaruwa ed satan! Tan ontan met so alikna ra ed si Pablo. Diad impakadngel da a sikato so agda la nanengneng, “sikara ya amin nannangis ira na baleg, et nilakap da ed beklew si Pablo, tan sikato so inangoban da.” (Gawa 20:31, 37) Inaagin panamabli a nibase’d apresasyon? On! Say inaagin panamabli to so nanengneng met ed saray salita to ed 2 Corinto 6:11-13: “Say sangi mi akalukas ed sikayo. O taga Corinto, say puso mi binmaleg. Sikayo ag kayo naeletan ed sikami, balet naeletan kayo ed saray puspuso yo. Natan lapu ed sakey ya upa dia ed kapara a nengneng (mansalita ak a singa kayo ana’ko), onbaleg kayo met komon.”
10. Anton kakulangan na inaagin panamabli so angitonton ed si Pablo a mangisalaysay na saray subok to ed 2 Corinto kapitulo 11?
10 Malinew, dakel ed saray taga Corinto so onkukulang na maapresyan inaagin panamabli para’d si apostol Pablo. Kanian, arum ed sikara so nanreklamo: “Saray sula’to, kuan da, maiyan tan mabiskeg ira; balet say inkato-o to a silalaman makapuy, tan say salita to sikato so namormora.” (2 Corinto 10:10) Satan no akin a si Pablo so anukoy ed “saray manonaan ya Apostoles” da tan adagdag a mangibaga ed saray subok a sinungdoan to, a singa nirekord ed 2 Corinto 11:5, 22-33.
11. Anton pantasi so wala nipaakar ed panamabli nen Pablo para’d Kristianos ed Tesalonica?
11 Say ampetang a panamabli nen Pablo ed saramay nilingkoran to so nagkalautlan napatnagan ed saray salita to ed 1 Tesalonica 2:8: “Ontan mi met, a maibibeg kami’n mangaro ed sikayo, apaliket kami’n toloy a mangipanabang ed sikayo, na aliwa’n say evangelio na Dios labat, no ag met saray dili’n kakamarerwa mi, ta nagmaliw kayo a sankablian ed sikami.” Diad tua, ontanla so panamabli to ed sarayan balo nin agagi ya agto la makaalagar a mangamta nipaakar ed kipapasen da—ontanlan magunaet a mangamta no panon dan nasusungdoan so panamasegsegang ya imbaki to si Timoteo, ya angiter na maabig a report ya ontanlan akaligliwa ed si Pablo. (1 Tesalonica 3:1, 2, 6, 7) Maabig so impanalambit na Insight on the Scriptures: “Sakey a maapit a bedber na inaagin panamabli so niwala ed baetan nen Pablo tan saramay nilingkoran to.”
Apresasyon—Say Tombok ed Inaagin Panamabli
12. Antora so rason pian sikatayoy mangipanengneng na ampetang a panamabli para’d saray agagi tayo?
12 Maseguro, say tombok ed inaagin panamabli et say apresasyon. Agta amin a dedikadon ariripen nen Jehova so walaan na kalidad ya aapresyaen tayo, a mamapawala na panamabli tayo, a manggawa’d sikatayon maliket a miulop ed sikara? Say iyuuna tayon amin et say Panarian na Dios tan say inkatunong to. Amin tayo so mipupuligesgesan sumpad taloran kaslakan a kakabusol tayo: si Satanas tan saray demonyo to, say marelmeng a mundon babanlongan nen Satanas, tan say atawir a sinisiblet iran tendensya na makasalanan a laman. Agta lawas tayon nepeg a moriaen a saray agagi tayo et gagawaen da so anggaay nayarian da anggaman ed saray sirkumstansya? Lapud balang sakey a walad mundo so balanglan walad dapag nen Jehova odino ed dapag nen Satanas. Saray dedikadon agagi tayo so walad dapag nen Jehova, on, diad dapag tayo, tan sirin makanepegan na inaagin panamabli tayo.
13. Akin a sikatayo so nepeg a nawalaan na ampetang a panamabli para’d saray mamatatken?
13 Komusta so pangaapresya ed saray mamatatken tayo? Agta sikatayo so nepeg a maliket para’d sikara nisesengeg ed pamapasya ra para’d intereses na kongregasyon? Singa ed sikatayon amin, kaukolan a sikaray manustuni para’d inkasikara tan saray pamilya ra. Sikara met so walaan na mipadparan obligasyon a singa met ed arum ed sikatayo a singa say personal a panagaral, iyaatendi ed saray miting na kongregasyon, tan pibibiang ed lawak a ministeryo. Nilikud ed saya, sikaray walaan na obligasyon a manparaan na saray betang ed programa para’d saray miting, mangiter na mapublikon paliwawa, tan mangasikaso ed saray probleman onlelesa ed kongregasyon, a no maminsan et lalanoren to so andukey a panaon para’d saray hudisyal a bista. Peteg, labay tayon “sikatoy galangen tayo.”—Filipos 2:29.
Panangipanengneng na Inaagin Panamabli
14. Antoran teksto so mangigaganggan ed sikatayo a mangipanengneng na inaagin panamabli?
14 Pian napaliket si Jehova, nepeg tayon ibalikas so ampetang a liknaan na inaagin panamabli para’d kapananisiaan tayo, a singa ginawa met nen Jesu-Kristo tan si Pablo. Nabasa tayo: “Diad [inaagin panamabli] matamoy komon so aroan na sakey tan sakey.” (Roma 12:10, Kingdom Interlinear) “No nipaakar ed [inaagin panamabli], agkami la kaukolan a mansulat ed sikayo, ta sikayon mismo so binangatan na Dios a manaaroan ed balang sinansakey.” (1 Tesalonica 4:9, Int) “Pansiansaen yo [so inaagin panamabli].” (Hebreos 13:1, Int) Maseguron say mangatatawen ya Ama tayo so naliketan sano ipanengneng tayo so inaagin panamabli para’d mangaraldalin ya ananak to!
15. Antoray pigaran paraan a nibalikas tayo so inaagin panamabli?
15 Diad panaon na saray apostol, saray Kristiano so apasal a manbabanoan ed “masantos ya angob” odino “angob na aro.” (Roma 16:16; 1 Pedro 5:14) Peteg a panangibalikas na inaagin panamabli! Natan, diad maslak a pasen na dalin, say nagkalalon matukoy a panangibalikas et say makaaron imis tan sakey a malet a pasamano. Diad saray bansa a Latin, a singa ed Mexico, wadtan so panangibano diad porma na panlakap, a peteg a panangibalikas na panamabli. Sayan ampetang a panamabli ya ipapanengneng na sarayan agagi so nayarin makakatulong ed baleg ya idaraak ed saray bansa ra.
16. Antoran pankanawnawa so walad sikatayo a mangipanengneng na inaagin panamabli diad Kingdom Hall?
16 Sano onloob tayo ed Kingdom Hall, kasin panggugunaetan tayon ibalikas so inaagin panamabli? Satan so mamakiwas ed sikatayon mansalitay makapaseseg, nagkalautla ed saramay singano nagogonigon. Nibaga ed sikatayo a “simbawaen yo so saray agnaoksoy.” (1 Tesalonica 5:14) Satan so maseguron sakey a paraan a nipasabi tayo so petang na inaagin panamabli. Sananey nin maabig a paraan et say pangibalikas na apresasyon diad maabig a publikon paliwawa, diad sakey a kabiangan ed programan maabig so inkiparungtal to, ed maong a sagpot a ginawa na sakey ya estudyanten nanpaliwawa ed Eskuelaan na Teokratikon Ministeryo, tan arum nira.
17. Panon ya agamoran na sakey a matatken so panamabli na kongregasyon?
17 Akin ya ag-imbitaan so nanduruman agagi ed saray ayaman yo para’d sakey a panangan odino angangko et sakey a mirienda kayari miting no agni tanton labi la? Agta say simbawa nen Jesus diad Lucas 14:12-14 so nepeg a tumboken tayo? Sakey a datin misionero so aturo bilang manangimaton a manangasikaso ed kongregasyon ya amin ditan et nanduruma so rasa ra. Alikas ton kulang so inaagin panamabli, kanian ginawa to so sakey a plano pian nakorihi so situasyon. Panon? Kada Simba, sikato so mangiimbita na nanduruman pamilya pian nakadungo ed sakey a panangan. Diad sampot na taon et amin so mangipapatnag na ampetang ya inaagin panamabli ed sikato.
18. Panon tayon nipanengneng so inaagin panamabli para’d saray mansasakit ya agagi tayo?
18 Sano say sakey ya agi so mansasakit, diad ayaman odino diad ospital, say inaagin panamabli so managdag ed sikatayon ipaamta ed mansasakit a mapaga tayo. Odino komusta iramay manaayam ed nursing home para’d saray maedad la? Akin ya agpersonal a bisitaen ira, tawagan ed telepono, odino mangipawit na sakey a kard a mangibabalikas na ampetang a liknaan?
19, 20. Panon tayon nipanengneng a say inaagin panamabli tayo so ninmatnat la?
19 Sano mangiiter na ontan iran balikas na inaagin panamabli, nayarin itepet tayo ed inkasikatayo, ‘Kasin say inaagin panamablik so manangiduma? Kasin saray pamaakaran a singa say kolor na baog, edukasyon, odino materyal a kaykayarian so mangiimpluensya ed panangipatnag ko na inaagin panamabli? Kasin kaukolan kon palaknaben so inaagin panamablik, a singa ed insimbawa nen apostol Pablo ed saray Kristiano ed Corinto a gawaen?’ Say inaagin panamabli so managdag ed sikatayon moriaen iray agagi tayo ed positibon paraan, ya apresyaen ira ed maabig iran walna ra. Say inaagin panamabli so ontulong ed sikatayo a mangayaga ed espiritual ya iyaaligwas na agi tayo imbes a mangimon ed satan.
20 Say inaagin panamabli so nepeg met a manggawa ed sikatayon magmaliw ya aliston ontulong ed saray agagi tayo ed ministeryo. Satan so nepeg a singa ed ibabaga na sakey ed saray kanta tayo (Numero 92):
“Saray makapuy so tulongan
Pian say tepel so nagegemtan
Ugugaw so agpapaulian
Pabiskegen, takot napali’san.”
21. Anton kiwas so nailaloan tayo sano ipanengneng tayo so inaagin panamabli?
21 Kanian agtayo lilingwanan a diad pangibalikas na inaagin panamabli, say prinsipyon impabitar nen Jesus diad Sermon to ed Palandey so onaaplika: “Mangiter kayo, et naitdan kayo; sukat a maong, pinerper, aseksek tan manleplepwas, so iter da ed akwalan yo. Ta sukat a pansukat yo sikato met so pansukatan ed sikayo.” (Lucas 6:38) Nagunggunaan tayo so inkasikatayo sano ipanengneng tayo so inaagin panamabli, ya iter so panamabli ed saramay ariripen nen Jehova a singa ed inkasikatayon dili. Peteg maliket iramay mangayaga ed pangipatnag na inaagin panamabli!
[Paimano ed leksab]
a Nengnengen so onggendan ya artikulo: “Say Aro (Agape)—No Anto’y Agto Kabaliksan tan Say Kabaliksan To.”
Panon so Pangebat Mo?
◻ Antoran Griegon salita so nisisiglaot ed emosyon tayo, tan panon a mandumaan ira?
◻ Anto so tombok ed inaagin panamabli?
◻ Antoran Makasulatan ya alimbawa so niwala ed sikatayo nipaakar ed inaagin panamabli?
◻ Akin a nepeg a nawalaan tayo na ampetang a panamabli ed saray agagi tayo tan ed saray mamatatken?
[Litrato ed pahina 15]
Sisimbawaen nen apostol Pedro iray agagi to a mangitekep na inaagin panamabli tan arum niran Kristianon kalidad ed pananisia ra