Manpakpel!
“Nayarian tayo ya ibaga a mataletalek: Say Katawan [Jehova, NW] sikato so mananulong ko.”—HEBREOS 13:6.
1. Anton inkakpel so inpatnag na saraman so akaaral na katuaan nen inmunan siglo K.P.?
SAMAN so inmunan siglo na Komon a Panaon tayo. Sinmabi so abayag lan aalagden a Mesias. Imbangat toray babangatan ton maong tan angigapo ed makanan panagpulong a kimey. Saman so panaon para’d totoo ya ondengel ed maong a balita na Panarian na Dios. Kanian, saray lalaki tan bibii ya akaaral ed katuaan so masebeg ya angiyabawag ed makapakelkelaw a mensahe.—Mateo 28:19, 20.
2. Akin a kaukolan na Tastasi nen Jehova so manpakpel natan?
2 Say Panarian so agniletneg ed saraman ya agew. Balet say Nidesignan-Ari, si Jesu-Kristo, so angipropesiya nipaakar ed arapen ya agnanengneng a kiwawala to ed pakayari na Panarian. Satan so tandaan na saray bengatla a singa say agnaparaan iran bakal, eras, saray salot, yegyegyeg, tan sankamundoan a panangipulong na maong a balita. (Mateo 24:3-14; Lucas 21:10, 11) Bilang Tastasi nen Jehova, kaukolan tayo so inkakpel ta pian natalonaan irayan kipapasen tan say nasasagmak tayon panamasegsegang. Kanian makagungguna sirin so pangunsidera ed saray salaysay na Biblia nipaakar ed makpel iran manangiyabawag na Panarian ed inmunan siglo K.P.
Makpel ya Aligen si Kristo
3. Siopa so angitarok na sankaabigan ya ehemplo na inkakpel, tan anto so nibaga nipaakar ed sikato diad Hebreos 12:1-3?
3 Itatarok nen Jesu-Kristo so sankaabigan ya alimbawa na inkakpel. Kayari impangisita ed “sankabalgan a lurem” na makpel iran sakbay-Kristianon tastasi nen Jehova, tinukoy nen apostol Pablo si Jesus diad impangikuan: “Kanian sikatayo met, bangta wala ed liberliber tayo so sakey a sankabalgan a lurem na saray tasi, ikaindan tayo so amin a pakabelatan, tan say kasalanan ya akaliktob a sankainomayan ed sikatayo tan batiken tayo a siaanos komon so babatiken a niyan ed arap tayo, a nengnengnengen tayo si Jesus a nangawa tan manamayadyari na pananisia tayo, a sikato lapud gayaga a niyan ed arap to so sinongdoan to so cruz [panamairapan a kiew, NW], ya inbantak to so baing, et imyorong ed kawanan na trono na Dios. Motektek yo sirin so nansongdo ed ontan la ya insumlang na say managkasalanan ed sikaton dili, pian ag kayo komon nakesawan, ya onkapuy kayo ed saray kamarerwa yo.”—Hebreos 12:1-3.
4. Panon nen Jesus ya inpatnag so inkakpel sanen tinukso nen Satanas?
4 Kayari inkabautismoan to tan 40 ya agew na panagdalepdep, panagpikasi, tan panag-ayunal ed kalawakan, si Jesus so mabisbiskeg a sinmumpa ed si Satanas. Tinukso na Diablo a pagmaliwen a tinapay so bato, impulisay nen Jesus itan lapud mauges so panggawa na milagro diad pamenek na personal a pilalek to. “Walan nisulat,” kuan nen Jesus. “Aliwa a say tinapay labat so napanbilay na too, noag say amin a salitan onbesngaw ed sangi’ Dios [nen Jehova, NW].” Sanen sikato so inangat nen Satanas ya ontaboy manlapud toktok na templo, impulisay itan nen Jesus lapud kasalanan so panukso ed Dios pian pailiktar ed sikato manlapud potensyal a panbitkel. “Wala met a nisulat, Sika ag mo gawaen so panalsali ed [Jehova a, NW] Dios a Katawan mo.” Inyopresi nen Satanas ed sikato so amin a panarian na mundo ed sakey a ‘panangigalang,’ balet si Jesus so agmanapostasya tan manuporta ed angat na Diablo a saray totoo so agmansiansian matoor ed Dios diad silong na subok. Kanian inyabawag nen Jesus: “Arawi ka dia, Satanas! Ta wala’n nisulat, Sika igalang mo naani so Dios a Katawan [Jehova a Dios, NW] mo, tan sikato labat so panlinkoran mo.” Diad saman, say Managtukso so “tinmainan ed sikato ed pigara’n panaon.”—Mateo 4:1-11; Lucas 4:13.
5. Anto so ontulong ed sikatayon natalonaan so tukso?
5 Nampauley si Jesus ed si Jehova tan sumpa ed si Satanas. No sikatayo so mipadparan ‘ontolok ed Dios; balet onsumpa ed Diablo, et sikato so onarawi ed sikatayo.’ (Santiago 4:7) Singa si Jesus, sikatayo so makapanpakpel ya ontalindeg ed subok no iyaplika tayoray Kasulatan, anggan diad pangaon ed saratan diad panaon a sikatayo so natutukson manggawa na bengatlan pankasalananan. Kasin sikatayo so onsuko ed tukso a mantakew no diad satan a panaon et uliten tayo ed inkasikatayo so ganggan na Dios ya: “Ag ka mantakew”? Kasin saray duaran Kristiano so onsuko ed seksual ya imoralidad no anggan sakey ed sikara so sipapakpel a mangaon ed saray salitan: “Agka manlawan”?—Roma 13:8-10; Exodo 20:14, 15.
6. Panon a si Jesus so makpel a mananalo ed mundo?
6 Bilang Kristianos a bubusolen na sayan mundo, napaliisan tayo so espiritu tan makasalanan a kondukta to. Imbaga nen Jesus ed saray patumbok to: “Dia ed mundo walaan kayo na kairapan, balet man-ilalo kayo’d siak tinalok so mundo.” (Juan 16:33) Tinalo to so mundo diad agto impagmaliw a singa satan. Say alimbawa to bilang mananalo tan say nansumpalan na manamemben-katooran a kurang to so mamawala ed sikatayo na inkakpel a sikatoy aligen diad pansiansian biig manlapud sayan mundo tan agnamantsaan ed satan.—Juan 17:16.
Makpel a Mantultuloy a Manpulong
7, 8. Anto so ontulong ed sikatayo pian mansiansia ed panagpulong anggaman ed panamasegsegang?
7 Si Jesus tan saray babangatan to so nanmatalek ed Dios para’d inkakpel a mantultuloy a manpulong anggaman wala so panamasegsegang. Masebeg si Kristo ya anumpal ed ministeryo to anggaman ed panamasegsegang, tan kayari na Pentecostes 33 K.P., saray apasegsegang a patumbok to so nantultuloy ya angiyabawag na maong a balita anggaman sinali na saray relihyoson pangulo a patundaen ira. (Gawa 4:18-20; 5:29) Nampikasi iray babangatan: “Katawan [Jehova, NW], nengneng mo so saray gagaem da; tan yabuloy mo ed saray aripen mo a salitaen da a makmakpel so salitam.” Tan anto so agawa? “Et nen akapikasi la ra, saman so pasen a nantitiponan da ginmiwgiw,” kuan na salaysay, “et napno ra ya amin na Espiritu Santo, et sinalita ra so salita na Dios a makmakpel.”—Gawa 4:24-31.
8 Lapud maslak ed totoo natan so agmangaksobi ed maong a balita, say sebeg so mabetbet a nakakaukolan pian mantultuloy tayo ’ran pulongan. Nagkalautla sano napasegsegang, saray ariripen nen Jehova so mankakaukolan ed inter-Dios ya inkakpel ta pian nagnap a makapantasi. (Gawa 2:40; 20:24) Kanian say makpel a manangiyabawag na Panarian a si Pablo so angibaga ed sakey a walad kalangweran, agtanton ekspiriensiado a kaparan kumikimey: “Ag itayo initdan na Dios na espiritu na katakotan; no ag say pakayari tan say aro tan say maong a linawa. Ag mo sirin ibaing so pamatua na Katawan tayo, tan say siak a pinangaw to, no ag ingen midamay ka ed saray irap lapud evangelio, onong ed pakapanyari na Dios.” (2 Timoteo 1:7, 8) No ipikasi tayo so inkakpel, sikatayo so makapantultuloy a manpulong, tan anggan say panamasegsegang so agmamakesay ed gayaga tayo bilang manangiyabawag na Panarian.—Mateo 5:10-12.
Makpel ya Ondapag ed si Jehova
9, 10. (a) Anto so ginawa na saray inmunan-siglon Judios tan Hentiles ta pian magmaliw iran abautismoan a patumbok nen Kristo? (b) Akin a nakaukolan so inkakpel ed pagmaliw a sakey a Kristiano?
9 Dakel ya inmunan-siglon Judios tan Hentiles so sipapakpel ya angikaindan ed agmakasulatan iran tradisyon pian magmaliw a bautismadon patumbok nen Kristo. Kayarin tuloy na Pentecostes 33 K.P., “et say bilang na saray binangatan dinmakerakel a toloy ed Jerusalem; et baleg ya olop na saray sacerdotes so tinmolok ed pananisia.” (Gawa 6:7) Saraman a Judio so awalaan na inkakpel a mamultot ed relihyoson pisisiglaotan tan inawat [da] si Jesus bilang Mesias.
10 Nanlapulad 36 K.P., dakel a Hentiles so nagmaliw a mananisia. Sanen si Cornelio, saray membro na pamilya to, tan arum niran Hentil so akadngel ed maong a balita, aliston inawat da itan, inawat so masanton espiritu tan sikaray “abinyagan ed ngaran nen Jesu-Cristo.” (Gawa 10:1-48) Diad Filipos sakey a bantay na prisoan a Hentil tan say sankaabungan to so aliston anayakup ed Inkakristiano, tan “tampol ya inpabinyagan, sikato tan amin a kabaley to.” (Gawa 16:25-34) Kaukolan so inkakpel pian laen iratan a kundang lapud saray Kristiano so apasegsegang, agpopular a minoridad. Siansian ontan nira anggad natan. Balet no agkayo ni angidedika ed Dios tan abautismoan bilang sakey ed saray Tasi nen Jehova, agta natan la so panaon para’d sikayon alaen irayan makpel a kundang?
Inkakpel ed Naapag Iran Sankaabungan
11. Si Eunice tan si Timoteo so angitarok na anton maabig iran ehemplo na inkakpel?
11 Si Eunice tan say anak ton si Timoteo so angiletneg na maabig iran alimbawa na makpel a pananisia diad sakey a relihyoson tuloy a naapag a sankaabungan. Anggaman say masiken nen Eunice so sakey a pagano, imbangat to so anak to na “saray masanto a Sulsulat” manlapud inkaugaw to. (2 Timoteo 3:14-17) Diad impagmaliw ton Kristiano, impatnag to so ‘pananisia a matua.’ (2 Timoteo 1:5) Sikato met so walaan na tepel a mangipanabang na Kristianon bangat ed si Timoteo legan ya ipapanengneng so respeto ed inkaulo na agmananisian masiken to. Maseguron, say pananisia tan inkakpel to so atumangan sanen say nibangat-a-maong ya anak to so apilin mangulop ed si Pablo ed saray misioneron panagbaroy. Agaylan saya so mamaseseg ed saray Kristianon atateng a walaan na mipadpara iran sirkumstansya!
12. Anton nengneng na inkatoo so nagmaliwan nen Timoteo, tan siopara natan so mamapaneknek a kapara to?
12 Anggaman si Timoteo so nambilay ed sakey a relihyoson naapag a sankaabungan, sikato so sipapakpel ya angawat ed Inkakristiano tan nagmaliw ya maespiritual a persona a nipaakar ed sikato et nibaga nen Pablo: “Et ilaloan ko ed Katawan a Jesus ya ibaki Timoteo ed sikayo [taga Filipos] ed magano, pian naligliwa ak met a maong, no nakabatan ko so awawey’yo. Ta angapo so too a kapara’y kalakal to, a mangisakit a peteg ed kipapasen yo. . . . Et kabat yo a say inpakasali la ed sikato, ya singa sakey ya ugaw a manlinkor ed ama, ontan so inpiolop to ed siak a nanlinkor ed kikayat na evangelio.” (Filipos 2:19-22) Natan, dakel a lalaki tan bibii diad relihyoson naapag iran ayaman so sipapakpel a manasayakup ed tuan Inkakristiano. Singa si Timoteo sikaray mangiiter na prueba ed inkasikara, tan agaylay pangayaga tayo a sikaray kabiangan na organisasyon nen Jehova!
Makpel a ‘Mangyan na Saray Beklew Tayo’
13. Diad anton dalan ya inpatnag nen Aquila tan Prisca so inkakpel?
13 Si Aquila tan say akulaw to, si Priscilla (Prisca), so angiletneg na alimbawa diad makpel ya ‘impangiyan da na saray beklew da’ para’d kaparan mananisia. Inabrasa ra si Pablo ed ayaman da, akikimey ed sikato ed panaggaway tolda, tan tinmulong ed sikaton manibukel na balon kongregasyon ed Corinto. (Gawa 18:1-4) Legan na 15-taon ya inpankaaro ra, inrisgo da ni ingen so bilay da ed biang to diad sakey ya agniparungtal a paraan. Sikaray manaayam ed Roma sanen inkuanto ed saray Kristiano diman: “Ibano yo ra di Prisca tan Aquila, ya kakimeyan ko ra ed Cristo Jesus, ya inyan da so beklew dan dili a nisesengeg ed bilay ko et aliwa a siak lambengat so misalamat ed sikara.”—Roma 16:3, 4.
14. Diad pangipapalaran da na bilay da para’d si Pablo, si Aquila tan Prisca so onkikiwas a mitunosan ed anton ganggan?
14 Diad pangipapalaran da na bilay da para’d si Pablo, si Aquila tan Prisca so kinmiwas a mitunosan ed saray salita nen Jesus: “Sakey a balon gangan so iter ko ed sikayo, a manaaroan so sakey tan sakey ed sikayo. Salanti unong na impangarok ed sikayo, pian manaaroan met so sakey tan sakey ed sikayo.” (Juan 13:34) Sayan ganggan so “balo” lapud satan et palumbasan to so kakaukolanen na Mosaikon Gangan a say sakey et aroen to so kapara ton too a singa panangaro to ed inkasikaton dili. (Levitico 19:18) Kakaukolanen to so dilin-panagsakripisyon aro ya anggad punton pangiter ed bilay na sakey para’d arum, a singa ginawa nen Jesus. Say managsulat a si Tertullian na komadua tan komatlon siglo K.P. so angaon ed saray salita na minumundon totoo nipaakar ed saray Kristiano sanen insulat to: “‘Imanoen,’ kuan da, agayla so panangaro da ed balang sinansakey . . . ‘agaylan sikaray akaparaan ya anggan ompatey para’d balang sinansakey.’” (Apology, kapitulo XXXIX, 7) Nagkalautla diad utel na panamasegsegang nayarin sikatayo so napaskar a mangipanengneng na inaagin panangaro diad sipapakpel a panangipusta na bilay tayo ta pian napaliisan so pangiwalwal ed saray kapananisiaan diad panamairap odino ipapatey ed lima na kabusol.—1 Juan 3:16.
Say Inkakpel so Mangitatarok na Gayaga
15, 16. Unong a nipanengneng ed Gawa kapitulo 16, panon a nayarin say inkakpel tan gayaga so mansiglaotan?
15 Si Pablo tan si Silas so amaneknek a say panangipatnag na inkakpel ed utel na saray subok so nayarin mangitarok na gayaga. Diad ganggan na sibil ya huis ed syudad na Filipos, sikara so mapublikon pinekpek tan impangaw. Ingen, sikaray agmaermen a natatakot. Anggaman ed mairap iran kipapasen, sikaran siansia so walaan na inter na Dios ya inkakpel tan gayaga a satan so nitatarok ed matoor iran Kristiano.
16 Ngalngalin diad kapegleyan na labi, si Pablo tan si Silas so manpipikasi tan mangidadayew ed Dios diad kanta. Bigla, sakey a yegyeg so nanyegyeg ed prisoan, ya amalukak ed saray gulonggulong da, tan angilukas ed saray pinto. Say natatakot a bantay na prisoan tan say pamilya to so akatasi ya angitonton ed inkabautismoan da bilang ariripen nen Jehova. Sikaton mismo so “aliketan na baleg, ya anisia ed Dios.” (Gawa 16:16-34) Agaylan gayaga so intarok na saya ed si Pablo tan si Silas! Diad pangunsidera ed saya tan ed arum a Makasulatan iran ehemplo na inkakpel, panon tayon mansiansian makpel bilang ariripen nen Jehova?
Mantultuloy a Magmaliw a Makpel
17. Unong a nipanengneng ed Salmo 27, panon a say panilalo ed si Jehova so mitukoyan ed inkakpel?
17 Say panilalo ed si Jehova so ontulong ed sikatayon mansiansian makpel. Inkanta nen David: “Manalagar ka ed Jehova; ibalap mo so pusom et sikato pabiskegen to so pusom; on, manalagar ka ed Jehova.” (Salmo 27:14) Ipapanengneng na Salmo 27 a si David so nanmatalek ed si Jehova bilang “biskeg” na bilay to. (Bersikulo 1) Diad impakaimano ed no panon so impideneng na Dios ed saray kabusol nen David ed apalabas so sengegan na inpakawalaan to na inkakpel. (Bersikulo 2, 3) Say panangapresya ed sentro na panagdayewan nen Jehova so sananey nin sengegan. (Bersikulo 4) Say panagmatalek ed tulong, pananalimbeng, tan panangiliktar nen Jehova so tinmulong met ed inkakpel nen David. (Bersikulo 5-10) Makatulong, met, so nantultuloy a bilin ed saray prinsipyo na matunong a dalan nen Jehova. (Bersikulo 11) Say matalek a pikakasi para’d panangiliktar manlapud saray kakabusol to, tekep na pananisia tan ilalo, so tinmulong ed si David pian magmaliw a makpel. (Bersikulo 12-14) Napabiskeg tayo so inkakpel tayo diad mipadpara iran paraan, sirin ipanengneng a sikatayo so peteg a “maniilalo ed si Jehova.”
18. (a) Anto so mangipanengneng a say maparanay a pililimog ed kaparan managdayew nen Jehova so ontulong ed sikatayon mansiansian makpel (b) Anton betang so gawaen na saray kristianon miting diad pamabiskeg na inkakpel?
18 Say regular a pililimog ed saray kaparan managdayew ed si Jehova so nayarin ontulong ed sikatayo pian mansiansian makpel. Sanen inmapelo si Pablo ed si Caesar tan manbiabiahen mamaarap ed Roma, saray kaparan mananisia so inmabet ed sikato diad Tindaan na Appio tan Taloran Taberna. “Et nen anengneng to ra,” kuan na salaysay, “[si Pablo] akisalsalamat ed Dios, et binmiskeg so linawa to.” (Gawa 28:15) No sikatayo so maparanay ya onaatendi ed saray Kristianon miting, tutumboken tayo so simbawa nen Pablo: “Tan manpapagalangan itayo ed sakey tan sakey pian manaayatan itayo ed aro tan diad ed saray maabig a gawa. Ya ag tayo paulianan so saray panmomoyong tayo, singa ugali na saray arum, no ag ingen mansisimbawaan itayo; tan nagkalalo la, lapud nanengneng yo a manasinger so agew.” (Hebreos 10:24, 25) Anto so kabaliksan na manpapasesegan ed balang sinansakey? Say pamaseseg et kabaliksan to’y “pangiter na panamaseseg tekep na inkakpel, espiritu, odino ilalo.” (Webster’s Ninth New Collegiate Dictionary) Dakel so nagawaan tayo diad pangiter na panamaseseg ed arum iran Kristiano tekep na inkakpel, tan say seseg da so napabiskeg met na sayan kalidad a walad sikatayo.
19. Panon a saray kasulatan tan Kristianon palapagan so mitukoyan ed pansiansia tayon makpel?
19 Pian mansiansian makpel, nepeg tayon maparanay ya aralen so Salita na Dios tan iyaplika iray simbawa to ed kabibilay tayo. (Deuteronomio 31:9-12; Josue 1:8) Say maparanay a panagaral tayo so nepeg a laktipen to iray Kristianon palapagan a nibase ed saray Kasulatan, lapud say asimbang a simbawan nitarok so ontulong ed sikatayo a mangarap ed saray subok na pananisia tekep na inter na Dios ya inkakpel. Manlapud saray salaysay na Biblia, naimano tayo no panon a say ariripen nen Jehova so nagmaliw a makpel diad nanduruman kipapasen. Natan la, nayarin agtayo kabat no panon a say ontan ya impormasyon so makatulong ed sikatayo, balet say Salita na Dios so walaan na pakayari, tan no anto so naaralan tayo manlapu ed satan et lawas mangungguna ed sikatayo. (Hebreos 4:12) Alimbawa, no say takot ed too so onggapon mangapekta ed ministeryo tayo, nayarin nonoten tayo no panon ya si Enoc et walaan na inkakpel pian ipasabi so mensahe na Dios ed saray agmaridios.—Judas 14, 15.
20. Akin a nibaga a say pikakasi so makana no sikatayo so mansiansian makpel bilang ariripen nen Jehova?
20 Diad pansiansian makpel bilang ariripen nen Jehova, nepeg tayo so mansiansia ed pikakasi. (Roma 12:12) Sipapakpel a sinungdoan nen Jesus iray subok to lapud sikatoy “angibagat na pikakasi tan pikekerew, a tekep na mabiskeg a tagleey tan saray lua, ed saman so makapanyari’n mangilaban ed sikato ed ipapatey, tan sikato so nadngel lapud masanton panaglikas to.” (Hebreos 5:7) Diad pansiansian maapit ed Dios diad pikakasi, sikatayo so agmagmaliw a singa payakot iran taga paway a nigana ed “kumadua ya ipapatey” a ditan ed anggapo so kikioli. (Apocalipsis 21:8) Say madibinon salimbeng tan bilay ed balon mundo na Dios so para’d saray makpel ya ariripen to.
21. Akin a manpakpel iray matoor a Tastasi nen Jehova?
21 Bilang matoor a Tastasi nen Jehova, agkaukolan a sikatayo so ontakot ed demonyo tan toon kakabusol, lapud walaan itayo na tulong na Dios tan say makpel ya ehemplo nen Jesus bilang mananalo ed mundo. Say makapabiskeg ed espiritual a pililimog ed totoo nen Jehova so ontulong met ed sikatayo a magmaliw a makpel. Say inkakpel tayo so napabiskeg met diad panamegley na panangiwanwan tan simbawa na saray Kasulatan tan saray Kristianon palapagan. Tan say salaysay na Biblia ed saray ariripen na Dios ed apalabas so ontulong ed sikatayo pian manakar ed saray dalan to a sipapakpel. Sirin, diad sarayan maatap a kaunoran ya agew, komon ta sikatayo so onabantin sitetepel ed sagradon serbisyo. On, komon ta amin a totoo nen Jehova so manpakpel!
Panon so Pangebat yo?
◻ Panon a say ehemplo nen Jesus so ontulong ed sikatayo ed inkakpel?
◻ Anto so angiter ed si Jesus tan saray babangatan to na inkakpel pian mansiansia ed panagpulong?
◻ Akin a saray Judio tan Hentiles so nankaukolan na inkakpel pian ondapag ed si Jehova?
◻ Antoran ehemplo na inkakpel so intarok nen Eunice tan si Timoteo?
◻ Anton paneknek a say inkakpel so mangitatarok na gayaga anggan ed utel na panamasegsegang?
[Litrato ed pahina 18]
Singa si Jesus, natalonaan tayo so tukso no iyaplika tayo tan aonen iray Kasulatan