Talaga ta a Saya so Panagtakew?

SI Abiodun so sakey a senior waiter ed baleg ya otel ed Nigeria. Legan ya inkandado to so hall a panagbankete, nalmo to so sakey a supot na kuarta a mankarga na kantidad na $1,827, U.S. Agnampaleen ya isumiti to so kuarta, a diad kaunoran et inala na akankayarian, a sakey a bisita ed otel. Si Abiodum so tinumangan na manangipakurang na otel na doblen promosyon tan inter ed sikato so titulon “sankaabigan a kumikimey ed taon.” Sikato met so tinumangan na akankuarta.

Sakey a lokal a newsmagazine, say Quality, so angipalapag ed estorya, a tinawag si Abiodun a sakey a “Maong a Samaritano.” Sanen tinepetan na Quality no sikatoy atukson mangiyatol ed kuarta para’d inkasikato, inkuan nen Abiodun: “Siak so sakey ed saray Tasi nen Jehova. Kanian no makaromog ak na antokaman ya agko kayarian, satan so ipapawil ko ed akankayarian.”

Nikelawan so dakel ed komunidad ed inkamatuan impanengneng nen Abiodun. Saray kaparan Tastasi nen Abiodun so aliketan ed agawa, balet sikaray agnikelawan. Diad sankamundoan saray Tasi nen Jehova so kabkabat lapud atagey iran prinsipyo ra. Kabiangan na saraya et say pagmaliw a matua; satan so totontonen, sakey ya importantin kabiangan na tuan Inkakristiano.

Anggaman ontan, tunggal paminsan et saray sirkumstansya so mamairap a naamtaan no anto so matua tan agmatua. Kunsideraen pa iyan situasyon. Si Festus, a manaasikaso ed saray kontribusyon tan saray kuenta na sakey a kongregasyon na saray Tasi nen Jehova ed Sagur ya Aprika, so mankaukolan a tuloy na kuarta.a Say asawa ton bii so mankaukolan na seryoson operasyon ya unong ed saray doktor da et agla nipaleen. Kinerew na ospital a mamauna ira na kapalduay gastos.

Si Festus so kulang na ontan a kantidad. Sanen inasinggeran toy pigaran totoo pian onotang, sikaray agnampaotang. Diad ontan et anonotan to so kuartan impaasikaso ed sikato tan nankatunongan, ‘Manepeg ta ya abuloyan ko a niiyan ed ipapatey so asawak anta wala so nagawaan ko pian sikatoy niliktar? Akin ya ag “bayesen” so kuarta na kongregasyon? Nayarian ko met ya ipawil itan sano bayaran ak na pigaran totoon akaotang ed siak.’

Inusar itan nen Festus ya agto kayarian pian ibayar ed ospital. Susto ta so rason to? Makatunongan kasi inkiwas to nisesengeg ed emerhensyan situasyon a nipaarap ed sikato?

Siopay Akankuarta?

Diad pangusisa ed saratan a tepet, repasoen tayo pan magano so pigaran punto nipaakar ed nanlapuan tan gagala na kuartan inala nen Festus. Say pundo so nanlapud mabunlok a kontribusyon na saray membro na kongregasyon a malabay a mamalaknab na puron panagdayew ed si Jehova. (2 Corinto 9:7) Agnausar itan pian ibayar ed saray sueldo, ta anggapo so suesueldoan lapud gagawaen da ed kongregasyon. Diad kasuniyan to, say kuartan kontribusyon so manunan uusaren ed pangipaalagey tan pangasikaso ed panmimitingan, a gendagendat a sakey a Kingdom Hall. Itatarok na saya so kumbiniente tan komportablen pasen a ditan et saray totoo​—malangwer tan matatken, mayaman tan duka—​so nayarin mandaragup pian mangawat na saray bangat na Biblia.

Siopay akankuarta? Satan so kayarian na kongregasyon bilang interamenti. Anggapoy indibidual a membron manetermina no panon a gastosen. Manwarin say ulop na mamatatken so mangidirihe ed panbayar na karaklan a gagastosen na kongregasyon, sano kaukolan so panbayar na baleg a gastos, ipapaarap na mamatatken itan a bengatla ed interon kongregasyon para’d panangabobon.

Panagbayes odino Panagtakew?

Lapud plano ton ipawil a tampol so kuarta, minoria nen Festus so ginawa bilang panagbayes. Anggaman ontan, say Webster’s New Dictionary of Synonyms so angusar na arum niran salita nipaakar ed “pangala tan pangekal na pankayarian na arum a gendagendat diad paamot odino agto namamamtaan tan naynay a gagawaen itan ya ag-ipapatanir ed sikato.” Saray salita et “panagtakew” tan “matakew.” Anggapoy panangiyabuloy odino autorisasyon, ya inala nen Festus so kuartan pankayarian na kongregasyon. Kanian, on, sikatoy nankasalanan na panagtakew. Sikato so matakew.

Siempre, walaray sukat na inkagrabe na kasalanan unong ed motibo na pantakew. Nanengneng tayo itan manlapud alimbawa nen Judas Iscariote a pinabtangan a manasikaso ed kuarta nen Jesus tan saray matoor ya apostol. Kuan na Biblia: “[Si Judas] so matakew, tan lapu’d wala ed sikato so supot inala to so inpepelag diman.” (Juan 12:6) Lapud abayuboan na mauges a puso tan agum, nantultuloy ya inmuges si Judas. Diad kaunoran sikato so pinmalalo angga ed impangitapat to ed Anak na Dios​—ed kantidad a 30 piraso na pilak.​—Mateo 26:14-16.

Balet, si Festus so abayuboan na kapagaan lapud pansasakit na asawa to. Kasin kabaliksan na saya a sikatoy agbalot napakasalanan? Maseguron andi. Kunsideraen so ibabaga na Biblia nipaakar ed panagtakew ed sananey nin singa emerhensyan situasyon: “Saray totoo agda balawen so matakew, no mantakew pian manpesel no sikato so narasan. Balet no sikato so naromog, ipawil to so maminpito; iter to naani so amin a kayarian na abung to.” (Uliran 6:30, 31) Diad arum a salita, sano narel, kaukolan a sigpot a nadusa so matakew unong ed ipakseb na ganggan. Unong ed Mosaikon Ganggan, kaukolan a bayaran na matakew so krimen to. Kanian imbes a pasesegen odino ikatunongan so pantakew, ipapasakbay na Biblia ya anggano ed gipit iran situasyon, say panagtakew so mansumpal ed pakaandi na trabaho, kababaingan, tan say sankaseryosoan et say pakabalang na abobon na Dios.

Bilang Tastasi nen Jehova, amin a tuan Kristiano, nagkalautla saramay apabtangan na saray responsabilidad ed loob na kongregasyon, so kaukolan a magmaliw ya uliran, “angapo so kabalawan da.” (1 Timoteo 3:10) Agnaawat nen Festus so iilaloan ton kuarta kanian agto nipawil so kuartan inala to. Naamtaan so ginawa to. Anto so agawa ed sikato? No sikato so agnagbabawin matakew, sikatoy ekalen komon manlapud malinis a Kristianon kongregasyon. (1 Pedro 4:15) Balet sikato so naermenan tan sikatoy nagbabawi. Diad ontan et sikatoy pinansiansia ed kongregasyon, anggaman abalang toray pribilihyo ed serbisyo.

Panagmatalek ed Dios

Si apostol Pablo so amasakbay a say panagtakew na sakey a toon mankuan a manlilingkor ed si Jehova so nayarin mangiter na kabalawan ed ngaran na Dios tan ed totoon mamebenben na ngaran to. Nansulat si Pablo: “Sika a mangibangat ed arum ag mo bangatan so inkasika a dili? sika ya ipupulong mo so ag pantakew, mantakew ka ta? Ta say ngaran na Dios naayew lapu ed sikayo dia ed utel na saray Gentiles, onong na nisulat.”​—Roma 2:21, 24.

Si Agur, sakey a makabat a laki ed inmunan panaon, so anaglawi ed mipadparan punto. Diad pikakasi to kinerew to a sikato komon so “onduka ak, tan mantakew ak, tan agamilen ko a modmoraen so ngaran na Dios ko.” (Uliran 30:9) Imanoen a binidbir na makabat a laki a say inkaduka so nayarin makasabi’d saray kipapasen a makatukso anggan ed sakey a toon matunong pian mantakew. On, saray mairap a panaon so makasubok ed pananisia na Kristiano ed abilidad nen Jehova a manalima para’d saray pankaukolan na totoo to.

Ingen, saray matoor a Tasi nen Jehova, pati saramay duka, so walaan na pananisia a say Dios so “mananumang ed saray mananap ed sikato.” (Hebreos 11:6) Kabat da a tutumangan nen Jehova iray matoor diad panutulong to ed sikaran mangasikaso ed saray pankaukolan da. Satan so pinalinew nen Jesus ed Sermon to ed Palandey, ed impangikuan: “Ag kayo sirin mapaga, ya ikuan yo, Anto kasi kanen mi? ono, Anto kasi inumen mi? ono, Anto kasi pankawes mi? Ta . . . say Ama yo’n mangatatawen amta to ya nakaukolan yo so saraya ya amin a bengatla. Ingen anapen yo ni’n onona so panarian, tan say inkatonong to; et amin iraya a bengatla niarum ira ed sikayo.”​—Mateo 6:31-33.

Panon so pangitatarok na Dios para’d saray mankaukolan ed Kristianon kongregasyon? Diad dakel a paraan. Say sakey et diad panamegley na saray kapananisiaan. Ipapanengneng na totoo na Dios so tuan aro ed balang sinansakey. Ipapapuso ra so simbawa na Biblia: “Bangbalet say walaan na kayamanan to ed sayan mundo, tan nanengneng to so agi to a naokolan, et kaputan to so panangasi to, panon so pansiansia na aroy Dios ed sikato? Ana’ko ra ya ankekelag, aleg a mangaro itayo ed salita o dia ed dila; no ag dia ed gawa tan dia ed katuaan.”​—1 Juan 3:17, 18.

Diad interon mundo, ed masulok a 73,000 a kongregasyon, say masulok ya apatira tan kapalduan milyon a Tastasi nen Jehova so magunaet a panbabanikelan dan manlingkor ed Dios unong ed matunong iran prinsipyo to. Kabat da ya agbalot paulyanan na Dios iray matoor ya ariripen to. Saramay akapanlingkor la ed si Jehova ed dakel a taon so mangipapaatagey na saray boses da diad pangabobon ed si Arin David, a nansulat: “Tobonbalo ak nensaman, et natan masiken ak la: agko nin balot anengneng a say matunong et apulian, nisay saray bini to mipabpayabol na nakan.”​—Salmo 37:25.

Agaylan magmaong so panisia ed Dios ya angipuyan ed saraman a salita, imbes a paulyan na sakey so inkasikato a natukson mantakew tan posiblin nabalang to so pabor na Dios ed ando lan ando!​—1 Corinto 6:9, 10.

[Paimano ed leksab]