Apocalipsis—Asingger la so Engranden Kapantokan To!
Katuloyan na Kapitulo 43
Saray Kiew na Bilay
24. Anto so nanenengneng natan nen Juan ed parehon dapag na ilog na danum na bilay, tan anto so iretrato ra?
24 Diad pasingawey nen Ezequiel, say ilog so nagmaliw a mabiskeg ya agos, tan anengneng na propeta a wala so tinmobo ed parehon dapag to na amin a nengneng na manbubungan kiew. (Ezequiel 47:12) Balet anto so anengneng nen Juan? Saya: “Tan dia ed biek na saya ya ilog tan dia ed saman wala so kiew na bilay a wala so bunga to a labindua, a binulan so pangiter to na bunga to. Tan saray bulong na saray kiew so onkana a pakatambal ed saray nasyon.” (Apocalipsis 22:2b) Sarayan “kiew na bilay” so nepeg met a mangiretrato ed probisyon nen Jehova ed pangiter na andi-geter a bilay ed matulok a katooan.
25. Anton daakan a probisyon nen Jehova so amakiwas ed totoo ed sankagloboan a Paraiso?
25 Agaylan daakan a probisyon so ginawa nen Jehova para’d onkikiwas a totoo! Ag-ira labat makainom ed makarepreskon danudanum noagta nayari da nin manborbor ed saraman a kakiewan na mantultuloy a nanduruman makasustini iran bunga. O, no komon ta saray akadkaunan ateng tayo so apenek ed mipadparan “makapalagyat” a probisyon ed Paraison Eden! (Genesis 2:9) Balet natan sakey a sankagloboan a paraiso so wadia, tan manggagawa ni na probisyon si Jehova ed panamegley na saray bulong na saraman a simbolikon kakiewan para’d “pakatambal ed saray nasyon.”a Nagkalalon mabiskeg nen antokaman a tambal a nayarin iresita natan, manlapud tanaman odino antokaman a lapuan, say makarepreskon pangusar ed saratan a simbolikon bulong so mangipaarap ed mananisian katooan ed inkayadyari ed espiritual tan laman.
26. Anto met so iretrato na saray kiew na bilay, tan akin?
26 Saraman a kiew, a nasasalog a maong na ilog, so nayarin mangiretrato ed 144,000 a membro na asawa na Kordero. Legan a wala ni ed dalin saraya so uninom met ed probisyon na Dios para’d bilay ed panamegley nen Jesu-Kristo tan atawag bilang “baleg iran kiew na inkatunong.” (Isaias 61:1-3; Apocalipsis 21:6) Sikara so amawala na daakan ya espiritual a bunga ed kidayewan nen Jehova. (Mateo 21:43) Tan legan na Sanlibon Taon ya Uley, nawalaan ira na pibiang ed pangiyaplika ed saray probisyon na dondon a nausar ed “pakatambal ed saray nasyon” manlapud kasalanan tan patey.—Ipareng so 1 Juan 1:7.
Anggapo La so Labi
27. Anton kaaruman a bendisyon so binitla nen Juan para’d saraman so apribilihyoan a makaloob ed Balon Jerusalem, tan akin a nibaga ya “anggapo la so antokaman a samba diman”?
27 Say iloob ed Balon Jerusalem—peteg, anggapo la so lalon makapakelaw a pribilihyo! Isipen pa—saray datin abeba, ag-ayadyarin totoo so ontumbok ed si Jesus ed tawen pian magmaliw a kabiangan na ontanlan maglorian oksuyan! (Juan 14:2) Si Juan so angiter na pigaran ideya ed saray bendisyon a pangayagaan na saraya, a nankuan: “Tan anggapo lay inkisamba. Balet say trono na Dios tan say Kordero wala ed syudad, tan saray aripen to so manlinkor na sagradon serbisyo ed sikato; tan nanengneng da so lupa to, tan say ngaran to wala ed saray muling da.” (Apocalipsis 22:3, 4) Sanen say inkasaserdote na Israelita et nagmaliw ya abulok, satan so nanirap ed samba nen Jehova. (Malaquias 2:2) Say andiay-pananisian “abung” na Jerusalem so inyabawag nen Jesus ya intalirak. (Mateo 23:37-39) Balet ed Balon Jerusalem, “anggapo la so antokaman a samba diman.” (Ipareng so Zacarias 14:11.) Amin iran manaayam to so asubok ed saray apuy na irap dia ed dalin, tan agamoran so pananalo, nipasen da so ‘agpakabulok tan ag-ipapatey.’ Diad kipapasen da, kabat nen Jehova, a singa ed pakakabat to ed si Jesus, a sikaray agbalot napelag ed pananisia. (1 Corinto 15:53, 57) Niarum ni, “say trono na Dios tan ed Kordero” so wadman, pian say kipapasen na syudad so maligen ed andi-geter a panaon.
28. Akin a saray membro na Balon Jerusalem et nisulat so ngaran na Dios ed muling da, tan anton magayagan ilalo so manaalagar ed sikara?
28 Singa si Juan a mismo, amin ya arapen iran membro na mangatatawen a syudad so “ariripen” na Dios. No ontan, walaan ira na ngaran na Dios a mapatpatnag ya akasulat ed muling da, a mangipabidbir a sikato so Akankayaryan ed sikara. (Apocalipsis 1:1; 3:12) Ikuenta da bilang agnaparaan a pribilihyo so pangisaklang ed sikato na sagradon serbisyo bilang kabiangan na Balon Jerusalem. Legan a si Jesus so wadia ed dalin, sikato so angiter na makapasagyat a sipan ed saratan a prospektibon manuley, a nankuan: “Maliket iray maralus ed puso, ta nanengneng da so Dios.” (Mateo 5:8) Agaylan liket na sarayan aripen sano aktual dan nanengneng tan nadayew si Jehova!
29. Akin ya ikuan nen Juan a say mangatatawen a Balon Jerusalem et “anggapo la so labi”?
29 Intuloy nen Juan: “Ontan met, anggapo la so labi, tan agla ra mankaukolan na liwawa na silewan nisay liwawa na banwa, ta si Jehova a Dios so mansindag ed sikara na liwawa.” (Apocalipsis 22:5a) Say kadaanan a Jerusalem, a singa ed dinan man a syudad ed dalin, so nanmatalek ed banwa para’d liwawa ed agew tan ed liwawa na bulan tan artipisyal a silew ed labi. Balet diad mangatatawen a Balon Jerusalem, agla kakaukolan itan a panlapuan na liwawa. Say syudad so aliwawaan nen Jehova a mismo. Say “labi” so nayarin nausar ed piguratibon pantalos, a manutukoy ed kairapan odino iyaarawi a manlapud si Jehova. (Miquias 3:6; Juan 9:4; Roma 13:11, 12) Anggapo la so nengneng na ontan a labi ed magloria, marlang a kiwawala na makapanyarin-amin a Dios.
30. Panon so impanampot nen Juan ed makapakelaw a pasingawey, tan mamaseguroy Apocalipsis ed sikatayo na anto?
30 Sampotan nen Jesus iyan makapakelaw a pasingawey diad pangikuan ed sarayan ariripen na Dios: “Tan manuley ira bilang arari ed ando lan ando.” (Apocalipsis 22:5b) Tua, diad sampot na sanlibon taon, saray gungguna na dondon so niyaplika ed pakakompleto, tan iparungtal nen Jesus so ayadyarin rasa na too ed Ama to. (1 Corinto 15:25-28) No anto so walad kanonotan nen Jehova para’d si Jesus tan say 144,000 kayari na satan, agtayo amta. Balet paseguroan tayo na Apocalipsis a say pribilihyo ra ed sagradon serbisyo ed si Jehova so mantultuloy ed andi-anggaan.
Say Maliket a Pantok na Apocalipsis
31. (a) Say pasingawey na Balon Jerusalem so tanda na pakasumpal na anto? (b) Anto so gawaen na Balon Jerusalem para’d arum nin matoor a katooan?
31 Say kasumpalan na sayan pasingawey na Balon Jerusalem, say asawa na Kordero, so maliket a pantok ya ituturo na Apocalipsis, tan matukoy a tuloy. Diad amin a kaparan Kristiano nen Juan ed inmunan-siglo ya inmunan akipaarapan na sayan libro so manilalo ed iloob ed satan a syudad bilang ag-ompatey ya espiritun kaiban manuley nen Jesu-Kristo. Say nakdaan na alanaan iran Kristiano a siansian mabilay ni natan ed dalin so walaan na parehon ilalo. Sirin say Apocalipsis so onarap ed engranden pantok to, legan a say akompleton nobya et mikakasakey ed Kordero. Insan, diad panamegley na Balon Jerusalem, saray gungguna na dondon bagat nen Jesus so niyaplika ed katooan, pian diad asingger et amin iran matoor so onloob ed andi-anggaan a bilay. Diad sayan dalan say nobya, say Balon Jerusalem, a bilang matoor a katulong na Nobyon Ari to, so mibiang ed pangipaalagey ed maandon matunong a balon dalin—amin ed kigloriaan na Soberanon Katawan tayo a si Jehova.—Mateo 20:28; Juan 10:10, 16; Roma 16:27.
32, 33. Anto so naaralan tayo manlapud Apocalipsis, tan anto so nepeg ya impapuson ebat tayo?
32 Sirin, agaylan liket so nalikna tayo legan a manasingger tayo ed kasampotan a pangonsidera tayo na libron Apocalipsis! Anengneng tayo so kaunoran iran sagpot nen Satanas tan say bini to a sinmaew tan say matunong iran panangukom nen Jehova ya akompleto. Nepeg a naandi ed ando lan ando so Babilonian Baleg, a tumbokan na amin ya arum ya andi-ilalon abulok iran elemento na mundo nen Satanas. Si Satanas a mismo tan saray demonyo to so ibantak ed kaaralman tan diad saginonor et naderal. Say Balon Jerusalem so miuley ed si Kristo ed katawenan legan a mantultuloy so kioli tan panangukom, tan say ayadyarin katooan so diad kaunoran et mangayaga ed andi-anggaan a bilay ed Paraiso diad dalin. Agaylan malinlinew ya ipatnag na Apocalipsis iyan amin a bengabengatla! Agaylan mamabiskeg ed determinasyon tayo so ‘pangiyabawag na sayan andi-anggaan a maong a balita bilang maabig a balita ed balang nasyon tan tribo tan pansasalita tan totoo’ ed dalin natan! (Apocalipsis 14:6, 7) Kasin sikayo so sigpot a mamapasya ed sayan baleg a kimey?
33 Tekep na saray kapusoan tayon napno na pisasalamat, komon mangimano tayo ed kasampotan iran salita na Apocalipsis.
[Paimano ed leksab]
a Imanoen so balikas a “saray nasyon” et mabetbet ya ontutukoy ed saramay agkabiangan na espiritual ya Israel. (Apocalipsis 7:9; 15:4; 20:3; 21:24, 26) Say pangusar dia na ontan a balikas so agmangisuheri a satan a katooan so mantultuloy ya organisaen ed manbibiigan a nasyonal iran grupo legan na Sanlibon Taon ya Uley.