Apocalipsis​—Asingger la so Engranden Kapantokan To!

Kapitulo 44

Say Apocalipsis tan Sikayo

1. (a) Anton pamaseguro lamet so inter na anghel ed si Juan nipaakar ed amin a makapakelaw iran propesiya ed Apocalipsis? (b) Siopa so mankuan a, “siak so onsabin tamtampol,” tan kapigan iyan ‘isasabi’?

Diad pambasa ed makapaliket a nengneng na Balon Jerusalem et nayarin sikayo so napakiwas a mantepet: ‘Peteg kasin nagawa so ontanlan makapakelkelaw a bengatla?’ Ebatan nen Juan itan a tepet diad pangireport ed saray ontumbok a salita na anghel: “Tan inkuanto ed siak: ‘Sarayan salita so matoor tan matua; on, si Jehova so Dios na apuyanan iran balikas na saray propeta ya angibaki na anghel to pian ipatnag to ed saray aripen to iray bengatla a kaukolan a nagawan magano. Tan, nia! siak so onsabin tamtampol. Mapalar so siopaman a mangunor ed saray salita na propesiya na sayan lukot.’” (Apocalipsis 22:6, 7) Amin a makapakelaw iran propesiya ed Apocalipsis so petepeteg a nasumpal! Nipaakar ed ngaran nen Jesus, inyabawag na anghel a si Jesus so asingger lan onsabi, “tamtampol.” Maseguron saya so isasabi nen Jesus “a singa sakey a matakew” pian deralen iray kakabusol nen Jehova tan mangipaarap ed engrande tan maliket a pantok na Apocalipsis. (Apocalipsis 16:15, 16) Sirin, nepeg tayon itukoy so saray bilay tayo ed saray salita na “sayan lukot,” say Apocalipsis, pian sikatayo so nibilang a maliket ed satan a panaon.

2. (a) Panon so inkiwas nen Juan ed impangawat to ed daakan a panangiparungtal, tan anto so inbaga na anghel ed sikato? (b) Anto so naaralan tayo ed saray salita na angheles, “Manalwar ka!” tan, “Dayewen mo so Dios”?

² Kayarin napangayagaan iman a panangiparungtal, natalosan no akin a si Juan et aliketan: “Bueno, siak a Juan ya akadngel tan akanengneng ed sarayan bengatla. Tan kayari na impakadngel tan impakanengneng ko dinmakmomo ak pian mangigalang ak ed arap na saray sali na anghel ya angipanengneng ed siak na sarayan bengatla. Balet inkuanto ed siak: ‘Manalwar ka! Agmo gagawaen itan! Ta kapara moak ya aripen tan ed saray agagim a propeta tan ed saray manguunor na saray salita na sayan lukot. Dayewen mo so Dios.’” (Apocalipsis 22:8, 9; ipareng so Apocalipsis 19:10.) Sayan amiduan danay a nibalikas a pasakbay ya agmandayew ed saray anghel so nipanpanaon ed panaon nen Juan, sanen arum so mapatnag a nankurang na ontan a panagdayew odino mangibabagan walaan na espesyal iran panangipuyan a manlalapud saray anghel. (1 Corinto 13:1; Galacia 1:8; Colosas 2:18) Natan, satan so mangipapabitar ed katuaan a nepeg tayon dayewen lambengat so Dios. (Mateo 4:10) Nepeg ya agtayo dudutakan so tuan panagdayew ed pandayew ed siopaman odino antokaman a bengatla.​—Isaias 42:5, 8.

3, 4. Anto so mantuloy ya ibabaga na anghel ed si Juan, tan panon a tinmulok so alanaan a nakdaan ed saray salita to?

³ Intuloy nen Juan: “Tan inkuanto ed siak: ‘Agmo tatatakan iray salita a propesiya na saya a lukot, ta say aturon panaon asingger la. Samay manggagawa na ag-inkatunong, abuloyan a manggawa ni na ag-inkatunong; tan say marutak iyabuloy ni a mandutak; balet say matunong iyabuloy mo ni a manggawa na matunong, tan say santo iyabuloy mo ni a napasanto.’”​—Apocalipsis 22:10, 11.

⁴ Say alanaan a nakdaan natan so tinmulok ed sarayan salita na anghel. Agda tinatakan iray salita na propesiya. Siempre, say manunan paway na Zion’s Watch Tower and Herald of Christ’s Presence (Hulyo 1879) so angiparungtal na saray komento ed dakel iran bersikulo na Apocalipsis. Unong a naimano tayo ed manangilukas a kapitulo, diad inlabas na saray taon say Watch Tower Society so angipalapag na arum niran libro pian mangipaliwawa ed Apocalipsis. Natan et sagyaten mi lamet so imano na amin a manangaro-na-katuaan ed mabiskeg iran propesiya na Apocalipsis tan say kasumpalan da.

5. (a) Panon no kaliktan na totoon ibaliwala iray pasakbay tan simbawa ed Apocalipsis? (b) Anto so nepeg a kiwas na saray mauyamo tan matunong?

⁵ No kaliktan na totoon ipulisay iray pasakbay tan simbawa ed Apocalipsis, bueno, abuloyan a gawaen da so ontan! “Samay manggagawa na ag-inkatunong, abuloyan a manggawa ni na ag-inkatunong.” No satan so labay da, paulyanan iray mantitiblak ed karutakan na sayan malukak a panaon ya ompatey ed ontan a karutakan. Agmanbayag, nagawa la iray panangukom nen Jehova ed kakompleto, ya onggapo ed kadederal na Babilonia a Baleg. Abuloyan iray mauyamo a manseet ya ontumbok ed saray salita na propeta: “Anapen si Jehova . . . Anapen so inkatunong, anapen so kauyamoan. Nayarin niyamot kayo ed agew na sanok nen Jehova.” (Sofonias 2:3) No nipaakar ed saramay dedikado la ed si Jehova, “abuloyan so matunong a manggawa ni na inkatunong, tan abuloyan so masanto a manpasanto ni.” Amta na makabat ya anggapo so temporaryon pankaabigan a manlapud kasalanan no ikumpara ed ag-mangangga iran bendisyon a pangayagaan na saraman so mangegemtan na inkatunong tan inkasanto. Ikuan na Biblia: “Mansiansian suboken yo so inkasikayon dili no wala kayo ed pananisia, paneknekan yo so sikayon dili.” (2 Corinto 13:5) Nisengeg ed kurang a pilien tan pansiansiaen yo, makaawat kayo na langkap.​—Salmo 19:9-11; 58:10, 11.

6. Anto so inkuan nen Jehova legan ya ipapaarap to ed saray managbasa na Apocalipsis para’d kaunoran a pankanawnawa ed propesiya?

⁶ Diad kaunoran a pankanawnawa ed sayan propesiya, ipapaimano natan nen Jehova, say andi-anggaan ya Ari, ed saray managbasa na Apocalipsis, diad pangibabagan: “Nia! Siak so onsabin tamtampol, tan say langkap ya iter ko wala ed siak, pian iter ed balang sakey unong ed gawa to. Siak so Alpha tan Omega, say sengeg tan kasumpalan, say ona tan unor. Mapalar iray pinesakan da so kawekawes da, pian wala so katunongan da ya onasingger ed saray kiew na bilay tan pian nagamoran da so iloob ed saray pinto na syudad. Wala ed paway iray aso tan saray manag-anito tan saray managlawan tan saray akapatey tan saray managtalintao tan siopaman a maliket tan manggawa na tila.”​—Apocalipsis 22:12-15.

7. (a) Diad anto ya “onsabin tamtampol” si Jehova? (b) Akin a say klero na Kakristianoan et andiay pibibiang ed Balon Jerusalem?

⁷ Maminsan ni ya idadanet nen Jehova a Dios so andi-geter ya inkasoberano to tan say katuaan ed inmunan ginagala to et sumpalen to ed kaunoran. Sikato so “onsabin magano” pian mangukom tan mamalangkap ed saray mangugunaet a mananap ed sikato. (Hebreos 11:6) Saray estandarte to so manetermina no siopara so napalangkapan tan no sioparay nipulisay. Saray klero na Kakristianoan so kinmiwas a singano “apepe iran aso,” a manbulag-bulagan ed saray bisyo a deneskribe dia nen Jehova. (Isaias 56:10-12; nengnengen met so Deuteronomio 23:18, New World Translation Reference Bible, paimanod-leksab.) Maseguro, a sikaray ‘nanliket tan nanggawa’ na tila iran bangat tan doktrina tan sigpot ya angibaliwala ed simbawa nen Jesus ed saray pitoran kongregasyon. Sirin, anggapo so pinabang da ed Balon Jerusalem.

8. (a) Siopa lambengat so nayarin “onasingger ed saray kiew na bilay,” tan anto so kabaliksan na saya? (b) Panon a say baleg ya ulop et “pinesakan da so kawekawes da,” tan panon dan impansiansia so malinis a talindeg da?

⁸ Saraman lambengat so alanaan iran Kristiano a petepeteg a “pinesakan da so kawekawes da” pian magmaliw a malinis ed imaton nen Jehova so napribilihyoan ya “onasingger ed saray kiew na bilay.” Salanti, awaten da so kanepegan tan titulo ed ag-ompatey a bilay ed mangatatawen a pasen. (Ipareng so Genesis 3:22-24; Apocalipsis 2:7; 3:4, 5.) Kayari na ipatey da bilang too, makaloob ira ed Balon Jerusalem diad panamegley na kioli. Sikaray palooben na 12 angheles, bangta sebelan so siopaman a mangagamil na tila odino inkarutak anggaman mangibabagan walaan na mangatatawen ya ilalo. Say baleg ya ulop ed dalin so ‘nanpesak ed kawekawes da tan pinaputi ra ed dala na Kordero” tan kaukolan a pansiansiaen da so malinis a talindeg da. Nagawaan da iya diad iyarawi ed saray bisyo a pamapasakbayan nen Jehova, tan diad pangipapuso ed simbawa nen Jesus ed pitoran mensahe to ed saray kongregasyon.​—Apocalipsis 7:14; kapitulo 2 tan 3.

9. Antoran salita so sinalita nen Jesus, tan manuna para’d siopa so angipaarapan ed mensahe to tan ed interon Apocalipsis?

⁹ Kayari nen Jehova, si Jesus so nansalita. Sikato so angipaarap na makapaseseg iran salita ed saray maptek impanpuson manbabasa na Apocalipsis, diad pangibabagan: “Siak, si Jesus, imbakik so anghel ko pian tasian to ed sikayo so saraya a bengatla dia para’d saray kongregasyon. Siak so lamot tan say kailalakan nen David, tan say kabontatalan masnag dia ed kabuasan.” (Apocalipsis 22:16) On, sarayan salita so manunan “para’d saray kongregasyon.” Saya so sakey a mensahe, manuna ed amin, para’d kongregasyon na alanaan iran Kristiano dia ed dalin. Amin a walad Apocalipsis so manunan nipapaarap ed alanaan iran Kristiano, a manayam ed Balon Jerusalem. Diad panamegley na satan a kongregasyon, say baleg ya ulop met so apribilihyoan a makagamor na pakatalos ed sarayan mablin mapropetikon katuaan.​—Juan 17:18-21.

10. Akin a tinawag nen Jesus so inkasikato a (a) “say lamot tan say kailalakan nen David”? (b) “say kabontatalan masnag dia ed kabuasan”?

¹⁰ Nimatalek ed si Jesu-Kristo so pangipasabi ed Apocalipsis ed si Juan tan diad panamegley to ed kongregasyon. Namparan si Jesus so “lamot tan kapolian nen David.” Sikato so kailalakan nen David unong ed laman tan sirin kualipikadon magmaliw ya Ari ed Panarian nen Jehova. Sikato met so magmaliw ya “Andi-anggaan ya Ama” nen David, tan sirin “lamot” nen David. (Isaias 9:6; 11:1, 10) Sikato so permanenti, ag-ompatey ya Ari ed linya nen David, mananumpal na sipanan nen Jehova ed si David, tan “say masnag a kabontatalan ed kabuasan” a nipasakbay ed panaon nen Moises. (Numeros 24:17; Salmo 89:34-37) Sikato so “bitewen ed kabuasan” ya onpelnak, a sengegan na ipalbangon na agew. (2 Pedro 1:19) Amin a panamalikdo na bantog a kabusol a Babilonia a Baleg et agto nasebelan iyan maglorian ibubutay.

Ikuan: “Gala!”

11. Anto so lukas ya imbitasyon so iparungtal natan nen Juan, tan siopa so nayarin onkiwas ed satan?

¹¹ Natan et pankanawnawa la nen Juan pian mansalita. Manlapud puson manliplippua tekep na panamabli ed amin ya anengneng tan nadngel to, ipaliwawa to: “Tan say espiritu tan say nobya kuanto: ‘Gala!’ Tan siopaman a makadngel kuanto: ‘Gala!’ Tan siopaman a napgaan so ondago; tan siopaman a malabay so uninom ya anggapoy bayar ed danum na bilay.” (Apocalipsis 22:17) Saray gungguna ed dondon bagat nen Jesus so aglimitado ed 144,000, lapud lukas iyan imbitasyon. Say manamakiwas ya espiritu nen Jehova so mamapakiwas ed panamegley na nobyan klase, pian say mensahe et mantultuloy a nipaknol tekep na nagnap ya inkalinew: “Uninom ya anggapoy bayar ed danum na bilay.” (Nengnengen met so Isaias 55:1; 59:21.) Siopaman a napgaan para’d inkatunong so naimbitaan ya “ondago” tan mangawat na inkadaakan nen Jehova. (Mateo 5:3, 6) Agaylan pribilihyo na amin a napibilang ed mangaraldalin a klase ya onebat ed sayan imbitasyon na alanaan a klasen Juan!

12. Panon so ikiwas na baleg ya ulop ed imbitasyon ed Apocalipsis 22:17?

¹² Nanlapulad gapo na saray taon 1930, say ondarakel a bilang na baleg ya ulop so “makakadngel”​—mangiimano ed imbitasyon. Singa saray kapara ran ariripen, akapet da so malinis a talindeg ed arap nen Jehova. Panpirawatan da so panaon sano say Balon Jerusalem so mangipaagus a manlapud tawen na saray bendisyon ed sankatooan. Diad impakadngel na manamakiwas a mensahe na Apocalipsis, aglambengat ikuan na say baleg ya ulop a “Gala!” noagta aktibo met a manugyop na arum ni ed organisasyon nen Jehova, ya ipapasal met ira a mangiyabawag: “Siopaman a napgaan so ondago.” Kanian mantutultuloy ya ondarakel so bilang na baleg ya ulop, a masulok nen 3,000,000 ed sikara ed masulok a 200 a daldalin ed interon dalin so mibiang a kaibay dagdaiset nen say 9,000 na alanaan a nobyan klase ed pangilaknab na say imbitasyon a “mangala na anggapoy bayar a danum na bilay.”

13. Anton pasakbay so inparungtal nen Jesus?

¹³ Insan, intuloy lamet nen Juan a nansalita, a nankuan: “Siak so mantasi ed siopaman ya akadngel na saray salita na propesiya na sayan lukot: No siopaman a mangarum ed sarayan bengatla, iyarum na Dios ed sikato; so saray bakbak a nisulat ed sayan lukot; tan no siopaman so mamawas a manlapud saray salita na lukot na sayan propesiya, alaen na Dios so betang to a manlapud saray kiew na bilay tan ed paway na masanton syudad, saray bengatlan nisulat nipaakar ed sayan lukot.”​—Apocalipsis 22:18, 19.

14. Panon so panmoria na klasen Juan ed “propesiya” na Apocalipsis?

¹⁴ Saramay kabiangan na klasen Juan so nepeg a mangimano ed “propesiya” na Apocalipsis. Agda nepeg ya iyamot odino aruman itan. Say mensahe to so nepeg a mapatpatnag a nipulong, “a manlapud saray toktok na kaabungan.” (Mateo 10:27) Say Apocalipsis so inpuyan na Dios. Siopa kasi so manalin manalat na salitan sinalitan mismo na Dios tan impasabi ed panamegley na samay sakey a manuuley la natan ya Ari, si Jesu-Kristo? Maseguro, say ontan a too so makanepegan a makabalang ed babatiken para’d bilay tan manirap ed saray bakbak a nepeg ya idapo ed Babilonia a Baleg tan ed interon mundo.

15. Anto so kabaliksan na saray salita nen Jesus a sikato so “mantasi ed sarayan bengabengatla” tan “siak so onsabi a tamtampol”?

¹⁵ Iyarum natan nen Jesus so kaunoran a salita na panamaseseg: “Saman so mantasi ed sarayan bengatla so mankuan, ‘On, onsabi ak a tamtampol.’” (Apocalipsis 22:20a) Si Jesus so “matoor tan matuan tasi.” (Apocalipsis 3:14) No tatasian toray pasingawey ed Apocalipsis, nepeg a saraya so tua. Namparan sikato tan si Jehova a Dios a mismo so paulit-ulit ya angidanet ed katuaan a sikaray onsabin “tamtampol,” odino magano, sasalitaen dia nen Jesus ed komaliman danay. (Apocalipsis 2:16; 3:11; 22:7, 12, 20) Say “isasabi” so panangukom ed baleg a balangkantis, say mapulitika “iran arari” tan amin ya arum ya onsumpa ed “panarian na Katawan [Jehova] tayo tan ed Kristo to.”​—Apocalipsis 11:15; 16:14, 16; 17:1, 12-14.

16. Diad pakaamta a si Jehova a Dios tan si Jesus so onsabin tampol, anton mapekder a kiwas so nepeg a gawaen tayo?

¹⁶ Say pakaamta yo a si Jehova a Dios tan si Jesus so onsasabin magano so nepeg a mamaseseg ed sikayon “sinononot ed kiwawala na agew na sanok nen Jehova.” (2 Pedro 3:12) Dinanman ya ompatnag ya inkaseguro dia ed dalin ed sistema na bengabengatla nen Satanas so sakey a kugip. Antokaman so ompatnag ya aligwas a nadampot na tawen na minumundon manuley so temporaryo lambengat. Sarayan bengatla so ompaso. (Apocalipsis 21:1) Say inkapermanenti lambengat so naromog ed si Jehova, say Panarian to ed silong nen Jesu-Kristo, tan say insipan a balon mundo to. Agbalot sasaewen iya!​—1 Juan 2:15-17.

17. Panon kayon naapektuan na panamabli ed inkasanto nen Jehova?

¹⁷ No ontan sikayo sirin so mangiyabuloy a mangimpluensya ed bilay yo ray naaralan ed Apocalipsis. Agta say impamasimar yo ed mangatatawen a kiwawala nen Jehova so manlagyat ed sikayo ed agnaparaan a gloria tan inkasanto na Amalsa tayo? (Apocalipsis 4:1–​5:14) Agaylan pribilihyo so manlinkor ed ontan a Dios! Komon ta say panamabli yo ed inkasanto to so mamakiwas ed sikayon manseryoso ed simbawa nen Jesus ed pitoran kongregasyon tan ompaliis ed bengabengatlan singa say materyalismo, panagtalintao, imoralidad, inkamalainemem, apostasyan sektarianismo, odino antokaman a bengatlan manggawad serbisyo yon agmakapaliket ed si Jehova. (Apocalipsis 2:1–​3:22) Saray salita nen apostol Pedro ed klasen Juan so onaplika met ed baleg ya ulop: “Unong ed Masanto ya anawag ed sikayo, magmaliw kayo a masanto ed inkasikayo ed amin a panagbilay yo.”​—1 Pedro 1:15, 16.

18. Diad anto a nagnap kayon mibiang, tan akin a sayan kimey et maganat natan?

¹⁸ Niarum ni, napakiwas kayo komon a pasimbaloey seseg legan ya iyabawag yo so “taon na abig a linawa ed biang nen Jehova tan say agew na panangibales ed biang na Dios tayo.” (Isaias 35:4; 61:2) Balang lan diad melag a pulok odino diad baleg ya ulop, nawalaan kayo komon na sankasigpotan a pibibiang ed pangiyabawag na pangikalbo na pitoran yaong na sanok nen Jehova, a mangibabaga ed panangukom na Dios ed mundo nen Satanas. Ontan met, iyarum yo so boses yo ed magayagan pangiyabawag ed andi-anggaan a maong a balita nipaakar ed niletneg a Panarian nen Jehova tan ed Kristo to. (Apocalipsis 11:15; 14:6, 7) Manganat a mibiang ed sayan kimey. Tan say pakabidbiran a wala tayo la ed agew na Katawan so mamakiwas ed dakel a miulop ed kimey na panangiyabawag na maong a balita. Komon ta saraya so onaligwas ed panangitalaga ed saray bilay da ed Dios ed gagalan manpabautismo. Tandaan, “say aturon panaon so asingger la”!​—Apocalipsis 1:3.

19. Antoray pansaran salita na matatken lan apostol a si Juan, tan panon so ikiwas yo ed saya?

¹⁹ Kanian, dingan nen Juan, sikatayoy magunaet a manpikasi: “Ontan pa komon! Galadia, Katawan a Jesus.” Tan onya ni so inyarum nen Juan, say matatken lan apostol: “Komon ta say agkanepegan a panangasi na Katawan a Jesu-Kristo so wala ed saray sasanto.” (Apocalipsis 22:20b, 21) Ontan met komon ed sikayon mamabasa na sayan palapagan. Nawalaan kayo komon na pananisia ed asingger lan engranden pantok na Apocalipsis, pian sikayo met so mibiang ed sikami ed impapuson “Ontan pa komon!”