Determinadon Manlingkor ed si Jehova!

“AGKA oonlan manpulong!” “Agmo ra aabuloyan ya ombisita dia iray kaparam a Tastasi nen Jehova!” Dakel a Kristianon bibii so makakarengel ed saraya tan mipara iran balikas manlapud saray sumpan kaasawaan da. Balet sano sarayan lalaki so sundalo, saray kaasawaan da so nidunget ed nikaduman subsubok ed pananisia ra. (Isaias 2:4; Juan 17:16) Sirin, panon so pangipapakurang na Kristianon kaasawaan a bibii pian mansiansian mabiskeg ed espiritual tan aktibo ed serbisyo na Panarian?

Say katooran ed si Jehova tekep na personal a determinasyon so ontutulong ed sikaran makapantultuloy. “Isipen kon satan so sigpot a determinasyon ko,” ibabaga nen Yvonne, sakey ya asawa na sundalo. “Kabat ko a walara so paraan a napaliisan so isusumpa na asawak.” Peteg, walara.

Sananey a Kristianon bii, ya asawa na sakey a sundalon opisyal, so mangisasalaysay ed no panon a say determinadon talindeg to so nanggawa ni ingen a magmainomay so bilay para’d asawa to. “Kabat to so eskedyul ko tan pati sikato, tan aapresyaen itan na saray walad militar,” ipapaliwawa to. Anggaman ontan, say mantultuloy a serbisyo to ed si Jehova et aliwan mainomay a kimey.

Pananalona ed Kaermenan

Saray kaasawaan na lalakin manlilingkor ed militar so mabetbet a nidudunget ed angat na iyalis kayari na pigaran agew a paimano no sikaray kaukolan a mangiba ed kaasawaan da ed sakey a distino ya arawi ed ayaman da. Diad ontan, diad panayam ed agkabisadon kaliberliber, magmainomay so pakalikna na panbukbukor. Balet saya so agnepeg a nagawa. Saraman so manlilingkor ed si Jehova so walaan na bentaha. Anto itan? Unong ed si Kristianon apostol Pablo, satan so “interon panlilimog na agagi.” A natan et manbilang na minilyon, saray Tasi nen Jehova ed 231 a bansa so onkikiwas bilang sakey a baleg a Kristianon pamilya, sakey ya “impanaagi.” Sikara so naromog mo ed inerman a pasen.​—1 Pedro 2:17, NW, paimanod-leksab.

Si Susan, a biglan inmalis ed pasen a panaayaman to, so sinmabi pian manayam ed base na air force ya akadistinoan na asawa to. Lapud balo ni ed pananisia tan dedesdesen na agmananisian asawa to pian ontunda lan mibiang ed Kristianon ministeryo, isasalaysay to: “Siak so tampol ya inmatendi ed lokal iran miting, tan diman et akapiyurongan tan akatongtong ko so pigaran agagin bibii. Petepeteg a nibagak a sayan pililimog so ontutulong ed siak pian makapantultuloy.”

No maminsan say kaermenan so panlalapuan na pakakagonigon. Anggaman kuan, say maong a balita so mangitatarok na panamabiskeg. Si Glenys, sakey ya agin biin taga Inglatera ya akila ed asawa to sanen sikato so nidistino ed biek-taew, inkuanto: “Sanen siak so peteg a nagogonigon, diad ag-iilaloan, sinmulat ed siak so sakey ya akabat ko abayag lan taon sanen wala ak ni ed armada tan inkuan ton sikato so agano nin abautismoan bilang sakey ed saray Tasi nen Jehova. Satan so amaseseg ed siak ed dugan panaon.”

Si Jane, a manbiabiahe a kaiba to so asawa to a mamaarap ed Kenya, so akaimanon saray Kristianon miting so apaneknekan ya importanti pian makapantultuloy ed kimey, anggaman saman so inkundokta ed saray lenguahen agto natalosan. “Kabat ko a kaliktan nen Jehova a wadia ak,” inkuanto. “Siak so kaiba na saray agagik ed espiritual, tan sikaray singa tambal a pampabiskeg. Sikaray angabrasa ed siak, tan aliknak a sikami so sakey a pamilya.”

Si Jane so sakey lambengat ed dakel ed sarayan walad kipapasen ya akadiskobre a sikatoy walaan manaya na espiritual a kakanayon ya agto labat anggan kabat!​—Marcos 10:29, 20.

Mapekder ed Arap na Isusumpa

“Agyo isipen a linmaak dia’n mangiter na kareenan,” so pasakbay nen Jesus. “No ag ingen sakey a kampilan.” (Mateo 10:34) Anto so labay ton ibaga? Anggan diad loob na sakey a pamilya, a say kareenan so nailaloan, nayarin niwala so “sakey a biglan angatan na barang,” so kuan nen A. T. Robertson ed Word Pictures in the New Testament. “Et,” kuan nen Jesus, “saray kakabosol na too sikara’y kaamong to lanlamang.” (Mateo 10:36) Agaylan tua irayan salita sano say sakey ya asawa et sumpa ed katuaan!

Sanen inggapo nen Diane so panaral na Biblia ed saray Tasi nen Jehova, say asawa to, a sakey ya opisyal na air force, so ag-aliketan. Anto so epekto to ed panamaley da? “Saman so singa sakey a bloki na yelo a walad leetan mi,” kuan nen Diane. “Gendat et maliket so panamaley mi. Bigla-biglan sikami so niwawala ed parehon sankaabungan.” No ontan, panon so intalona to? “Say personal a kombiksyon tan determinasyon so peteg a makana, tekep na tulong manlapud si Jehova tan say espiritu to.” Impapuso nen Diane so alimbawa nen propeta Daniel ed Biblia.

Sanen adakep ed Babilonia tan inopresian na tagano ya ag-aawaten na aripen na Dios, si Daniel “ingetma to ed puso to ya agto tilolan so inkasikato ed saray kanen na ari.” On, si Daniel so nanggawa na sakey a maong a desisyon a ninonot ton maong. Pinekderan to ed puso to ya agton balot dutakan so inkasikato diad pangan ed saman a tagano. Agaylan inkakpel so impanengneng to legan a “kinerew to ed principe na saray eunuko ya agto komon tilolan so inkasikato”! Say resulta? Benindisyonan nen Jehova so determinadon talindeg to.​—Daniel 1:8, 9, 17.

Ontan met natan a nayarin say sakey a sumpan asawan laki et kerewen to ed asawa to ya ontundan onatendi ed saray miting ed kongregasyon. Panon so ikiwas to? Aromog nen Jane so inkasikato ed onian kipapasen. Inkuanto: “Agak balot sinmuko ed silong na pananesdes. Kabat ko ya agnayari so mikompromiso. Kaukolan ya ipanengneng ko no panon kaimportanti iray miting ed siak.” Benindisyonan nen Jehova so desisyon to legan a sikato so mantultuloy ya onaatendi.

“Nanggunaetan na asawak a sebelan toak ed iyaatendi ed saray miting, balet satan so agnanbayag,” inkuan nen Glenys. “Siak so siansianin onaatendi. Sano siak so makasempet, no maminsan et siak so papasakitan to, tan no maminsan et sikato so ag-onese-esel.” Ingen, atalonaan to, diad impanpikasin paulit-ulit. Ontan met, duaran mamatatken ed kongregasyon so maparanay ya angipikasi ed sikato, ya amaseseg a tuloy ed sikato pian mantultuloy ya onatendi.​—Santiago 5:13-15; 1 Pedro 2:23.

No maminsan et nayarin desdesen na atagtagey iran opisyal ed militar na asawan laki pian dismayaen so asawa ton manpulong na maong a balita. Nalmoan nen Diane a kaukolan ton linewen ed asawa to no anto iray nepeg ton iyuna. “Siak so akaparaan,” kuanto, “ya awaten iray pansumpalan na mantultuloy kon panpulong.” Agaylan kapara na talindeg na saray apostol! (Gawa 4:29, 31) Anggaman kuan, sikato so maalwar a tuloy ed panagpulong to. Inkuanto: “Siak so angiyuksoy na panduropyo pian mankape tan iyoopresik so libron Katuaan ed amin a wadman.”​—Mateo 10:16; 24:14.

Panagpasakop ya Andian na Panangikompromiso

Anggaman nagogonigon lapud pakakawetwet ed panamaley, saray Kristianon kaasawaan a bibii so onnenengneng ed arapen tan maniilalo ed si Jehova. Saya so ontutulong ed sikaran pansiansiaen so asimbang a panmoria. Susuportaan da so kaasawaan da ed anggaay nayarian da ya anggapo so panangikompromiso ed pananisia ra. Diad panggawa na ontan, tutumboken da so apuyanan a simbawa nen Pedro: “Sikayo’ran asawan bibi-i, toloken yo komon so saray dili’n kaasawaan yo.” (1 Pedro 3:1) Diad The Amplified New Testament, onia so nabasa nipaakar ed apostolikon bilin: “Pauleyan kayo bilang komadua tan mandepende ed sikara, tan iyadapta yo so inkasikayo ed sikara.” Imanoen no panon a tinumbok nen Jane iyan simbawa. “Imbaga ed siak na asawak a say kaliktan kon gawaen so nepeg ya agmakasebel ed karera to,” so inkuanto. “Kanian nanggunaetan kon makaromog na arum a paraan pian natulongan ko.”

Arum a Kristianon asawan bibii so mipapaknan onatendi ed sosyal iran pantitipon ya impakaimbitaan na kaasawaan da. Balet sikaray desididon agbalot mangikompromiso ed pananisia ra. Si Jane so angalay panaon pian itongtong ed asawa to so nipaakar ed saya. Sikato so mapangasin angipaliwawa a sikato so mabulos ya onatendi balet agto kaliktan a say kiwawala to so sengegay pakabaingan to. “Kabat ko a paminsan-minsan et amin a presenti so iilaloan ya onalagey tan mibiang ed toast. Naaralan ko a say pansamba et kanepegan labat nen Jehova, tan say toast so nagkalalo ni nen say basta pangipanengneng na respeto. Amoria na asawak no panon makapabaing so kipapasen, kanian inkuanto: ‘Agka la mimila!’ Siak so tinmulok.”

Si Glenys, diad biek a dapag, so akila ed asawa to ed onman a selebrasyon, balet sikato so mangiimano ed saray opisyal a wala ed kabesira na lamisaan. Sanen anengneng ton sikaray manpaparaan pian man-toast, sikato so makabat ya inmalis a linma ed rest room! On, sarayan bibii so angiyadapta na inkasikara balet agbalot akikompromiso.

‘Analo ya Andian na Salita’

“No paaligwasen ko so dilin abilidad ko bilang asawan bii, naimano na asawak a say katuaan so manguuman ed siak,” ikakatunongan nen Yvonne. Kanian sikato’y nanbasa tan nanbasa lamet ed kapitulo na libron Family life ya atituloan na “A Wife Who Is Dearly Loved.”a “Siak so nikadkaduman nanimano ed materyal ed silong na subtitulon ‘The Weepers, the Naggers’! Balet naimanok a no lalon panggugunaetan ko so mitongtong ed asawak, lalon onuges so kipapasen.” Kaunoran, anggaman kuan, sikato so tinmalona ed impanulong ed asawa to a manlingkor ed si Jehova. Panon? Diad pangiyaaplika ed prinsipyon nidatak ed 1 Pedro 3:1, a saray kaasawaan a lalaki so nayarin ‘napatolok ira ya andi salita.’

Say paraan na pangaasikaso na Kristianon bibii ed saray pamilya ra et baleg so nagawaan pian komendaan so Inkakristiano ed arum. “Nanggunaetan kon say katuaan so makapasagyat anggad nayari,” kuan nen Diane. “Sano siak so onatendi ed saray miting, nalikna na asawak a sikato’y nibibiig a tuloy, kanian nanggunaetan kon bangatan iray ananak a lalon manugalin maabig sano makasabi ed ayaman. Nanggunaetan ko met so nagkalalon pangimano ed sikato sano onsempet kami.” Kalkalnan anguman so awawey na asawa to legan a sikato so onkikiwas ed mapangasin panangasikaso na pamilya to.

Makatulong met iray kaparan ariripen nen Jehova. Isasalaysay nen Jane a nangayagaan nen asawa to so piuulop ed saray misioneron Tasin akabat to ed Kenya. “Sikaray akikaaroan ed sikato tan akintongtong ed sikato nipaakar ed football, tan sikaray maparawes a tuloy. Diad pigaran inkagawa, sikami so naimbitaan ed nanduruman ayaman na misionero para’d panangan.” Saginonor et insalaysay na asawa to: “Ginapoan kon nengnengen so pananisia nen Jane manlapud sigpot a duman punto-de-bista. Saray kakaaro to so matudion tuloy a nakatongtong nipaakar ed nambabangil a tema.” Diad ontan et say asawa nen Diane so anguman na impanmoria to ed katuaan. Sanen say kotsen imamaneho to so aderal, sakey a kalangweran a Tasin laki so tinmulong ed sikato. “Satan so talagan anagyat ed siak,” kuanto.

Siempre, aliwan amin a kaasawaan so ontalona ed katuaan. Anto sirin? Iiter nen Jehova so tulong a makayari ed saray matoor a makapansungdo. (1 Corinto 10:13) Kunsideraen pa so panamaseseg nen Glenys para’d saramay say kipapasen da so mipadpara ed sikato: “Agbalot panduaruwaan a si Jehova so Sakey a nanlapuan na panangasawa tan labay ton saray sanasawa so mansiansian mankasakey. Kanian antokaman so gawaen na asawan laki odino antokaman ya isusumpa so nasagmak mo manlapud saray walad kaliberliber mo, agbalot abuloyan nen Jehova a manirap kayo.” Anggaman say asawa to so agni mandadayew ed si Jehova, say awawey to ed sikato tan ed katuaan so maabig.

‘Mantanem Tekep na Saray Lua; Manani Tekep na Gayaga’

Peteg, sarayan Kristianon bibii so determinadon manlingkor ed si Jehova. No sikayo so walaan na mipadparan kipapasen, gawaen met itan a desisyon yo. Tandaan so simbawa: “Sika nepeg mo a takotan si Jehova a Dios mo; sikato so nepeg mo a panlinkoran; tan dia ed sikato so peketan mo ya agmo aknitan.”​—Deuteronomio 10:20.

“Say onla tan mannangis a sankatarok to so mabli a bukel, a itatanem, andi duarua ya onsempet lamet naani a magaygayaga, a sankatarok to so pinongopongo to,” iyaabawag na salmista. (Salmo 126:6) “Talagan nipatedter yo so dakel a lua legan a panggugunaetan yon ipanengneng ed kapareha yo so katuaan, balanglan diad gawa odino diad salita,” binidbir na sakey a Tasin bii. “Balet diad kaunoran sika so onkelyaw a sigagayaga lapud anggaman agto awaten so katuaan et bebendisyonan kayo nen Jehova lapud sagpot yo.”

Amin a sitotoor a manlilingkor ed si Jehova anggaman ed isusumpa ed ayaman so makaromog na peteg a komendasyon. Kanepegan da so suporta tan aro. Komon ta napansiansia ra so agmikompromison talindeg, a determinadon manlingkor ed si Jehova!

[Paimano ed leksab]

[Litrato ed pahina 28]

Say sipipikasin panagaral so mamabiskeg ed Kristianon determinasyon