Report na Saray Manangiyabawag na Panarian
Tinumbok To so Nipasal-ed-Biblian Konsiensia To
NAMPIKASI so Ari na Israel a si David para’d tulong nen Jehova sanen inkuanton: “Balet no nipaakar ed siak, manakar ak ed inkatunong ko: dondon moak, tan mapangasi ka ed siak.” (Salmo 26:11) Talagan sikato so pinaboran na Dios lapud impamasiansia to na katooran to. Binendisyonan met nen Jehova si Jesus lapud impanggawa to na linawa na mangatatawen ya Ama to, tan binendisyonan To so sakey a tobonbalo diad Colombia ya anumbok ed nipasal-ed-Biblian konsiensia to tan determinadon manggawa na linaway Dios. Isasalaysay na sayan malangwer a laki:
“Sanen ginapoan koy nanaral na Biblia ed saray Tasi nen Jehova, siak so estudyante ed sakey a Katolikon eskuelaan. Anggaman ontan, gogonigonen ak na konsiensiak sano onatendi ak ed Misa, kanian inasinggeran ko so prinsipal na eskuelaan (a sakey a pari), say guidance counselor, tan say monitor na grupo mi pian kerewen a na-exempt ed iyaatendi ed Misa. Anggaman siak so na-excuse, sinali na pigara a piliten ak ya onatendi. Say desdes so pinmalalo kayari inkabautismoan ko bilang sakey ed saray Tasi nen Jehova. Pinagyaw ak na amak a pataynanen no siak so paekalen na eskuelaan. Plano nen amak a panaralen ak ed unibersidad pian nawalaan ak na propesyonal a karera.
“Aminpigan amasakbay so prinsipal nipaakar ed isaew na siopaman a ngilinan iray obligasyon bilang Katoliko. Sanen sinmabi panaon na ununan Misa ed taon, inmamot ak anggad asumpal itan. Insan inikdan ko so maestrok (sakey a pari) na sakey a kopya na brosyur ya School and Jehovah’s Witnesses tan imbagak ed sikato a bilang sakey ed Tastasi nen Jehova, agko nayarian so onatendi ed Misa. Inkuanto: ‘Magmaong no gapoan mo lay mananap na alisan mon eskuelaan.’ Amtak a say pakaekal ko manlapud eskuelaan et mankabaliksan na pamataynan nen amak ed siak. Anggaman ontan, siak so nampikasi ed si Jehova tan nantultuloy a mangiter na nagnap a panagtasi ed saray kaeskuelak.
“Asabi bakasyon. Insan, ompawil pian maneskuela kayari bakasyon, saman so panaon lamet na Misa. Say prinsipal tan arum niran pari so walad paway na kapilya, ya akaparaan ya ondengel na panagkumpisar. Ngalngali ak atalonaan na takot. Linmoob ak tan inmirung, nannonot ak, ‘Antoy gagawaen ko dia? Si Jehova so Dios ko. Agnayarin siak so magmaliw a payakot tan sikatoy iburi. Agko nayarian a sikatoy paermenen. Agto ak kaindanan.’ Nampikasi ak para’d tepel. Insan, pinmaway ak ed kapilya tan akilinya ed saray mikumpisar. Sanen akaarap ak la ed prinsipal, imbagak ed sikato: ‘Sir, agak mankumpisar.’ Inkuanto: ‘Nononoten ko lan ontan so gawaen mo.’ Imbagak ed sikato ya akaparaan ak ed antokaman a pansumpalan ta nagonigon so konsiensiak no mibiang ak ed Misa. Agko nayarin sumlangen so naaralan ko manlapud Biblia.
“Ninmengneng ed siak, inmimis, insan inkuanton: ‘Pandinayewan taka. Amin yon Tastasi so makanepegan na admirasyon. Ta diad sika et iyuunam so Dios, tan akaparaan kan ontulok ed saray ganggan antokaman so nagawa. Mantultuloy ka ed satan. Maong so gagawaen mo. Komon ta amin a Katoliko so singa sika, diad pangipanengneng na ontan a seseg, say aro ed Dios. Manlapulad natan, sika so exempted ed pibibiang ed saray relihyoson serbisyo.’ Agaylay liket ko! Bibindesyonan nen Jehova so determinasyon ko ya ontulok ed nipasal-ed-Biblian konsiensiak.
“Diad ontumbok ya agew inkuan na prinsipal ed saray estudyante: ‘Manunaan iray arum a relihyon nen say relihyon tayo. Akin ya aliwa tayon singa sikara a maseseg, a walaay aralem a panangaro ed Dios tan say pilalek a manlingkor ed sikaton manuna nen say siopaman? Saya so bengatlan nepeg a walad kapusoan tayo.’
“Kaunoran say rector so niyalis ed Roma, tan say balon prinsipal so angibaliwala ed agko pibibiang. Inmalis so amak manlapud abung, ya intilak to ak a bulos ed pakadampot na kalat kon sigpot-panaon a ministeryo kagraduar.”
Binendisyonan nen Jehova iyan kalangweran ya anumbok ed nipasal-ed-Biblian konsiensia to. Sikato met so mipadparan mamendisyon ed amin na saramay manggawa ed linawa to.—Uliran 3:5, 6.