Say Sankabalgan a Toon Nambilay ed Kapiganman

Kapitulo 3

Inyanak so Manangiparaan na Dalan

Ngalngali lan mananak si Elizabeth. Diad sarayan linmabas a taloran bulan, si Maria so kaamong to. Balet natan et panaon la pian manpatanir si Maria tan manbiahe na andukey a papawil ed Nasaret. Diad loob na nayarin anemiran bulan et sikato met so mananak.

Agnambayag kayari na inyalis nen Maria, si Elizabeth so nan-anák. Agaylan liket so niwala sanen sikatoy matalonan akapan-anák tan si Elizabeth tan say ugaw et wala ed maabig a kipapasen! Sanen ipanengneng nen Elizabeth so samay melag ya ugaw ed saray kakaabay tan kakanayon to, sikaran amin so akiliket ed sikato.

Unong ed Ganggan na Dios, kayari na waloran agew kayari inkianak na sakey ya ugaw a laki ed Israel, nepeg a nagalsiman. Diad sayan inkagawa et binmisita iray kakaaro tan kakanayon. Imbaga da a say ngaran na ugaw so nepeg ya itumbok ed ngaran na ama to, si Zacarias. Balet inmebat si Elizabeth. “Aliwan ontan!” inkuanto, “noagta sikato so tawagen a Juan.” Nonoten, satan so ngaran ya imbaga nen anghel Gabriel a nepeg ya ingaran ed ugaw.

Anggaman kuan, saray kakaaro ra so nanprotesta: “Anggapo ed saray kakanayon mo so tatawagen ed ontan a ngaran.” Insan, diad panamegley na saray senyas, tinepet da no anto so labay na ama ya itawag ed anak to. Si Zacarias, kasumpal a sikatoy kinmerew na napansulatan, diad inkikelawan na amin, so nansulat: “Say ngaran to so Juan.”

Lapud satan, mamilagron nipawil so abilidad nen Zacarias a mansalita. Nanonotan mo a naandi so abilidad ton mansalita sanen sikato so ag-anisia ed impangipakabat na anghel a si Elizabeth so nawalaan na anak. Bueno, sanen si Zacarias so akasalita la, mankelaw a tuloy so amin a kakaabay tan kuanda ed inkasikaran-dili: “Anton talaga so pagmaliwan na sayan ugaw?”

Si Zacarias natan so napno na masanton espiritu, tan sikatoy maliket ya angibaga: “Nadayew si Jehova a Dios na Israel, lapud inlengay to so imano to tan nanggawa na pananondon ed baley to. Tan angitagey ed sikatayo na sakey a saklor na kilalaban ed abung nen David ya aripen to.” Sayan “saklor na kilalaban,” siempre, et say Katawan ya Jesus, ya iyanak ni labat. Diad panamegley to, imbaga nen Zacarias, say Dios so “mangiter ed sikatayo, kasumpal a sikatayo so iliktar ed saray kalaban tayo, na pribilihyo ed anggapoy-takot a panangiyapay na sagradon serbisyo ed sikato a walaan na katooran tan kaptekan ed arapan to diad amin na saray agew tayo.”

Insan si Zacarias so angipasakbay nipaakar ed anak to, si Juan: “Balet no nipaakar ed sika, melag ya ugaw, tawagen ka a sakey a propeta na Sankatageyan, lapud sika so onlad unaan ed arapan nen Jehova pian iprepara so saray dalan to, pian nipakabat so kilalaban ed baley to diad panamegley na panamirdona na saray kasalanan da, lapud matamoy a panangasi na Dios tayo. Nisengeg ed sayan panangasi et say ipepelnak na agew manlapud tagey so ombisita ed sikatayo, pian liwawaan so saramay akayurong ed kabilungetan tan aninoy patey, pian iwanwan so saray sali tayo ed dalan na kareenan.”

Diad sayan panaon si Maria, a diad saman a panaon et agni-akiasawa, so akasempet ed sikara ed Nasaret. Anto kasi so nagawa ed sikato sano napatnagan lan sikato so malokon? Lucas 1:56-80; Levitico 12:2, 3.

▪ Kaunongay katatken nen Juan ed kinen Jesus?

▪ Antoran bengatla so agawa sanen si Juan so waloran agew ed edad?

▪ Panon ya inlengay na Dios so imano to ed baley to?

▪ Anton kimey so impasakbay a gawaen nen Juan?