Say Sankabalgan a Toon Nambilay ed Kapiganman

Kapitulo 2

Apagalangan Sakbay a Niyanak

Kayarin imbaga na anghel Gabriel ed marikit a si Maria a sikato so mananak na sakey ya ugaw a laki a magmaliw a maandon ari, intepet nen Maria: “Panon iyan nagawa, lapud siak so anggapoy pirerelasyonan ed sekso ed sakey a laki?”

“Onleksab ed sika so masanton espiritu,” kuan nen Gabriel, “tan tarongan ka na pakapanyari na Sankatageyan. Lapud satan a rason met et tawagen so iyanak a masanto, Anak na Dios.”

Pian tulongan a manisia si Maria ed mensahe to, intuloy nen Gabriel: “Et, nia! si Elizabeth a kanayon mo so nanlokon met na sakey ya anak a laki, ed inkatatken to, tan saya so komanem a bulan to, say biin tatawagen a lepes; lapud anggapo so sinalita na Dios ya ag-nagawa.”

Inawat nen Maria so salita nen Gabriel. Tan anto so inyebat to? “Nia! say aripen a bii nen Jehova!” so inkelyaw to. “Nagawa komon ed siak unong ed deklarasyon mo.”

Ag-abayag kaalis nen Gabriel, nanparaan si Maria tan linma pian onbisita ed kinen Elizabeth, a kaamong na asawa to, si Zacarias, diad mapokdol a dalin na Judea. Manlapud abung nen Maria ed Nasaret, saya so sakey ya andukey a biyahe a nayarin mangusar na talora odino apatiran agew.

Sanen si Maria so diad kaunoran et akasabi ed abung nen Zacarias, sikato so linmoob tan angiter na panangibano. Diad saman a bekta, si Elizabeth so napno na masanton espiritu, tan imbaga to ed si Maria: “Abendisyonan ka ed saray bibii, tan abendisyonan so bunga na panag-anákan mo! Kanian panon a sayan pribilihyo so niwala ed siak, a say ina na Katawan ko so linma dia ed siak? Ta nia! sanen say tanol na panangibanom so sinmabi ed layag ko, say ugaw a wala ed panag-anákan ko so linmukso a walaan na baleg a liket.”

Diad impakadngel ed saya, si Maria so kinmiwas tekep na impapuson pisasalamat: “Itatandoro na kamarerwak si Jehova, tan nangayaga so espirituk ed Dios a Manangilaban ko; lapud ninengneng to so kaabebaan na aripen ton bii. Ta nia! manlapud natan amin na saray kailalakan ingaran da ak na maliket; ta say makapanyarin Sakey so nanggawa para’d siak na ankakabaleg a bengatla.” Ingen, anggaman diad pabor ya impanengneng ed sikato, impaarap nen Maria so amin a kagalangan ed Dios. “Masanto so ngaran to,” imbaga to, “tan ed kailalakan tan kailalakan et say panangasi to so wala ed saray antakot ed sikato.”

Intultuloy nen Maria so panangidayew ed Dios diad pinuyanan a mapropetikon kanta, a mangibabaga: “Sikato so angipatnag na pakapanyari ed taklay to; binuyak to so saray mapangta ed kanonotan na kapusoan da. Inekal to so saray prinsipe ed saray trono ra, et inatagey to so saray mapaabeba; pinesel to so saray narasan na maabig a bengabengatla tan pinataynan to so saray mayayaman a paoy-paoy. Tinulongan to so Israel ya aripen to, pian nanonotan to so panangasi, unong a sinalita to ed saray atateng tayo, ed Abraham tan say bini to, ed ando lan ando.”

Si Maria so nansiansia kinen Elizabeth na ngalngali taloran bulan, tan andi-duaruwan sikato so akatulong na baleg legan a si Elizabeth so ondadalan ed saray kasampotan a simba na panlolokon to. Satan so peteg a maabig a sarayan duaran matoor a bibii, a parehon nanlokon diad panamegley na tulong na Dios, so nankaiba ed sayan abendisyonan a panaon na bilay da!

Kasin naimano yo so galang ya inter ed si Jesus anggaman sakbay a sikato so iyanak? Sikato so tinawag nen Elizabeth a “Katawan ko,” tan say agtoni-inyanak ya ugaw so inmukso ed baleg a gayaga nen inmunan inyapireng nen Maria. Diad biek a dapag, saray arum so aliwan tanton walaan na panangigalang ed si Maria tan ed ilolokon ton ugaw, a singa nanengneng tayo. Lucas 1:26-56.

▪ Anto so imbaga nen Gabriel pian tulongan si Maria a natalosan no panon a sikato so magmaliw a malokon?

▪ Panon a si Jesus so pinagalangan sakbay ni a sikatoy iyanak?

▪ Anto so imbaga nen Maria diad sakey a mapropetikon kanta ed panangidayew ed Dios?

▪ Panon kabayag a nansiansia si Maria ed kinen Elizabeth, tan akin a matukoy a si Maria so mansiansian kaiba nen Elizabeth ed sayan panaon?