Say Sankabalgan a Toon Nambilay ed Kapiganman

Kapitulo 1

Saray Mensahe a Nanlapud Tawen

Say interon Biblia so, diad tua, sakey a mensahen nanlapu ed tawen, ya intarok na mangatatawen ya Ama tayo para ed kibangatan tayo. Anggaman kuan, duaran espesyal a mensahe so initer ngalngali 2,000 a taon la so apalabas diad panamegley na sakey ya anghel ya “akaalagey ya asingger ed arapan na Dios.” Say ngaran to et Gabriel. Aralen tayo so saray kipapasen na sarayan duaran importanten imbisita ed dalin.

Say taon so 3 K.K.P. Diad kapokdolan na Judea, nayarin aliwan tanton arawi manlapud Jerusalem, manaayam so sakey a saserdote nen Jehova a manngaran na Zacarias. Sikato so matatken la, tan ontan met ed kinen asawa to, si Elizabeth. Tan sikaray anggapoy anak. Gagawaen nen Zacarias ed saman so serbisyo to bilang saserdote ed templo na Dios ed Jerusalem. Bigla-bigla, pinmayawar si Gabriel ed bandad kawanan na altar na inciénso.

Mankebbiew a tuloy si Zacarias. Balet pinakepa nen Gabriel so takot to, ya inkuanto, “Agka ontatakot, Zacarias, lapud say ey-ey mo so nadngel tekep na panangabobon, tan say asawam a si Elizabeth so magmaliw ya ina na sakey ya anak a laki ed sika, tan tawagen mo so ngaran to a Juan.” Intultuloy ya imbaga nen Gabriel a si Juan “so magmaliw a baleg ed arapan nen Jehova” tan pian sikatoy “mangiparaan para’d si Jehova na sakey a baley ya akaparaan.”

Anggaman ontan, agmakapanisia si Zacarias. Singano imposiblin tuloy a sikato tan si Elizabeth so nawalaan ni na anak ed edad da. Kanian imbaga ed sikato nen Gabriel: “Naemel ka tan agka makasalita angga ed agew a kasumpal na saraya a bengatla, lapu ed agmo sinisia so saray salitak.”

Bueno, ed kaleganan, saray totoo ed paway so mankelaw no akin a manbabayag si Zacarias ed templo. Nen sikato so pinmaway a siansia, sikato so agmakasalita noagta manggagawa labat na senyas diad panamegley na saray lima to, tan amoria ra a sikatoy akanengneng na bengatlan makapakelaw.

Kayari na serbisyo nen Zacarias ed templo, sikato so sinmempet la. Tan ag-abayag kayari na saya et saman so peteg ya agawa​—si Elizabeth so nanlukon! Legan ya aalagden to so ipaway na anak to, nansiansia si Elizabeth ed abung da ya arawi ed saray totoo diad loob na limaran bulan.

Diad saginonor et pinmayawar lamet si Gabriel. Tan siopa so akitongtongan to? Saya so diad sakey a marikit a manngaran na Maria a manlapud syudad na Nasaret. Anton mensahe so iter to ed sayan pankanawnawa? Ondengel! “Akarumog ka na pabor ed Dios,” so imbaga nen Gabriel ed si Maria. “Nia! manlokon ka diad panag-anákan mo tan mangiyának ka na sakey a laki, tan say ngaran ya itawag mo ed sikato et Jesus.” Inyarum ni nen Gabriel: “Sayan sakey so magmaliw a baleg tan tawagen ya Anak na Sankatageyan;. . . tan sikato so manari ed abung nen Jacob ed ando lan ando, tan ag-mangangga so panarian to.”

Maseguro tayon alikna nen Gabriel a sakey a pribilihyo ya iter irayan mensahe. Tan legan a lalon babasaen tayo so nipaakar ed si Juan tan si Jesus, lalo tayon nalinewan no akin a sarayan mensahen manlapud tawen so importanten tuloy. 2 Timoteo 3:16; Lucas 1:5-33.

▪ Anton duaran importanten mensahe so inter manlapud tawen?

▪ Siopa so angiter na mensahe, tan siopa so angiteran na saratan?

▪ Akin a saray mensahe so mairap a tuloy a panisiaan?