Naapag-apag ya Iglesia​—Panon Kauges?

“SINGA sakey a baleg tan akebbiew a pamilya, a manaayam ed nagegeray a daan ya abung a say arap a pader so biglan akusbo, singano walay pansasangsangan a nagagawa ed amin a kuarto​—a saray ilalak nen Jesus a walaay ipapaspas iran tamborin so oneeyag ed eleganti iran Anglo-Katolikon homoseksual ya akasulong na andeket a sida.”​—The Sunday Times, London, Abril 11, 1993.

Sayan pamilya et say Church of England. Say pansasangsangan et nipaakar ed panangadmiti ed bibii diad inkapari. Say malinew ya impangiretrato ed agaylan agpantutunosan so onaaplika met ed amin a Kakristianoan. Legan a saray patriarka na Iglesia Ortodokso tan say papa so mangokondena ed desisyon a pangiyabuloy ed bibiin magmaliw a pari, say interamentin resulta, unong ed konklusyon na sakey a report et “say panpirawat na pankakasakey lamet na nakekeraan a kabiangan na Kakristianoan so lalon imposibli nen kapiganman.”

Panon Kaseryoso so Inkaapag-apag na Iglesia?

Unong a nabasa tayo ed Mateo 7:21, inkuan nen Jesu-Kristo a dakel so mankuan a walaan na pananisia ed sikato bilang Katawan balet siansian onsasaew a ‘mangunor ed linawa na Ama to.’ Onia so inkuan na magasin a Maclean: “Saray managbasa na Mateo a manaanap na kilalaban so paulyanan la lapud kawewetwet nipaakar ed no anton talaga so linawa na Dios, sano saray Kristiano, tan saray iglesia ra, so ontanlan mandumaan ed satan a tepet.” Kayari impan-surbey ed saray taga Canada, anampot iya a wala so “baleg a pandumaan ed saray sisisiaen tan agagamil na saray Kristiano ed Canada​—lalon nin pandumaan ed saray membro na antokaman a denominasyon, diad tua, nen say diad baetan na saray denominasyon a mismo.”

Unong ed surbey to, 91 porsienton Katoliko so mipakna ed pangusar na artipisyal a birth control anggaman satan so isesebel na iglesia ra; 78 porsiento so manisip a saray bibii so nepeg ya abuloyan a magmaliw a papari; tan 41 porsiento so miabobon ed aborsyon “ed pigaran sirkumstansya.” Say agpanpapaknaan ed limog na saray denominasyon nipaakar ed “dakel a teolohikon tepetepet,” kuan na Maclean, “so mangipapabitar ed saray inkaapag-apag a sengegay pansisian na manuna iran iglesia.”

Doblen Estandarte

Walay doblen estandarte, ontan met ed mansusumlangan iran estandarte nipaakar ed moral. Pigaran totoo so mankuan a mangitatandoro ed saray prinsipyo na Biblia, balet say arum so mangipupulisay ed satan. Kasin say “kasal” a gagawaen para’d duaran Tomboy ed Metropolitan Church na Toronto so mitunosan ed linawa na Dios? Malinew ya ontan so padesir na saray mibibiang ed satan. “Labay min selebraan so panangaro mi a parungtalan tan ed imaton na Dios,” inkuan da.

Sakey a kolumnista so tinmepet no panon a say “sakey ya arsobispon Katoliko a mantutumbokan so reklamon nipaarap ed sikato, so angiyalis ed saray parin pedophile ed sananey a simbaan a lalon dakel iray kalangweran a sakristan.” Unong ed say parin Andrew Greely, manlapu ed 2,000 ya anggad 4,000 a papari so nayarin angabuso ed 100,000 a biktiman menor de edad, a mabetbet ya anggapoy aksion ed saratan.

Say agnankakasakey ya iglesia so mamawala na agnankakasakey a totoo. Diad Balkans, sisiaen na namparan taga Serbia tan Croatia a “Kristianos” a si Kristo so walad sikara ed “makatunongan” a bakal da. Dakel so akasulong na krusipiho ed panlalaban; say sakey, ya unong ed report et “naynay ton sankatangal so krusipiho sano seryoson tuloy so laban.”

“Angapo so Inkaapag-apag ed Limog Yo”

Tua, ya iyaabuloy na Biblia so pigaran pamaakaran unong ed konsiensia, balet saya so nepeg ya agmangiyabuloy ed ontan a pansisian. Malinew ya imbaga nen apostol Pablo: “Salitaen yon amin tan onkiwas . . . ed panpapakna, tan . . . anggapo so inkaapag-apag ed limog yo.”​—1 Corinto 1:10, NW; Efeso 4:15, 16.

Say matuan panusisa ed “Inkakristiano” ed ngalngali duan libon taon kayari impangisulat nen apostol Pablo ed saraman a salita so mamalesa na pigaran seryoson tuloy iran tepet. Akin a “saray Kristiano” so ontanlan naapag-apag? Kasin say ontan a naapag-apag ya iglesia so makapansiansia? Kasin niwala ni so sakey a mankakasakey a Kakristianoan? Kunsideraen na ontumbok ya artikulo irayan tepet.

[Litrato ed pahina 3]

Saray demostrasyon na papari sumpad panagpaekal

[Credit Line]

Apis tan tagey: Eleftherios/Sipa Press