Naapag-apag ya Iglesia​—Kasin Satan so Makapansiansia?

“AMIN a mankuan a walaan na manangiliktar a katuaan nen Kristo so kabiangan na nanengneng ya Iglesia. Saray inkaapag-apag na Kakristianoan​—ed baetan na Sagur tan Bukig, tan ed baetan na Roma tan saray membro na iglesia na Repormasyon—​so inkaapag-apag ed loob na saksakey ya Iglesia.” (Christians in Communion) Ontan so panmoria na sakey ya autor ed Inkakristiano​—bilang sakey a malaknab ya inkayat na pamilya na saray relihyon, ya amin da et mankuan a walaan na sakey a nengneng na pananisia ed Jesu-Kristo.

Anggaman ontan, satan so sakey a naapag-apag a pamilya, a walaan na mansusumlangan iran sisiaen tan estandarte ed walna. “Say kaplesan a panaon ya Inkakristiano . . . so walaan na mas abeba iran estandarte para’d pagmaliw a membro ed iglesia nen say ilugan ed bus,” so kuan na sakey a manag-imaton. Sirin, panon tayon surien so espiritual a kipapasen na saya? Onia so konklusyon na Katolikon obispo a si Basil Butler: “Say naapag-apag ya Inkakristiano so talagan walaay graben sakit.” (The Church and Unity) Panon so inggapo na sakit? Kasin walay ilalon kipawil ed gendat?

“Say Too na Kaugsan”

Impasakbay nen apostol Pablo ya onlesa so inkaapag-apag. Diad saray Kristiano ed Tesalonica a manisian asingger la so kiwawala nen Kristo, insulat to: “Ag kayo komon patitilaan ed angan siopaman; ta ag ni onsabi [agew nen Jehova], no ag say onsabi ya onona so kapelag ed kasalanan, tan onpatnag so too na kasalanan [kaugsan, NW], say anak na kibabalang.”​—2 Tesalonica 2:3.

Sayan “too na kaugsan” so angigapo na apostasya tan rebelyon ed Kristianon kongregasyon. Sikato so siopa? Aliwan siopaman ya indibidual a too balet imbes, say kleron klase na Kakristianoan. Sayan klase so angitandoro ed inkasikato ed labas na apostatan kongregasyon, tampol kayari impatey na saray apostol nen Jesus, tan diad kaunoran et angibangat na pagano iran pilosopya, a singa say Trinidad tan say ag-ompatey a kamarerwa na too. (Gawa 20:29, 30; 2 Pedro 2:1-3) Singa makapatey a virus, saya so angimpikta ed mankuan a Kristianon kongregasyon na saray ideyan pinuyanan na demonyo ya agnipaliis a nipaarap ed agpankakasakey.​—Galacia 5:7-10.

Say inkaalisan so ginmapo la ed agew nen apostol Pablo. Insulat to: “Ta say misterio na inkaandi tulong ongagawa la: wala so saksakey labat natan a manebel, anga ed kaekal to ed dalan.” (2 Tesalonica 2:7) Saray apostol so kinmiwas bilang sakey a babeng ed samal na apostasya. Sanen naandi la so manamakasakey ya impluensya ra, say agnapokpokan ya apostasya so kinmayat a singa gangrena.​—1 Timoteo 4:1-3; 2 Timoteo 2:16-18.

Saray aktibidad na sayan “too na kaugsan” so ag-onkekesay. Diad agano nin report nipaakar ed “sakey ya iglesian manasagmak na agaylan seksual tan teolohikan irap,” inaon so reklamo na sakey a pangulon diakono na Church of England: “Saray proponi na klero ya agmirelasyonan ed agda asawa so ipupulisay. Inordinaan iray mangaagamil na homoseksualidad. Ginawa ran maong so mauges tan say mauges so maong.”​—The Sunday Times Magazine, London, Nobyembre 22, 1992.

Saray Trigo tan Zizañas

Si Jesu-Kristo a mismo so angibangat a say tuan Inkakristiano so naandin magano ed eksena. Inkuanto a say kiletneg na Kristianon kongregasyon so singa sakey a toon angisibwag na maong a bini ed uma to. Balet, inkuan nen Jesus, “say kabosol to linma tan angitanem na zizañas ya insamot to’d saray trigo.” Sanen tinepet na ariripen to no kasin nepeg dan bagoten so zizañas, inkuan na akankien na uma: “Andi; ompan sano tiponen yo so saray zizañas, napibagot yo ray trigo.” Panon kabayag a mantultuloy iyan panlalaok na trigo tan zizañas? Inkuan na akankien na uma: “Paulian iran ontobo a bansag ya anga’d panani.”​—Mateo 13:25, 29, 30.

Anggad “panani,” odino panaon na panangibiig legan na kaunoran iran agew na “[sistema] na bengabengatla,” saray alig-alig a Kristiano so tinmubon kabansag na tuan Kristianos. (Mateo 28:20) Inusar nen Satanas a Diablo iray apostata ta pian mamawala na abulok tan naapag-apag ya alig-alig a Kristianon kongregasyon. (Mateo 13:36-39) Amawala ira na makapabaing a palson nengneng na puron Inkakristiano. (2 Corinto 11:3, 13-15; Colosas 2:8) Legan a naapag-apag so iglesia ed ilalabas na nilasus taon, lalon inmirap so pakabidbir ed saray tuan Kristiano.

Balo Iran Grupo

Diad lalon modernon panaon, kuan na The Testing of the Churches​—1932-1982, “[b]alo iran grupo so linmesa, nagkalautla so karismatikon pakurang, a mangidadanet ed personal a pananisia tan eksperiensia.” Mapatpatnag, momoriaen na arum so kiyanak lamet, karismatiko iran pakurang a bilang saray tanda na espiritual ya inyabig imbes a balo iran grupo. Alimbawa, say Northern Ireland so akaeksperiensia na ontan ya inyemwas lamet ed saray taon na 1850. Linmesa iray baleg a panilalo. Sinaglawi na sakey a report so nipaakar ed “fraternal a pankakasakey . . . ed limog na saray Presbetaryano, Wesleyan, tan Independienti iran ministro” tan inkuan ya “inagew-agew et walaray balon report nipaakar ed saray trance, panugip, pansingawey, kugip tan saray milagro.”​—Religious Revivals.

Minoria na dakel irayan dramatikon panangipatnag a bilang ebidensya na kimey na espiritu na Dios pian bangonen lamet so iglesia to. “Say iglesia na Dios,” kuan na sakey a manag-imaton, “diad sankaekselintian a pantalos a saya so nibangon-lamet ed sarayan distrito.” Anggaman ontan, anggan sayan partikular ya impamangon-lamet so ibabalita bilang “sakey a magloria tan anggapo ni kaparan panaon ed relihyoson awaran na Ulster,” saya tan arum niran inbangon-lamet a singa saya so ag-amawala na relihyoson pankakasakey ed limog na saramay mankuan a niyanak-lamet ed espiritual.

Isuppiat na saratan a sikaray mankakasakey ed sanka-importantian tan manuna iran pamaakaran. Balet saya met lanlamang ya argumento so uusaren na nakekeraan a kabiangan na Kakristianoan, a mangikakatunongan a “say mamapakasakey ed saray Kristiano so mas importanti nen saray bengatlan siansian mangaapag-apag ed sikara.” (The Church and Unity) Bibidbiren na Kakristianoan: “Say manunan pankakasakey mi a singa met ed amin a kapara miran Kristiano so nilamot ed bautismo mi ed Kristo.” (Christians in Communion) Anggaman ontan, say pangibaga a saray grupo et ag-importanti lapud saksakey a pananisia ed si Jesus so singa pangibagan say kanser so agmet grabe basta no say pusom so mabiskeg.

Say kapetegan et saratan a modernon relihyoson pakurang so lalon amawetwet tan amawala na espiritual ya anarkiya legan a saray makaingganyon managbangat so manitipon na saray patumbok dan dili. Sikara di James Jones tan David Koresh so agano niran alimbawa na espiritual a pangulo ya amalikdo ed nilibo. (Mateo 15:14) Sakey a ministron Baptist so manunaan a membro na Ku Klux Klan. Isisiglaot to so kampanya to para’d inkasupremo na saray amputi ed impamangon-lamet na relihyon tan kuanto a saramay mibibiang ed satan so “naikdan na biskeg na madibinon panangiwanwan, inikdan na biskeg na linawa na Samay inatey ed Kalbaryo [Jesu-Kristo].”

Komusta met iray ipapasen a milagro, saray makapanyarin gawa, tan saray tandan ginawa diad ngaran nen Jesus? Tandaan so mabiskeg a pasakbay nen Jesu-Kristo ya, aliwan saramay basta mangibabagan “Katawan, Katawan” so makagamor na panangabobon to, balet, imbes, ‘saramay manguunor ed linawa na Ama to.’ Dakel natan so agda anggan amta so ngaran na Ama to, Jehova. Impasakbay nen Jesus so nipaakar ed saramay ‘mamapaway na saray demonio ed ngaran to, tan manggawa na makapakelaw iran gawa’ tan ingen et sikaray magmaliw a ‘managgaway kaugsan.’​—Mateo 7:21-23.

“Ompaway Kayo ed Sikato, Baley Ko”

Anto so ilalo ed katambal na mansasakit a Kakristianoan? Samsamet. No ontan, kasin tumboken tayo so simbawa na obispon Katoliko a si Butler, a “mimembro [ed iglesia] ya anggapoy kuskos-balungos tan tulongan tayo itan ed mantultuloy a ‘panaglinis’ to ed mismon leet na saray membro to”? Andi! Say naapag-apag tan nansisian a Kakristianoan so agmakapansiansia. (Marcos 3:24, 25) Sikato so kabiangan na imperyo ed mundo na palson relihyon a tatawagen a Babilonia a Baleg. (Apocalipsis 18:2, 3) Sayan makasalanan ed dalan relihyoson sistema so nipapaarap ed manasingger lan kadederal ed lima na Dios.

Ag-isusuheri na Biblia a saray tuan Kristiano so mansiansia ed loob na sayan abulok a relihyoson organisasyon tan sikatoy panggunaetan a repormaen manlapud loob. Imbes, saya so manisimbawa: “Ompaway kayo ed sikato, baley ko, pian ag kayo nalanor ed saray kasalanan to, tan ag kayo manlikna ed saray bakbak to. Ta saray kasalanan to sinmabi ra anga ed tawen, tan say Dios anonotan to so kaugsan to.”​—Apocalipsis 18:4, 5.

“Ompaway” a mamaarap ed iner? Tandaan, insipan nen Jesus a diad panaon na panani, saray tuan Kristiano so natipon lamet ed sankamundoan a pankakasakey. Impropesiya met nen propetan Miqueas so ontan a pantitipon-lamet ed sarayan salita: “Sankatipon a . . . singa sakey a polok ed pegley na pankabkaban da.” (Miqueas 2:12) Kasin nagagawa la iya?

On! Natitipon la natan iray tuan Kristiano ed nankakasakey ya impanaagi ed sankadalinan. Siopara? Sikaray Kristianon kongregasyon na Tastasi nen Jehova, a nankakasakey a mangiyaabawag na maong a balita nipaakar ed Panarian na Dios ed 231 a daldalin. Ipupulisay da so manangapag iran bangat na Kakristianoan tan panggugunaetan dan dayewen so Dios unong ed katuaan ed Salita to.​—Juan 8:31, 32; 17:17.

Sikayo so ampetapetang ya imbitaan a mitongtong ed sikara. No labay yo nin naamtaan so nagkalalo nipaakar ed saray Tasi nen Jehova, ipangasin miabet ed sikara diad lokal odino diad panamegley na matukoy ya address ed pahina 2 na sayan magasin.

[Litrato ed pahina 7]

“Say Dios anonotan to so kaugsan to”