Dinan a Dulang so Katataganoan Yo?
“Ag yo nayari minabang ed dulang na Katawan [Jehova, NW], tan say dulang na saray demonios.”—1 CORINTO 10:21.
1. Antoran dulang so intarya ed arap tayo, tan anton pasakbay so inter nen apostol Pablo nipaakar ed saratan?
SARAYAN impuyan a salita nen apostol Pablo so mangipapanengneng a duaran piguratibon dulang so akatarya ed arap na katooan. Kada dulang so naamtaan diad panamegley na klase na simbolikon taganon akatarya diman, tan amin tayo so mangakan ed dinanman ed saratan a dua. Anggaman ontan, no kaliktan tayon paliketen so Dios, sikatayo so agnayarin mangan ed dulang to tan insan mantimtim na tagano ed dulang na saray demonyo. Impasakbay nen apostol Pablo: “Ta saray bengatla ya ibagat na saray Gentiles, ibagat da ed saray demonios, ya aliwan dia ed Dios: tan ag ko labay komon a minabang kayo ed saray demonios. Ag yo nayarian so oninum ed copa na Katawan [Jehova, NW], tan say copa na saray demonios: ag yo nayari minabang ed dulang na Katawan [Jehova, NW], tan say dulang na saray demonios.”—1 Corinto 10:20, 21.
2. (a) Anton dulang nen Jehova so wala ed saray agew na kadaanan ya Israel, tan siopa so akibiang ed saray bagat na komonion? (b) Anto so kabaliksan natan na pangan ed dulang nen Jehova?
2 Ipapanonot ed sikatayo na saray salita nen Pablo iray bagat a pankomonion ya inyapay na saray kadaanan ya Israelita ed silong na Ganggan nen Jehova. Say altar na Dios so tinawag a dulang, tan samay mangitatarok na ayep ya ibagat so inkuan ya awalaan na komonion ed si Jehova tan ed saray saserdote. Panon? Ununa, si Jehova so mibibiang ed bagat lapud say dala so inwalsik ed tapew na altar to tan say taba so popoolan na saray liab ed loob. Komadua, say saserdote so mibibiang ta sikato (tan say pamilya to) so angan ed inkalot a pagew tan nikawanan ya ulpo na nibagat ya ayep. Tan komatlo, say manangiyapay so mibibiang diad pangan ed nakekeraan a kabiangan na saman. (Levitico 7:11-36) Natan, say pibiang ed dulang nen Jehova et kabaliksan to so pangiter tayo ed sikato ed nengneng na panagdayew a kakaukolanen to, a singa impanengneng na ehemplo nen Jesus tan saray apostol to. Pian nagawaan iya, sikatayo so nepeg a mangan ed saray espiritual ya itatarok nen Jehova diad panamegley na Salita tan organisasyon to. Saray Israelita, a nangayagaan da so nikadkaduman komonion ed si Jehova tan ed dulang to, so sinebelan a mangiyapay na saray bagat ed saray demonyo tan ed dulang da. Saray espiritual ya Israelita tan saray kaiba ran “arum a karnero” so walad silong na parehon madibinon panangisebel.—Juan 10:16.
3. Panon a nayarin magmaliw a mankasalanan so sakey ed pangan ed dulang na saray demonyo ed agew tayo?
3 Panon a mankasalanan so sakey diad pibibiang ed dulang na saray demonyo ed agew tayo? Diad pangiyaalibansa na antokaman a sumpa ed si Jehova. Lalaktipen na dulang na saray demonyo so amin a dinidemonyon propaganda, a dinisenyo pian palikdoen tan mangiyarawi ed sikatayo manlapud Jehova. Siopa so malabay a managano ed puso tan kanonotan to ed ontan a samal? Ikakaindan na tuan Kristianos so pibiang ed saray bagat ya iyaapay na maslak a totoo ed dirios na bakal tan saray kayamanan.—Mateo 6:24.
Ipaliis ed “Dulang na Saray Demonios”
4. Anton tepet so kipapaarapan tayon amin, tan akin ya agtayo sigagalan mangan ed dulang na saray demonyo?
4 Say tepet a kipapaarapan tayon amin et, Dinan a dulang so pakakataganoan ko? Agtayo nataynanan so katuaan a sikatayoy obligadon mangan ed dinanman ed sarayan duan dulang. (Ipareng so Mateo 12:30.) Agtayo sigagalan mangan ed dulang na saray demonyo. Say panggawa ed satan so mangibalang ed panangabobon ed sikatayo na alenleneg a tua tan mabilay a Dios, si Jehova. Diad biek a dapag, say pangan na tagano a walad dulang lambengat nen Jehova so mangitonton ed andi-anggaan a bilay tayo a walaay liket! (Juan 17:3) Wala so panangibaga a napatnagan ed sakey a too no anto so kakanen to. No ontan, siopaman a malabay a pansiansiaen to so maabig a pisikal tan mental a bunigas so kaukolan a manalwar ed kanen to. Unong a say puros-nantaban junk food, anggaman niparaan a mananam a walaay kemikal a panpananam, so agmakagungguna ed pamasiansia na pisikal a bunigas tayo, kanian say propaganda na sayan mundo a walaay parakep a dinidemonyon ideya so mauges a piguratibon junk food a manudutak ed saray kanonotan tayo.
5. Panon tayon napaliisan so pibibiang ed demonikon bangabangat natan?
5 Impasakbay nen apostol Pablo a legan na saray kaunoran ya agew, saray totoo so ibalang na “bangabangat na saray demonio.” (1 Timoteo 4:1) Aglambengat naromog iratan a dinidemonyon bangat ed palson relihyoson sisisiaen noagta saratan met so malaknab ya iyaabawag ed arum a paraan. Alimbawa, kaukolan tayon surien tan simbangen no antoran libro tan magasin so babasaen tayo tan saray anak tayo, no antoran programa ed telebisyon so babantayan tayo, tan no antoran drama tan pelikula so nenengnengen tayo. (Uliran 14:15) No diad panligliwaan et babasaen tayo so istorian anggapoy katuaan, kasin satan so nipaakar ed anggapoy-liknaan a karuksaan, isesebel a sekso, odino okultismo? No manbabasa tayo met na aliwan istorian anggapoy katuaan pian naibangat, kasin satan so mangisasalaysay ed pilosopya odino dalan na bilay ya “aliwan unong ed Cristo”? (Colosas 2:8) Kasin saman so mangipaparungtal na anggapoy kakanaan iran panagpalbeng, odino mangiyaalibansa na pibabali ed minumundo iran pakurang na sosyedad? Kasin itatandoro to so determinasyon na panpayaman a maong? (1 Timoteo 6:9) Kasin satan so sakey a palapagan a masilib a mangipaparungtal ed saray bangat a manangapag ya arawi ed pagmaliw a singa-Kristo? No say ebat et on tan mantutultuloy tayon manbasa odino bantayan so ontan a materyal, sikatayo so mamipeligron mangakan ed dulang na saray demonyo. Natan, walaray nilasus nilibon palapagan a mangiyaalibansa na minumundo iran pilosopya ya ompatnag ya ontanlan makaligliwa tan mibabansag ed panaon. (Eclesiastes 12:12) Balet anggapo ed sayan propaganda so talagan balo; nisay manggagawa itan na kagunggunaan tan pankaabigan na say sakey, a singa met a sisisilib ya impangibaga nen Satanas ed si Eva ya ontulong ed pankaabigan to.—2 Corinto 11:3.
6. Sano sikatayoy imbitaan nen Satanas a tawayan so demonikon junk food to, panon so nepeg tayon ikiwas?
6 Kanian, sano imbitaan itayo nen Satanas a tawayan so dinidemonyon junk food to, panon so nepeg ya ikiwas tayo? Singa ginawa nen Jesus sanen sikatoy tinukso nen Satanas a pagmaliwen a tinapay iray bato. Inyebat nen Jesus: “Wala’n nisulat, Aliwa a say tinapay labat so na panbilay na too, noag say amin a salitan onbesngaw ed sangi’ Dios [Jehova, NW].” Tan sanen inyopresi na Diablo ed si Jesus “so saray amin a panarian na mundo, tan say dayew da” no sikato so ondakmomo tan manggawa na sakey a gawa na panagdayew ed si Satanas, inmebat si Jesus: “Arawi ka dia, Satanas: ta wala’n nisulat, Sika igalang mo naani so Dios a Katawan [Jehova, NW], tan sikato labat so panlinkoran mo.”—Mateo 4:3, 4, 8-10.
7. Akin a papalikdoen tayo so inkasikatayo no isipen tayon nayarian tayoy mangan ed dulang nen Jehova tan ed dulang na saray demonyo?
7 Say dulang nen Jehova tan say dulang ya intarya na demonikon kakabusol to so agbalot napanpakna! On, sinubok la nensaman. Nonoten iray kadaanan ya Israelita ed saray agew nen Elias. Saray totoo so mangibabaga a mandadayew ed si Jehova, balet sinisia ra so arum niran dirios, a singa si Baal, ya angisipan na aligwas. Sininggeran nen Elias iray totoo tan inkuanto: “Panon so kabayag yo ya onla a manpawilpawil ed saray makadua a kanonotan? No si Jehova sikato so Dios, ontombok kayo ed sikato: balet no si Baal, sirin ontombok kayo ed sikato.” Agniburi, saray Israelita so mankitlaey “ununa diad sakey a sali tan kayari to et dia met ed basil.” (1 Arari 18:21; The Jerusalem Bible) Inangat nen Elias iray saserdote nen Baal a paneknekan so inkadios na dios da. Say Dios a makapangiyakseb na apoy manlapud tawen ed sakey a bagat so napaneknekan a tuan Dios. Anggaman ed baleg a sagpot, sinmaew iray saserdote nen Baal. Insan basta nampikasi lambengat si Elias: “O Jehova, denglen moak pian saya a baley nakabatan to a sika, Jehova, sika so Dios.” Say apoy a nanlapud si Jehova so tamtampol ya inmakseb nanlapud tawen tan amool ed ambasan bagat ya ayep. Lapud asagyat na makakumbinsin panangipatnag na inkadios nen Jehova, tinulok na totoo si Elias tan pinatey dan amin so 450 a propeta nen Baal. (1 Arari 18:24-40) Kanian natan, nepeg tayon bidbiren si Jehova bilang say tuan Dios tan desididon ombaling ed dulang to pian diman mangan noag tayo ni agawaan itan.
Seserbian na ‘Matoor ya Aripen’ so Dulang nen Jehova
8. Anton aripen so impasakbay nen Jesus ya usaren to pian pakanen iray babangatan to ed espiritual legan na kiwawala to, tan anto so pakabidbiran ed aripen?
8 Impasakbay na Katawan a Jesu-Kristo a legan na kiwawala to, sakey a “matoor tan makabat ya aripen” so mangitarya na espiritual a tagano para’d babangatan to: “Mapalar so satan ya aripen, a sikato’y nasabian na katawan to ya onta’y gagawaen to. Tua kuan ko ed sikayo, ya sikato’y ipasento’d amin a wala ed sikato.” (Mateo 24:45-47) Apaneknekan a sayan aripen ya, aliwan siopaman a saksakey ya indibidual, noagta klase na dedikado, alanaan a Kristianos. Sayan klase so mangiiyan ed dulang nen Jehova na sankaabigan ya espiritual a tagano a namparan para’d alanaan a nakdaan tan ed “baleg ya ulop.” Natan masulok ya apatiran milyon, say baleg ya ulop so angala na talindeg da a kaibay alanaan a nakdaan para’d sankatalbaan ya inkasoberano nen Jehova a Dios tan para’d Panarian to a pangitandoroan to na masanton ngaran to.—Apocalipsis 7:9-17.
9. Anton instrumento so uusaren na aripen a klase ed pangitatarok na espiritual a tagano para’d Tastasi nen Jehova, tan panon a say espiritual a piesta ra so mapropetikon adeskribe?
9 Sayan matoor ya aripen a klase so manguusar ed Watch Tower Bible and Tract Society pian mangitarya na espiritual a pakatagano ed amin a Tastasi nen Jehova. Bangta say Kakristianoan tan say arum a kabiangan na sayan sistema na bengabengatla so naeerasan lapud kakulangan na manangiter-bilay ya espiritual a tagano, say totoo nen Jehova so man-piesta. (Amos 8:11) Saya so kasumpalan na propesiya ed Isaias 25:6: “Si Jehova na saray ejercito mangawa naani ed saray amin a baley na sakey a liket ed saray mataba a bengatla, sakey a liket na saray alak ed tapew na saray bolirek, saray mataba a bengatla a napno na utek, tan saray alak ed tapew na saray bolirek napaitneng ira.” Singa ipapanengneng na bersikulo 7 tan 8, sayan piesta so mantultuloy ed andi-anggaan. Agaylan bendisyon itan ed amin a wala’d nanengneng ya organisasyon nen Jehova natan, tan agaylan bendisyon a mantultuloy itan ed arapen!
Manalwar ed Makasamal a Tagano ed Dulang na Saray Demonyo
10. (a) Anton klase na tagano so ibubunog na mauges ya aripen a klase, tan anto so motibo ra? (b) Panon so panatrato na mauges ya aripen a klase ed datin kapara ran ariripen?
10 Say tagano ed dulang na saray demonyo so makasamal. Alimbawa, kunsideraen, so taganon ibubunog na mauges a klasen aripen tan saray apostata—agto itayo napesel odino napabiskeg; aliwan makapabunigas. Ontan, lapud saray apostata so tinmundan mangan ed dulang nen Jehova. Bilang nansumpalan, antokaman ya abayuboan dan balon personalidad so naandi la. Say mamabayubo ed sikara et aliwan say masanton espiritu, noagta mapeligron inkapait. Saksakey so getma ra—say pamekpek ed datin kapara ran ariripen, a singa impasakbay nen Jesus.—Mateo 24:48, 49.
11. Anto so insulat nen C. T. Russell no nipaakar ed panpili na sakey ed espiritual a tagano, tan panon ton diniskribe iramay mangikakaindan ed dulang nen Jehova?
11 Alimbawa, nen 1909, say datin presidenti na Watch Tower Society, si C. T. Russell, so nansulat nipaakar ed sarayan binmeneg ed dulang nen Jehova tan kayari et ginmapon mauges so impantrato ra ed datin kapara ran ariripen. Say The Watch Tower na Oktubre 1, 1909, so nankuan: “Amin na saramay angisian ed inkasikara manlapud Sosyedad tan say kimey to, imbes a paaligwasen so inkasikaran dili odino mamaseseg ed arum diad pananisia tan saray aligwas na saray bunga na espiritu, so ompatnag a manggagawa na kasuniyan to—manasalin deralen so Sengegan a datin nanlingkoran da, tan, kayari to et kalkalnan nalner ed pakalingwan et sasakitan da lambengat so inkasikara tan arum a walaay mipadparan espiritu na pilalaslasan. . . . No iisipen na arum a sikaray makala na onman kaabig tan magmaong a panangitarya ed arum a dulang, odino sikaray makapawala na onman kaabig tan magmaong ed inkasikaran dili—paulyanan irayan mantultuloy ed kurang da. . . . Balet legan a sikatayo’y akaparaan a mamaulyan ed arum ya onla ed inerman tan ed amin a pasen pian mananap na tagano tan liwawa ed kapenek da, makapakelaw, saramay nagmaliw a sinmumlang ed sikatayo so angala na duman kurang. Imbes ya ibagan tekep na awawey na mundo ya, ‘Aromog ko so bengatlan lablabay ko; manpatanir ak la!’ saraya so mangipapatnag na sanok, mauges a pilalek, gula, inkaapag-apag, ‘saray gawa na laman tan diablo’ diad laknab ya agtayon balot ni anengneng anggan ed minumundon totoo. Singano ra binakonaan na kabaglan, Satanikon haydropobya [rabies]. Arum ed sikara so amasegsegang ed sikatayo tan kayari et ibaga ran sikatayo so amasegsegang. Sikaray akaparaan a mangibaga tan mansulat na agaylan uges a katilaan tan manpaabeba pian manggawa na inkaruksa.”
12. (a) Panon a pepekpeken na saray apostata iray kapara ran ariripen? (b) Akin a mapeligro so pagmaliw a mausisa nipaakar ed saray insulat na saray apostata?
12 On, mangipapalapag iray apostata na saray literatura a manguusar na saray panamikewet, agsigpot iran katuaan, tan direktan katilaan. Sikara ni ingen so manproprotista ed saray kumbension na Tastasi, a panggugunaetan dan patitan iray anggapoy amta. Kanian, magmaliw a mapeligron bengatla a paulyanan lapud inkaupapet tayo et napakiwas tayon manbasa na ontan iran insulat odino talinengen so maabuson panagsalita ra! Manwarin nayarin isipen tayon aliwa itan a peligro ed sikatayo, wadtan nin siansia so kapeligroan. Akin? Ununa, pigara ed saray apostatan literatura so mangipaparungtal na katilaan diad panamegley na “saray salita a “maamoyot” tan “konkonwarin salita.” (Roma 16:17, 18; 2 Pedro 2:3) Agta ontan so nailaloan yo ed dulang na saray demonyo? Tan anggaman saray apostata so nayarin mangipaparungtal met na pigaran katuaan, saraya so gendagendat ya aliwa so kiyaplikaan da diad kalat a panangguyor ed arum ya onarawi ed dulang nen Jehova. Amin ya insulat da so panamalaw lambengat tan panamaletey! Anggapoy antokaman a makapabiskeg.
13, 14. Antoray bunga na saray apostata tan say propaganda ra?
13 Inkuan nen Jesus: “Napatnagan yo ra lapu’d saray bunga ra.” (Mateo 7:16) Natan, antoray bunga na saray apostata tan saray palapagan da? Apatiran bengatla so mananda ed propaganda ra. (1) Inkasilib. Ibabaga na Efeso 4:14 a sikaray “napapalikdo ed panggaway lingo, NW.” (2) Ikikinon ya intelehensya. (3) Kaandian na aro. (4) Panamalikdo ed nanduruman porma. Sarayan mismo so rikado na say taganon walad dulang na saray demonyo, ya amin et dinisenyo pian deralen so pananisia na totoo nen Jehova.
14 Tan wala ni sananey a pamaakaran. Saray apostata so ompapawil ed anto? Diad dakel a kaso, sikaray ompapawil lamet ed kabilungetan na Kakristianoan tan saray doktrina to, a singa say sisisiaen ya amin a Kristiano et onla’d tawen. Niarum ni, maslak so agla ontatalindeg a malet ed Makasulatan a dapag nipaakar ed dala, neutralidad, tan say kakaukolanen a pantasi nipaakar ed Panarian na Dios. Anggaman ontan, sikatayo so akataynan la ed kabilungetan na Babilonia a Baleg, tan agtayon balot labay a pawilen itan. (Apocalipsis 18:2, 4) Bilang matoor ya ariripen nen Jehova, akin a panpilalekan tayo nin pasikmatan so propagandan ibabando na sarayan manangipulisay ed dulang nen Jehova a diad panamegley na salita et mamepekpek ed saramay ontutulong ed sikatayon minabang ed “saray maabig a salita”?—2 Timoteo 1:13.
15. Anton prinsipyo na Biblia so ontutulong ed sikatayo a mangala na makabat a kundang sano narengel tayoray akusasyon a gagawaen na saray apostata?
15 Nayarin say arum so mausisa nipaakar ed saray akusasyon na saray apostata. Balet nepeg tayon iyaplika so prinsipyo ed Deuteronomio 12:30, 31. Dia si Jehova ed panamegley nen Moises so angipasakbay ed saray Israelita nipaakar ed no anto so paliisan bektaman ya apataynan dalaray paganon manaayam ed Insipan a Dalin. “Ilikas mo so inkasika pian agda ka naani nakalotan ya ontombok ed sikara, naani no kayari inkaderal da ed arap mo, tan pian agka mantepettepet na nipaakar ed saray kinondirios da a kuan mo, Panoy panaglinkor na sarayan nacion ed saray kinon-diosdios da? onia met naani’gawaen ko. Agmo nepeg a gawaen so ontan ed kinen Jehova a Dios mo.” On, kabat nen Jehova a Dios no panon so iyaandar na inkaupapet na too. Tandaan si Eva, tan ontan met so asawa nen Lot! (Lucas 17:32; 1 Timoteo 2:14) Agtayo ontatalineng ed ibabaga odino gagawaen na saray apostata. Imbes, magmaliw ya okupado ed panamabiskeg ed totoo tan sitotoor a patagano ed dulang nen Jehova.
Mogmon say Dulang nen Jehova so Mansiansia
16. (a) Anto so agla mabayag a nagawa ed si Satanas, ed saray demonyo to, tan ed piguratibon dulang a pangakanan na saray nasyon ed mundo? (b) Anto so nagawa ed amin a too a mantultuloy a mangan ed dulang na saray demonyo?
16 Agla manbayag et biglan onggapo so baleg a kairapan, a masiglat ya onkiwas a mamaarap ed kapantokan diad “bakal na baleg ya agew na Dios, a Makapanyarin amin.” (Apocalipsis 16:14, 16) Saya so makasabi ed kapantokan ed paneral nen Jehova ed sayan sistema na bengabengatla tan say piguratibon dulang a pangakanan na nasyones na mundo. Panganggaen nen Jehova so interon agnanengneng ya organisasyon nen Satanas a Diablo a kaiba iray kaulop ton dedemonyo. Saramay mantutultuloy a mangakan ed espiritual a dulang nen Satanas, say dulang na saray demonyo, so napilitan ya onatendi ed sakey a literal a panangan, andi, aliwan bilang mibibiang, noagta bilang manunan putahe ed kaderal da.—Nengnengen so Ezequiel 39:4; Apocalipsis 19:17, 18.
17. Antoran bendisyon so onsabi ed saramay mangakan lambengat ed dulang nen Jehova?
17 Say dulang nen Jehova lambengat so mansiansia. Saramay siaapresyan mangakan ed satan so iliktar tan napribilihyoan a mangan diman ed ando lan ando. Sikaray agbalot nasigensigen na antokaman a nengneng na kakisiran na tagano. (Salmo 67:6; 72:16) Diad nagnap a bunigas sikaray manlingkor ed si Jehova a Dios diad Paraiso! Diad kaunoran saray makapasagyat a salita na Apocalipsis 21:4 so makapakelkelaw a nasumpal: “Punasen to so amin a lua ed kamataan da; tan andi gapo la naani ipatey; tan angapo la naani onangis o dageyem, o ot-ot: ta saray ona a bengatla sikara so linmabas la.” Lapud anggapo la so isusumpa, say sankatalbaan ya inkasoberano nen Jehova a Dios so ontalona ed ando lan ando ed amin a pasen legan a say anggapoy anggaan a madibinon langkap so nikalbo ed arondon a katooan a walad Paraison dalin. Pian nagamoran iyan tumang, amin tayo so magmaliw a desididon minabang lambengat ed dulang nen Jehova, a napnapno na sankaabigan iran espiritual a tagano!
Panon Yon Ebatan?
◻ Panon tayon napaliisan so pakapalikdo ed demonikon bangabangat?
◻ Akin ya agtayo nayarin mangan ed dulang nen Jehova tan ed dulang na saray demonyo?
◻ Anton klase na tagano so ibubunog na saray apostata?
◻ Akin a mapeligro so pagmaliw a mausisa nipaakar ed saray panamakasalanan na saray apostata?
◻ Antoray bunga na saray apostata?
[Litrato ed pahina 10]
Say dulang nen Jehova so napnapno na sankaabigan iran espiritual a tagano