Tastasi nen Jehova ed Interon Mundo​—Colombia

SAY Colombia so sakey a nikadkaduman dalin ed Abalaten ya Amerika. Namparan say kadayatan na Atlantiko tan Pacipiko so kaampar na baybay na sayan bansa ya apaliberan na saray bolkan. Say petang na abeban tropikon gilig na dayat tan saray patar so sengegay ibetel na atagey, ya akulapotay nieben Kapalandeyan na Andes.a

Anggaman say Colombia so kabkabat lapud balitok tan saray esmeralda, saray totoo so sankablian iran kayamanan to. Natan et papanoen nen Jehova na gloria so espiritual ya abung to. Saray marakep, makapaingganyon managdayew so ondadagsa ed satan ed amin a parti na dalin, pati say Colombia.​—Aggeo 2:7.

Mandinayew Iray Manedyer na Negosyo

Simba, Nobyembre 1, 1992, so ananda ed dedikasyon na balon sangan opisina tan pasilidad na panag-imprintaan na Watch Tower Society ed Facatativá, a walaay 42 a kilometron kaarawi ed bandad amianen-sagur na Bogotá. Say pan-tour ed sanga so walaan na baleg ya epekto ed saray ombisita ditan. Diad impawil ed pabrikan pantatrabahoan to, sakey a bisita so sigagayagan amaseseg ed saray manedyer to ya onla tan imatonan so sakey ya organisasyon a ‘sakey a makapakelaw no nipaakar ed inka-epektibo, uksoy, tan ligsa na saray empleyado.’ Diad tinmumbok ya impan-tour da, angipanengneng iray manedyer na agaylan interes tan tinmepet na dakel a tepet.

Kaliktan na sarayan manedyer ya ibaki iray superintendi ra, superbisor, tan poreman​—diad tua, amin ed saray komikimey da—​pian man-tour. Kada simba, iyeskedyul da so 15 ya anggad 25 ya empleyado pian man-tour anggad amin a managtrabaho a 1,300 so makaobserba ed ontan ya inka-epektibo ed inkaorganisa.

Nilasus ed saray komikimey da so nan-tour ed saray pasilidad na sanga tan nanbantay ed video a Jehovah’s Witnesses​—The Organization Behind the Name. Lapud naingganyo ed kabaleg na organisasyon tan sankamundoan a laknab na panangipulong na Panarian a kimey, sikaray mandinayew ed atagey a kipapasen na teknolihya ya uusaren ed saray panangipakurang na Sosyedad. Diad inyalis da, dakel so nadngel ya angibagan liknaen dan singano sikaray ‘onaalis ed Paraiso ya ompawil ed magulon mundo.’

Nasasabi na Katuaan so Amin a Nengneng

Saray totoo ed amin a nengneng so nasasabi na maong a balita. (1 Timoteo 2:3, 4) Alimbawa, sakey a datin kompositor tan lider na sakey a banda na musikan heavy-metal rock so angawat na katuaay Biblia, nanggawa na panamasimbalo ed bilay to, tan ag-abayag et nagmaliw a regular pioneer. Diad saginonor et sikato so aturon ministeryal ya aripen. Dakel ya indibidual iran membro na saray grupon subersibo so akaaral a manmatalek tan manilalo ed Panarian nen Jehova. Sikara la natan so aktibon nalalanor ed panangipulong na mensahe na mareen a balon mundo.

Binmaling met ed katuaan iray addict ed druga tan managlako na saray isesebel a tambal. Sakey a kalangweran a laki a sakey lan Tasi so datin mangipapakurang na tanamanan na isesebel a tambal tan laboratoryo na cocaine ed katakelan ed loob na limaran bulan sakbay na inkibulos ed onman a nengneng na panagbilay. Aromog to so liket diad impakaaral tan pangaagamil na saray prinsipyo ed Biblia. Diad sakey a kulongan na saray naukom bilang manamatey-totoo ya apakiwas lapud masimoon a panagaral na Biblia so sigugunaet a nampiksi a si Jehova so mamerdona ed saray kasalanan da tan awaten ira bilang ariripen to.

Diad ontan et amin a nengneng na totoo so onkikiwas ed mensahe na Panarian. Diad Colombia, a singa met ed arum a pasen, papanoen sirin nen Jehova so abung to na gloria.

[Paimano ed leksab]

[Kahon ed pahina 8]

SAY KIPAPASEN NA BANSA

1993 Serbisyon Taon

PANTOK A BILANG NA MANTATASI: 60,854

RATIO: 1 a Tasi ed kada 558

INMATENDI ED MEMORYAL: 249,271

PROMEDYON MANANGIPALAPAG A PAYUNIR: 8,487

PROMEDYON PANANGIYARAL NA BIBLIA: 100,927

BILANG NA ABAUTISMOAN: 5,183

BILANG NA SARAY KONGREGASYON: 751

SANGAN OPISINA: FACATATIVÁ

[Litrato ed pahina 9]

Say personahe tan saray misionero nen 1956 ed sangan opisina

[Litrato ed pahina 9]

Bista na sangan opisina manlapud tagey