Akin a say Takot so Mangegemgem ed Mundo?

SIOPA so malabay a manbilay ed takot? Pilalek na normal a too so kaligenan, ya anggapoy panisigensigen ed bilay to odino kaykayarian. Kanian, dakel so ontataynan ed saray pasen a kasmak so krimen. Ingen, saray sengegan na itakot so wala ed amin a pasen.

Saray kapeligroan manlapud pakaaksidente ed saray nuklear ya armas tan saray kagawaan ya uusaren nipaakar ed saya so mamapalesa na takot a naderal so katooan. Say intulasok na karawalan so mamapawala na takot. Dakel so natatakot ompan say AIDS so magmaliw a sankadakelay pinatey ya ipedemya ed siglo. Say kaderal na kaliberliber so kabiangan na arum niran sengegan na takot. Kasin sarayan katatakotan so nagkalautlan makabaliksan? Tan kasin makapanilalo tayo nin manbilay ed mundon andian na ontan a takot?

Makabaliksan so Sankamundoan a Takot

Say kasmak natan a takot so makabaliksan lapud impasakbay na Biblia. Diad propesiya to ed kaunoran iran agew, sinaglawi nen Jesu-Kristo iray kipapasen a panlapuan na takot. Inkuanto: “Ontalindeg naani nacion sumpa ed nacion, tan panarian sumpa ed panarian; tan wala ra naani eraeras tan yegyeg ed nambabangil a pasen.” Sinaglawi met nen Jesus “ya ondakel naani so kaugsan.” Nanlapulad 1914, say agnaparaan iran bakal, era-eras, yegyeg, tan kaugsan so nansumpal ed baleg a takot tan inkabalang na bilay.​—Mateo 24:7-14.

Anggan saray awawey na totoo so panlalapuan na takot natan. Diad 2 Timoteo 3:1-4, nabasa tayo so mapropetiko iran salita nen apostol Pablo: “Dia ed saray kaonoran ya agew onsabi so saray panaon a maatap. Ta saray totoo sikara naani so mangaro ed saray lamalaman da, maaro ra na pilak, managpasirayew, atagey a linawa, maayew, matulay ed saray kaatengan da malamang, aliwa ran masimpit, Angapo so aro ra a nianakan, angapo so panangasi’ra, managpauges, aliwa ra’n maadia, maruksa ra, maingongot ed saray maabig. Managliput, mayu-uges, mapasang, maaro ed saray liketliket, a lalo nen say dia ed Dios.” Lapud sikatayo so aliktub na ontan a totoo ed sarayan kaunoran ya agew, agpankelawan a walay kasmak a takot!

No Anto so Nailaloan na Sayan Mundo

Inkumpara nen Jesus iyan panaon ed saray kaunoran ya agew na say mundo ed panaon nen Noe. Anggapoy duaruwa, a mapalalo so takot ed saman, ta kuan na maawaran a kurit na Biblia: “Say dalin met inmuges ed arap na Dios, tan say dalin napno nen saman na karawalan.” Kanian, “say Dios inkuan to ed Noe, Say angaan na amin a laman sinmabi ed arapan ko; ta say dalin napno na karawalan.” (Genesis 6:11, 13) Saman a marelmeng a mundo so ontanlan marawal a pinangangga na Dios iman diad panamegley na sankagloboan a Delap. Balet, lapud aro et inliktar nen Jehova a Dios so matunong a Noe tan say pamilya to.​—2 Pedro 2:5.

Anto sirin so nailaloan na kaplesan a marawal a mundo? Bueno, kagula na Dios so marawal a panangibaliwala ed pankaabigan na arum. Saya so mapatnag manlapud saray salita na salmista: “Si Jehova soboken to so matunong; balet say bagel tan saman so labalabay to so karamsakan gulaen na kamarerwa to.” (Salmo 11:5) Intarok nen Jehova so kasampotan na marawal a mundo ed agew nen Noe. Kanian, sirin, agta ilaloan tayo a panganggaen met na Dios iyan mundon babakbaken na makapataktakot a karawalan?

Si apostol Pedro so apuyanan na Dios a mansalita nipaakar ed kiwawala nen Kristo tan mangipropesiya na desyang para’d kaplesan a marelmeng a mundo. Insulat to: “Amtaen so saya ya unona, a dia ed kaonoran ya agew onsabi so saray managlurey a pati panaglurey, a manakar irad dilin lawan da, Tan kuanen da: Iner so kawalaan na sipan ed idateng to? ta nanlapu la ed saman so agew ya inkaplag dad ugip na atateng, ganagana a bengatla, ontotoloy a singa nen gapu na inkapalsa.” Insan inusar nen Pedro so terminon “saray tawen” pian mangilaman ed sistema na ag-ayadyarin uley ed katooan tan say salitan “dalin” para’d agmatunong a sosyedad na too. “Ta,” inkuanto, “nanlinawaan da a inlingoan a wala ray katawenan nanlapu lad inmonan panaon, tan say dalin ya wala ed danum tan otel na danum lapud salita na Dios: Lapu ed saya say mundo nen saman [ed agew nen Noe], dia ed inkayanep to na danum atawtaw: Balet saray tawen ya wala natan, tan say dalin, inpansiansia ra na dilin salitan niatol ya onkana ed apuy ed agew na panangokom, tan dia ed kaderal na saray mangaruksan totoo.”​—2 Pedro 3:3-7.

Diad mipadparan kanonotan, sinalambit nen Pablo a si Kristo tan saray makapanyarin anghel to so mangitarok na “panamales ed saray ag mikabat ed Dios, tan dia ed saray ag ontolok ed evangelio na Katawan tayon Jesus; A sikara so mantepel na dusa a salanti andi angaan a kabalang da.” (2 Tesalonica 1:6-9) Say kaunoran a libro na Biblia so manasaglawi ed katipon na nasyones para’d “bakal na baleg ya agew na Dios, a Makapanyarin amin” tan mangipapaseguro ed sikatayo a si Jehova so ‘mamagbag ed saray mamagbag ed dalin.’​—Apocalipsis 11:18; 16:14-16.

Panaon Para’d Pangayaga, Aliwan Itatakot

Imbes a nakebbiew ed ipapasakbay na Biblia para’d sayan mundo, saray maptek a totoo so walaan na rason pian mangayaga. Agmabayag et panganggaen nen Jehova iyan marelmeng a mundo, balet saya so nagawa para’d pankaabigan na saramay mangaaro na inkatunong. Anto so ontumbok ed madibinon anggaan na kaplesan a sistema na bengabengatla? Siempre, sakey a balon sistema ed silong na mangatatawen a Panarian na Dios, a nipaakar ed satan et imbangat nen Jesus iray patumbok ton ipikasi! Inkuanto: “Kanian onia-sirin no mikasi kayo; Ama mi’n wala ka ed tawen, Nagalang komon so ngaran mo. Onsabi komon so panarian mo. Nagawa komon so linawam, onong ed tawen, ontan met ed dalin.” (Mateo 6:9, 10) Antoran pananguman so nailaloan tayo sano nagawa so linawa na Dios ed dalin?

Say bakal tan saray manangebbiew to so onandi. Kuan na Salmo 46:9: “Sikato patondaen to so bakabakal anga ed sampot na dalin; sikato balbalen to so bekang, tan poteren to a mankadua so gayang; sikato ipool to so carosa ed apuy.” Insan saray totoo so “onyorong ira naani balang sakey ed silong na kiew to ya uvas tan ed silong na kiew to ya higos; et angapo naani manaktakot ed sikara.”​—Miqueas 4:4.

Saray makapatey a sakit so agla pansengegan na takot tan kaandi na bilay. Say madibinon sipan et: “Say manayam agto naani ikuan, Mabeblay ak.” (Isaias 33:24) Agaylan sengegan na igayaga!

Saray takot a nisisiglaot ed krimen tan karawalan so magmaliw a bengabengatla ed apalabas. Isisipan na Salmo 37:10, 11: “Ta wala ni so daiset, et say bagel onandi: on, imanom so pasen to, et onandi. Ingen ta saray maoyamo tawiren da naani dalin: tan manliket ira a dili ed inka daakan na kareenan.”

Panon a say kaplesan-agew a pakakatakotan so nasalatan na tuan kareenan tan kaligenan? Diad panamegley na sakey a matunong a gobierno​—say Panarian na Dios. Nipaakar ed panaon tayo, onia so kuan na Daniel 2:44: “Dia ed saray agew naani na saratan ya ar-ari, say Dios na tawen mamaalagey naani na sakey a panarian ya angan kapigan ag naani naderal tan say panaguley to ag naani niiter ed sananey a baley: balet buybuyaken to naani tan opoten to naani so saraya ya amin a panarian, et sikato so mansiansia lawas.” Say tinuro nen Jehova ya Ari, si Jesu-Kristo, so ‘nakaokolan a manari, anga ed pakapangian na Dios ed amin a kabusol ed silong na saray sali to.’ (1 Corinto 15:25) Say Sanlibon Taon ya Uley nen Jesus so manumpal ed orihinal a gagala na Dios a nawalaan na sakey a paraison dalin a panayaman ed andi-anggaan na magayagan totoo.​—Lucas 23:43; Apocalipsis 20:6; 21:1-5.

Diad satan a Paraison dalin, onwala so saksakey a mabunigas a takot. Satan so “say takot ed Jehova.” (Uliran 1:7) Diad tua, nepeg tayon nawalaan na onian takot anggan natan, ta satan so panamagalang a tuloy tan takot ya atekepan na paga ed pakapaermen ed Dios lapud papablien tayo so maaron-panangasi tan kaabigan to. Kakaukolanen na sayan takot so sigpot a panmatalek ed si Jehova tan matoor a katutulok ed sikato.​—Salmo 2:11; 115:11.

Saray makapataktakot ya agawgawa so mananda ed saraya bilang saray kaunoran ya agew. Anggaman ontan, no paneknekan tayo so panangaro tayo ed Dios, sikatayo so nayarin mangayaga imbes a natatakot. Ipapanengneng na saray propesiya ed Biblia a say madibinon pamaandi ed sayan mundo so asingsingger la. Satan so salatan nen Jehova a Dios na insipan a balon mundo na inkatunong. (2 Pedro 3:13) On, diad silong na uley na Panarian et asingger lan niwala so sakey a mundon andian na agmabunigas a takot.

[Kahon ed pahina 6]

SAY PAKAYARI NA SAKEY A KOPYA

SI Tomasz, sakey a kalangweran a laki a nanlapud Poland, so awalaan na problema ed ley a sengegay itaynan to’d bansa. Diad loob na anemiran bulan sikato so akilugan ed ibeltang diad Europa, unuugip ed sakey a tolda tan awalaan na nanduruman trabaho. Kaleganan to, sakey a tepet so naynay a walad kanonotan to: Anto so gagala na bilay?

Say tepet nen Tomasz so naebatan sanen sikato so pinagamoran na sakey a kopya na Say Panag-Bantayan ed lenguahen Polako. Binasa ton aminpiga iman tan abidbir to a lugan na sayan magasin so katuaan ya aanapen to. Si Tomasz so akilugan ya amaarap ed sangan opisina na Watch Tower ed Selters/Taunus, ed Alemanya a walaay kaarawin 200 a kilometro. Sinmabi diman na sakey a labi na Lunes, impaway to so magasin ton Panag-Bantayan tan inkuanto: “Kaliktan kon walay mangisalaysay ed siak na nagkalalo ni nipaakar ed lugan na sayan magasin. Anto so kaukolan kon gawaen?”

Diad saman a labi, duara ed saray Tasi nen Jehova so akitongtong ed si Tomasz nipaakar ed gagala na bilay, ya uusaren so Biblia bilang say basiyan para’d tongtongan da. Lapud magunaet a makaaral ni, si Tomasz so pinmawil ed sangan opisina a kada agew ed saman a simba, nan-aral na Biblia tan say libron Makapambilay Kayo na Ando lan Ando ed Paraiso diad Dalin.

Diniside nen Tomasz so ompawil ed Polandya, anggaman sikatoy nayarin nipaarap ed saray problema diman. Kanian, nen Biernes, apatiran agew lambengat so linmabas manlapud insabi to ed sangan opisina ed Selters, si Tomasz so ginmapon nambaroy ya amaarap ed dilin binalegan ton dalin. Sikato so tamtampol ya akiaral ed saray Tasi nen Jehova ed Polandya. Maples so inyaligwas nen Tomasz tan maseseg a mangitotongtong ed arum nipaakar ed nanaaralan to. Nen Oktubre 1993, apatiran bulan lambengat kayari na inmunan imbisita to ed Selters, sikato so abautismoan bilang sakey ed Tastasi nen Jehova.

Sakey lambengat a kopya na Say Panag-Bantayan so akatulong ed sayan kalangweran a laki pian usisaen so gagala na bilay!

[Litrato ed pahina 7]

Diad silong na pananguley nen Jesu-Kristo ed Panarian, say mundo so aglan balot lamet gemgemen na takot