Si Job so Akapansungdo—Sikatayo Met!
“Nia, ibilang tayo a mapalar so saray managtepel.”—SANTIAGO 5:11.
1. Anto so imbaga na sakey a maedad lan Kristiano nipaakar ed saray subok to?
‘UUSILAN ak na Diablo! Naliliknak so singa alikna nen Job!’ Diad saratan a salita, imbalikas nen A. H. Macmillan so liknaan to ed maapit a kaaron walad hedkuarter na Tastasi nen Jehova. Asumpal nen Brother Macmillan so mangaraldalin a bilay to diad edad ya 89 nen Agosto 26, 1966. Amta ton say kredito parad matoor a serbisyo na alanaan iran Kristiano a singa sikato so “ontumbok ed sikara.” (Apocalipsis 14:13) On, sikaray mantultuloy ed serbisyo’d si Jehova diad panamegley na kioli ed ag-ompatey a bilay ed tawen. Nangayaga iray kaaro ya agamoran nen Brother Macmillan itan a tumang. Anggaman ontan, diad saray taon a sikatoy onkakapuy, sikatoy apairap na nanduruman sub-subok, pati say problema ed bunigas a mapatnag a nanggawa ed sikaton makaamtan tuloy ed saray gunaet nen Satanas a buyaken so integridad to ed Dios.
2, 3. Siopa si Job?
2 Sanen inkuan nen Brother Macmillan a nalilikna toy singa alikna nen Job, say tutukoyen to et say lakin nansungdo ed baleg iran subok na pananisia. Nanayam si Job ed “dalin na Uz,” a maseguron walad mamaamianen ya Arabia. Lapud sakey a kailalakan na ilalak nen Noe a si Shem, sikato so managdayew ed si Jehova. Ompatnag a saray subok ed si Job so agawa ed baetan na impatey nen Jose tan diad panaon sanen pinaneknekan nen Moises so kaptekan to. Legan na saman a panaon, anggapo so siopaman ed dalin a kapara nen Job ed inkamaridios a debosyon. Ipapasen nen Jehova si Job bilang sakey a lakin andi-kabalawan, maptek, tan matakot-ed-Dios a too.—Job 1:1, 8.
3 Bilang ‘sankabalgan ed saray amin ya anak ed bukig,’ si Job so awalaan na dakel ya ariripen, tan say ayayep to so manbilang na 11,500. Balet say espiritual a kayamanan so sanka-importantian ed sikato. Singa saray maridios a kaamaan natan, maseguron tuloy ya imbangat nen Job so pitoran ilalak ton lalaki tan taloran bibii nipaakar ed si Jehova. Anggan sikara lay andi la ed ayaman to, sikatoy inmakto ni bilang saserdote na pamilya diad panamegley na panangiyapay na saray bagat parad sikara, no bilang ta sikara so nankasalanan.—Job 1:2-5.
4. (a) Akin a nepeg a konsideraen na saray napapasegsegang a Kristiano si Job? (b) No nipaakar ed si Job, antoran tepet so konsideraen tayo?
4 Si Job so nepeg a konsideraen na saray Kristianon napapasegsegang pian pabiskegen day inkasikara a maanos a mansungdo. “Nia,” insulat nen babangatan a Santiago. “Ibilang tayo a mapalar so saray managtepel: nadngelan yo so inpantepel nen Job, tan anengneng yo so angaan ya initer na Katawan [Jehova, NW]; no panon a say Katawan [Jehova, NW] maabagey a toloy, tan mapangasi.” (Santiago 5:11) Singa si Job, saray alanaan a patumbok nen Jesus tan saray kaplesan-ya-agew a “baleg ya olop” so mankaukolan na sungdo pian natalonaan iray subok na pananisia. (Apocalipsis 7:1-9) Kanian, antoran subok so sinungdoan nen Job? Akin ya agawa iratan? Tan panon tayon nagunggunaan manlapud saray eksperiensia to?
Sakey ya Ampetang a Salisalan
5. Ag-amta nen Job, anto so agawa ed tawen?
5 Ag-amta nen Job, sakey a baleg a salisalan so ngalngali lan napalesa ed tawen. Sakey ya agew “saray anak a lalaki na Dios linma ra ya ompatnag ed arap nen Jehova.” (Job 1:6) Say bogbogtong ya Anak na Dios, say Verbo, so wadman. (Juan 1:1-3) Ontan met iray matunong ya anghel tan saray matungangan anghel ya ‘anak na Dios.’ (Genesis 6:1-3) Si Satanas so wadman, ta agni pinataynan ed tawen anggad kiletneg na Panarian nen 1914. (Apocalipsis 12:1-12) Diad agew nen Job, si Satanas so mamalesa na sakey ya ampetang a salisalan. Sikatoy mangipatnag na panduaruwa ed inkakanepegan na inkasoberano nen Jehova ed amin iran palsa To.
6. Anto so panggugunaetan a gawaen nen Satanas, tan panon ton pinauges si Jehova?
6 “Iner so nanlapuan mo?” intepet nen Jehova. Inmebat si Satanas: “Nanlapuak ed kakaakar diman tan dia ed dalin, tan nanlapu ed katatatdang tan kalalasor ed sikato.” (Job 1:7) Sikato so manaanap na buagen to. (1 Pedro 5:8, 9) Diad panamegley na pamuyak ed integridad na sinansakey a manlilingkor ed si Jehova, panggugunaetan a paneknekan nen Satanas ya anggapon balot so sigpot ya ontulok ed Dios lapu lambengat ed aro. Bilang ebat ed salisalan, tinepetan nen Jehova si Satanas: “Inimanom si aripen ko a Job? ta angapo so singa sikato ed dalin, a naskey tan matunong a laki, sakey a matakot ed Dios, tan pinmaliis a nanlapu ed mauges.” (Job 1:8) Akapet nen Job iray madibinon estandarti ya amalugar ed saray agto inkayadyari. (Salmo 103:10-14) Sisasanok ya inmebat si Satanas: “Si Job antakot ta ed Dios ya andi kabaliksan? Agka ta nangawa na alar ed liberliber to, tan dia ed liberliber na abung to, tan ed liberliber na amin ya wala ed sikato, ed amin a diking? Binendicionan mo so kimey na saray lima to, tan say kayarian to minmunat ed dalin.” (Job 1:9, 10) Pinauges na Diablo si Jehova diad pangibabagan anggapoy mangaaro tan mandadayew ed Sikato lapud panamabli ed posisyon tan kualidades nen Jehova noagta lapud papalaboan To iraya pian panlingkoran da. Ikakatunongan nen Satanas a manlilingkor lambengat si Job ed Dios lapud sinisiblet a gagala, aliwan lapud aro.
Onaataki si Satanas!
7. Diad anton paraan ya inangat na Diablo so Dios, tan panon so inyebat nen Jehova?
7 “Balet,” inkuan nen Satanas, “yunat mo so limam natan, tan diwiten mo so amin ya wala ed sikato, et ikaindan to ka ed lupam.” Panon kasi iyebat na Dios ed ontan a makapainsulton angat? “Nia,” inkuan nen Jehova. “Amin ya wala ed sikato wala ed pakayarim; salambengat ya dia ed sikato met lanlamang agmo unaten so limam.” Inkuan na Diablo ya amin a kayarian nen Job so benendisyonan, pinarakel, tan sinalimbengan. Abuloyan na Dios a manirap si Job, anggaman agsasakitan so laman to. Lapud determinadon manggaway mauges, tinaynan nen Satanas so pandaragup.—Job 1:11, 12.
8. (a) Antoran impakaperdi ed materyal so asagmak nen Job? (b) Anto so katuaan nipaakar ed “say apuy na Dios”?
8 Agnambayag, ginmapo so satanikon panangataki. Sakey ed ariripen nen Job so angipasabi ed sayan mauges a balita: “Saray baka manbabakara, tan saray asno mangakan ira ed abay da; et saray Sabeo pinmelag ira ed tapew da, tan inala da ra: on, pinatey da so saray ariripen ed tarem na kampilan.” (Job 1:13-15) Inekal la so salimbeng ed saray kayarian nen Job. Ngalngalin kabansag na saya et direktan pakayari na demonyo so indapo, ta sananey ya aripen so nanreport: “Say apuy na Dios naplag a nanlapu ed tawen, tan pinoolan to so saray carnero tan saray ariripen, tan inopot to ra.” (Job 1:16) Agaylan dinidemonyo so pangipatnag a say Dios so responsabli parad ontan a kalamidad ya indapo anggad dilin aripen to! Lapud say kirmat et manlalapud tawen, mainomay komon a tetelen si Jehova, balet diad tua et say apuy so nanlapud demonyo.
9. Panon a say inkaperdi so angapekta ed siglaotan nen Job ed Dios?
9 Legan ya itutuloy nen Satanas so panangataki to, sakey nin aripen so angireport a sinamsam na saray Caldeo iray kamelyo nen Job tan pinapatey so arum niran managkomponi to. (Job 1:17) Anggan asagmak nen Job so inkaperdi, saya so ag-aneral ed siglaotan to ed Dios. Kasin nasungdoan yo so baleg ya inkalugi ed materyal ya agbubuyaken so integridad yo ed si Jehova?
Babaleg a Trahedyan Dinmapo
10, 11. (a) Anto so agawa ed samploran ilalak nen Job? (b) Kayari na makapaermen a tuloy ya impatey na samploran ilalak nen Job, panon ton minoria si Jehova?
10 Agni asumpal so Diablo ed si Job. Sakey nin aripen so nanreport: “Saray anak mo a lalaki tan bibii mangakan tan maniinom ira na alak ed abung na kamasikenan ya agi ra; Et, nia, sinmabi baleg a dagem a nanlapu ed kalawakan, tan kinabil to so apat a suyok na abung, tan sikato so naplag ed tapew na tobonbalo a lalaki, tan inatey ira; et siak lambengat so akabatik a bokbokor a mangibaga ed sika.” (Job 1:18, 19) Say sakey ya akadngel ed lingon balita so nayarin mangibagan saman ya inkaderal a resulta na saman a dagem so ‘gawa na Dios.’ Anggaman ontan, inataki na pakayari demonyo so anlemek a puso nen Job.
11 Lapud kaermenan, ‘pinilat [nen Job] so sokbong to, tan pinuklisan to so olo to, tan pinmasag ed tapew na dalin.’ Anggaman ontan, talinengen paray salita to. “Si Jehova initer to, tan si Jehova inala to; bendito so ngaran nen Jehova.” Iyaarum na salaysay: “Dia ed saya ya amin si Job ag nankasalanan, agto met inpaakar a maatiw ed Dios.” (Job 1:20-22) Si Satanas so atalo lamet. Anto no nasagmak tayo so pandageyem tan pannangis bilang ariripen na Dios? Say andi siblet a debosyon ed si Jehova tan talek ed sikato so manggawa ed sikatayon makapansungdo bilang manamenben katooran, a singa ginawa nen Job. Saray alanaan tan saray kaiba ra a walaan na mangaraldalin ya ilalo so maseguron makagamor na ligliwa tan biskeg manlapud sayan salaysay na impansungdo nen Job.
Say Salisalan so Ompepetang
12, 13. Diad sakey a pandaragup ed tawen, anto so kinerew nen Satanas, tan panon so inyebat na Dios?
12 Ag-abayag, nampatawag si Jehova na sakey nin pantitipon diad mangatatawen a korte. Si Job natan et andian lay ilalak, pakaskasin toon singano pinairap na Dios, balet say integridad to so pareho. Siempre, ag-aksobien nen Satanas a tila iray akusasyon to sumpad Dios tan si Job so tila. Natan et narengelan la na ‘anak a lalaki na Dios’ so argumento tan panamaat legan ya imamaneobra nen Jehova so Diablo pian itarok so salisalan ed sakey a panaarapan.
13 Bilang paningil ed si Satanas, intepet nen Jehova: “Iner so nanlapuan mo.” Say ebat? “Nanlapu ak ed kakaakar dia tan diman ed dalin, tan manlapu ed katatatdang tan kalalasor ed sikato.” Impaimano lamet nen Jehova so naskey, maptek, matakot-ed-Dios ya aripen a Job, a sipepekder nin mamebenben ed integridad to. Inmebat so Diablo: “Baog tan baog, on, amin a say too wala ed sikato iter to nipaakar ed bilay to. Balet yunat mo so limam natan, tan diwiten mo so pukel to tan laman to, et ikaindan to ka ed lupam.” Kanian inkuan na Dios: “Nia, sikato wala ed limam; salambengat a yagel mo so bilay to.” (Job 2:2-6) Diad panilalon agni inekal nen Jehova so amin a salimbeng, kinerew nen Satanas so pangabil ed pukel tan laman nen Job. Ag-abuloyan a pateyen na Diablo si Job; balet amta nen Satanas a say pisikal a pansakit so mamaot-ot ed sikato tan manggawan ompatnag a sikatoy paiirapen na Dios lapud iyaamot iran kasalanan.
14. Anto so indapo nen Satanas ed si Job, tan akin ya anggapoy siopaman a toon makatambal ed maniirap?
14 Sanen pinataynan la manlapud saman a pantitipon, panliketan nen Satanas a gawaen lay maruksan tuloy a pilalek to. Kanabil to si Job na “makapasinagem a pelsa manlapu ed dapan na sali to anga ed toktok.” Agaylan irap so sinungdoan nen Job legan ya akayurong ed saray dapol tan gogogoen to so inkasikato na saray piraso na langa! (Job 2:7, 8) Anggapoy anggan sakey a managtambal ya akapangiter na pakainawaan manlapud sayan agaylan makapaot-ot, makapadimla, tan makapabaing a sakit, ta saya so pinawala na pakayari nen Satanas. Si Jehova lambengat so makatambal ed si Job. No sikayo so walaay-sakit ya aripen na Dios, agbalot lilingwanan a say Dios so makatulong ed sikayon mansungdo tan makapangiter ed sikayo na bilay ed sakey a bulos-ed-sakit a balon mundo.—Salmo 4:1-3; Isaias 33:24.
15. Anto so impaseseg na asawa nen Job a gawaen to, tan anto so reaksion to?
15 Diad kaunoran, inkuan na asawa nen Job: “Siansia a benbenan mo ni inkaskey [integridad, NW] mo? Inkaindan mo so Dios, tan ompatey ka.” Say “integridad” so mankabaliksan na naskey a debosyon, tan nayarin sikatoy nansalitan siiinsulto pian ayewen nen Job so Dios. Balet inyebat to: “Mansalita ka a singa sakey ed saray maatiw a bibii a mansalita. Anto? awaten tayo ta so maong ed lima na Dios, tan ag tayo awaten so mauges?” Anggan sayan taktika nen Satanas et agto agawaan so panpipilalekan to, ta nibaga ed sikatayo: “Dia ed saya ya amin ag nangawa si Job na kasalanan ed saray bibil to.” (Job 2:9, 10) No bilang ta ibaga na saray onsusumpan membro na pamilya a makulangkulang lambengat a paiirapen tayo so inkasikatayo lapud saray iyaalibansa tayo bilang Kristianos tan pipiliten da itayon ikaindan si Jehova a Dios. Singa si Job, makapansungdo itayo ed ontan a subok lapud inaro tayo si Jehova tan pilalek tayon dayewen so masanton ngaran to.—Salmo 145:1, 2; Hebreos 13:15.
Taloran Matangas ya Impostor
16. Sioparay sinmabin kuan a manligligwa komon ed si Job, balet panon iran inusar nen Satanas?
16 Diad linmabas a sakey nin satanikon pakana, taloran “kakaaro” so sinmabi, kuan a pian manligliwa komon ed si Job. Say sakey et si Elifaz, maseguron kailalakan nen Abraham diad panamegley nen Esau. Lapud si Elifaz so awalaan na kanepegan a mansalitan ununa, anggapoy panduaruwan sikatoy sankatatkenan. Wadman met si Bildad, sakey a kailalakan nen Shuah, sakey ed ilalak nen Abraham ed si Ketura. Say komatlon laki et si Zofar, atawag a sakey a Naamatita pian ipakabat so pamilya odino pasen na panaayaman to, anganko diad amianen-sagur na Arabia. (Job 2:11; Genesis 25:1, 2; 36:4, 11) Singa saramay manusubok ed Tastasi nen Jehova natan ya ipulisay so Dios, sarayan talo so iimpluensyaan nen Satanas pian panggunaetan a paadmiti ed si Job so kasalanan to ed saray palson dalem tan pian buyaken so integridad to.
17. Anto so ginawa na taloran binmisita, tan anto so agda agawaan ed loob na pitoy agew tan pitoy labi?
17 Sarayan talo so angipanengneng na pililikna diad impanakis, impamilat ed kawes da, tan impangisibbuag na dabok ed kauloan da. Balet sikaray linmespak a kaiba nen Job ed pitoran agew tan pitoran labi ya andian na anggan sakey a makaligliwan salita! (Job 2:12, 13; Lucas 18:10-14) Sarayan talon matangas ya impostor so ontanlan kulang na espiritualidad ya anggapon balot so nibaga ran ligliwa nipaakar ed si Jehova tan saray sipan to. Ingen, sikaray manitibukel na lingon konklusyon tan akaparaan a mangusar ed saratan sumpad si Job bektaman a nakapet da ed pormalidad na mapublikon pannangis. Makapasagyat, sakbay a manampot so pitoy-agew ya inkapepe, say kalangweran a si Elihu so imyurong ed lugar a narengel ton amin so pantotongtongan da.
18. Akin ya inanap nen Job so kareenan diad panamegley na ipapatey?
18 Diad kaunoran et sinampotan nen Job so inkapepe. Lapud ag-akala na ligliwa manlapud taloran bisita, inayew to so agew na inkiyanak to tan manumameng no akin a pababayagen ni masinagem a bilay to. Inanap to so deen diad panamegley na ipapatey, ya ag-anggan nanumameng a napangayagaan to lamet so peteg a liket sakbay na ipatey to, natan ta sikato la so pakaskasi, inateyan, tan walaay graben liliknaen. Balet ag-abuloyan na Dios a sakitan si Job a pansengegay ipatey to.—Job 3:1-26.
Inmataki Iray Manag-akusa nen Job
19. Diad antoran pamaakaran a lingon inakusaan nen Elifaz si Job?
19 Si Elifaz so inmunan nansalita ed taloran impanaarapan ed debatin anubok ni ed integridad nen Job. Diad inmunan impansalita to, intepet nen Elifaz: “Iner so akapegpegan na matunong?” Inkuan ton walay mauges a ginawa nen Job a nepeg ton awatey dusa na Dios. (Job, kapitulo 4, 5) Diad komaduan impansalita to, niludlurey nen Elifaz so kakabatan nen Job tan intepet to: “Anto ta so amtam, ya agmi amta?” Ipaparungtal nen Elifaz a labay nen Job ya ipanengneng ed Makapanyarin-amin a sikatoy superyor. Diad impanampot na komaduan panangataki to, deniskribe to si Job a nankasalanan na apostasya, panagpasoksok, tan panamalikdo. (Job, kapitulo 15) Diad unor ya impansalita to, sititilan inakusaan nen Elifaz si Job na dakel a krimen—panagpatobo, ag-impangiter na tinapay tan danum ed saray mankakaukolan, tan mamapairap ed saray balo tan ulila.—Job, kapitulo 22.
20. Antoray paraan na panangataki nen Bildad ed si Job?
20 Bilang komaduan mansalita ed kada taloran liber a debati, gendagendat a tinumbok nen Bildad so kaslakan na teman ginawa nen Elifaz. Saray panagsalita nen Bildad so mas-antikey balet ansakit. Inakusa to ni ingen iray ilalak nen Job a manggagaway mauges a makanepegan na ipapatey. Tekep na lingon panagkatunongan, inusar to iyan ilustrasyon: No panon a saray balbalino tan saray dampig so namagaan tan ompatey no anggapoy danum, ontan met ed “saray amin a mangilingoan ed Dios.” Satan a balikas so tua, balet ag-onaplika itan ed si Job. (Job, kapitulo 8) Impasen nen Bildad a say paniirap nen Job et singa saramay onsasabi’d saray marelmeng. (Job, kapitulo 18) Diad antikey tan komatlon impansalita to, insuppiat nen Bildad a say too et “bigis” tan “bigis [alumbayar, NW]” tan sirin et agmalinis ed imaton na Dios.—Job, kapitulo 25.
21. Diad anto ya inakusaan nen Zofar si Job?
21 Si Zofar so komatlon nansalita ed debati. Diad inkalapagan, say argumento to so mialaan ed samay argumento nen Elifaz tan Bildad. Inakusa nen Zofar si Job a marelmeng tan pinaseseg a tundaan to laray makasalanan a gawa to. (Job, kapitulo 11, 20) Kayari na duaran liber, tinmundan mansalita si Zofar. Anggapo la so niarum to ed komatlon liber. Anggaman ontan, legan na interon debati, sipapakpel ya inebatan nen Job iray manaakusa ed sikato. Singa bilang, diad sakey a punto et inkuanto: “Masegsegang kayo ya amin a managligliwa. Saray maapa a salita walaan ira na angaan?”—Job 16:2, 3.
Makapansungdo Itayo
22, 23. (a) Singa ed kaso nen Job, panon ya onkikiwas so Diablo pian panbanikelan a buyaken so integridad tayo ed si Jehova a Dios? (b) Anggaman nansungdo si Job ed nanduruman subok, anto so nitepet tayo no nipaakar ed awawey to?
22 Singa si Job, ompan sikatayo so nidunget ed masulok a sakey a subok a maminpinsan, tan nayarin usaren nen Satanas so pakadismayaan odino arum niran sengegan diad gunaet ton buyaken so integridad tayo. Nayarin salien to itayon pabenegen ya onsumpa ed si Jehova no walaan tayo na saray problema ed panagbilay. No inatey so sakey ya inad-aro odino nayarin walay liliknaen tayo, ompan sugsogan itayo nen Satanas a teteley Dios. Singa saray kaulop nen Job, ompan wala so lingon mangakusa ed sikatayo. Singa imbaga nen Brother Macmillan, nayarin sikatayo so ‘uusilan’ nen Satanas, balet makapansungdo tayo.
23 Singa ed naimatonan tayo anggad natan, sinungdoan nen Job so nanduruman subok ed sikato. Anggaman ontan, kasin sikato lambengat so nansungdo? Kasin sikato so talagan maralit ed espiritu? Nengnengen tayo no talagan abalang ya amin so ilalo nen Job.
Panon Yon Ebatan?
◻ Anton baleg a salisalan so pinalesa nen Satanas ed panaon nen Job?
◻ Diad anton paraan ya asubok si Job anggad kapantokan?
◻ Anto so angakusaan na taloran “kakaaro” ed si Job?
◻ Singa ed kaso nen Job, panon a sikatayoy nayarin suboken nen Satanas a deralen so integridad tayo ed si Jehova?
[Litrato ed pahina 10]
A. H. Macmillan