Tastasi nen Jehova ed Interon Mundo—Polandya
nen loglog na 1989, saray gobierno na Komunista manlapud Baltic ya anggad Black Sea so ginmapon akusbo. Legan a say Kortinan Balatyang so nagegeba, ginapoan na nasyones diad Mamabukig a Europa ya anapen so dilin direksyon da. Kabiangan na saraya et say Polandya, sakey a bansan napno na saray pukdol, palatas iran patar, tan kapalandeyan.a
Makukulin komikimey iray Polako, tan say Polandya so nanlapuan na pigara ed saray bantog a pintor tan sientista. Balet nilikud ni ed satan, wala natan so sakey ya ombabaleg ya armada na saray manangiyabawag na maong a balita na Panarian na Dios.
Makpel ed Panangiwalwal na Inkatila
Diad Polandya et dakel so malabay a makaaral ed katuaan manlapud Biblia. Balet say arum so aamperen na kakanayon odino kakaabay da. Alimbawa, diad kabangibang na Wroclaw, tinmunday sakey ya interesadon bii ed panagaral na Biblia ed Tastasi nen Jehova sanen sikatoy dinesdes na pamilya tan kakaaro to. Anggaman kuan, abasa na tinedyer ya anak ton bii so sakey a serye na saray artikulo ed Panag-Bantayan a mangiwawalwal ed palson relihyon. Saya so anagyat ed interes tod katuaan.
Kayari anem bulan na panagaral na Biblia, denisidi na sayan kalangweran a pakseten so amin a pisisiglaot to ed palson relihyon. Binisita to so klerigo na simbaan to pian ipaamtay desisyon to. Imbaga na klero ed sikaton isulat so onggendan: “Siak, K—— P——, so mangikakaindan ed Katolikon pananisia.”
Diad ontumbok a Simba, sayan balikas so binasa ed simbaan. Nalmay so laki na marikit, tan say bai to so inmakis. Anggaman ontan, arum ed saray mimimisa so mandinayew tan nankuan: “Diad kaunoran et wala so sakey a makpel a tuloy a mangibagan dakel so katilaan ed simbaaan tayo.” Sayan makpel a tinedyer so sakey lan bautismadon agi ed espiritual tan akapangigapo na pitoran panangiyaral na Biblia ed baryo to.
‘Diad Panamegley na Saray Bunga Ra’
Impalapag na sinimban Kujawy i Pomorze so report a “Nabidbiran Yora Diad Panamegley na Bunga Ra.” Diad sakey a kabiangan et inkuan na artikulo a saray managdayew ed Kakristianoan “diad kapetegan et agseryoson mangiyaaplika ed aaksobien daran relihyoson prinsipyo. Sikaray duman tuloy ed saray Tasi nen Jehova ya onkikiwas unong ed ibabaga ra, tan ibabaga ra no antoy igaganggan na Biblia.”
Kayarin impareng so pandumaan ed alagey na saray Tasi ed nominal iran Kristiano, intuloy na report: “Say saginonor so maseguron agmakaamta, tan mabetbet ya agmangiyaaplika, ed saray makanan katuaan tan prinsipyos ed pananisia ra. . . . Diad panamegley na awawey da, ipapatnag na Tastasi nen Jehova so pantunosan na saray salita tan kakikiwas da, diad ontan et papaneknekan a sikaray aliwan ‘palson profetas,’ imbes, sikaray nabidbiran diad panamegley na saray bunga ra. ‘Makaborbor ta’ray totoo na uvas ed saray espino, odino higos ed saray sabitan?’ (Mateo 7:15-20).”
Nansulat so sakey a bii ed sinimban magasin a Przyjaciółka, ya ibabalikas so ermen lapud impanaynan na anak ton laki ed Iglesia Katolika tan nagmaliw a sakey a Tasi nen Jehova. Anto so simbawa na editor? “No mililimog so anak yo ed Tastasi nen Jehova, naaralan tan inawat so pananisia ra, satan so nagnap a dilin desisyon to, a nepeg a bidbiren tan respetoen. . . . Kabkabat iyan relihyoson grupo diad panamegley na dakel a marakep tan kalkaliktan a kualidad ed sosyedad, a singa say makapakelkelaw a pankakasakey tan mabiskeg a panaaroan, inkamatua tan maapit ya itutumbok ed bibidbiren iran totontonen ed panagbilay diad komunidad, tan diad kaunoran et say abilidad a manbilay a mitunosan ed katuaan da, a susumpalen iray nipaparungtal ya estandarti. Saraya so importantin tuloy a kaabigan.”
[Paimano ed leksab]
a Parad kaaruman ya impormasyon, nengnengen so 1994 Calendar of Jehovah’s Witnesses.
[Kahon ed pahina 9]
SAY KIPAPASEN NA BANSA
1993 Serbisyon Taon
PANTOK A BILANG NA MANTATASI: 113,551
RATIO: 1 a Tasi ed kada 339
INMATENDI ED MEMORYAL: 235,642
PROMEDYON MANANGIPALAPAG A PAYUNIR: 7,961
PROMEDYON PANANGIYARAL NA BIBLIA: 79,131
BILANG NA ABAUTISMOAN: 8,164
BILANG NA SARAY KONGREGASYON: 1,397
SANGAN OPISINA: Nadarzyn
[Litrato ed pahina 9]
Sangan opisina ed Polandya diad Lodz nen 1948
[Litrato ed pahina 9]
Kimey diad panamegley na placard, Hunyo 1948, ed datin East Prussia
[Litrato ed pahina 9]
Pitomplo-tan-duan membro na Bethel ed Polandya, Enero 1993
[Litrato ed pahina 9]
Say balon sangan opisina ed Nadarzyn