Iner so Kawalaan na Inaatey?

“SAY dalin so sakey a tindaan; say tawen so ayaman tayo,” kuan na saray Yoruba na West Africa. Sayan ideya so niyaaniweng ed dakel a relihyon. Ipapatnag to so ideyan say dalin so singa sakey a tindaan a lalaen tayon magano tan insan taynanan. Unong ed sayan sisisiaen, diad patey et oonla itayo ed tawen, say peteg a panayaman tayo.

Talagan ibabangat na Biblia a say arum et onlad tawen. Imbaga nen Jesu-Kristo ed saray matoor ya apostol to: “Dia ed abung nen Amak walaray amayamay a panayaman; . . . onlaak a mangiparaan na pasen ya onkana’d sikayo. Et no onlaak tan mangiparaanak na pasen ya onkana’d sikayo, onlaak dia lamet, tan awaten ta kayo ed inkasiak; pian no iner so kawalaan ko, diman makapanayam kayo met.”​—Juan 14:2, 3.

Agkabaliksan na saray salita nen Jesus ya amin a maong a totoo so onlad tawen odino say tawen et ayaman na katooan. Arum so naala ed tawen lapud pananguley ed dalin. Amta nen Jehova a Dios a saray gobierno na too so agbalot ontalonan mangasikaso ed saray kurang ed dalin. Kanian, inyuksoy to so sakey a mangatatawen a gobierno, odino Panarian, a diad kaunoran et mangontrol ed dalin tan pagmaliwen to iyan Paraiso a ginagala to ed inmuna. (Mateo 6:9, 10) Si Jesus so magmaliw ya Ari ed Panarian na Dios. (Daniel 7:13, 14) Say arum so napili manlapud limog na sankatooan a miuley ed sikato. Impasakbay na Biblia a saramay naala ed tawen so magmaliw a “panarian tan sacerdote nipaakar ed Dios” tan “manari ra ed tapew na dalin.”​—Apocalipsis 5:10.

Siopa so Onlad Tawen?

No konsideraen so baleg a responsabilidad a niwala ed sarayan mangatatawen a manuley, agpankelawan a kaukolan dan nakapet iray mapeget a kakaukolanen. Saramay oonlad tawen so nepeg a nawalaan na suston pikakabat ed si Jehova tan sikatoy nepeg dan tuloken. (Juan 17:3; Roma 6:17, 18) Sikaray kakaukolanen a mangagamil na pananisia ed dondon bagat nen Jesu-Kristo. (Juan 3:16) Ingen, nagkalalo ni so nalalanor. Sikaray nepeg a natawag tan napili na Dios diad panamegley na Anak to. (2 Timoteo 1:9, 10; 1 Pedro 2:9) Nilikud ed saya, sikaray nepeg a bautismadon Kristiano a “nianak lamet,” tinagibi na masanton espiritu na Dios. (Juan 1:12, 13; 3:3-6) Kaukolan da met a pansiansiaen so integridad da ed Dios anggad patey.​—2 Timoteo 2:11-13; Apocalipsis 2:10.

Agnabilang a minilyon a totoon nambilay tan inatey so ag-akakapet ed sarayan kakaukolanen. Dakel so awalaan na daiset a pankanawnawan naaralan so nipaakar ed tuan Dios. Say arum met so agbalot akabasa ed Biblia odino akaamta na daiset odino antokaman nipaakar ed si Jesu-Kristo. Anggan diad limog na tuan Kristianos natan, daiset lambengat so apili na Dios parad mangatatawen a bilay.

Kanian, say bilang na saramay onlad tawen so dagdaiset. Tinukoy nen Jesus iratan bilang “melag a pulok.” (Lucas 12:32) Saginonor, imparungtal ed si apostol Juan a saramay “asaliw dia ed saray taga dalin” pian miuley ed si Kristo ed tawen so manbilang na 144,000 lambengat. (Apocalipsis 14:1, 3; 20:6) Sano ikumpara ed binilyon a totoon nambilay ed dalin, peteg a melag itan a bilang.

Saramay Ag-Onlad Tawen

Anto so nagawa ed saramay ag-onlad tawen? Kasin sikaray maniirap ed sakey a pasen na andi-anggaan a panamairap, a singa ibabangat na arum a relihyon? Andin balot, ta si Jehova so Dios na aro. Ag-ibubuntok na maaron atateng so ananak da ed apuy, tan agpaiirapen nen Jehova so totoo ed ontan a dalan.​—1 Juan 4:8.

Say ilalo parad kaslakan na saramay inatey la et say kioli ed mangaraldalin a paraiso. Ibabaga na Biblia a pinalsa nen Jehova so dalin ‘pian panayaman.’ (Isaias 45:18) Inyabawag na salmista: “Saray tawen, salanti saray katawenan, kien ira nen Jehova. Bangbalet say dalin inter to ed saray anak na totoo.” (Salmo 115:16) Say dalin, aliwan say tawen, so magmaliw a permanentin ayaman na katooan.

Impasakbay nen Jesus: “Onsabi horas, ya amin so saray wala ed saray lobok narengel da so voces to [salanti, si Jesus, say “Anak na too”]. Et onpaway ira.” (Juan 5:27-29) Pinekderan iya na Kristianon apostol a si Pablo: “Wala so ilalok ed Dios, . . . ya wala naani kioli ed bilay na saray matunong tan ag matunong.” (Gawa 24:15) Legan a walad panamairapan a kiew, insipan nen Jesus ed magbabawin managgawa na kaugsan so bilay diad panamegley na kioli ed sakey a mangaraldalin a paraiso.​—Lucas 23:43.

Anggaman ontan, anto so kaplesan a kipapasen na saray inatey a napaoli ed bilay ed dalin? Say sakey ya ebento ed ministeryo nen Jesus so ontutulong ed sikatayon ebatan iyan tepet. Say kaaro ton si Lazaro so inatey la. Sakbay a linma diman si Jesus pian paolien to, imbaga To’d saray babangatan To: “Si kaaro tayo’n Lazaro naugip; ingen onla ak, pian sikato so liingen ko ed ugip.” (Juan 11:11) Sirin, impareng nen Jesus so ipapatey ed ugip, sakey a maitlep ya ugip ya andian na saray kugip.

Nanaugip ed Patey

Mitunosan iray arum a kasulatan ed sayan kaisipan nipaakar ed pagmaliw a naugip ed patey. Ag-ibabangat na saraya a saray totoo so walaan na ag-ompatey a kamarerwa ya onaalis ed espiritun pasen diad oras na ipatey. Imbes, ibabaga na Biblia: “Saray inaatey agda amta so bengatla. . . . No panon so aro ra, ontan so gula ra tan siblet da, atawtaw ya abayag la; . . . angapo so gawa, no kanonotan, no pakaamta, no kakabatan, dia ed Sheol [say lubok], a laen mo.” (Eclesiastes 9:5, 6, 10) Nilikud ed saya, inyabawag na salmista a say too so “ompawil ed dalin to; dia ed satan lanlamang ya agew saray nonot to natawtaw ira.”​—Salmo 146:4.

Malinew ya ipapanengneng na sarayan kasulatan ya ag-itayo nanengneng odino narengel na saray nanaugip ed patey. Agda nayarian so mangitarok na bendisyon odino kalamidad. Anggapo ra ed tawen, nisay manaayam ira ed komunidad na saray inmunan atateng. Sikaray andiay bilay, anggapo.

Diad nigetar a panaon na Dios, saramay nanaugip natan ed patey tan saramay walad memorya to so bangonen ed bilay ed sakey a paraison dalin. Satan so magmaliw a sakey a dalin a nilinisan manlapud say polusyon, kaguloan, tan saray problema a sasagmaken natan na katooan. Agaylan makapagayagan panaon itan! Diad satan a Paraiso et nawalaan ira na ilalon manbilay ed ando lan ando, ta ipapaseguro ed sikatayo na Salmo 37:29: “Say matunong tawiren to so dalin tan manayam diman lawas.”

[Kahon ed pahina 6, 7]

INTUNDAK SO PANAGDAYEW ED SARAY INATEY

“Sanen siak so ugaw ni, tutulongan koy amak ed saray maparanay a panagbagat to ed inatey ya ama to. Aminsan sanen say amak so inmabig manlapud graben sakit, imbaga na orakulo ed sikato a kaukolan a mangiyatang na sakey a bagat a kanding, tugi, kola nut, tan alak ed inatey ya ama to bilang pisasalamat ed inyabig to. Sinimbawa met so Amak a mamaliket ed saray inatey ya inmunan atateng to pian naamper so kaaruman niran sakit tan kalamidad.

“Sinaliw nen inak iray nakakaukolan parad say bagat, a gawaen ed pantyon nen lakik. Say pantyon so walad abay lambengat na abung mi, unong ed abangonan diad lugar mi.

“Saray kakaaro, kakanayon, tan kakaabay so naimbitaan pian mangimaton ed bagat. Say amak, ya amisteng pian ontukoy ed okasyon, so akayurong ya akaarap ed altar a diman niaalasir so dakel a bungo na saray kanding ya inusar ed apalabas iran panagbagat. Siak so pinabtangan a mangibales na alak manlapud sakey a botilya diad sakey a melag a baso, ya inderew ko’d amak. Saman met so inkalbo to’d dalin bilang bagat. Insan, amitlon danay a tinawag nen amak so ngaran na ama to tan nampikasi’d sikato parad kalegyas manlapud kalamidad ed arapen.

“Inyatang iray kola nut, tan amakger na karnero, inluto, tan kinan na amin a wadman. Siak so akibiang ed panangan tan sinmayaw ed pankakanta tan ed tanol na saray tambol. Marakep so impansayaw nen amak tan tekep na biskeg, anggaman amta ton sikatoy maedad la. Insaletsalet ton impikasi iray inmunan atateng to a komon ta bendisyonan so amin a wadman, legan a saray totoo, pati siak la, so oneebat na Ise, a say kabaliksan to et ‘Ontan pa komon.’ Inimatonan koy amak tekep na aralem ya interes tan pandinayew tan pirawrawat ko so agew a siak so wala la’d suston edad pian makapanbagat ed inatey iran inmunan atateng.

“Anggaman dakel so niyatang a bagat, siansian anggapo so deen ed loob na pamilya. Anggaman taloray abilay ed ananak a lalaki nen inak, anggapoy anggan sakey ed taloran anak ton bibii so abayag a nambilay; amin so inatey ya ugaw ni. Sanen nanlukon lamet si inak, si amak so nanggawa na maarti iran panagbagat pian say ugaw so niyanak a maligen.

“Si inak so akapangiyanak na sananey nin bii. Duay taon ed saginonor say ugaw so nansakit tan inatey. Tinmupleg si amak ed orakulo, a nankuan a say kabusol so responsabli ed impatey. Inkuan na orakulo a pian makabales so ‘kamarerwa’ na ugaw, kaukolan a mangibagat na sakey ya itutungo, sakey a botilya na alak, tan sakey ya oken. Say itutungo so itapew ed pantyon, say alak so iwalsik ed pantyon, tan say oken so ikotkot a mabilay diad abay na pantyon. Gawaen iya pian bangonen so kamarerwa na inatey ya ugaw pian ibales so impatey to.

“Inawit ko ed pantyon so boti na alak tan say itutungo, tan inawit nen amak so oken, ya inkotkot to unong ed bilin na orakulo. Sisiaen min amin a diad loob na pitoran agew a pateyen na inatey ya ugaw so toon nansengegan na agnipanaon ya impatey to. Duay bulan so linmabas, tan anggapo so nireport ya inatey diad lugar mi. Siak so adismaya.

“Siak so 18 a taon ed saman. Ag-abayag kayari to et akabat koray Tasi nen Jehova, ya impanengneng da’d siak manlapud Kasulatan a saray inatey et agmakapanggawa na maong nisay mauges ed saray mabilay. Legan a nilalamot ed pusok so pikakabat nipaakar ed Salitay Dios, imbagak ed amak a sikatoy agko la nayarin ulopen ed saray bagat parad inaatey. Diad gapo et sikato so sinmanok ed siak lapud pinaulyanan ko, unong ed sikato. Balet sanen naimano ton agak mabulos a mangipulisay ed balon pananisiak, agto la sinumlang so panagdayew ko ed si Jehova.

“Nen Abril 18, 1948, insimbolok so dedikasyon ko diad bautismo ed danum. Nanlapulad saman, siak so nantultuloy a nanlingkor ed si Jehova tekep na baleg a gayaga tan inkapnek, a tutulongan so arum pian nibulos manlapud panagdayew ed inaatey ya inmunan atateng, ya agmakatulong nisay makapasakit ed sikatayo.”​—Insulat nen J. B. Omiegbe, Benin City, Nigeria.

[Litrato ed pahina 7]

Niwala so baleg a gayaga sano napaoli iray inatey ed sakey a paraison dalin